“Tukulonda Tuye Nawe”
“Tukulonda tuye nawe, pano swemo tuvwa ukuti Leza waya kunomuli.”—ZAKALIYA 8:23.
INYIMBO: 32, 31
1, 2. (a) I vyani vino Yeova walanzile ukuti ivilaacitika ndakai? (b) A mauzyo ci aamaasukwa umu cipande cii? (Lolini cikope cakutandikilako.)
YEOVA walanzile ukuti umu manda ya ndakai, “apa inamasi yonsi akaalanda indimi zipusanepusane, ainamasi ikumi yalaiza ku Muyuda wenga, nu kumunena yati, ‘Tukulonda tuye nawe, pano swemo tuvwa ukuti Leza waya kunomuli.’” (Zakaliya 8:23) “Umuyuda” akaimililako apakwe nu mupasi wakwe Leza uwa muzilo. Nupya yakaamwa nu kuti “antu yakwe Leza acumi [nanti Izlaeli wakwe Leza].” (Galatiya 6:16) “Aina masi ikumi” yakaimililako yonsi akwata upaalilo wakwikala pano nsi amanda pe. Yamanya ukuti Yeova wapolelela iumba lii ilya yapakwe nupya yakalola ukuti i syuko ukupepa Leza capamwi nayo.
2 Wakwe vivi kwene vino Zakaliya walanzile, Yesu walanzile ukuti antu yakwe Leza yalaombela pamwi. Walumbwile antu yaayo aakwata upalilo wa kwikala ukwiyulu ukuti “ufyo unono” na yayo akwata upaalilo wa kwikala pano nsi ukuti “mfwele nazyuze.” Nomba Yesu walanzile ukuti yalaya “ufyo onga” nupya yalakonka “mucemi wenga” kuli kuti Yesu. (Luka 12:32; Yoane 10:16) Nomba vino pali maumba yaili, yamwi yangelenganya ukuti: (1) Uzye amfwele na zyuze yalinzile ukumanya mazina yakwe yonsi apakwe? (2) Uzye apakwe yalinzile ukuilola uli? (3) Ndi cakuti umwi umu cilongano cino nayamo watandika ukulyako umukate nu kumwako waini pa Ciusyo, uzye ndinzile ukumulola uli? (4) Uzye ndinzile ukusakamala ndi cakuti nalola impendwa yakwe yaayo akalyako mukate nu kumwako waini pa Ciusyo ikuya ikukulilako? Icipande cii cimaasuka mauzyo yaa.
UZYE TULINZILE UKUMANYA MAZINA YAKWE YONSI APAKWE ALIPO NDAKAI?
3. U mulandu ci uno tutanga tumanye ningo aaya umwiumba lyakwe ya 144,000?
3 Uzye amfwele nazyuze yalinzile ukumanya mazina yakwe yonsi apakwe alipo ndakai? Awe foo. U mulandu ci? U mulandu wakuti kusi angamanya ningo ukuti antu yaa yalapeelwa cilambu nanti foo. [1] (Lolini amazwi pa mpela ya cipande.) Nanti cakuti Leza wayama ukuti yakaye ukwiyulu, yalapokelela icilambu cii ndi cakuti yatwalilila ukuya acisinka. Satana wamanya vii, nupya akaomvya ‘ya kasema yaufi’ pakuti “yaponzye” apakwe. (Mateo 24:24) Aina Klistu apakwe yatanga yamanye ukuti yalapokelela cilambu mpaka lino Yeova wayasokolwela ukuti aacumi kuli aliwe. Yeova akayapeela icimanyililo cakusyalikizya, lino yatali yafwe nanti alayapeela icimanyililo cico lino kwasyala panono ukuti “ucuzi ukulu cuze” utandike.—Umbwilo 2:10; 7:3, 14.
