CIPANDE CA KUSAMBILILAMO 15
LWIMBO NA. 30 A Tata, Leza Wane, Napya Cuza Wane
“Ukupalama Kuli Leza Ali Cintu Cisuma” Kuli Sweswe
“Lelo nemo ukupalama kuli Leza ali cintu cisuma.” —MASA. 73:28.
VINO TUMASAMBILILAPO
Vino tungapalama sana kuli Yeova alino ni visuma ivyaya umu kucita vivyo.
1-2. (a) I vyani vino tulinzile ukucita pakuti tuye cuza umupalamisye nu muntu umwi? (b) I vyani vino tumasambilila umu cipande cii?
UZYE mwakwata cuza winu umupalamisye? Uzye mwacisile uli pakuti muye ivyuza? Mufwile mwayanga pamwi pa nsita itali, mwamanyile intazi zino yakwata, vino yatemwa alino na vino yapata. Mwizile imumanya imiyele isuma ino yakwata nupya ino mungatemwa ukukolanya. Na cii, calenzile ukuti mutemwe cuza winu.
2 Pakuti muye cuza umupalamisye na umwi mulinzile ukulazanwa pamwi nawe pa nsita itali. Naswe kwene tukalondekwa insita pakuti tumanye Yeova alino nu kumutemwa. Umu cipande cii, tumasambilila pali vino tungapalama sana kuli Yeova alino ni visuma ivyaya umu kucita vivyo. Ica kutandikilapo, katusambilile umulandu uno cazipila ukulapama kuli Yeova, cuza witu umusuma.
3. U mulandu ci uno tulinzile ukulaelenganyizizya pa mulandu uno cazipila ukupalama kuli Yeova? Langililini.
3 Ukwaula nu kutwisika, mwamanya ukuti ukupalama kuli Yeova kwazipa sana. Nomba ukumanya umulandu uno cazipila ukupalama kuli aliwe kulalenga ukuti tutwalilile ukulapalama sana ukuli aliwe. (Masa. 63:6-8) Wakwe, twamanya ukuti ukulya ivyakulya ivisuma, ukutukusya umwili, nu kupuuza pa insita iilinge, alino nu kumwa manzi vikalenga umi witu ukuya ningo. Nomba nanti ciye vivyo, aingi yasiika mano uku vintu vii nupya umi wao usiya ningo. Lelo ndi cakuti twelenganya pali vino ivintu vii vikalenga umi witu ukuya ningo, cikatwazwa ukutwalilila ukulacita ivintu vivyo. Umu nzila ili imwi kwene, twamanya ukuti ukupalama kuli Yeova u kusuma, lelo ukwelenganya pa visuma ivyaya umu kucita vivyo, kulatwazwa ukupalama sana kuli Cuza witu.—Masa. 119:27-30.
4. Ukulingana na Masamu 73:28, uzye kalemba wa masamu wayuvwanga uli?
4 Belengini Masamu 73:28. Kalemba wa Masamu 73 wali u Mwina Levi nupya wali a kimba api tempele lyakwe Yeova. Afwile wapepanga Yeova na ucisinka pa myaka iingi. Lelo wamanyile ukuti “ukupalama kuli Leza” ali cintu icali icisuma kuli aliwe nupya walondanga na yauze yamanye ukuti ali cintu cali icisuma kuli aliyo. I visuma ci ivyaya umu kucita vivyo?
“UKUPALAMA KULI LEZA” KUKALETA INSANSA
5. (a) U mulandu ci uno ukupalama sana kuli Yeova kukaletela insansa? (b) Uzye amano yano Yeova akamupeela yakamwazwa uli nu kumucingilila? (Mapinda 2:6-16)
5 Ndi cakuti twapalama sana kuli Yeova, tukaya sana ni nsansa. (Masa. 65:4) Kwaya ivintu ivingi ivikalenga twaya ni nsansa. Wakwe, ndi cakuti tukulondela vino Baibo ikalanda, tukaya na mano. Amano yaa yakatucingilila nupya yakalenga tutacita imembu izipisye. (Belengini Mapinda 2:6-16.) Ali mulandu uno Baibo ikalandila ukuti: “Uwalongo umuntu uwakwata amano nu wamanya ukwiluka ivintu.”—Mapi. 3:13.
