Namusesile pa mulandu wakuti nelenganyanga ukuti atamanyile ivili vyonsi pa mipepele. Namuziizye inti: “I vyani vino wamanya pali Baibo?” Ataswike papo kwene sile. Lyene wizile anena ukuti ya nyina yali aa Nte Yakwe Yeova nupya wasambilileko vimwi. Pa mulandu wakuti nalondesyanga ukuvwa namunenyile ukuti anene ivingi.

Twalanzyanyizye umupiipi nu usiku onsi. Umunji wanenyile ukuti Baibo ikalanda ukuti Satana ali kateeka wa nsi. (Yoa. 14:30) Limwi mwemo mwamanyile vivyo ukufuma na mpiti nomba nemo wali u muku wa kutandikilapo ukuvwa vivyo nupya nazungwike sana. Kufuma lino nali umwance nuvwanga ukuti Leza uwaya ni cikuuku nupya aataya nu lufyengo u watungululanga insi. Nomba navilwanga ukuvwikisya pa mulandu na vino nalolanga vikucitika umu nsi. Nanti cakuti nali sile ni myaka 26, naweni ivintu ivingi ivyansakamikanga sana.

Ya tata yapisyanga indeke ya asilika uku United States. Fwandi lino nali umwance namanyile ukuti asilika yali nu kupoosya ibomu insita ili yonsi. Inkondo uku Vietnam yatandike lino nali uku koleji umu California. Nizile iningila umu kaungwe akaleetanga ivimvulunganya. Ya kapokola ali ni vyakumilako yatuzinginye nupya tuutwike ala itukoleka nupya tusikulola ningo pa mulandu na matiyagasi. Insita iya ifile sana. Pa mulandu wakuti yalemile intunguluzi zya miteekele calenzile antu yatandika ukupanga ivimvulunganya. Antu yelenganyanga ivipusanepusane pali vino vyali nu kucitwa. Kwali sana icimvulunganya.

Umu 1970 natandike ukuomba uku katutu ka Alaska nupya nakwatanga sana impiya. Lyene nakwezile indeke nu kuya uku London, inkala onda nu kulungama ku kaeya ukwaula ukumanya kuno nkuya. Lino papisile imyezi, nafisile umu Africa. Muno napitanga nazananga antu alandanga ukuti nayo kwene yalondanga ukuutuka uku ntazi zino yakweti.

Pa mulandu na vino naweni nu kuvwa, vino Baibo ikasambilizya ukuti umupasi uwipe uukatungulula  insi vyuvwikike ningo sana. Nomba nalondanga ukumanya, ndi cakuti Leza asi aliwe watungululanga insi ale i vyani vino wacitanga?

Lino papisile imyezi nizile imanya icasuko. Nupya lino papisile insita nizile imanya aonsi aingi na anaci aalangilile ukuti yali acisinka kuli Leza wa cumi wenga asi mulandu ni ntazi zino yakwatanga.

Lino naswilile uku London, nalondesyanga ukulolana na ya nyina ya munji nupya lino twaloliine yampeezile Baibo. Lino papisile insita naile uku Amsterdam ku Netherlands, lino nali kuku Nte umwi wambweni nkubelenga Baibo ala inikala umwisika lya cililaiti ca mu museo nupya wangazwilizye ukusambilila ivingi. Lyene naile uku Dublin ku Ireland nupya naile inzana iofesi lya musambo lyakwe ya Nte Yakwe Yeova. Naile inkonkonsya. Kuku akuno naile indolana na ya Arthur Matthews u mwina uwaombiile Yeova pa myaka iingi. Nayalenzile ukuti yansambilizya Baibo nayo yazumiile.

Nalondesyanga sana ukusambilila nu kubelenga mabuku na ya magazini yakwe ya Nte. Nupya nabelenganga na Baibo kwene. Naipakizyanga sana. Nga tuli pa kulongana, nalolanga ukuti na ana anono kwene yamanyile amasuko uku mauzyo yano na antu asambilile yafilwanga ukwasuka pa myaka iingi wakwe: ‘U mulandu uno kwayela iviipe? Uzye Leza a weni? I vyani vikacitika umuntu nga wafwa?’ Ya cuza yane yonsi yali aa Nte. Cangangukiile sana pa mulandu wakuti ntamanyiine na aliwensi. Yangazwile ukutemwa Yeova nu kulondesya ukucita ukulonda kwakwe.

