1, 2. (a) Uzye “uwila [wakwe Leza] uwa kuzunguka” ukalozya na kuli vyani? (b) A mauzyo ci yano tumaasuka umwi sambililo lii?

YEOVA watupiile uwila ukalamba cuze lino watumile Umwanakwe, Yesu, pano nsi! (Yoane 3:16; 1 Yoane 4:9, 10) Umutumwa Paulo walondolwile ati uwila uu wali u “wila uwakuzunguka.” (2 Kolinto 9:15) U mulandu ci uno Paulo walandiile vii?

² Paulo wamanyile ukuti impolelwa ino Yesu wapeezile yaali uusininkizyo wa maka uwakuti vyonsi vino Leza walaya vilafikiliziwa. (Welengini 2 Kolinto 1:20.) Cii cikupiliula ukuti “uwila [wakwe Leza] uwa kuzunguka” asi impolelwa sile ino Yesu wapeezile. Lelo umu wila uu mwaya nu usuma alino nu kutemwa kuno Yeova akatulangizya. Uwila uu uusuma cuze icakuti tutanga tuulondolole na ningo. Uzye uwila uu ulinzile ukutulenga ukuvwa uli? Nupya uwila uu ulinzile ukutucincizya uli lino tukupekanyizizya Iciusyo ca Mfwa yakwe Yesu icilayako pali Citatu, pa Maaci 23, 2016?

3, 4. (a) Uzye mukauvwa uli ndi cakuti umwi wamupeela uwila? (b) Uzye uwila uiyele ungasenula uli umi winu?

³ Tukatemwa sana ndi cakuti umwi watupeela uwila. Amawila yamwi yaiyela sana icakuti yangasenula nu umi witu. Mwelenganye ukuti muli nu mulandu ukulu sana. Lyene yamunena ukuti umulandu uno imucita uwa kufwilapo. Nomba lilyo kwene sile umwi wino mutamanyile nu kumanya waipeelesya ukuti umulandu uno mukweti uye pali aliwe. Waipeelesya nu kuti aliwe afwe! Uzye munguvwa uli pa wila wa musango uwo?

⁴ Uwila uwo uiyele cuze, ungalenga musenuke. Namwe mungatandika ukulondesya ukuya na ukapekape nu kutemwa yauze alino nukwelela ali wensi aataaya ni cikuuku kuli mwemwe. Lyonsi mungalondesya ukulangizya ukuti mukataizya pa kuipeelesya kuno umuntu wiyo waipeelisye.

5. Uzye uwila uno Leza watupeela wakula uli ukuluta uwila ulionsi?

⁵ Uwila uno Leza watupeela wakula ukuluta uwila uno twati tulandapo umu cilangililo. (1 Petulo 3:18) Mutale mwelenganye pali cii: Swensi kwene twapyana uluyembu ni mfwa kufuma kuli Adamu. (Loma 5:12) Ukutemwa u kwalenzile ukuti Yeova atume Yesu pano nsi nu kwizafwila antu yonsi, lino “wacuzile ukufika nu kumfwa.” (Ayebulai 2:9) Lelo impolelwa ino Yesu wapeezile ilaomba ni vicizilepo! Ilafumyapo imfwa amanda pe. (Ezaya 25:7, 8; 1 Kolinto 15:22, 26) Yonsi aataila Yesu yalikala umu mutende nu kuya ni nsansa manda pe, ukwiyulu nanti pano nsi. (Loma 6:23; Umbwilo 5:9, 10) I visuma ci na vyuze vino uwila uu ulaleta?

6. (a) I visuma ci vino mukaalolela vino uwila uno Yeova watupeela ulaleeta? (b) Lumbulini ivintu vitatu vino uwila uno Leza watupeela umatucincizyanga ukucita.

⁶ Insi ilasanguka paladaise, alwale yalapola, na afwe yalatuutuluka, vyonsi vii vyaya umu wila uno Leza watupeela. (Ezaya 33:24; 35:5, 6; Yoane 5:28, 29) Twatemwa Yeova nu mwanakwe Yesu pa kutupeela “wila wa kuzunguka.” Uzye uwila uu umatucincizyanga ukucita cani? Umatucincizyanga (1) ukukolanya sana Yesu, (2) ukutemwa aina itu, na (3) ukwelela yauze nu mwenzo onsi.

