1. Uzye imilimo yakwe Leza ikaombwa uli ukufuma pa kutandika?

YEOVA na Yesu yakaombela pamwi ukufuma sile na pa kutandika. Yeova watandikilepo ukuumba Yesu lino atatala waumba ivintu vyonsi ivyayako. Lyene Yesu watandike ukuombela pamwi na Yeova nupya wali a “ciinda wa milimo.” (Mapinda 8:30) Antu yakwe Yeova aaliko mpiti nayo yaombelanga pamwi. Nowa nu lupwa lwakwe yakuuzile iciwato. Lyene lino papisile imyaka iingi, aina Izlaeli yakuuzile itenti lya kupepelamo, yalisambululanga nu kulisenda uku ncende izipusane pusane. Antu yakwe Leza, iimbanga inyimbo izisuma cuze nu kulizya ivilimba capamwi ala yakulumbanya Yeova apa ng’anda ya kupepelapo. Antu yakwe Yeova yacitanga vyonsi vii pa mulandu wakuti yaombelanga pamwi.—Utandiko 6:14-16, 22; Mpendwa 4:4-32; 1 Milandu 25:1-8.

2. (a) I cintu ci icisuma sana icacitikanga umu cilongano ca Ina Klistu ya kutandikilako? (b) A mauzyo ci yano tumaasuka?

 ² Aina Klistu yakutandikilapo nayo yaombelanga pamwi. Umutumwa Paulo walanzile ukuti nanti icakuti yaombanga imilimo ipusane pusane nupya yataalingine maka, yaombelanga pamwi. Yonsi yalondelanga Intunguluzi yao Yesu Klistu. Paulo wakolinye Aina Klistu uku mwili uwaya ni vilundwa vipusane pusane ivikaombela pamwi. (Welengini 1 Kolinto 12:4-6, 12.) Nga swemo ndakai? Uzye tungacita uli pakuti twaombela pamwi umu mulimo wa kusimikila, umu cilongano, alino nu mulupwa?

3. Uzye umutumwa Yoane waweni icilolwa ca musango ci?

³ Umu nsita ya Ina Klistu ya kutandikilako, umutumwa Yoane waweni angeli umu cilolwa ala yakulizya mapenga. Lino umungeli walenga yasano walizizye ipenga, Yoane waweni “ulutanda lwapona ukufuma ukwiyulu kuya pansi.” “Ulutanda” luulo lwaomvizye imfungulo ukuyula icisaasa ca mu ciwina umwafiita fititi. Icakutandikilapo, icunsi cafumile umu ciwina, lyene makanta apapuka ukufuma umu cunsi. Makanta wiyo atononyile imiti nanti vimelwa, lelo wazanzile yaayo ‘aataakweti cimanyililo cakwe Leza pa mausyu yao.’ (Umbwilo 9:1-4) Yoane wamanyile ukuti makanta akaonona sana ivimelwa; ononyile sana ivintu umu Eguputo umu nsita yakwe Mose. (Kufuma 10:12-15) Makanta wino Yoane waweni akaimilikako Aina Klistu apakwe aakasimikila ilandwe lya maka sana uku yantu aaya umu mipepele ya ufi. Nupya antu na yauze aaya nu upalilo wa kwiza ikala pano nsi nayo yakaombela pamwi na apakwe. Yonsi yakaombela capamwi umu mulimo kwene uu uwa kusimikila. Umulimo uu walenga ukuti antu aingi yafume umu mipepele ya ufi nu kufuma umu uzya wa kutungululwa na Satana.

4. Uzye u mulimo ci ukulu cuze uno antu yakwe Yeova yakwata ndakai, nupya yangacita uli pakuti yauombe ningo?

⁴ Twakwata umulimo wa kusimikila “ilandwe lisuma” uku yantu yonsi umu nsi lino impelelekezyo itali ize. Umulimo uu ukulu cuze! (Mateo 24:14; 28:19, 20) Tulinzile ukwama yonsi aaya nu “lusala” lwa “manzi yano yakapeela umi,” kulikuti tulinzile ukusambilizya yonsi angatemwa ukusambilila icumi icaya muli Baibo. (Umbwilo 22:17) Nomba tungacita sile vivyo ndi cakuti ‘tukuombela pamwi’ alino nu kuvwana na Ina Klistu yanji umu vilongano vino twayamo.—Efeso 4:16.

