1, 2. U mulandu ci uno tulinzile ukusambilizya yauze ukuombako imilimo yakwe Leza?

UKUKOSOOLA ilandwe lisuma ilya Wene ali mulimo uno Yesu wacindike sana. Nomba wasumbanga ni insita ikulu ukusambilizya yauze ukuti yaye acemi nupya yakasambilizya. (Mate. 10:5-7) Nanti cakuti Filipi waombesyanga umu mulimo wa kusimikila, wazwilizye ana yakwe 4 akazyana pakuti yaomvya ningo Amalembelo lino yakusimikila icumi uku yantu yauze. (Mili. 21:8, 9) Uzye ukusambilizya kwa musango uu kwacindama uli na ndakai kwene?

² Antu aakapokelela ilandwe lisuma umu nsi yonsi ndakai yakuvulilako sile. Apya aatali yawatiziwe yalinzile ukumanya ucindami wa kuisambilizya Baibo. Yalinzile nu kusambiliziwa ningo ukusimikila ilandwe lisuma uku yantu yauze nu kusambilizya icumi. Umu vilongano vino twayamo, aina yalinzile ukukomeleziwa ukuti yaombesya pakuti yafikepo ukusontwa ukuya ya eluda nanti aomvi umu cilongano. Ndi cakuti Aina Klistu atiyaomba imyaka ingi yakuomvya “amalango asuma,” yangazwa apya ukulunduluka.—Mapi. 4:2.

3, 4. (a) Uzye Paulo walondolwile uli ukulemana ukwaya pa kusambilila Amalembelo nu kuomba ningo umu mulimo wa kusimikila? (b) I vyani vino tulinzile ukutandikilapo ukucita lino tutatala twakomelezya yano tukasambilizya Baibo ukuti yaisambilizya Baibo?

³ Uzye ukuisambilizya Amalembelo kwacindama uli? Tukazana icasuko umu mazwi yano Paulo walembiile Aina Klistu uku cilongano ca ku Kolose. Walemvile ati: “Swemo tukamupepela, kufuma pa wanda uno tuvwile vya pali mwemwe. Tukulenga Leza kuti amupeelesye umanyililo wa kucita kulonda kwakwe, mu mano yonsi nu kuvwikisya vino umupasi wamuzilo ukapela. Lyene mulaya na maka akwikala ndi vino [Yeova] akalonda nga lyonsi mulacita vintu vino vikazanzya Mwene. Mu umi winu mulacita visuma, nupya namwe mulakula mukumanyikisya [Leza].” (Kolo. 1:9, 10) Ukumanya vii, kwali nu kulenga aina Kolose ukuya “na maka akwikala ndi vino [Yeova] akalonda.” Cii cali nu kulenga kuti yatwalilile ‘ukulacita ivisuma,’ lino yakusimikila ilandwe lisuma. Umuomvi wakwe Yeova alinzile ukuisambilizya Baibo lyonsi pakuti aomba ningo. Tulinzile ukwazwa asambi ukumanya icisinka cii.

⁴ Lino tutatala twazwilizya yauze ukutandika ukuisambilizya Baibo, tulinzile ukutandikilapo ukuisambilizya nu kulola usuma uwayamo. Fwandi tulinzile ukupekanya ningo ivya kuisambilizya. Mungayuzya mweineco muti: ‘Ndi cakuti antu yano nkusimikila yatandika ukulanda vino yakwelenganya ivisiuvwana ni visambilizyo ivyaya umu Malembelo nanti ndi yuzya amauzyo akome, uzye ningasuka ukuomvya Baibo? Uzye ndi nawelenga pali vino Yesu, Paulo, na yauze yazizimizyanga umu mulimo wa kusimikila, uzye nkaelenganya sana pali vino ningayakolanya?’ Swensi kwene tulinzile ukusambiliziwa nu kulungikwa ni vyeo ivyaya umwi Zwi Lyakwe Leza. Nupya ndi tukunena yauze pa visuma vino twazana pa mulandu nu kuisambilizya Baibo, tungayakomelezya ukuti nayo yazana ivisuma lino yakuisambilizya ningo ivyaya umu Malembelo.