Nabatiziwe umu 1972. Lino papisile umwaka onga natandike upainiya nupya natandike ukulongana umu cilongano icinono icayelile uku Newry ku Northern Ireland. Nasonkiile ing’anda iyayelile umupipi nu mwamba. Mupiipi pali impanga muno ing’ombe zyalilanga nupya napekanyanga malyasi pa nkoleelo ya ng’ombe. Zyalolekanga kwati zikukutika vino nkulanda ala zikulya. Zitanenanga vino ndinzile ukucita na vino ntalinzile ukucita lelo zyangazwile ukulalola iumba nga nkulanda malyasi. Umu 1974 nasonsilwe ukuya painiya umuiyele, natandike ukuombela pamwi na ya Nigel Pitt nupya twizile ituya sana ivyuza.

Pa nsita iya umu Northern Ireland mwali sana ivimvulunganya. Fwandi cii calenzile antu ukutandika ukwama impanga ya Northern Ireland ukuti “impanga ya vimvulunganya.” Casesile sana ukulola kuno antu yakulwa umu miseo, yakupikana nu koca imyotoka. Ilingi intazi zyayangako pa mulandu ni vikanza vya miteekele ni mipepele.  Lelo, ya Pulotesitanti na ya Katolika yamanyile ukuti ya Nte Yakwe Yeova yasiika umu vikanza vya miteekele, fwandi calenzile tukwate untungwa uwa kusimikila ukwaula ukutiina icili consi. Insita izingi antu yamanyanga ningo insita ino ivimvulunganya vimacitika na kuno vimacitikila, fwandi yatucelulanga pakuti tungaya acingililwe.

Kwayanga insita zimwi lino twayanga umu uzanzo. Uwanda umwi nemo na ya Denis Carrigan ya painiya twasimikilanga umwi tauni ilyayelile umupipi umutaali ya Nte Yakwe Yeova kuno twaileko sile umuku onga lino tutatala twaya umu kusimikila. Umwanaci umwi watubepizye ukuti twatumilwe na asilika aku Britain uku kulondelezya vimwi umu umfisolo, limwi a pa mulandu wakuti tutalandanga wakwe vino aaku ncende iya yalandanga. Vino wacisile vyalenzile tuvwe sana intete. Ukuya cuza wa musilika kwali nu kulenga umwi akomwe nanti ukupikwa umu makulu. Lino twali swenga panzi tukulolela basi ala ikuzuka twaweni motoka wimilila apali umwanaci uwatubepizye. Umwanaci wafumile muno wali nu kutandika ukulanda na aonsi yaili aali muli motoka, ala ali ni nsansa lino akusonta kuno twali. Lyene aonsi yaa izile na motoka pano twali nu kutandika ukutuuzya amauzyo yamwi pa nsita ino basi yali nu kwizilapo. Lino basi yafisile yalanzile nu wapisyanga. Tutuvwanga vino yalanzyanyanga. Muli basi mutaali antu, fwandi twelenginye ukuti yalanzyanyanga vino yali nu kutufulula nga twafuma umwi tauni lii. Nomba vivyo vitacitike. Lino nikilanga muli basi nuzizye uwapisyanga basi ukuti: “I vyani vino aonsi yaya iyakuzya pali sweswe?” Walanzile ukuti: “Inayalondolwela ukuti mwemwe ya Nte Yakwe Yeova. Mutasakamala. Mwemwe yacingililwe.”

Umu 1976 pa ukongano wa citungu uwayelile umu Dublin, naloline na Paulina painiya umuiyele uwizile umu kutandala ukufuma uku England. Wali na ucisinka, umuicefye nu kutemwa. Wene nu mutowakwe Ray, yamanyile icumi ukufuma uwance wao. Lino papisile umwaka onga twatwaline nupya twatwalilile ukuomba upainiya umu Ballymena uku Northern Ireland.