6. I vyani ivyalenzile kalemba wa masamu ate ukuya ni nsansa?
6 Insita zimwi, na ya cuza yakwe Yeova nayo kwene yakaya nu ulanda. Kalemba wa Masamu 73 watile ukuya ni nsansa lino welenginye pa vintu vino walolanga ukuti vitaali ningo. Watandike ukwelenganya ukuti antu acitanga iviipe yaipakizyanga umi nanti cakuti yatuvwilanga Leza, nupya cii calenzile ukuti kalemba wa masamu wii asoke. Welenginye ukuti antu aali nu unkalwe nupya acilumba yali sana ni vyuma, umi usuma, nu kuti yataculanga. (Masa. 73:3-7, 12) Watandike ukutwisika ndi cakuti cali sile ningo ukulaombela Yeova. Wali sana nu ulanda nupya watiile: “I cumi kwene nkaicuzya sile ukusunga umwenzo wane usanguluke nu kufulala makasa yane muli ukaele.”—Masa. 73:13.
7. I vyani vino tulinzile ukucita ndi cakuti twaya nu ulanda? (Loliniko ni pa nkupo.)
7 Kalemba wa masamu atalesile ukuti ulanda umutoovole. Wacisilepo vimwi. Wingile “umu ncende ikalamba iya muzilo yakwe Leza,” muno Yeova wamulungike muli vino welenganyanga. (Masa. 73:17-19) Lino tuli nu ulanda, Cuza witu Yeova akamanya. Ndi cakuti twapepa kuli aliwe ukuti atutungulule nu kuzumila ukwazwa kwakwe ukupitila umwi Izwi lyakwe alino na ina na ya nkazi, tulaya na maka akuzizimizya lino twaya nu ulanda. Nupya ndi cakuti twakwata intazi, Yeova alatwazwa nu kututeekezya.—Masa. 94:19. a
Umwina Levi uwalemvile Masamu 73, wataimilila umu “ncende ikalamba iya muzilo yakwe Leza” (Lolini palaglafu 7)
“UKUPALAMA KULI LEZA” KUKALENGA TUYE NU UMI USUMA ALINO NU UPAALILO
8. U mu vintu ci vyuze muno ukupalamila kuli Yeova kwazipila kuli sweswe?
8 Ukupalama kuli Leza kwazipa sana kuli sweswe umu vintu viili. Ica kutandikilapo, tukaya nu umi usuma ndi cakuti twakwata ucuza upalamisya na Yeova. Cakwe ciili, kukalenga ukuti tuye nu upaalilo. (Yele. 29:11) Lekini tulande pa vintu kwene vii.
9. Uzye ukupalama kuli Leza kukalenga tuye uli nu umu usuma?
9 Ukupalama kuli Yeova kukalenga ukuti tuye nu umi usuma. Antu aingi ndakai yakalanda ukuti kutaya Leza. Fwandi yatamanya umulandu uno antu yayelako pano nsi nupya yazumila ukuti uku nkoleelo pano nsi patalaya umuntu nanti wenga. Nomba vino twasambilila umwi Izwi lyakwe Leza vyalenga tusininkizye ukuti Leza “akuno waya nu kuti akalambula yayo aakamulondesya.” (Aeb. 11:6) Na ndakai kwene, tukaipakizya umi pa mulandu wakuti tukacita vino twaumbiilwe ukuti twacita, kuli kuti ukulaombela Tata witu uwa kwi yulu, Yeova.—Malan. 10:12, 13.
10. I vyani vino Yeova walaya yayo umutaila? (Masamu 37:29)
10 Antu aingi yatakwata upaalilo wa ku nkoleelo. Yakaomba sile, ukutwala nanti ukutwalwa, kukuzya ana, alino nu kusunga impiya zino yangiza yaomvye lino yalata ukuomba. Yatamanya vino Leza walaya ukucita uku nkoleelo. Lelo swemo twamanya ukuti Yeova akasakamala aomvi yakwe. (Masa. 25:3-5; 1 Tim. 6:17) Twataila Leza witu nupya Cuza witu. Nupya twamanya ukuti alafikilizya vino watulaya ukutucitila. Pa upaalilo uno twakwata paya nu upaalilo uwa kulapepa Yeova amanda pe umu paladaise.—Belengini Masamu 37:29.
11. I vyani ivikacitika ndi cakuti twaya ya cuza yakwe Leza, nupya Leza akauvwa uli?
11 Ukupalama kuli Leza kukalenga ivintu vyatuzipila umu nzila izingi. Wakwe, Yeova walaya ukwelela imembu zyakwe ya cuza yakwe aakalapila. (Eza. 1:18) Na cii, cikalenga tutasakamala sana pa membu zino twacisile mpiti. (Masa. 32:1-5) Nupya tukaya ni nsansa ndi cakuti tukuzanzya Yeova. (Mapi. 23:15) Mungelenganya pa visuma na vyuze vino tukaipakizya pa mulandu wa kuya ya cuza aapalamisye na Leza. Lekini lyene tulole vino tungapalama sana kuli Leza.