5. Landini pali vino umwi angacita pa kwazwa umusambi ukuti aisambilizya Baibo lyonsi.

⁵ Limwi munguzya muti, ‘Uzye ningasambilizya uli umusambi pakuti aisambilizya Baibo lyonsi?’ Icakutandikilako, mungamulanga ivya kucita pakuti aipekanya lyonsi lino mutatala mwaya uku kumutungulula isambililo. Limwi mungamunena ukuwelenga Ivyeo navyuze umwi buku lya kuti Uzye Baibo Ikasambilizya Ukuti Uli? nu kuwelenga amalembelo alimo. Mwazwini ukupekanya ukulongana ala akweti uyo wakuya asukapo pa kulongana. Mukomelezyini ukuti awelenga Ulupungu Lwa Mulinzi na Loleni! lyonsi lino wapokelela impapulo zizyo. Ndi cakuti umu lulimi lwakwe mwaya Watchtower Library nanti Watchtower ONLINE LIBRARY,  mungamulanga ivyakucita pakuti aomvya iviombelo vii ukwasuka amauzyo amuli Baibo. Ndi cakuti mukucita vivyo, ukwaula nu kutwisika umusambi winu alatandika ukutemwa sana ukuisambilizya Baibo.

6. (a) Uzye mungazwa uli umusambi ukutandika ukutemwa sana Baibo? (b) Uzye umusambi alacita uli ndi cakuti watemwa sana Amalembelo?

⁶ Ukuya kwene, tutalinzile ukupatikizya umuntu ukuwelenga nu kuisambilizya Baibo. Lelo, lekini twaomvya iviombelo vino iuvi lyakwe Yeova likatupeela ku kwazwilizya asambi ukutemwa sana Baibo. Umukuya kwa nsita, cingalenga ukuti asambi aaya nu ufuma cumi yalanda wakwe vino kalemba wa masamu walanzile ati: “Lelo nemo natemwisya ukukupalamila, we Leza! Akuli wewe we [Yeova] akuno nemo nazina.” (Masa. 73:28) Umupasi wakwe Yeova ulatwalilila ukwazwa asambi yamusango uo.

7. Uzye Yesu wasambilizye uli ya kakosola yilandwe lisuma? (Lolini icikope cakutandikilako.)

⁷ Muli Mateo icipande 10, tukazana vino Yesu wanenyile atumwa yakwe 12. Ukucila ukulanda sile icilande lande, walandanga pa visinka ivicindame. ^[1] Atumwa yasumvile sana amano kuli vino Yesu wayasambilizyanga pali vino yangaasimikila ningo. Lyene atumwa yaile umu mulimo. Lino yaweni inzila zino Yesu waomvyanga, nayo izile yaya yakasambilizya yasuma sana. (Mate. 11:1) Tungasambilizya asambi yakwe Baibo ukuya aomvi yasuma ailandwe lisuma. Lekini lyene tusambilile pa nzila ziili zino tungaomvya pa kwazwa apya.

8, 9. (a) Uzye Yesu wacitanga uli pa kusimikila? (b) Uzye tungazwa uli ya kakosola apya pakuti yakolanya vino Yesu wacitanga pa kulanzyanya na antu?

⁸ Mwalanzyanya na antu. Yesu walandanga uku muntu wenga na wenga pa Wene. Walanzyanyizye ningo sana nu mwanaci pa cifula cakwe Yakobo icayelile umupiipi nu musumba wa Sika. (Yoa. 4:5-30) Nupya walanzile na Mateo Levi, kasonkesya wa misonko. Amabuku ya malandwe yataalanda sana pa kulanzyanya kwene kuu, lelo Mateo wazumile ulwamo lwakwe Yesu nu kuya umulondezi wakwe. Mateo na yauze yuvwile kuno Yesu wavwanzile pa nsita itali lino yakweti icimulo umu ng’anda yakwe Mateo.—Mate. 9:9; Luka 5:27-39.

⁹ Pa nsita yuze, Yesu wavwanzile na ucuza kuli Natanaeli, aatacindike antu aaku Nazaleti. Lelo, Natanaeli wasenwile myelenganyizizye yakwe. Wapingwilepo ukuvwa kuli vino Yesu umonsi uwafumile uku Nazaleti wasambilizyanga. (Yoa. 1:46-51) Fwandi tulinzile ukusambilizya yakakosola apya pakuti yalanzyanya na antu na ucuza nupya ala yatiyateeka umwenzo. ^[2] Yayo yano tukaazwilizya ukucita vii, yalaya ni nsansa ukuilolela aeneco kuno antu ya myenzo ya ufuma cumi yakupokelela icumi pa mulandu wa kuyasumbako mano alino nu kuomvya amazwi ya cikuuku.

