Paulo walemvile ukuti: “Nafwile pa mulandu wa kulondela masunde, pakuti ningaya nu umi kuli Leza.”—Gala. 2:19, NWT.

Vino Paulo walemvile vyalemenkine ni cisinka cino wanenyile amu vilongano ivyali mu citungu ca Galatiya icateekwanga na Ina Loma. Aina Klistu yamwi kuku yatandike ukucita vino ya kasambilizya ya ufi yacitanga. Aonsi yaa yasambilizyanga ukuti pakuti umuntu akapusuke alinzile ukulondela Masunde yakwe Mose, sana sana ilya kusilamulwa. Nomba Paulo wamanyile ukuti Leza atalondanga ataila ukusilamulwa. Walanzile ivisinka ivyuvwike ivyalangilile ukuti ivisambilizyo vii ivya ufi, nupya wakomizye utailo wa ina umwi lambo lyakwe Yesu Klistu.—Gala. 2:4; 5:2.

Baibo ikalanda ukuti umuntu nga wafwa asimanya nanti acimwi. (Kasa. 9:5) Lino Paulo walanzile ukuti: “Nafwile pa mulandu wa kulondela masunde,” walozizye umukuti amasunde yakwe Mose yatakweti amaka pali aliwe. Lelo, Paulo wasininkizye ukuti pa mulandu nu utailo umwi lambo, wali nu kuya uwa “umi kuli Leza.”

Masunde yalenzile ukuti Paulo asenuke. U mu nzila ci? Walondolwile ukuti “umuntu akacitwa kuya mololoke pa manso yakwe Leza pa utailo wakwe muli Yesu Klistu.” (Gala. 2:16) Masunde yacisile ivintu ivicindame sana. Paulo walondolwelile Aina Galatiya ukuti: “Yalunzilweko pakuti imembu zisokololwe, ukufikila lino umwana uwalavilwe wali nu kwiza; nupya yapeezilwe kuli kakundanya ukupitila muli ya malaika.” (Gala. 3:19, NWT.) I cacumi, masunde yalangilile ukuti antunze aatamalilika nupya ayembu yataali nu kulondela masunde, nupya yalondekwanga ilambo ilimalilike. Fwandi masunde yazwile antu ukumanya ukuti Yesu wali ali “umwana uwalavilwe,” Klistu. Nga mukulanga utailo muli Yesu Klistu, Leza alamulola ukuti mwemwe yololoke. (Gala. 3:24) Paulo walanzile vii pano pa mulandu na masunde wazumiile nu kutaila Yesu. Fwandi Paulo “wafwile pa mulandu wa kulondela masunde”, nupya wizile aya uwa “umi kuli Leza.” Masunde yatakweti amaka pali aliwe, nomba Leza wakweti.

Paulo walanzile ivikolineko muli kalata wino walembiile Aina Loma. Walemvile ukuti: “Ali vino cili na kuli mwemwe mwe inane. Pano mwemwe vilundwa vya mwili wakwe Klistu, mwafwa pamwi naliwe ku Masunde yakwe Mose . . . Sweswe antungwa kufuma ku kuteekwa na Masunde, pamulandu wakuti tukoline wa afwe kuli cino icatutesile uzya.” (Loma 7:4, 6) Api lembelo lii na pali Galatia 2:19, Pakalangilila ukuti Paulo atalandanga pa kufwa wa muyembu wakwe vino Masunde yalandanga. Nomba, walandanga pakuya nu untungwa. Masunde yatakweti amaka pali aliwe alino na pali yauze aali wakwe aliwe. Yali antungwa pa mulandu wakuti yataile umwi ilambo lyakwe Klistu.