TUTI mukupita mu nzila usiku. Nomba nanti kusi luswepo, musikwelenganya pa kuponga pano mukweti tooci iya maka sana. Nga mwakozya apansi, mungalola ningo sana pano mukulyata. Lyene nga mwakozya uku nkoleelo, nako kwene mungalola ningo kufika patali sana.

Tungati Baibo yakolanako na tooci. Ndi vino tulanzilepo mpiti umu vipande ivyafumako, Izwi Lyakwe Leza lingamwazwa ukumanya ivya kucita pa ntazi zya cila wanda izyaya mu nsi yii iitale. Aasi cico conga sile. Ingamwazwa nu kumanya vino uku nkoleelo kulaya nu kumwazwa ukumanya vino mungacita pakuti muce mwikale ningo. (Masamu 119:105) Ingamwazwa uli?

Katulande pa nzila ziili muno Baibo ingamwazwa kuti mwapaalila ivisuma uku nkoleelo: 1 Ikatwazwa ukumanya vino tufwile ukwikala, alino na 2 ikatusambilizya vino tungaya ya cuza yakwe Kaumba witu.

Baibo ingamupanda amano pali vino mungacita nga mwakwata intazi, nomba tusikuti ikoline na mabuku yano antu yakaomvya pa kuisambilizya vimwi, awe. Baibo yene isitukomelezya ukuya ya kaitemwe, lelo ikatusambilizya ukuti tufwile twaelenganya na pa yantu yauze. Nga tukucita vivyo alino tungaikala ningo.

Uvwini ivyeo vii ivingatwazwa ivyaya muli Baibo, ivikaati: “Mukupeela mwaya upolelelo ukulu cuze kuluta mukupokelela!” (Milimo 20:35) Uzye mukwiusya ivyacitike lino mwavwilizyeko umwi? Limwi mwaipeelisye ukumukutika sana lino wamulondolwelanga ivyali ku mwenzo. Uzye mutuuvwile ningo sana pa kwazwa umuntu wiyo ukuya nu luzango nupya?

Nga mukulonda ukuya ni nsansa ukuluta, mwapeela uwila ukwaula ukwenekela cimwi kuli wino  mwapeela. Kalemba wa mpapulo umwi watiile: “Umuntu ndi waipeelesya ukwazwa umwi angapokelela ivingi ukuluta—cikulu sile ataelenganya pa kulambulwa pali vino waipeelesya.” Nomba nga twaipeelesya ukwazwa umwi, sana sana umuntu aatakweti ni vya kutuwezezya, tukalambulwa. Tutalaelenganya sile pali sweineco, tulaelenganya na pa yantu yauze. Tulamanya nu kuti tukuombela pamwi na Kaumba witu, uwaati nga twaombela antu yauze ivisuma ala twamukongwesya. (Mapinda 19:17) Wacindika sana vino tukacitila alanda, nupya walaya ukuti alatulambula pali vino tukaomba, lino alatupeela umi wa muyayaya mu paladaise pano kwene apa mpanga ya pansi.—Masamu 37:29; Luka 14:12-14. *

Ni cikalamba cino tungasambilila muli Baibo i cakuti tungaya ni nsansa sana nga tukupepa Yeova Leza wa cumi. Izwi Lyakwe likatukomelezya ukuti tulinzile twamulumbanya, nu kumucindika alino nu kumuyeela. (Kasambilizya 12:13; Umbwilo 4:11) Nga tukucita vivyo, tungazunguka pali vino walanda ukuti ali vino cingaya: Kaumba wati alazanga cuze. Leza watunena wati: “Uye na mano, pakuti uzanzye umwenzo wane.” (Mapinda 27:11) Uzye muvwa ivingacitika? Nga tukupingula ningo pa vintu kulingana ni vyalembwa muli Baibo, Tata witu uwa kwi yulu wino watutemwa alazanga cuze. U mulandu ci? Pano watusakamala nupya akalonda twaikala ningo kulingana na masunde yakwe. (Ezaya 48:17, 18) Uzye vwilini mungati kuli icingacila pa kupepa Kateeka wa maka yonsi nu kwikala ukulingana ni vikamuzanzya?

Baibo ikatusambilizya nu kuti tungaya ya cuza yakwe Kaumba witu. Malembelo yakati: “Mupalame kuli Leza, nga nawe amapalama kunomuli.” (Yakobo 4:8) Insita zimwi tungatwisika tuti tutanga tuye ya cuza yakwe Kaumba uwa maka yonsi. Nomba Baibo yene yatuneena yati ‘twalonda Leza,’ nupya ‘tulamuzana,’ pano ‘Leza ataaya kutali naswe.’ (Milimo 17:27) Vino Baibo yatuneena ukuti tuye ya cuza yakwe Leza vingatwazwa sana uku nkoleelo. Vingatwazwa uli?

Tale elenganyini: Swe yantunze, nanti tungezya tutuuli, tutanga tucimvye umulwani witu umukalamba, kuli kuti imfwa. (1 Kolinto 15:26) Nomba Leza wene u wa muyayaya. Atalatala afwe nupya akalonda ya cuza yakwe ukuti nayo yakiikale amanda pe. Baibo yalanda umu mazwi sile anono lelo aasuma wakwe cimwi pali vino Yeova akalonda uku yantu yakwe, yaati: “Si angala yaye nu umi amanda pe.”—Masamu 22:26, NWT.

Mungacita uli pakuti muye ya cuza yakwe Leza amanda pe? Mutwalilile ukusambilila pali aliwe umwi Zwi lyakwe, Baibo. (Yoane 17:3; 2 Timoti 3:16) Mwamulenga kuti mwauvwikisya Malembelo. Baibo yatunena yati nga tukulenga Leza ukuti atupeele amano, atalatwima foo. * (Yakobo 1:5) Ni ca kusyalikizya cino mungacita, u kulalondela vino mukusambilila pakuti Izwi Lyakwe Leza liye wi ‘lampi ilya kumutungulula, nupya wa luswepo lwa kukozezya inzila zinu’ ndakai alino na manda pe.—Masamu 119:105.