7, 8. Uzye tulinzile ukuyuvwa uli pa kutemwa kuno Klistu wakwata, nupya ukutemwa kwene kuu kulinzile ukutucincizya ukucita cani?

⁷ Icakutandikilapo i cakuti, tulinzile ukulondesya ukuomvya umi witu uku kucindika Yesu. Umutumwa Paulo walanzile ati: ‘kutemwa kuno Klistu wakwata kukatucincizya.’ (Welengini 2 Kolinto 5:14, 15.) Paulo wamanyile ukuti ndi cakuti twamanya ukutemwa kuno Yesu wakwata, kutemwa kuko kulatucincizya ukutemwa Yesu nu kumucindika. Fwandi ndi cakuti twamanya ningo vino Yeova watucitila ukutemwa kuno wakwata kulatucincizya ukulacita vintu ivikalangilila ukuti tukacindika Yesu. Tungacita uli vivyo?

⁸ Kutemwa kuno twatemwa Yeova kulatulenga ukuti twakolanya Yesu nu kulalondela sana umu ntampulo zyakwe. (1 Petulo 2:21; 1 Yoane 2:6) Ndi tukuvwila Yeova na Yesu, ala tukulanga ukuti twayatemwa. Yesu walanzile ati: “Wino wensi akapokelela masunde yane nu kuyayela, ala wene uwantemwa. Na wino wensi uwantemwa, wene alatemwikwa na Tata. Nani kwene ndamutemwa  nu kuisokolola kunoli.”—Yoane 14:21; 1 Yoane 5:3.

9. U wezyo ci uno twakwata?

⁹ Umu nsita ii iya Ciusyo, cingazipa twaelenganya pali vino tukaomvya umi witu. Fwandi cingazipa twayuzya ukuti: ‘A muli vyani muno nkakolanya Yesu? A muli vyani muno ndinzile ukuzifya?’ Cacindama sana ukuyuzya mauzyo yaa pano antu amu nsi ii yakalonda twacita vino yene yakacita. (Loma 12:2) Nga tutacenjile, tungatandika ukukolanya ya mwalimu ya mu nsi ii, antu alumbuka sana umu vya mafilimu, alino na antu alumbuka sana umu vyangalo vya kucimvyanya. (Kolose 2:8; 1 Yoane 2:15-17) Tungacimvya uli uwezyo uu?

10. A mauzyo ci yano tulinzile ukuyuzya sweineco umu nsita ya Ciusyo, nupya vino twasuka vingatucincizya ukucita cani? (Lolini cikope ca kutandikilako.)

¹⁰ Umu nsita ya Ciusyo, cingazipa ukuceceta ivyakuzwala vitu, mafilimu yano tukatamba, ni inyimbo zino tukakutikako, ukwikako sile na vino vyaya pali ya kompyuta itu, ma foni, nanti ya tabuleti. Muyuzye mweineco muti: ‘Ndi cakuti Yesu ali pano nu kulola vino nzwite, uzye ninguvwa insonyi?’ (Welengini 1 Timoti 2:9, 10.) ‘Uzye ivyakuzwala vyane vingalanga ukuti nene mulondezi wakwe Klistu? Uzye Yesu angatemwa ukutamba mafilimu yano nkatamba? Uzye angatemwa ukukutika uku nyimbo zino nkakutikako? Nga ndi cakuti Yesu waazima foni yane nanti tabuleti, uzye ninguvwa insonyi ndi cakuti walola ivilimo? Uzye cingantalila ukulondolwela Yesu umulandu uno natemelwa ukuteya ivyangalo vimwi ivya pa kompyuta?’ Ukutemwa kuno twatemwa Yeova kulinzile ukutucincizya ukusumba vyonsi vino vitalinzile ukuomviwa na Ina Klistu, nanti cakuti ivya mutengo. (Milimo 19:19, 20) Lino twaipeezile kuli Yeova, twamulavile ukuti twakulaomvya umi witu ukukucindika Klistu. Fwandi tutalinzile ukusunga iciliconsi icingalenga citutalile ukukolanya Yesu.—Mateo 5:29, 30; Filipi 4:8.