10-12. (a) Uzye Yesu wacitanga uli pakuti atwalilile ukusambilizya antu alondanga ukusambilila api landwe lisuma? (b) Uzye tungazwa uli ya kakosola apya ukuzifya imisambilizizye yao?

¹⁰ Mwasambilizya aangatemwa ukuvwa. Yesu wakweti insita inono sile iya kusimikila. Lelo, wasumbanga insita ikulu ukusambilizya antu alondanga ukusambilila api landwe lisuma. Pa nsita imwi Yesu wasambilizye iumba lya yantu ala ali umu wato. Pa nsita kwene iiya, walesile ukuti Petulo avuwe inswi izingi umu cizungusyo nu kumunena ati: “Kufuma ndakai umavuwanga antu.” Uzye icacitiike icani pa mulandu na mazwi yano Yesu waomvizye na vino wacisile? Petulo pamwi na yauze “yakulila mato ku cituntu, yasya vyonsi, yamulondela.”—Luka 5:1-11.

¹¹ Nikodemo, uwaombelanga umu cilye cikalamba wizile atemwa vino Yesu wasambilizyanga. Walondanga ukusambilila ivingi  nomba watinanga vino antu yali nu kulanda ndi yamulola kuno akulanda na Yesu. Yesu waomvizye ningo insita, wakomaanyile na Nikodemo usiku ukutaali antu. (Yoa. 3:1, 2) I vyani vino tungasambilila uku vintu kwene vii ivyacitiike? Mwana Leza wapatulanga insita ukuti azwe umuntu wenga na wenga ukulundulula utailo. Fwandi naswe tulinzile ukuswilila kuli yano twasimikile nu kutandika ukutungulula amasambililo kuli yano yangatemwa ukusambilila.

¹² Ya kakosola apya yangazifya imisambilizizye yao ndi cakuti tukuomba nayo umu mulimo wa kusimikila. Tungayazwa ukuti yaiusya antu aakalanga nanti panono sile ukuti yangatemwa ukusambililila. Tungalenga ya kakosola apya ukuti tuombe nayo lino tukuswilila kuli yano twasimikile na lino tukuya uku kutungulula amasambililo. Ndi tukuyasambilizya vii nu kuyakomelezya, yakasimikila apya yalaalondesya ukusambilizya antu angatemwa ukusambilila Baibo nu kutandika ukutungulula amasambililo. Nupya yalasambilila ukukana fupulwa zuwa, lelo yalatwalilila ukuzizimizya umu mulimo wa kusimikila.—Gala. 5:22; lolini akambokosi akaakuti “ Ukuzizimizya Kwacindama.”

13, 14. (a) Uzye mukaelenganyapo uli pa yantu alembwa muli Baibo aipeelisye ukuti yazwe yauze? (b) Uzye mungasambilizya uli apya na acance ukuti yalanga ukutemwa uku ina na ya nkazi umu cilongano?

¹³ Amalyasi aaya muli Baibo yakalanga isyuko lino twakwata ilya kulanga vino ‘twatemwana’ na ina alino na vino tukaazwana. (Welengini 1 Petulo 1:22; Luka 22:24-27.) Mwana Leza watuuzile vyonsi vino wakweti, ukwikako sile nu umi wakwe, pa kutumikila yauze. (Mate. 20:28) Dokasi “wasumvile insita yakwe yonsi mu kuomba milimo isuma nu kukumbusuka apina.” (Mili. 9:36, 39) Maliya, nkazi wa ku Loma, “watumikilanga cuze” amu cilongano. (Loma 16:6) Uzye tungazwa uli apya ukumanya ucindami uwaya umu kwazwa aina na ya nkazi?

¹⁴ Aina Klistu aombela Leza pa nsita itali yangaamako apya ukuti yapitile pamwi uku kutandalila alwale na akoloci. Ndi calinga, avyazi yangasenda ana yao uku kutandala kwa musango uu. Ya eluda yangaombela pamwi na yauze umu cilongano nu kusininkizya ukuti akoloci yakukwata ivyakulya ivisuma alino nu kuyazifizya amang’anda. Ndi cakuti caya vivyo, acance na apya umu cilongano yangasambilila ukulanga icikuuku kuli yauze. Eluda umwi watandalilanga ya Nte aikalanga umu cifulo cino yasimikilangamo, ndi yakusimikila. Umwina uwacance uwaombanga na eluda wiyo wasambilile ukuti yonsi umu cilongano yalinzile ukuyuvwa ukuti yatemwikwa.—Loma 12:10.