Pa nsita imwi lino twali umu mulimo wa kutandalila ivilongano twaombelanga aina umu Belfast uku Londonderry alino ni ncende zyuze izitale. Twakomeleziwe sana pa mulandu nu utailo wa ina na ya nkazi asile ivizumilo vya mu mipepele ya ufi, ukuta ukuya na kapatulula nu lupato pakuti sile yaombele Yeova. Yeova wayapaazile nu kuyacingilila.

Nikazile umu Ireland apa myaka 10. Lyene umu 1981 yatwamile ukwi Sukulu Lya Gilyadi ilyalenga 72. Pa cisila ca kumala isukulu yatutumile uku Sierra Leone, uku West Africa.

Twikalanga umu ng’anda yakwe ya misyonali muno twali antu 11. Twaomvyanga icikini conga, vimbusu vitatu, mwakufulalila mwili, foni wenga, masyini wa kuwasizya wenga nu wakwanikilamo wenga. Malaiti yapitanga pitanga nupya yatamanyikwanga lino yamapita na lino yamawela. Yakuza ingililanga umwipaala, inzoka nazyo zingilanga umu miputule ya pansi.

Nanti cakuti vintu vyatazile umu wikalo twaipakizyanga sana ukuomba umulimo wa kusimikila. Antu yacindike sana Baibo nupya yakutikisyanga. Aingi yasambililanga Baibo nu kuya ya Nte. Antu aku ncende iya yangamanga ukuti “Mister Robert.” Mamane nawe yamwamanga ukuti “Missus Robert.” Nomba lino papisile insita natiile ukuomba sana umulimo wa kusimikila pa mulandu wakuti nakweti imilimo iingi pa maofesi ya musambo fwandi antu yatandike ukwama mamane ati  “Missus Paulina.” Nani yatandike ukungama ati “Mister Paulina.” Nupya mamane uvwanga ningo nga yakutwama vivyo.

Aina aingi yali aapiina nomba Yeova lyonsi wayasakamalanga nupya umu nzila iziiyele. (Mate. 6:33) Nkaiusya nkazi umwi uwakweti ulupiya ulwakukalila sila ivyakulya vyakuti wene na anakwe yalye pa wanda kwene uwo, lelo wapeezile umwina ulupiya lulo aatakweti ulupiya lwa kukalilamo umulembo wakwe malelya. Insita yuze pa wanda kwene uwo, umwanaci umwi waile kuli nkazi wiyo ukwaula ukwenekela nu kumulipila ukuti amuluke inyele. Kwali ivingi ivyacitikanga ivya musango kwene uu.

Twikazile imyaka 9 uku Sierra Leone. Lyene izile iyatutuma ukuya umu kuombela pa Betele ya ku Nigeria. Twatandike lyene ukuombela pa musambo ukalamba. Naombanga umulimo uli umwi kwene uwa mu ofesi uno naombanga lino twali uku Sierra Leone nomba mamane wene watandike ukuomba umulimo upusane sana na uno waombanga nupya camutaliile. Cila mwezi waombanga maawazi 130 umu mulimo wa kusimikila nupya wakweti masambililo ya Baibo aingi aalundulukanga. Nomba yamunenyile ukulaombela umu muputule wa kusumilamo, muno waombanga uwanda onsi ala akusuma ivya kuzwala ivilepuke. Papisile insita pakuti ayelezye nomba wizile ailuka ukuti yauze yataizyanga sana pa mulimo uno waombanga nupya wisile sana mano uku kukomelezya aomvi yauze apa Betele.

Intambi zya ku Nigeria zyali i zipya kuli sweswe nupya twalondekwanga ukusambilila ivingi. Pa nsita imwi umwina wizile na nkazi uku ofesi wino yamile pa Betele pakuti mumanye. Lino namutambike ikasa kuti mulamuke wafukime nu kwinama. Nazungwike sana. Lilyo kwene sile nizile iniusya malembo yaili: Milimo 10:25, 26 nu Kusokolola 19:10. Natandike ukwelenganya inti, ‘Uzye munene ukuti utacita vivyo?’ Nomba nizile niluka ukuti vino yamwamile ukwiza umu kuombela pa Betele, wamanya vino Baibo ikasambilizya.

