CIPANDE CA KUSAMBILILAMO 37
U Mulandu ci Uno Tulinzile Ukuitemelwa Ukutontela Yeova Nupya Tungacita Uli Vivyo?
“Uzye lyene tutangalusya kutontela Tata?” —AYEB. 12:9.
ULWIMBO 9 Yeova Ali Mwene Witu!
VINO TUMASAMBILILAPO *
1. U mulandu ci uno tulinzile ukutontela Yeova?
TULINZILE ukutontela * Yeova pano a Kaumba witu. Vino aliwe watuumvile, wakwata insambu zya kutunena vino tulinzile kucita. (Umbw. 4:11) Nomba umulandu na uze uno tulinzile ukuvwila Yeova u wakuti, imiteekele yakwe ali ino yazipisya. Antu aingi yateeka antu yauze pa myaka iingi iyapitapo. Ndi twalinganya antu yayo kuli Yeova, wene wakwatisya mano nu kutemwa, waya nu luse, nupya ali Kateeka aakalangulukilako sana ukucila yonsi asyala.—Kufu. 34:6; Loma 16:27; 1 Yoa. 4:8.
2. Uzye ilembelo lya Ayebulai 12:9-11 likalanda pa milandu ci iikalenga kuti twatontela Yeova?
2 Yeova akalonda twamuvwila, asi pa mulandu wakuti tukamutiina, lelo a pa mulandu wakuti twamutemwa nupya tukamulola ukuti a Tata uwatutemwa. Lino Paulo walemvile kalata uku Ayebulai, walondolwile ukuti tulinzile “kutontela Tata” pano akatusambilizya “kuti vintu vituzipile.”—Welengini Ayebulai 12:9-11.
3. (a) Uzye tukalanga uli ukuti tukatontela Yeova? (b) A mauzyo ci yano tumaasuka?
3 Tukatontela Yeova ndi cakuti tukumuvwila muli vyonsi nu kukanasintilila pa mano itu sweineco. (Mapi. 3:5) Cisitutalila ukutontela Yeova ndi cakuti twamanya imiyele ino wakwata isuma sana. U mulandu ci? Pano imiyele iyo iikalolekela muli vyonsi vino akacita. (Masa. 145:9) Lino tukuya tukumanyilapo ivingi pali Yeova, tukaya tukumutemelwako. Nupya ndi cakuti twatemwa Yeova, tusilondekwa amasunde aingi akutunena vino tulinzile ukucita na vino tutalinzile ukucita. Tukaezya ukutandika ukwelenganya wakwe vino Yeova akalonda nu kutaluka ku viipe. (Masa. 97:10) Nanti ciye vivyo, insita zimwi cingatutalila ukuvwila Yeova. U mulandu ci? Nupya i vyani vino ya eluda na avyazi yangasambilila kuli Neemiya, Umwene Davidi na kuli Maliya nyina wakwe Yesu? Icipande cii cimaasuka amauzyo amauzyo yaa.
UMULANDU UNO CITANGUPALILA UKUTONTELA YEOVA
4-5. Ukulingana na mazwi aaya pali Loma 7:21-23, u mulandu ci uno cikatalila ukutontela Yeova?
4 Umulandu onga uno cingatutalila ukutontela Yeova u wakuti, swensi twapyana uluyembu nupya tutamalilika. Fwandi asi lyonsi lino tukalonda ukuvwila Leza. Lino Adamu na Eva yapondikile Leza nu kulya uku cizao cino wayainzile, yatandike ukuipangila masunde. (Utan. 3:22) Ndakai, antu aingi yasiika mano kuli Yeova nupya yakaipingwila aeneco icisuma ni ciipe.
5 Na antu kwene atemwa Yeova yangacula sana pakuti yatwalilile ukumutontela. Umutumwa Paulo wakweti intazi ii. (Welengini Loma 7:21-23.) Wakwe Paulo, tukalonda ukucita ivisuma ivingazanzya Yeova. Nomba tufwile ukutwalilila ukulwisyanya na melenganyo aipe aangalenga tucite iviipe.
6-7. U mulandu ci wakwe ciili uno cikatalila sana ukutwalilila ukutontela Yeova? Langililini.
