CIPANDE CA KUSAMBILILAMO 44
Twalililini Ukukomya Upaalilo Winu
“Mwataila muli Yawe! Mukwate upaalilo.”—MASA. 27:14.
LWIMBO NA. 144 Mwike Sana Mano pa Cilambu!
VINO TUMASAMBILILAPO *
1. Uupaalilo ci uno Yeova watupeela?
YEOVA watupeela upaalilo usuma sana uwa kuya nu umi wa pe. Yamwi yakapaalila ukwikala ukwi yulu wa viumbwa vya mupasi manda pe. (1 Kol. 15:50, 53) Nomba aingi yakapaalila ukwizaikala pano nsi manda pe nu umi umalilike nupya uwa nsansa. (Kuso. 21:3, 4) Upaalilo witu wacindama sana asi mulandu tukapaalila ukwikala ukwi yulu nanti pano nsi manda pe.
2. Uzye upaalilo witu wasintilila pali cani, nupya u mulandu ci uno twalandila vivyo?
2 Muli Baibo, izwi lyakuti “upaalilo” lingalondololwa ukuti “ukutaila ukuti ivintu visuma vilacitika.” Tungasininkizya ukuti vino tukapaalila uku nkoleelo vilafikiliziwa pano a Yeova uwatulaya. (Loma 15:13) Twamanya vino watulaya nupya twamanya nu kuti lyonsi akafikilizya vino walanda. (Mpe. 23:19) Twasininkizya ukuti Yeova akalondesya nupya wakwata amaka ya kufikilizya vyonsi vino walanda ukuti alacita. Fwandi upaalilo witu utasintilila pa vintu vya kwelenganya nanti vino tukalonda ukuti vikacitike, lelo wasintilila pa vintu vino twamanya ukuti i vya cumi cumi.
3. I vyani vino tumalandapo umu cipande cii? (Masamu 27:14)
3 Tata witu uwa kwi yulu watutemwa nupya akalonda ukuti twamutaila. (Belengini Masamu 27:14.) Ndi cakuti utailo witu muli Yeova ukome nupya twasininkizya ukuti vino tukapaalila vilafikiliziwa tulakwanisya ukuzizimizya nupya tulaya asipe nu kuya ni nsansa asi mulandu ni vingatucitikila. Lekini tulande pali vino upaalilo ungatucingilila. Tumatandikila ukulanda pali vino upaalilo witu waya wa nanga ni cisote. Lyene tumalanda vino tungakomya upaalilo witu.
UPAALILO WITU WAYA WA NANGA
4. Uzye upaalilo witu waya uli wa nanga? (Aebele 6:19)
4 Muli kalata ino umutumwa Paulo walembiile Aebele wakolinye upaalilo uku nanga. (Belengini Aebele 6:19.) Ilingi Paulo pa kuya kumwi wapitanga pali yemba, fwandi wamanyile ukuti inanga ikaomviwa uku kulenga uwato ukukanasendwa. Pa nsita imwi lino wakwezile uwato, kwakatwike icimuza iciipisye. Lino vivyo vyacitiike waweni kuno ya kapisya ya wato yakusumbila inanga umu manzi pakuti uwato utasendwa nu kuyapuma mu mawe aangaleta uzanzo. (Mili. 27:29, 39-41) Wakwe vino inanga ikalenga uwato ukukanasendwa, upaalilo witu ukatwazwa ukutwalilila ukupalama kuli Yeova pakuti tutatoovoka lino twakwata intazi izipisye. Upaalilo witu ukatwazwa ukuteeka umwenzo lyonsi lino twakwata intazi pa mulandu wakuti twataila ukuti vintu vilazipa uku nkoleelo. Iusyini ukuti Yesu watucelwile ukuti yalatucuzya. (Yoa. 15:20) Fwandi ukwelenganya sana pali vino Yeova watulaya kukatwazwa ukutwalilila ukumuombela.
5. Uzye upaalilo wakomelizye uli Yesu lino wali mupiipi nu kufwa?
5 Lolini vino upaalilo wavwile Yesu ukutwalilila ukuya uwa cisinka asi mulandu wamanyile ukuti wali nu kufwa imfwa iipisye. Pa Pentekositi 33 C.E., mutumwa Petulo wambwile amazwi aaya umu usesemo uwaya umwi buku lya Masamu aakalondolola vino Yesu wateesile umwenzo aakuti: “Ndatwalilila ukukutaila; pano utalansya umwi Lindi, nanti ukuzumilizya umuntu wako uwa cumi ukuti aole. . . . Ulalenga ukuti inje sana ni nsansa pa manso yako.” (Mili. 2:25-28; Masa. 16:8-11) Nanti cakuti Yesu wamanyile ukuti wali nu kufwa, wakweti upaalilo ukome uwakuti Leza wali nu kumutuutulula nupya wali ni nsansa pano wamanyile ukuti wali nu kuya pamwi na Isi nupya ukwi yulu.—Aeb. 12:2, 3.