Yesu i ntunguluzi itu, nupya tulinzile ukumukonka
4. Ndi cakuti tutanga tumanye mazina yakwe yonsi apakwe alipo pano nsi ndakai, tungapita nayo tutuli?
4 Ndi cakuti tutanga tumanye mazina yakwe yonsi apakwe ndakai, uzye amfwele nazyuze yangapita nayo yatuuli? Baibo ikati ainamasi ikumi “yalaiza ku Muyuda wenga, nu kumunena yati, ‘Tukulonda tuye nawe, pano swemo tuvwa ukuti Leza waya kunomuli.’” Amazwi yaa yakulanda pa Muyuda wenga, lelo amazwi aakuti “nawe” alino na “kunomuli,” yakulozya uku yantu aingi. Cii cikupiliula ukuti Muyuda asi umuntu wenga lelo akwimililako iumba lya apakwe. Amfwele nazyuze yamanya ukuti vikwene avino caya, nupya yakaombela Yeova pamwi ni umba lii. Yatalinzile ukumanya amazina yakwe yonsi apakwe pakuti alino yalondela wenga na wenga. Yesu ali ntunguluzi itu, nupya Baibo ikatunena ukuti tulinzile ukulondela sile aliwe.—Mateo 23:10.
UZYE AINA KLISTU APAKWE YALINZILE UKUILOLA ULI?
5. U kucelula ci kuno apakwe yalinzile ukwelenganyapo sana, nupya u mulandu ci?
5 Apakwe yalinzile ukwelenganyapo sana apa kucelula ukwaya pali 1 Kolinto 11:27-29. (Welengini.) Uzye umupakwe angalya uli umukate nu kumwa waini pa ciusyo “mu musango utalinzile”? Ndi cakuti umuntu wiyo wata ukuya cuza wakwe Yeova nu kuta ukuya uwa cisinka kuli aliwe, alino lyene umuntu wiyo walya umukate nu kumwa waini, ala asikulanga umucinzi kuli Yeova. (Ayebulai 6:4-6; 10:26-29) Amazwi yaa akucelula yakaiusyako apakwe ukuti yalinzile ukutwalilila ukuya acisinka pakuti yakapokelele “cilambu kwiyulu, icili ulwamo lwakwe Leza muli Klistu Yesu.”—Filipi 3:13-16.
6. Uzye Aina Klistu apakwe yakailola uli?
6 Paulo wanenyile Aina Klistu apakwe ati: “Ne munyepwe pa mulandu wa kutumikila Umwene, nkumupapata kuti wikazi nu umi winu viye kulingana nu mwata wa lwamo luno mwamilwe.” Uzye yaali nu kucita uli vii? Paulo walondolwile ati: “Muye afuke nupya aicefye lyonsi. Mwaposya kuti mulange kutemwana kuli cila muntu, ezyini kuombesya na maka mu kuleka umupasi wakwe Leza umulundanye myenzo. Mwacita cii mukwikala mu mutende.” (Efeso 4:1-3) Umupasi wa muzilo wakwe Yeova ukaazwa aomvi yakwe ukuya aicefye. (Kolose 3:12) Fwandi apakwe yasiilola kwati yacindama ukuluta yauze. Yamanya ukuti Yeova asipeela apakwe umupasi wa muzilo uwingi ukuluta yauze. Nupya yasilola kwati aliyo yanguvwikisya icumi ca muli Baibo ukucila aliwensi. Nupya yatanga yanene muntu muze ukuti wapakwa nupya afwile atandike ukulya umukate nu kumwa waini pa Ciusyo. Lelo yaicefya nupya yamanya ukuti Yeova sile aakaama antu ukuya ukwiyulu.
7, 8. I vyani vino Aina Klistu apakwe yatalinzile ukwenekela, nupya u mulandu ci?