11. (a) Uzye ukutemwa kuno twatemwa Yeova na Yesu kukatucincizya uli umu mulimo wa kusimikila? (b) Uzye ukutemwa kuno twakwata kukatucincizya uli ukwazwa yauze umu cilongano?

¹¹ Ukutemwa kuno twatemwa Yesu kukatucincizya ukusimikila nu kusambilizya sana antu. (Mateo 28:19, 20; Luka 4:43) Uzye mungatantika ukuti umu nsita ya Ciusyo mukaombeko upainiya wa nsita inono pakuti mukaombeko maawala 30 nanti 50 umu mulimo wa kusimikila? Umwina umwi uwacikalamba uwafwilwa aali ni myaka 84, walolanga kwati atanga aombeko upainiya wa nsita inono pa mulandu wa musinku nu kulwalilila. Nomba ya painiya aali umu ncende yakwe yalondanga ukumwazwa. Yamwazwilizye imipitile nupya yasoolwile cifulo ca kusimikilamo icilinge icakuti aasimikilamo. Avino umwina wiyo wizile akwanisya ukuomba maawala 30. Uzye mungazwilizyako umwi umu cilongano cinu ukuombako upainiya wa nsita inono umu Maaci nanti Epulelo? I cacumi ukuti asi yonsi angaombako upainiya, lelo tungaomvya insita itu na amaka itu ukuluundako imiombele itu umu mulimo wakwe Yeova. Ndi twacita vii, tulalanga ukuti ukutemwa kuno Yesu wakwata kukatucincizya wakwe vino Paulo wacisile. I cani na cuze cino ukutemwa kuno Leza wakwata kulaatucincizya ukucita?

12. Uzye ukutemwa kuno Leza wakwata kukatulenga ukucita cani?

¹² Cakwe ciili i cakuti, ukutemwa kuno Leza wakwata kulinzile ukulenga ukuti  twatemwa ina itu. Umutumwa Yoane walemvile ukuti: “Mwe yacuza akundwe ndi Leza watutemilwe vivyo, catuzipila ukuti naswe twatemwana.” (1 Yoane 4:7-11) Fwandi pa kulanga ukuti Leza watutemwa, tulinzile ukutemwa aina itu. (1 Yoane 3:16) Tungalanga uli ukuti twayatemwa?

13. Uzye Yesu watulangilile uli ivya kutemwa antu yauze?

¹³ Vino Yesu wacitanga vikalanga vino tungatemwa yauze. Lino Yesu wali pano nsi, wavwile antu, maka maka yano yali aicefye. Wapozizye alwale, alemale, impafu, na yaciulu. (Mateo 11:4, 5) Yesu atali wa ntunguluzi zya ya Yuda, lelo uvwanga ningo ukusambilizya antu aalondanga ukusambilila pali Yeova. (Yoane 7:49) Watemilwe yayo aali aafuke nupya waombisye pakuti ayaazwe.—Mateo 20:28.

14. I vyani vino mungacita ukulanga ukuti mwatemwa aina inu?

¹⁴ Nupya insita ya Ciusyo iinsita isuma ino mungaelenganya pali vino mungaazwa aina na ya nkazi umu cilongano cinu, maka maka acikalamba. Uzye mutanga muyatandalileko? Limwi mungayatwalilako ivyakulya, ukuyazwako utumilimo twa pa ng’anda, ukuyasendako umu kulongana, nanti ukuyalaalika ukuti mukaombeko nayo umu mulimo wa kusimikila. (Welengini Luka 14:12-14.) Lekini ukutemwa kuno Leza wakwata kwamucincizya ukutemwa aina inu!

15. I cani cino tulinzile ukumanya?

¹⁵ Cakwe citatu i cakuti, ukutemwa kuno Yeova wakwata kukalenga twaeleela aina itu na ya nkazi. Swensi kwene twapyana uluyembu ni mfwa ukufuma kuli Adamu, fwandi kusi angalanda ukuti “Nemo imfwa yakwe Yesu itacindama.” Nanti sile aomvi yakwe Leza acisinka nayo kwene imfwa yakwe Yesu yacindama kuli aliyo. Swensi kwene Leza watweleela sana! U mulandu ci uno cacindamila ukumanya vivyo? Icasuko tukaacizana umu cilangililo cino Yesu walanzile.