6 Umulandu na uze uno cikatalila ukutontela Yeova i ntambi ni myelenganyizizye ya antu aaya kuno twakuliile. Antu aingi yangatunena ivintu ivipusane na vino Yeova akalonda. Fwandi tulinzile ukutwalilila ukuombesya pakuti tutaelenganya wakwe vino antu yayo yakaelenganya. Katulole vino tungasambilila kuli nkazi umwi.
7 Alumendo na akazyana yakapatikiziwa ukukwata impiya izingi sana. Nkazi uwi zina lyakuti Mary * wakweti intazi ii. Lino atali asambilile pali Yeova, waile asambilila ukwi sukulu ilisuma sana ilya mu mpanga ya kumwao. Ulupwa lwakwe nkazi Mary lwezizye ukumupatikizya ukuzana incito iingalenga afola impiya izingi sana nu kucindikwa. Nawe kwene avino walonda ukucita. Lelo, pa cisila ca kusambilila pali Yeova nu kumutemwa, wasenwile mauyo yakwe. Nanti ciye vivyo, walanzile ukuti: “Insita zimwi nkazana inzila iyakupangilamo impiya izingi, nomba namanya ukuti ingandenga ukuta ukuombela Yeova wakwe vino nkamuombela ndakai. Pa mulandu ni nkulilo yane, cikantalila sana. Nkapepa kuli Yeova ukuti angazwa ukukana mezyo akuzumila incito ingalenga ntaombesya apapezile amaka yane umu mulimo wakwe.”—Mateo 6:24.
8. I vyani vino tumasambililapo lyene?
8 Wakwe vino itusambilila mpiti, ukutontela Yeova i cintu icisuma sana. Nomba yamwi yano Leza wapeela amaka ndi yakumuuvwila, wakwe ya eluda, avyazi aonsi, na avyazi anaci, yangazwa yauze. Lyene tumasambilila pali vino yamwi alembwa muli Baibo yaomvizye amaka ningo nu kuzanzya Yeova.
VINO YA ELUDA YANGASAMBILILA KULI NEEMIYA
Ya eluda yakaombako imilimo pa Nga’nda ya Wene, wakwe vino Neemiya waomvileko umulimo wa kukuula Yelusalemu cipya cipya (Lolini mapalaglafu 9-11) *
9. Iintazi ci zino Neemiya wapisilemo?
9 Yeova wapeela ya eluda umulimo ucindame sana uwa kusakamala antu yakwe. (1 Pet. 5:2) Ya eluda yangasambilila ivingi kuli vino Neemiya waomvile na antu yakwe Yeova. Vino wali u mulasi wa Ayuda, Neemiya wakweti sana maka. (Neem. 1:11; 2:7, 8; 5:14) Elenganyini pa ntazi zimwi zino Neemiya wapisilemo. Wazanyile ukuti antu yakowizye ing’anda ya kupepelamo nupya yatazwanga Aina Levi muli vino yalondekwanga wakwe vino isunde lyalanzile. Ayuda yatalondelanga isunde lyakwe Yeova ilyalandanga api Sabata, nupya aonsi yamwi yatwazile anaci amu nko izitapepanga Yeova. Umulasi Neemiya wamazile intazi ii.—Neem. 13:4-30.
10. Uzye Neemiya wacisile uli pa ntazi zino wakweti?
10 Neemiya ataomvyanga maka yakwe kupatikizya antu ukucita vino welenganyanga umweneco. Lelo wapepanga kuli Yeova kuti amwazwe, nupya wasambilizyanga antu Masunde yakwe Leza. (Neem. 1:4-10; 13:1-3) Nupya Neemiya waombelanga pamwi na ina yakwe, nu kuyazwa ukukuula malinga ya musumba wa Yelusalemu.—Neem. 4:15.