5, 6. Uzye umulimo wa kusimikila ukwatwazwa uli ukuvwana?

⁵ Pakuti tusimikile antu aingi, tulinzile ukuomba ningo umulimo wa kusimikila. Vino yakatunena ukucita umu vilongano  vino twayamo vikatwazwa ukuti twaomba ningo. Pacisila ca kukomaana kwa kuya umu mulimo wa kusimikila, tukaaya umu kulanzyanya na antu api landwe lisuma ilya Wene. Tukapeela na antu impapulo izikalaanda pali Baibo. Twapeela antu aingi sana umu nsi yonsi impapulo zii. Insita zimwi yakatunena ukuomba ama kampeni aiyele umu mulimo wa kusimikila. Ndi mukaombako umulimo uu, mukaombela pamwi na ina inu umu nsi yonsi aakakosola ilandwe kwene lii! Nupya mukaombela pamwi na angeli aakaazwilizya antu yakwe Leza umu mulimo wa kusimikila ilandwe lisuma.—Umbwilo 14:6.

⁶ Cikatuzanzya sana ukuwelenga umwi buku lyakuti Ilyashi lya Nte sha kwa Yehova pa mulimo wa kusimikila uukaombwa umu nsi yonsi! Elenganyini na pali vino tukaombela pamwi umu nsi yonsi lino tukwama antu uku kulongana kwa Citungu. Ndi twazanwa pa ukongano wa citungu, swensi tukasambilila ivyeo ivilivimwi. Amalyasi aakalandwa, ivyangalo ivikayako, alino ni vilangililo, vyonsi vii vikatwazwa ukuti twaombela ningo Yeova. Nupya tukalanga ukuti twalemana na ina itu na yankazi umu nsi yonsi ndi tukuzanwa uku Ciusyo cila mwaka. (1 Kolinto 11:23-26) Tukakomaana apa wanda onga cila mwaka, pa Nisani 14, lino ilanzi lyawa pakuti tulange ukuti tukataizya pali vino Yeova watucitila nupya tukauvwila isunde lino Yesu watupeela. Nupya ndi kwasyala imilungu inono ukuti kuye Iciusyo, tukaombela pamwi ukwama antu aingi kuti yakize yakalongane capamwi naswe uku kulongana kuu ukucindame.

7. Uzye ukuombela pamwi kukatwazwa uli?

⁷ Makanta wenga atangaonone sana ivimelwa. Naswe kwene cila muntu pa lwitu tutanga tusimikile antu yonsi umu nsi. Pa mulandu wa kuti tukaombela pamwi, tukasimikila antu aingi cuze pali Yeova alino nu kwazwa yamwi ukutandika ukumulumbanya nu kumucindika.

8, 9. (a) Icilangililo ci cino Paulo waomvizye pa kwazwa Aina Klistu ukuvwana? (b) Uzye tungacita uli pakuti twaombela capamwi umu cilongano?

⁸ Paulo walondolwelile aina Efeso vino icilongano capekanyiziwa, nupya walanzile ukuti yonsi umu cilongano yalinzile “kukula umumisango yonsi.” (Welengini Efeso 4:15, 16.) Paulo waomvizye icilangililo ca mwili pa kulondolola ukuti Umwina Klistu wenga na wenga angazwilizyako ukuti amu cilongano yaombela pamwi alino nu kulondela Yesu, Intunguluzi ya cilongano. Walanzile ukuti “cilundwa consi ca mwili caomba mu ufumaluke.” Fwandi ndi cakuti sweswe yance nanti akalamba, umi witu usuma nanti foo, i vyani vino tungacita?