Nuvwile sana insonyi pa nsita yonsi ino twalanzyanyanga nupya nasyazile indondelezya. Nizile imanya ukuti vino nkazi wacisile walondelanga ulutambi ulwaombanga pa nsita iya umu ncende zimwi zimwi umu Nigeria. Vikwene a vino na onsi yacitanga. Yali i nzila ya kulangilamo umucinzi. Vino wacisile atampepanga nupya kwaya na malembo aalanda pa antu acisile ivili vimwi. (1 Sam.  24:8) Nuvwile ningo ukuti ntalanzile ivili vyonsi ivyali nu kulenga nkazi auvwe insonyi.

Uku Nigeria twaweni aina na ya nkazi aingi aali nu utailo pa myaka iingi. Uvwini ivyacitikile umwina Isaiah Adagbona. a Wasambilile icumi ala acili umulumendo, nomba wizile alwala tembwe. Yamutwazile kuno yakasungila yakwe tembwe, nupya ali Nte u waliko sile. Asi mulandu na vivyo wazwilizye alwale yakwe tembwe ukucila pali 30 ukumanya icumi nupya walenzile ni cilongano ukupangwa.

Umu 1996 yatutumile ukuya umu kuombela pa musambo wa ku Kenya. Uu wali umu wakutandikilapo ukuswilila uku mpanga ii ukufuma pano natandalileko lino vino indanda pa kutandika vyacitike. Twikalanga pa Betele. Nupya pali sana ya kolwe. Yasompolanga ivizao vino ya nkazi yasendanga. Uwanda umwi nkazi wa pa Betele wasile iwindo casi. Lino wawezile kuno waile wazanyile ya kolwe aingi yakulya ivyakulya umu muputule wakwe. Wapunzile nu kuutukila panzi. Ya kolwe yalizile nu kufumila api windo.

Paulina nani twatandike ukulongana uku cilongano ca Ciswahili. Patalengile yanenyile ukutandika ukutungulula Isambililo Lya Citabo pa Cilongano (lino ndakai tukaama ukuti Isambililo Lya Baibo pa Cilongano). Nomba cantalilanga pano ala ntatala namanya ningo ululimi. Napekanyizizyanga limwi, fwandi nuzyanga ningo mauzyo. Nomba ndi cakuti ivyasuko vya ina na ya nkazi vyapusana sile panono ni vyativilembwa, nafilwanga ukuvwa. Citazifile. Nuvwilanga aina na ya nkazi uluse. Nuvwanga ningo sana pano yanteekelelanga nupya yali aicefye nu kunzumilizya ukutwalilila ukutungulula.

Tutakuminye nu mwaka uku Kenya. Lyene umu 1997 yatwamile uku Betele ya Brooklyn ku New York. Twatandike ukwikala umu mpanga umwali antu akweti sana ivyuma na cico cingalenga antu ukukwata intazi zyuze. (Mapi. 30:8, 9) Nomba nu mu mpanga zya musango uwo aina na ya nkazi yakwata utailo ukome. Aina na ya nkazi yasiomvya ivikwatwa ni nsita yao pakuti yaye aakankala lelo yakaviomvya uku kutungilila iuvi lyakwe Yeova.

Pa myaka iingi twalola ya Nte yanji aakwata utailo asi mulandu ni vikayacitikila. Mu Ireland twaweni aina na ya nkazi aingi aakweti utailo asi mulandu nu unkalwe uwaliko. Mu Africa twaweni aina na ya nkazi aingi aakweti utailo asi mulandu nu upiina nu kwikala umu ncende umutaali sana ya Nte. Mu United States twaweni aina na ya nkazi aingi aakweti utailo asi mulandu nu kukwata icuma. Yeova akauvwa ningo sana ndi cakuti walola antu yakwe yakulanga vino yamutemwa asi mulandu ni vikuyacitikila.

Imyezi yatisimula sana “ukuluta na vino icipikwilo cansalu cikapita.” (Yobo 7:6) Ndakai tukaombela pa maofesi yakalamba mu nsi yonsi uku Warwick mu New York nupya twaya nu luzango vino twatwalilila ukuombela pamwi na antu aatemwana sana. Twaya ni nsansa nu kuteeka umwenzo lino tukutungilila Umwene witu Klistu Yesu wino wasya alambule aomvi yakwe aingi sana aya nu utailo.—Mate. 25:34.