11. Ukulingana na amazwi aya pali 1 Tesalonika 2:7, 8, uzye ya eluda yalinzile ukusunga uli amu cilongano?
11 Limwi ya eluda yatanga yakwate intazi izili zimwi na zino Neemiya wakwetiko, nomba yangamukolanya mu nzila izingi. Yakaombesya ukwazwa aina na ya nkazi. Nupya yasiilola ukuti yacindama ukuluta yauze pa mulandu na maka yano yakwata. Lelo, yakasunga ningo amu cilongano. (Welengini 1 Tesalonika 2:7, 8.) Pa mulandu wakuti yaicefya nupya yatemwa yauze, yakalanzyanya nayo mu cikuuku. Ya Andrew, aombako ueluda pa myaka iingi yalanzile iyati: “Nazana ukuti ndi cakuti eluda ali ni cikuuku na ucuza, aina na ya nkazi yakaitemelwa ukumuvwila. Imiyele ii ikalenga amu cilongano ukulaombela pamwi na ya eluda.” Ya Tony nayo kwene aomba ueluda pa myaka iingi yalanzile iyati: “Nkaezya ukuvwila ukusunda ukwaya pali Filipi 2:3 nupya lyonsi nkaezya ukulola yauze ukuti yacindama ukuncila. Cii cikangazwa ukukanapatikizya yauze ukunguvwila.”
12. U mulandu ci uno ya eluda yalinzile ukuyela aicefye?
12 Ya eluda yalinzile ukuicefya, wakwe vino Yeova waicefya. Nanti i cakuti Yeova Akateeka wa Papelapela, “akalolekesya na pano nsi” pakuti ‘akatusye umulanda apa citumba.’ (Masa. 18:35; 113:6, 7) Nupya, Yeova wapata sana antu ya cilumba.—Mapi. 16:5.
13. U mulandu ci uno eluda alinzile ‘kupindulwila lulimi lwakwe’?
13 Inzila yonga ino ya eluda yangalangilamo ukuti yakatontela Yeova, u ‘kupindulula lulimi lwao.’ Ndi cakuti eluda asikucita vivyo angalanda ukwaula icikuuku lino akulanda kuli wino atamukwatiile umucinzi. (Yako. 1:26; Gala. 5:14, 15) Ya Andrew, atiyalandwapo mpiti, yalanzile ukuti: “Insita zimwi, nkayuvwa kwati ndizile ukulanda ukwaula icikuuku uku mwina nanti nkazi wino nkulola kwati atankwatile umucinzi. Lelo, nkaelenganya pa yantu acisinka alembwa muli Baibo, nupya cii cangazwa ukumanya vino ukuicefya kwacindama.” Ya eluda yakalanga ukuti yakatontela Yeova nga yakulanga ukutemwa lino yakulanda na amu cilongano, ukwikako sile na ya eluda yauze.—Kolo. 4:6.
VINO AVYAZI AONSI YANGASAMBILILA KU MWENE DAVIDI
14. U mulimo ci uno Yeova wapeela avyazi aonsi, nupya akalonda ukuti yatungulula uli indupwa zyao?
14 Yeova wapeela avyazi aonsi umulimo wa kutungulula ulupwa, nupya akalonda ukuti yasambilizya, ukutungulula nu kulungika ana yao. (1 Kol. 11:3; Efes. 6:4) Nomba umulimo wa muvyazi umonsi wakwata umwa kupeleela, Yeova alayapeela umulandu ndi yasikutungulula ningo amu lupwa lwao pano uwalenzile ukuti ulupwa luyeko. (Efes. 3:14, 15) Avyazi aonsi yakalanga ukuti yakatontela Yeova ndi yakuomvya amaka yao umu nzila ikazanzya Leza. Yangasambilila ivingi kuli vino vyacitikiile Umwene Davidi.