6. I vyani vino umwina umwi walanzile pa upaalilo?
6 Upaalilo wazwa aina ingi na ya nkazi ukuzizimizya. Uvwini ivyacitikiile umwina Leonard Chinn uwali nu utailo uwikalanga uku England. Lino kwali Inkondo ya Nsi Yonsi Iya Kutandikilako, yamunyefile pa mulandu wakuti wakanyile ukwingila usilika. Pa myezi iili yamuyalile wenga, lyene izile iyatandika ukumupatikizya ukuomba imilimo ikome. Lino papisile insita walemvile ati: “Ivyancitikiile vyalenzile imanye vino ukuya nu upaalilo kwacindama pakuti tuzizimizye. Muli Baibo tukabelenga pa malayo aasuma sana alino ni vyacitikiile Yesu, atumwa na ya kasesema. Vyonsi vii vikalenga tukwate upaalilo usuma uwa ku nkoleelo nupya vikalenga twazizimizya.” Upaalilo wali wa nanga ku mwina Leonard, nupya ungaya vivyo kwene na kuli sweswe.
7. Uzye upaalilo ukakomelako uli nga twakwata intazi? (Loma 5:3-5; Yakobo 1:12)
7 Upaalilo ukakomelako nga twazizimizya lino twakwata intazi nu kulola vino Yeova akutwazwa nu kumanya ukuti watutemwa. (Belengini Loma 5:3-5; Yakobo 1:12.) Nga twacita vivyo upaalilo witu ukakoma sana ukucila vino ukaya lino twatandika sile ukusambilila Baibo. Satana akalonda ukuti intazi zyatutoovola nomba Yeova nga watwazwa tungazizimizya intazi zyonsi.
UPAALILO WITU WAYA WA CISOTE
8. Uzye upaalilo witu waya uli wa cisote? (1 Tesalonika 5:8)
8 Baibo ikakolanya upaalilo uku cisote. (Belengini 1 Tesalonika 5:8.) Musilika akazwala icisote pakuti acingilile umutwe wakwe. Lino tukulwisyanya na Satana, tulinzile ukucingilila amelenganyo itu kuli aliwe. Akaomvya ivintu ivipusanepusane pa kututuunka ukulaelenganya pa viipe. Wakwe viivi kwene vino icisote cikacingilila umutwe wa musilika, avino nu upaalilo ukacingilila amelenganyo itu pakuti tutwalilile ukuya acisinka kuli Yeova.
9. I vyani vikacitika ndi cakuti antu yatakweti upaalilo?
9 Upaalilo wa kwikala manda pe ulatwazwa ukuya na mano lino tukucita ivintu alino nu kwiluka. Nomba ndi cakuti utailo witu watonta icakuti twatandika ukwelenganya pali vino tukulonda sweineco, tungatandika ukwilila pa upaalilo uno twakwata uwa kwikala manda pe uku nkoleelo. Elenganyini pali vino vyacitikiile Aina Klistu yamwi amu Kolinto. Yatiile ukutaila umu ulayo ucindame uno Leza wayalavile kuli kuti upaalilo wa kutuutuluka. (1 Kol. 15:12) Paulo walemvile ukuti yayo aatazumila ukuti kulaya ukutuutuluka, yakaika sile mano kuli vino aineco yakulonda. (1 Kol. 15:32) Ndakai aingi aatazumila umu malayo yano Leza watulaya yakaezya papezile maka yao ukucita ivintu ivingalenga yaye ni nsansa ndakai. Nomba swemo twapusanako pa mulandu wakuti twataila malayo yano Leza watulaya aaku nkoleelo. Upaalilo waya wa cisote, ukacingilila amelenganyo itu nupya ukatwazwa ukukanaelenganya sile pa vintu vino tukulonda ivingonona ucuza witu na Yeova.—1 Kol. 15:33, 34.