⁹ Yesu wasonta ya eluda ukuti aliyo yatungulula umu cilongano, nupya akaalonda ukuti twayacindika nu kuvwila vino yakutunena. (Ayebulai 13:7, 17) Citangupala ukuvwila  ya eluda lyonsi. Nomba tungapepa kuli Yeova ukuti atwazwe. Umupasi wakwe uwa muzilo ungatwazwa ukuti twauvwila vino ya eluda yakutunena. Elenganyini pali vino ivintu vingazipa umu cilongano ndi cakuti twaya aicefye nu kuombela pamwi na ya eluda. Ndi cakuti tukuuvwila ya eluda, tulaombela pamwi umu cilongano nupya tulaatemwana sana.

10. I vyani vino aomvi yakacita pakuti yavwe amu cilongano ukulaombela pamwi? (Lolini cikope cakutandikilako.)

¹⁰ Aomvi nayo yakaazwilizya ukuti amu cilongano yaombela pamwi. Yakaombesya sana lino yakwazwa ya eluda, nupya tukataizya sana pa milimo yonsi ino yakaomba. Aomvi yakasininkizya ukuti itukwata impapulo izikulondekwa izya kuomvya umu mulimo wa kusimikila nupya yakapokelela aenyi aakaiza umu kulongana capamwi naswe. Nupya yakaombesya ukuzifya ing’anda ya Wene ndi vimwi vyononeka alino nu kulenga ukuti iye iyausaka. Tukaombela pamwi na ina yaa nu kuombela ningo Yeova.—Loliniko na Milimo 6:3-6.

11. I vyani vino ancance yangacita pakuti yazwe amu cilongano ukulaombela pamwi?

¹¹ Ya eluda yamwi yaombela sana Yeova umu vilongano pa myaka ingi. Limwi ndakai yatanga yaombesya wakwe vino yaombanga mpiti pano yatiyakota. Aina yacance yangaazwilizyako ya eluda ya musango uwo. Ndi cakuti yasambiliziwa ningo, yangaomba imilimo ingi umu cilongano. Nupya ndi cakuti aomvi yakuombesya, yangiza yaye ya eluda uku nkoleelo. (1 Timoti 3:1, 10) Ya eluda yamwi acance yalunduluka sana. Yakaomba umulimo wa kutandalila ivilongano nu kwazwa aina na ya nkazi umu vilongano. Tukataizya aina acance aakaitemelwa  ukuombela aina na ya nkazi umu cilongano.—Welengini Masamu 110:3; Kasambilizya 12:1.

12, 13. I cani icingazwa amu lupwa yonsi ukuti yaombela capamwi?

¹² Uzye tungazwilizya uli amu lupwa ukuti yaombela pamwi? Ukupepa kwa lupwa ukwa cila mulungu kungatwazwa. Ndi cakuti avyazi na ana yao yakusambilila pali Yeova capamwi, yakatandika ukutemwana sana. Pa nsita ya kupepa kwa lupwa, yangapituluka umu vyeo vino yalaomvya umu mulimo wa kusimikila, pakuti yonsi yaipekanye ningo. Ndi cakuti mukulanzyanya pa cumi icaya muli Baibo nu kulola vino yonsi umu lupwa yatemwa Yeova na vino yakalondesya ukuti yamuzanzya, mulatandika ukuvwana sana.

¹³ Uzye ya iya na aci yangacita uli pakuti yaombela pamwi. (Mateo 19:6) Ndi cakuti yonsi yatemwa sana Yeova nu kumuombela, yakaya sana ni nsansa alino nu kuombela capamwi. Yalinzile nu kutemwana sana, wakwe vino cali kuli Sala na Abulaamu,  Isaki na Labeka, alino na Elikana na Hana. (Utandiko 26:8; 1 Samueli 1:5, 8; 1 Petulo 3:5, 6) Ndi cakuti ya iya na aci yakucita vii, yakatandika ukuvwana sana nu kupalama kuli Yeova.—Welengini Kasambilizya 4:12.