15. U mulandu ci uno ya eluda yalinzile ukusumbila sana amano kuli vino aonsi yakulunduluka umu cilongano?

¹⁵ Vino Leza akaomvya aonsi ukuti yasambilizya umu cilongano, cacindama ukuti aina yaezya na maka ukuya ya kasambilizya yasuma. Ndi mwemwe ya eluda, uzye mungaezya ukuvwako lino umuomvi akupituluka umwi lyasi lino ali nu kulanda? Ukucita vivyo kungalenga asambilile ukuya kasambilizya musuma.—Neem. 8:8. ^[3]

16, 17. (a) Uzye Paulo walangilile uli ukuti walondanga ukwazwa Timoti ukulunduluka? (b) Uzye ya eluda yangaasambilizya uli ningo yayo alaya acemi umu cilongano uku nkoleelo?

¹⁶ Ndakai kukalondekwa sana ya kacema umu vilongano, nupya yaayo aalaomba umulimo uu uku nkoleelo yalinzile ukusambiliziwa. Paulo walondolwile vino ukusambilizya kulinzile ukuya, lino wanenyile Timoti ati: “We mwanane mu utailo. Komeleka mu cikuku cino twakwata muli Klistu Yesu. Maila aingi ukauvwa nkusambilizya pa manso yakwe yakambone aingi. Lyene ndakai nkulonda kuti wemo ulasike mulimo uu ku antu atailwe, yano angasambilizya antu yauze.”  (2 Tim. 2:1, 2) Timoti wasambilile ivingi lino waombanga pamwi nu mutumwa, uwali eluda. Lyene Timoti waomvyanga imisambilizizye ino Paulo waomvyanga umu mulimo wa kusimikila ni milimo yuze yakwe Leza.—2 Tim. 3:10-12.

¹⁷ Paulo wasambilizye Timoti ningo sana. Wamusendanga kuno wayanga. (Mili. 16:1-5) Ya eluda yangaakolanya Paulo lino yakusenda aomvi uku kucema amu cilongano ndi calinga. Ndi ya eluda yakucita vivyo yakaazwa aina ukuilolela vino yalinzile ukusambilizya, kuya nu utailo, ukuteeka umwenzo, alino nu kutemwa, imiyele ino angalizi yalinzile ukukwata. Inzila kwene ii ikaazwilizya ukusambilizya aalaya acemi uku nkoleelo, aalasakamala “mauvi yakwe Leza.”—1 Pet. 5:2.

18. U mulandu ci uno mulimo wa kusambilizya yauze ulinzile ukuyela ucindame sana kuli sweswe?

¹⁸ Ukusambilizya yauze kwacindama sana ndakai pa mulandu nu kuvulilako kwa milimo umwi uvi lyakwe Yeova. Vino Yesu na Paulo yasambilizyanga yauze vingatwazwa na ndakai kwene. Yeova akalonda ukuti aomvi yakwe ndakai yasambiliziwa ningo pakuti yaomba ningo imilimo umwi uvi. Leza watupeela isyuko lya kusambilizya apya ukuti yamanye ivikalondekwa pakuti yaomba ningo umu cilongano. Lino ivintu vikwipilako umu nsi alino nu mulimo wa kusimikila ukukulilako, umulimo wa kusambilizya nao ukalondekwa ukuombwa zuwa sana pano wacindama.

19. U mulandu ci uno mungasininkizizya ukuti ukuombesya kwinu lino mukusambilizya yauze umu mulimo wakwe Yeova kulalenga ukuti ivintu vizipe?

¹⁹ Ukuya kwene ukusambilizya yauze kukasumba insita nupya kukalondeka ukuombesya. Nomba Yeova nu mwanakwe Yesu yalatwalilila ukututungilila nu kutupeela amano pakuti twasambilizya ningo yauze. Tulaya sana ni nsansa ukulola vino yano tukusambilizya ‘yakuombesya.’ (1 Tim. 4:10) Si lekini ukuti naswe kwene cila muntu tutwalilile ukulunduluka umu mulimo uno Yeova watupeela.