Ya Delphine atiyalumbulwa umu cipande icifumileko, yayuvwanga ukuti amasakamika yayalenzile ukutandika ukumwa sana uwengwa. Baibo isilanda ukuti ukumwa uwengwa umu kuliinga kwaipa, lelo ikati: “Utapita pamwi na akolesi.” (Mapinda 23:20) Ukumwesya uwengwa kukaleta malwala aipisye, ukuta ukuuvwana na antu yauze, nupya antu aingi cuze yakafwa zuwa cila mwaka. Antu aingi yangasenka uku ntazi zii zyonsi ndi yakulondela amano aaya muli Baibo.

Ya Delphine yasenwike. Yalanzile ukuti: “Nilwike ukuti ukumwa sana uwengwa kutamalanga masakamika yano nakweti. Naomvizye amano aaya pali Filipi 4:6, 7, apakati: ‘Mutasakamikwa pa cintu cili consi, lelo pepini pa mulandu wa vintu vyonsi.’ Lyonsi usiku ndi natandika ukusakamikwa, napepanga kuli Yeova. Namunenanga vyonsi, ukwikako sile ni vya nsosyanga, ivya nguvwisyanga uyi, nupya napapatanga ukuti angazwe ukuzana inzila zya kwelenganyizizya pa vintu ivisuma. Ndi waca katondo, nasininkizyanga ukuti natinta ukusakamikwa pali vino vyandetelanga ulanda. Kupepa lyonsi kwangazwanga ukwika mano pali vino nakweti ukucila ukwika mano kuli vino ntakweti. Napingwilepo ukuti ntalatala imwepo uwengwa nupya. Umutende uno nizile nkwata wazifile sana, ntalondanga ukuti mponzye umutende uwo.”

Kutaya intazi ikaleta sana ulanda nu kusakamika umuntu wakwe ii. Nomba ivisinte vya muli Baibo vingatwazwa ukusenka uku ntazi ii ndi twatandikilapo ukusenka uku vintu ivikatungulula uku kucita upulumusi, wakwe, ukulanga icintemwa icitalinzile alino nu kutamba ivikope vya uzelele. Umulumendo uwi zina lyakuti Samuel watiile: “Cangupiile sana ukulanga icintemwa. Insita zimwi nangu ntakumvilwe umukazyana, nomba nalola ukuti watantemwa, nalondesya ukulanga icintemwa caufi.” Samuel wazanyile ukuti ilingi yamupeelanga umulandu wa kulanga icintemwa ca ufi, na lino umwine ala asikulonda ukucita vivyo, fwandi calenzile ukuti apingulepo ukulalanga icintemwa caufi uku mufulo sile. Nomba kucita vii kwatandike ukumusakamika. Walanzile ati: “Vino nacitanga vitazifile, pano vyalenzile inje na ukaitemwe.”

Samuel wawelenzile icipande ica yalumendo na akazyana pa webusaiti iya pa jw.org. Nupya welenginye pali Mapinda 20:11, apakati: “Nanti sile apa kucina kwene, umwance [nanti umulumendo] akatala alanga ndi cakuti ivicitwa vyakwe vilazipa nanti vilalondoloka.” Uzye vii vyamwazwilizye uli? Samuel wilwike ukuti ukulanga icintemwa caufi kutali ukulondoloke nupya kutaazifile foo. Walanzile ukuti: “Nasambilile nu kuti umulumendo aakalanga icintemwa caufi akakwata imiyele ikalenga ukuti uku nkoleelo ace aye iya umwipe. Natandike ukwelenganya pali vino mama wino ndatwala angayuvwa ndi wambweni nkulanga icintemwa kuli mama muze. Cii calenzile niluke ukuti iciyelezyo cii citaazifile. Nanti icakuti citatala ukulanga icintemwa, cisisenula ukuti caya sile ningo.” Samuel wasenwike. Ukusenka uku ciyelezyo ca kulanga icintemwa caufi kwalenga Samuel ukusenka nu ku upulumusi kwene.

Ya Antonio yene yali umu ntazi ikulu sana iya kuyalenga ukucita upulumusi. Yateesilwe uzya uku kutamba ivikope vya uzelele. Nanti icakuti yatwazile mama wino yatemilwe sana, yaizananga sile ukuti yakuswilizya swilizyapo ukutamba. Yalanzile ukuti ukwelenganya pali 1 Petulo 5:8 kwayazwilizye sana. Paya amazwi akuti: “Mwatekela nu kupempula! Ciwa, mwanisi winu akululumba nu kung’anza wakwe cisama wino akulunga umwi uwakuti alye.” Ya Antonio yalanzile ukuti: “Ivikope vya uzelele vyaya mpanga yonsi, nupya ivikope vivyo vikaikalilila umu melenganyo. Icikomo cii cangazwilizye ukwelenganya sana pali wino akaleta amezyo kwene yaa. Nilwike zuwa ukuti ivikope vivyo ivya uzelele vikafuma kuli Satana. Lyene namanya ukuti Yeova angangazwa ‘ukuya umuteekele nupya umupempule’ pakuti ndwisye ukuzanza kuu ukwa mumelenganyo, umu mwenzo wane, alino nu mu cupo cane.” Ya Antonio yazanyile uwazwilizyo uno yalondekwanga, nupya yasusile yata iciyelezyo ciipe. Nupya cii cayazwa ukusenka uku ntazi izipisye.

I cumicumi Baibo ikatupeela ukupanda mano ukungatwazwa ukusenka uku ntazi izingi. Nomba, nga ndi cakuti intazi zyakula mpiti nupya zyatwalilila? Lekini tulole vino Izwi Lyakwe Leza lingatwazwa ukumala intazi zizyo.