7 Nanti cakuti apakwe yakalola ukuti i syuko ukuya ukwiyulu, yatanga yenekele yauze ukuyapeela sana umucinzi. (Efeso 1:18, 19; welengini Filipi 2:2, 3.) Nupya yamanya ukuti lino Yeova wayasoolwile, atalesile ali wensi amanye ukuti yati yapakwa. Fwandi umupakwe atalinzile ukuzunguka ndi cakuti yamwi yatazumile papo kwene ukuti watapakwa. Afwile ukwiusya ukuti Baibo ikatunena ukuti tutalinzile ukuzumila zuwa ndi umwi walanda ukuti Leza wampeela umulimo umwi uiyele. (Umbwilo 2:2) Apa mulandu wakuti umupakwe atalinzile ukwenekela yauze ukumusumbako sana mano, atalinzile ukunena yano yakomenkana umuku wakutandikilapo ukuti wene wapakwa. Nupya, limwi atalinzile ukunena nanti aliwensi. Nupya atalinzile ukutandika ukuyuvwa pa vintu visuma vino alaacita ukwiyulu.—1 Kolinto 1:28, 29; welengini 1 Kolinto 4:6-8.
8 Aina Klistu apakwe yasilola kwati yalinzile sile ukuya pamwi na apakwe yauze lyonsi, kwati namanye yaaya umu kaungwe kamwi. Yasitandika ukulonda apakwe yauze pakuti yalanda pali vino yaapakwa nanti ukukomaana umu tumaumba pakuti yasambilila Baibo capamwi. (Galatiya 1:15-17) Ndi cakuti caya vii umu cilongano mutanga muye kulemenkana. Miombele ii ingapusana sana na vino umupasi wa muzilo ukaomba, pano ukaazwa antu yakwe Leza ukuya amutende nupya alemenkane.—Welengini Loma 16:17, 18.
UZYE MULINZILE UKUYALOLA ULI?
9. U mulandu ci uno tulinzile ukucenjela sana kuli vino tukalola apakwe? (Lolini akambokosi akaakuti “ Kutemwa ‘kutakwata kasa.’”)
9 Uzye mulinzile ukulola uli aina na ya nkazi apakwe? Yesu wanenyile asambi yakwe ati: “Mwensi mwemwe ina.” Nupya walanzile ati: “Pano wino wensi akaikuzya wene alacefiwa, na wino wensi akaicefya wene alakuziwa.” (Mateo 23:8-12) Fwandi citanga ciye ningo ukukumbwa sana umuntu, nanti cakuti u mwina wakwe Klistu umupakwe. Lino Baibo ikalanda pali ya eluda, ikatukomelezya ukuti twakolana na aliyo umu utailo, lelo isitunena ukuti tulinzile ukupanga umwi ukuya intunguluzi itu. (Ayebulai 13:7) I cacumi ukuti Baibo ikati yamwi “yalinzile [ukucindikwa].” Lelo cino Baibo yalandila vii a pa mulandu wakuti “yakaomba umulimo usuma uwa kutungulula” nupya “yakaombesya mu kukosola nu kusambilizya,” asi apa mulandu wakuti yapakwa. (1 Timoti 5:17) Ndi cakuti tukupeela sana apakwe umucinzi nu kuyasumbako sana mano, tungalenga yuvwe insonyi. Ni ciipisye icakuti limwi tungalenga yatandike ukuya ni cilumba. (Loma 12:3) Tutanga tutemwe ukucita icili consi icingalenga umwi pa ina yakwe Klistu apakwe acite icintu ca musango uwo iciipe!—Luka 17:2.