16, 17. (a) I cani cino tulinzile ukusambilila uku cilangililo ca mwene na aomvi? (b) Ngi cakuti mwelenganya pa cilangililo cino Yesu walanzile, i vyani vino mumacitanga?

¹⁶ Yesu walanzile icilangililo apa mwene umwi uwelezile umuomvi wakwe uwamukongwile impiya izingi cuze, amadinali 60 milyoni. Lelo pa cisila, umuomvi wiyo wakanyile ukweleela umuomvi muze uwa mukongwile impiya izinono izyali sile amadinali 100. Umuomvi wiya nga welezile umuomvi muze, pano ala wene umwene watamweleela. Umwene wasosile sana lino uvwile ukuti umuomvi wakwe wakaanyile ukwelela umuze uwamukongwile impiya izinono sile. Walanzile ati: ‘Wewe muomvi mwipe! Nemo nali nakwelela inkongole zyonsi, pano wali wampapaata. Uzye nawe utali uli nu kuyela muomvi muzo luse nu kumwelela  wakwe vino nemo nali nakwelela?’ (Mateo 18:23-35) Yeova watwelela inkongole izingi cuze, wakwe vino umwene wacisile. Uzye ukutemwa kuno Yeova wakwata alino nu luse lwakwe vilinzile ukutucincizya ukucita cani?

¹⁷ Lino tukupekanyizizya Iciusyo tungayuzya sweineco tuti: ‘Uzye kwaya umwina umwi uwanduvyanya? Uzye cikantalila ukumwelela?’ Ngi cakuti avino cili, ii ali nsita yakuti twakolanya vino Yeova akaelela. (Neemiya 9:17; Masamu 86:5) Nga tukutaizya pa luse lwakwe Yeova, tulalanga uluse kuli yauze nukuyelela nu mwenzo onsi. Nga tusikutemwa nu kwelela aina itu, tutanga twenekele Yeova ukututemwa nu kutwelela. (Mateo 6:14, 15) Nga tukwelela yauze, tulaya nu luzango nanti cakuti tutanga tufumyepo vino yatuluvyanya.

18. Uzye ukutemwa kuno Yeova wakwata kwazwilizye uli nkazi umwi ukutwalilila ukuvwana na nkazi muze?

¹⁸ Cingatala ukuya pamwi na ina na ya nkazi aatamalilika. (Welengini Efeso 4:32; Kolose 3:13, 14.) Nkazi wenga wino catalile a Lily. ^[1] (Lolini amazwi pa mpela ya cipande.) Wazwilizyanga nkazi mukamfwilwa uwizina lya kuti Carol. Wamutwalanga na motoka konsi kuno akulonda ukuya, wamwazwanga ukuya umu kukala vimwi, nupya wamwazwanga ukuomba ivintu na vyuze. Nanti cakuti Lily wamucitiile vyonsi vii, Carol ataataizyanga, nupya insita zimwi citangukanga ukumwazwa. Nomba Lily walolangamo sile visuma muli Carol nupya watwalilile ukumwazwa mpaka Carol aiza alwala sana afwa nu kufwa. Nanti cakuti citangwike ukwazwa Carol, Lily walanzile ati: “Nkalondesya ukwizalola Carol nga watuutuluka. Nkulonda nkize nkamumanye ningo ndi wiza wamalilika.” Fwandi ukwaula nu kutwisika ukutemwa kuno Leza wakwata kungalenga ukuti twauvwana na ina na ya nkazi nu kuloleela insita ino antu yonsi yalaya aamalilike.

19. Uzye ‘uwila wa kuzunguka’ uno Leza watupeela umamucincizyanga ukucita cani?

¹⁹ Yeova watupeela ‘uwila wa kuzunguka.’ Lekini lyonsi twataizya pa wila uu! Insita ya Ciusyo ali nsita isuma iyakwelenganya pali vyonsi vino Yeova na Yesu yatucitila. Lekini ukutemwa kuno Yeova na Yesu yakwata kwatucincizya ukuti twakolanya sana Yesu, ukutemwa aina itu, nu kuyelela nu mwenzo onsi.