10. Uzye upaalilo ungatucingilila uli uku kwelenganya pa vintu ivitange vicitike?
10 Nupya upaalilo ungatucingilila uku melenganyo yakuti nanti tungezya uli tutange tuzanzye Yeova. Yamwi yakaelenganya ukuti: ‘Ntalatala inje pa yantu aalikala manda pe. Ntalinga ukuya nu umi wa pe. Ntanga nkwanisye ukulacita vino Leza akalonda ukuti nacita.’ Iusyini ukuti vikwene avino kasansamusya wa ufi Elifazi wanenyile Yobo. Elifazi watiile: “Uzye kungaya akacita vyaololoke lyonsi kuno ali?” Nupya walanzile pali Leza ukuti: “Ala mwine Yobo, Leza atataila angeli yakwe, nanti akwiyulu kwene, pano nayo kwene yataya amalilike foo.” (Yobo 15:14, 15) Uu onsi uufi. Mwaiusya ukuti Satana aliwe akalonda twaelenganya ivya musango uwo. Wamanya ukuti nga twatandika ukwelenganya mu nzila iyo, tungata ukuya nu upaalilo. Fwandi tulinzile ukukana ufi wa musango uwo nu kwika mano kuli vino Yeova watulaya. Mutalinzile ukulatwisika ukuti Yeova akalonda mukikale manda pe nupya alamwazwa ukucita vivyo.—1 Tim. 2:3, 4.
TWALILINI UKUYA NU UPAALILO UKOME
11. U mulandu ci uno tulinzile ukuyela ateekele lino tukulolela ivintu vino tukapaalila ukufikiliziwa?
11 Asi lyonsi lino cikaanguka ukuya nu upaalilo ukome. Limwi tungatoonta ukuloleela Leza ukufikilizya malayo yakwe. Nomba pa mulandu wakuti Yeova wayako lyonsi, vino tukalola ivintu vyapusana na vino wene akalola. (2 Pet. 3:8, 9) Alacita vyonsi vino watulaya pa nsita ilinge nomba atange acite vivyo pa nsita ino tukwenekela. I vyani vingatwazwa ukukomya upaalilo witu lino tukuloleela ukuti Leza afikilizye malayo yakwe?—Yako. 5:7, 8.
12. Ukulingana na Aebele 11:1, 6, uzye upaalilo walemana uli nu utailo?
12 Tungakomya upaalilo witu ndi cakuti tukupalama kuli Yeova wiyo aalalenga vyonsi vino tukapaalila ukufikiliziwa. Pakuti tukwate upaalilo, tulinzile ukuzumila ukuti Yeova akuno waya nu kuti “akalambula yayo aakamulondesya.” (Belengini Aebele 11:1, 6.) Ndi cakuti twazumila ukuti Yeova akuno waya, tulasininkizya ukuti alafikilizya vyonsi vino watulaya. Lekini tulande pali vyuze vino tungacita pa kukomya ucuza witu na Yeova nu kutwalilila ukuya nu upaalilo ukome.
Ipepo nu kwelenganyapo vilatwazwa ukuya nu upaalilo ukome (Lolini mapalaglafu 13-15) *
13. Tungacita uli pakuti tupalame kuli Leza?
13 Tulinzile ukupepa kuli Yeova nu kubelenga Izwi lyakwe. Nanti cakuti tutange tulole Yeova, tungapalama kuli aliwe. Tungapepa kuli aliwe nu kutaila ukuti amakutika. (Yele. 29:11, 12) Tungakutika kuli Leza ndi cakuti tukubelenga Izwi lyakwe nu kwelenganyapo. Nga tukubelenga pali vino Yeova wasakamalanga aomvi yakwe aali na ucisinka uku cisila, upaalilo witu ulakomelako. Vyonsi ivyaya umwi Izwi Lyakwe Leza “vyalemvilwe uku kutusambilizya, pakuti ukupitila umu kuzizimizya nu mu kuteekeziwa ukukafuma umu Malembo tuye nu upaalilo.”—Loma 15:4.
14. U mulandu ci uno tulinzile ukwelenganyizizya pali vino Yeova wacitila antu yauze?
14 Mwaelenganya pa malayo yano Yeova wafikilizya mpiti. Elenganyini pali vino Yeova wacitiile Abulahamu na Sala. Yakosile sana icakuti yatange yakwate nu mwana. Lelo Leza wayalavile ukuti yali nu kukwata umwana. (Utan. 18:10) I vyani vino Abulahamu wacisile lino yamulavile ukuti wali nu kukwata umwana? Baibo ikati: “Wali nu upaalilo nupya wataile ukuti angaya isi wa nko izingi.” (Loma 4:18) Nanti cakuti Abulahamu atamanyile vino ulayo uu wali nu kufikiliziwa, wataile ukuti ulayo uu wali nu kufikiliziwa. Nu mu cumi wafikiliziwe. (Loma 4:19-21) Malyasi ya musango uu yakatusambilizya ukuti lyonsi Yeova akafikilizya malayo yakwe, asi mulandu tukulola ukuti vitanga vicitike.