Uzye mulinzile ukulola uli aakalyako umukate nu kumwako waini pa Ciusyo? (Lolini mapalagalafu 9-11)
10. Mungalanga uli ukuti mwacindika Aina Klistu apakwe?
10 Uzye tungalanga uli ukuti twacindika yano Yeova wapaka? Tutalinzile ukuyuzya vino cali pakuti yapakwe. Aineco aafwile ukumanya vivyo, swemo tutakwata insambu ya kumanya. (1 Tesalonika 4:11; 2 Tesalonika 3:11) Nupya tutalinzile ukwelenganya ukuti yaiya nanti aci, avyazi nanti yalupwa yao yauze nayo kwene yapakwa. Kusi umuntu akakwata upaalilo pa mulandu wakuti ulupwa lwakwe lwakwata upaalilo. (1 Tesalonika 2:12) Nupya tutalinzile ukuuzya mauzyo angalenga yauze yasoke. Citanga ciye ningo ukuuzya umuci wa mwina umupakwe ukuti: ‘Uzye ukauvwa uli ndi welenganya ukuti uliikala amanda pe pano nsi ukwaula uwako?’ Twasininkizya ukuti umu nsi ipya, Yeova ‘alikusya icaumi consi.’—Masamu 145:16.
11. Uzye ndi ‘tusikucindika’ sana apakwe tukaicingilila uli?
11 Ndi cakuti tusiikulola ukuti apakwe yacindama sana ukuluta yauze, naswe kwene tungaicingilila. Uzye tungaicingilila uli? Baibo ikatusoka ukuti limwi umu cilongano mungaya aina aufi aangaitaka ukuti yapakwa. (Galatiya 2:4, 5; 1 Yoane 2:19) Alino nupya, apakwe yamwi yangata ukuya acisinka. (Mateo 25:10-12; 2 Petulo 2:20, 21) Lelo ndi cakuti twata “kucindika,” sana apakwe tutalaayakonkelezya, nanti cakuti yaapakwa, yamanyikwa sana nanti sile yaombela Yeova pa myaka ingi. Ndi cakuti yata ukuya acisinka nanti ukufuma umu cilongano, swemo tulatwalilila ukutaila Yeova nu kutwalilila ukumuombela.—Yuda 16.
UZYE TULINZILE UKUSAKAMALA PA MULANDU NI MPENDWA YAKWE YAYO AAKALYAKO UMUKATE NU KUMWAKO WAINI PA CIUSYO?
12, 13. U mulandu ci uno tutalinzile ukusakamala pa mulandu ni mpendwa yakwe yayo aakalyako umukate nu kumwako waini pa Ciusyo?
12 Pa myaka iingi, impendwa yakwe yayo aakalyako umukate nu kumwako waini pa Ciusyo yacepanga. Nomba ndakai, impendwa ikukulilako. Uzye tulinzile ukusakamala? Awe. Lekini tulole umulandu uno twalandila vii.
13 “[Yeova] wamanya antu yakwe.” (2 Timoti 2:19) Aina aakapenda impendwa ya antu aakalyako umukate nu kumwako waini pa Ciusyo yasiimanya wino wapakwa umu cumicumi. Pa mpendwa iyo pakaya na aakalola kwati yapakwa fwandi ala asi yapakwe. Yamwi alyangako mpiti umukate nu kumwako waini, izile yata. Yamwi yangalola kwati yalaya umu kuteka na Yesu kwiyulu, fwandi limwi ala u mulandu wa kuti yakwata intazi ya myelenganyizizye. Fwandi, tutamanya ningo apakwe aasyala pano nsi.
14. Uzye Baibo ikatuuli apa mpendwa yakwe yayo apakwe alaya pano nsi lino ucuzi ukulu cuze ulatandika?
14 Apakwe yalaya umu ncende izingi pano nsi lino Yesu aliiza umu kuyasenda ukwiyulu. Baibo ikati Yesu “alatuma angeli yakwe kukukonganika asoololwe yakwe kufuma ku mpela yonga ya nsi kufika nu ku yuze kwene.” (Mateo 24:31) Baibo nupya ikalangilila ukuti umu manda aakusyalikizya, kulaya impendwa inono yakwe yayo apakwe alasyala pano nsi. (Umbwilo 12:17) Lelo Baibo italanda impendwa yakwe yayo apakwe alaya pano nsi lino ucuzi ukulu cuze ulatandika.
15, 16. I vyani vino tulinzile ukumanya pali ya 144,000 yano Yeova akasoolola?