Amapepo yano umuvyazi umonsi akapepa lino ali nu lupwa yalinzile ukulanga ukuti waicefya (Lolini mapalaglafu 15-16) *
15. U mulandu ci uno avyazi aonsi yangasambililila ivintu ivisuma kuli vino Umwene Davidi wali?
15 Yeova atasonsile sile Davidi ukuya umutwe wa lupwa lelo wali nu kulatungulula uluko lwa ina Izlaeli lonsi. Vino wali Umwene wakweti sana amaka. Insita zimwi waomvyanga amaka yakwe uyi uyi nupya waluvyanyanga. (2 Sam. 11:14, 15) Lelo walangilile ukuti watontelanga Yeova pano wazumile lino yamulungike. Wapefile kuli Yeova nu kumunena vyonsi vino wayuvwanga. Nupya waomvile apapezile amaka yakwe pakuti uvwile ukusunda kwakwe Yeova. (Masa. 51:1-4) Nupya wali umuicefye sana pano wazumilanga ndi cakuti yamulungika asi uku yonsi sile lelo nu ku yanaci kwene. (1 Sam. 19:11, 12; 25:32, 33) Davidi wasambilile kuli vino waluvyanyizye nupya waipeelisye ukuombela Yeova umu umi wakwe onsi.
16. I vyani vino avyazi aonsi yangasambilila kuli Davidi?
16 I vyani vino mwe yavyazi aonsi mungasambilila ku Mwene Davidi? Mutalinzile ukuomvya uyi uyi amaka yano Yeova wamupeela. Mwazumila ndi cakuti mwaluvyanya, nupya mwazumila ndi cakuti yauze yamilungika ukuomvya Baibo. Ndi cakuti mwacita vivyo, amu lupwa lwinu yalamucindika pa mulandu wa kuicefya kwinu. Lino mukupepela pamwi nu lupwa lwinu, mwanena Yeova ivili mu mwenzo, mwaleka amu lupwa iyalola vino mwamutaila. Nu kucila pali vyonsi, mulinzile ukuleka ukuombela Yeova kuye ali cintu cicindamisye mu umi winu. (Malan. 6:6-9) Vino mukacita vingazwa sana ulupwa lwinu.
VINO AVYAZI ANACI YANGASAMBILILA KULI MALIYA
17. U mulimo ci uno Yeova wapeela avyazi anaci?
17 Yeova wapeela avyazi anaci umulimo ucindame sana umu lupwa, nupya wayapeela amaka pa yana yao. (Mapi. 6:20) Vino nyina wa yana akacita nu kulanda vingalenga ana yakule ningo nanti foo. (Mapi. 22:6) Lolini vino avyazi anaci yangasambilila kuli Maliya, nyina wakwe Yesu.
18-19. I vyani vino avyazi anaci yangasambilila kuli Maliya?
18 Maliya wamanyile ningo sana Malembelo. Wacindikanga sana Yeova nupya wali acuza wakwe. Waitemiilwe ukucita vino Yeova walondanga, nanti icakuti ivintu vyasenwike sana umu umi wakwe.—Luka 1:35-38, 46-55.
Ndi cakuti umuvyazi umwanaci watatonta nanti iyamusosya, angalondekwa ukuombesya pakuti alange ukutemwa uku lupwa lwakwe (Lolini palaglafu 19) *
19 Mwe yavyazi anaci, mungakolanya Maliya umu nzila izingi. Mungacita uli? Ica kutandikilako, mulinzile ukutwalilila ukuisambilizya Baibo nu kupepa mapepo ya pa lwinu pakuti mwakomya ucuza winu na Yeova. Cakwe cili, mwaitemelwa ukusenuka pakuti mwazanzya Yeova. Limwi mwakuliile umu lupwa luno avyazi yasokanga ilingi nu kukalipila sana ana yao. Fwandi cingalenga mukule ala mukaelenganya ukuti caya sile ningo ukukuzya ana umu nzila kwene iiyo. Na pa cisila ca kusambilila pali Yeova, limwi cingamutalila ukuya ateekele uku yana inu, sana sana ndi mwatonta nupya ana yasikumuvwila. (Efes. 4:31) Nga mukuyuvwa vivyo, alino mulinzile ukupepa kuli Yeova pakuti amwazwe. Umuvyazi umwi uwi zina lyakuti Lydia walanzile ati: “Insita zimwi, nkapepa sana pakuti ntakalipila sana umwane umulumendo ndi cakuti atanguvwilile. Nkatala inta nu kuvwanga lino ntali malilile vino nkasi ukulanda nu kupepa kuli Yeova ukuti angazwe. Ipepo likalenga nateeka umwenzo.”—Masa. 37:5.