15. U mulandu ci uno tulinzile ukulaelenganyizizya pali vino Leza watucitila?
15 Mwaelenganya pali vino Yeova wamucitila. Elenganyini pa visuma vimwi ivyamucitikila pa mulandu wakuti malayo yamwi aamuli Baibo yafikiliziwa. Wakwe, Yesu watulaya ukuti Isi alatupeela vino tukalondekwa umu umi. (Mate. 6:32, 33) Yesu nupya watunena ukuti Yeova alatupeela umupasi wa muzilo ndi cakuti twamulenga. (Luka 11:13) Yeova akafikilizya malayo yaa. Limwi mungelenganyako na pa malayo yauze yano wafikilizya umu umi winu. Wakwe, wamulaya ukuti alamweleela, ukumuteekezya alino nu kumupeela ivikalondekwa pakuti mupalame sana kuli aliwe. (Mate. 6:14; 24:45; 2 Kol. 1:3) Ndi cakuti mukwelenganya pali vino Yeova wamucitila mulakomya upaalilo winu pali vino alamucitila uku nkoleelo.
MWAZANGILA PALI VINO MULAPOKEELELA UKU NKOLEELO
16. U mulandu ci uno upaalilo wayela uupe ucindame?
16 Upaalilo wa kwikala manda pe, uupe ucindame ukufuma kuli Leza. Tukalonda ukwizaikala umi usuma sana uno twasininkizya ukuti umu cumi Leza alatupeela. Upaalilo witu uwaya wa nanga ukutwazwa ukuzizimizya intazi, ukuzizimizya lino yakutucuzya nu kutwalilila ukuya ni nsansa na lino tuli umupiipi nu kufwa. Nupya waya wa cisote pano ukatucingilila uku melenganyo aipe nu kutwavwa ukucita ivyololoke. Upaalilo uno Baibo ikalandapo ukatwazwa ukumanya ningo Leza nu kutulanga vino watutemwa. Ivintu vikatuzipila ndi cakuti twatwalilila ukuya nu upaalilo ukome.
17. U mulandu ci uno upaalilo ukulenga twazanga?
17 Lino Paulo walembelanga Aina Loma kalata, wayakomelizye ukuti: “Mwazangila muli vino mulapokelela uku nkoleelo.” (Loma 12:12) Paulo wali nu luzango pa mulandu wakuti wasininkizye ukuti ndi cakuti watwalilila ukuya uwa cisinka, alaya nu umi wa pe ukwi yulu. Naswe kwene tungazangila muli vino tulapokelela uku nkoleelo pano twasininkizya ukuti Yeova alafikilizya vino watulaya. Kalemba wa masamu walemvile ati: “Aansansa antu . . . yano yakapaalila muli Yawe Leza wao, . . . akafikilizya amalayo yakwe pe.”—Masa. 146:5, 6.
LWIMBO NA. 139 Mwaelenganya Ukuti Muli Umu Nsi Ipya
^ Yeova watupeela upaalilo usuma uwa ku nkoleelo. Upaalilo uwo ukatukomelezya nu kutwazwa ukukanaika amano pa ntazi zino tukakwata ndakai. Ukatupeela amaka pakuti tutwalilile ukuombela Yeova asi mulandu ni ntazi zino tukakwata. Nupya ungatucingilila uku kwelenganya pa viipe ivingonona imyelenganyizizye itu. Wakwe vino tumasambilila umu cipande cii, vyonsi vii vingalenga tutwalilile ukukomya upaalilo witu.
^ ULONDOLOZI WA CIKOPE: Wakwe viivi kwene vino icisote cikacingilila umutwe wa musilika na vino inanga ikalenga uwato ukukanasendwa, avino nu upaalilo ukacingilila amelenganyo itu nu kutwazwa ukuzizimizya lino twakwata intazi. Nkazi akupepa kuli Yeova. Umwina akwelenganya vino Leza wafikilizye malayo yakwe kuli Abulahamu. Umwina muze akwelenganya pali vino wapaalwa.