15 Yeova aliwe akasoolola apakwe. (Loma 8:28-30) Yeova watandike ukusoolola apakwe lino Yesu watuutulwike. Cikaloleka kwati umu nsita ya atumwa, Aina Klistu yonsi acumi yasoolwilwe ukuya apakwe. Lino papisile imyaka ingi, aingi pali yano yatangi Aina Klistu yatakonkanga Klistu nu mwenzo onsi. Nomba, pa nsita iya, Yeova wasoolwile antu anono ukuya apakwe yano yali Aina Klistu ya cumi. Antu yaa yaali kwati ingano zino Yesu walanzile ukuti zyali nu kukula muli kalolo. (Mateo 13:24-30) Umu manda yakusyalikizya, Yeova watwalilila ukusoolola antu kuti alaya umwi umba lyakwe ya 144,000. [2] (Lolini amazwi pa mpela ya cipande.) Fwandi ndi cakuti Yeova wapingulapo ukusoolola yamwi lino kwasyala sile panono ukuti impelelekezyo ifike, tulataila ukuti vino watapingulapo ukucita vili sile ningo. (Ezaya 45:9; Danieli 4:35; welengini Loma 9:11, 16.) [3] (Lolini amazwi pa mpela ya cipande.) Tulinzile ukucenjela ukuti tutacita kwati aomvi ailizyanyizye pali vino umukalamba wa incito wacisile kuli yano wingizye incito ala kwasyala panono kuti inuke.—Welengini Mateo 20:8-15.
16 Asi yonsi aakwata upaalilo wa kuya ukwiyulu aaya umwi umba lya “Muomvi Mutailwe uwa Mano.” (Mateo 24:45-47) Wakwe vivi kwene vino cali umu nsita ya atumwa, ndakai Yeova na Yesu yakuomvya antu anono ukuliisya nanti ukusambilizya antu aingi. Umu nsita ya atumwa Aina Klistu apakwe anono sile, ali yano yaomvizye ukulemba amalembelo ya Ina Klistu aciGliki. Ndakai, Aina Klistu apakwe anono sile, aliyo yakwata umulimo wa kupeela antu yakwe Leza “vyakulya vyao pa nsita ilinge.”
17. I vyani vino mwasambilila umu cipande cii?
17 I vyani vino twatitusambilila umu cipande cii? Yeova wapingulapo ukuti akapeele antu umi wa pe pano nsi alino na yaayo aalateeka pamwi na Yesu ukwiyulu. Yeova akalambula aomvi yakwe yonsi, “Muyuda” alino na “aina masi ikumi,” nupya akalonda yonsi ukulakonka masunde aliyamwi nu kutwalilila ukuya acisinka. Yonsi yalinzile ukuya aicefye. Yonsi yalinzile ukumuombela capamwi nu kuya alemenkane. Nupya yonsi yalinzile ukuombesya pakuti mu cilongano muye umutende. Lino tukuya tukupalamila sana uku mpelelekezyo, lekini swensi tutwalilile ukuombela Yeova nu kuya ufyo onga lino tukukonka Klistu.
^ [1] (palagalafu 3) Wakwe vino ilembelo lya Masamu 87:5, 6, likalanda, ukunkolelo limwi Leza angaca asokolole mazina yakwe yonsi aalateeka na Yesu ukwiyulu.—Loma 8:19.
^ [2] (palagalafu 15) Nanti cakuti ilembelo lyakwe Milimo 2:33 likalangilila ukuti Yesu akaazwa umwi ndi cakuti wapakwa, Yeova aliwe aakasoolola umuntu wiyo.
^ [3] (palagalafu 15) Nga mukulonda ukumanyilapo na vyuze lolini Lupungu Lwa Mulinzi ulwa Ciyemba lwakwe Mei 1, 2007, amafwa 30-31 apa cipande icikuti “Amepusho Ukufuma ku Babelenga.”