20. Iintazi ci ino avyazi yamwi anaci yakakwata, nupya yangacimvya uli intazi iiyo?
20 Intazi yuze ino avyazi yamwi anaci yangakwata i yakuti, cingayatalila ukulanga ana yao ukuti yayatemwa. (Tito 2:3, 4) Anaci yamwi yakuliile umu ndupwa zino avyazi yao yatuvwananga sana na ana. Ndi cakuti avino mwakuziwe, mutalinzile ukukolanya vino avyazi inu yaluvyanyanga. Umuvyazi umwanaci aakatontela nu kucita vino Yeova akalonda limwi angalondekwa ukusambilila ukulanga ukutemwa uku yana yakwe. Limwi cingatala ukusenula imyelenganyizizye yakwe, vino akayuvwa, ni micitile yakwe iya vintu. Nomba angakwanisya, nupya ndi wasenuka ivintu vingamuzipila nu kuzipila ulupwa lwakwe.
TWALILILINI UKUTONTELA YEOVA
21-22. Ukulingana na mazwi aaya pali Ezaya 65:13, 14, i visuma ci ivikacitika nga tukutontela Yeova?
21 Umwene Davidi wamanyile usuma uwaya umu kutontela Yeova. Walemvile ukuti: “Amalamulo yakwe [Yeova] yaya alungame. Yao akayalondela yakasansamukila mwenemo. Amasunde yakwe yaya atunguluke, yakatungulula umupasi, nu kunjilula ningo. Ali muno ne muomvi wako inkapula amano nu kuyawaka. Umu kuyalondela ali muno ndapokelela ni cilambu icikalamba.” (Masa. 19:8, 11) Ndakai, tukailolela upusano uwaya pa yantu aakatontela Yeova na yayo akakana ukusunda kwakwe. Yayo aakatontela Yeova ‘yakaimba inyimbo zya nsansa’ pa mulandu nu luzango luno yakwata umu mwenzo.—Welengini Ezaya 65:13, 14.
22 Ndi cakuti ya eluda, avyazi aonsi, na avyazi anaci yakutontela Yeova, umi wao ukazipilako, indupwa zyao zikaya sana ni nsansa, nupya amu cilongano yonsi yakaya alemane. Ni cicindame sana icakuti, yakazanzya sana Yeova. (Mapi. 27:11) Ukucita vii ukungatuletela sana uluzango!
ULWIMBO 123 Lyonsi Twatontela Vino Leza Watantika
^ pala. 5 Icipande cii cimalanda pa mulandu uno tulinzile ukutontela Yeova. Nupya cikulanda na pali vino ya eluda na avyazi yalinzile ukuomvya amaka yano Yeova wayapeela. Yangasambilila ivingi kuli Neemiya; Umwene Davidi; na Maliya nyina wakwe Yesu.
^ pala. 1 MAZWI AATIYALONDOLOLWA: Izwi lya kuti ukutontela lyakwata upiliulo uwipe ku yantu yano yakapatikiziwa ukuvwila umuntu umwi. Lelo antu yakwe Leza yene yakaitemelwa ukumuuvwila, fwandi yasilola ukutontela Leza ukuti i cintu iciipe.
^ pala. 7 Yamwi atiyalumbulwa umu cipande cii asi mazina.
^ pala. 62 ULONDOLOZI WA CIKOPE: Eluda akuombela pamwi nu mwanakwe umulumendo ukuzifya pa Ng’anda ya Wene, wakwe vino Neemiya wazwilizyeko ukukuula amalinga ya musumba wa Yelusalemu.
^ pala. 64 ULONDOLOZI WA CIKOPE: Umuvyazi umonsi akupepa kuli Yeova ukufuma pansi ya Mwenzo lino ali nu lupwa lwakwe.
^ pala. 66 ULONDOLOZI WA CIKOPE: Umulumendo wasumba insita ikulu sana ukuteya ivyangalo vya pa vidyo nupya atamazile ukuomba imilimo ya pa ng’anda nanti ivya ku sukulu. Ya nyina iyatonta, yamulungika ukwaula ukusoka nanti ukuomvya amazwi aipe.