14. Ndi cakuti ya winu yasiombela Yeova, i vyani vino mungacita pakuti icupo cinu ciye icikome?

¹⁴ Baibo ikatunena ukuti tutalinzile ukutwalana nu muntu asiombela Yeova. (2 Kolinto 6:14) Nomba, kwaya aina na ya nkazi atwalana na antu asi Inte Zyakwe Yeova. Yamwi yasambiliile icumi ala yatwala mpiti nanti ukutwalwa, nupya ya wao yene yatasambilila icumi. Yamwi nayo limwi yatwaline na kapepa wakwe Yeova, nomba aiza ata ukuombela Yeova. Aina Klistu yonsi aaya umu miyele ya musango uu, yakaombesya pakuti yatwalilile ukukomya ivyupo vyao lino yakuvwila ukusunda ukwaya muli Baibo. Ukucita vii kutangupala lyonsi. Mary na iya, Davidi, yaombelanga Yeova capamwi. Lyene, Davidi wizile ata ukuya umu kulongana. Nomba Mary akaombesya pakuti atwalilile ukuya umuci musuma nu kulanga imiyele ya Wina Klistu. Nupya wasambilizye ana yakwe 6 icumi nu kutwalilila ukuya umu kulongana kwa pa cilongano alino nu kwa citungu. Pa cisila ca myaka ingi, ala na ana yakula yafuma na pa ng’anda, Mary watwalilile ukuombela Yeova nanti icakuti ivintu vizile ivyamutalila sana. Nomba, Davidi watandike ukuwelenga ya magazini yano Mary wamusiilanga. Umu kuya wa nsita watandike ukuzanwa umu kulongana limwi limwi. Umwizikulu wakwe uwa myaka 6 wamusungilanga icilimba, nupya ndi David atizile umu kulongana, mwizikulu wamunenanga ati, “Kuku, inakuluuka sana ilelo umu kulongana.” Davidi wawezile kuli Yeova ala papita imyaka 25, nupya wene na mamakwe yaaya sana ni nsansa pa mulandu wakuti yatandika ukuombela Yeova capamwi nupya.

15. Uzye atwalana mpiti yangazwa uli atwaline likwene?

¹⁵ Satana watemwa sana ukuzanza indupwa ndakai. Ali mulandu onga uno ya iya  na aci aakaombela Yeova yalinzile ukuombela sana capamwi. Nanti icakuti mwatwaline mpiti sana, mwaelenganya pali vino mungalanda nanti ukucita pakuti mwakomya icupo cinu. Ndi cakuti mwatwaline mpiti sana, aatwaline likwene yangaamukolanya ndi cakuti mukaomba ningo. Limwi mungaama aatwaline likwene pakuti iiza yazanwa uku kupepa kwinu ukwa lupwa. Cii cilalenga yalole ukuti nanti icakuti yamwi yatwaline mpiti sana, yalinzile ukutwalilila ukutemwana nu kuombela capamwi.—Tito 2:3-7.

16, 17. I vintu ci ivisuma vino antu yakwe Leza aakaombela pamwi yakalolela?

¹⁶ Lino aina Izlaeli yaayanga umu kuzevya kwa ucilo uku Yelusalemu, yaombelanga capamwi. Yapekanyanga vyonsi ivyalondekwanga pa lwendo. Lyene yapitilanga capamwi nu kwazwana. Pa ng’anda ya kupepelapo, yonsi yalumbanyanga nu kupepela Yeova capamwi. (Luka 2:41-44) Ndakai, lino tukuipekanyizizya ukwiza ikala umu nsi ipya, tulinzile ukuombela pamwi nu kuombesya ukuti twauvwana na anji. Uzye kwaya inzila zimwi zino mukaelenganyapo ukuti zingamwazwa ukucita vivyo?

¹⁷ Antu aaya muno nsi yasiuvwana nupya kwaya ivingi ivikalenga ukuti yalwisyanya. Nomba swemo tukataizya ukuti Yeova akatwazwa ukuti twauvwana nupya akatusambilizya icumi! Antu yakwe Yeova umu nsi yonsi yakamupepa ukulingana na vino umwineco akaalonda. Nupya umu manda yaa akusyalikizya, antu yakwe Yeova yakaombela sana capamwi. Wakwe vino Ezaya na Mika yasoowile, tukatumbelela capamwi “umwamba wakwe [Yeova].” (Ezaya 2:2-4; welengini Mika 4:2-4.) Tulaya sana ni nsansa uku nkoleelo lino antu yonsi ‘yalaombela capamwi’ alino nu kupepela Yeova capamwi!