VINO TUNGATWALILILA “UKUPALAMA KULI LEZA”
12. I vyani vino mwacisile pakuti mupalame sana kuli Leza?
12 Lino tutatala twabatiziwa nu kuya Inte Zyakwe Yeova, twacisile ivintu ivingi sana pakuti tuye ya cuza yakwe Yeova. Twasambilile icumi pali aliwe na Klistu Yesu, twalapile uku membu zitu, twalangizye ukuti twaya nu utailo muli Leza nupya twaombisye pakuti twamuvwila. Pakuti tuye ya cuza yakwe Yeova aapalamisye, tulinzile ukutwalilila ukulacita ivintu vii.—Kolo. 2:6.
13. I vintu cii vitatu ivingatwazwa ukutwalilila ukupalama sana kuli Yeova?
13 I vyani ivilatwazwa ukutwalilila ukupalama sana kuli Yeova? (1) Tulinzile ukutwalilila ukubelenga nu kuisambilizya Baibo. Lino tukubelenga Baibo, tulinzile ukucita na vyuze pakuti tumanyilepo ivingi pali Leza. Lelo tulinzile ukwezya na maka ukumanya vino Yeova akaelenganya pakuti twacita nu kwikala ukulingana na vino akalonda ukuti twacita. (Efes. 5:15-17) (2) Tulinzile ukukomya utailo witu ukupitila umu kwelenganya pa vintu ivikalangilila ukuti watutemwa wenga na wenga. (3) Tulinzile ukutwalilila ukupata ivintu vino Yeova wapata alino nu kuta ukuya na ucuza na antu aakacita iviipe.—Masa. 1:1; 101:3.
14. Ukulingana na mazwi aaya pali 1 Kolinto 10:31, i vintu ci vimwi vino tungaacita cila wanda pakuti twazanzya Yeova? (Loliniko ni vikope.)
14 Belengini 1 Kolinto 10:31. Cacindama sana ukuti twacita ivintu ivikazanzya Yeova. Tulinzile ukucita na vyuze ivicizile pa kusimikila nu kulazanwa umu kulongana. Pa vintu ivikazanzya Yeova paya na vino tukacita cila wanda. Wakwe, ndi cakuti tukuya acisinka mu vintu vyonsi nu kupeelako yauze vino twakwata, Yeova akaya ni nsansa. (2 Kol. 8:21; 9:7) Nupya akalonda ukuti twataizya pa umi uno watupeela. Fwandi tukasoolola ningo ivyakulya ni vyakumwa nupya tukacitako ni vintu vyuze pakuti tuye nu umi usuma. Ndi cakuti Yeova walola vino tukwezya na maka ukumuzanzya muli vyonsi vino tukacita, akatutemelwako.—Luka 16:10.
Ukulapisya ningo ya motoka, kuisakamala sweineco ukupitila umu kutukusya umwili nu kulya ivyakulya ivisuma, alino nu kuya na ukapekape ali vintu vimwi ivingalenga tuzanzye Yeova (Lolini palaglafu 14)
15. Uzye Yeova akalonda twalola uli yauze?
15 Yeova waya ni cikuuku kuli yonsi alungame na asi yalungame. (Mate. 5:45) Akalonda ukuti naswe twalanga icikuuku kuli yauze. Wakwe, tusilanda ‘iviipe uku muntu ali wensi, tutaya nu lwete, . . . lelo twaya afuuke uku yantu yonsi.’ (Tito 3:2) Nga tukwelenganya pa mazwi yaa, tutalalola yauze ukuti yatacindama pa mulandu wakuti yatazumila muli vino twazumilamo. (2 Tim. 2:23-25) Tukapalama kuli Yeova ndi cakuti lyonsi tuli ni cikuuku alino nu kulangulukilako yauze.
‘TUNGAPALAMA KULI LEZA’ NA LINO TWALUVYANYA
16. Uzye kalemba wa Masamu 73 watandike ukuyuvwa uli pa nsita imwi?
16 Insita zimwi, mungatandika ukuyuvwa ukuti Yeova ali ukutali namwe pa mulandu ni viipe vino imucita. Wakwe vino itulandapo, vikwene i vyacitikile na kalemba wa Masamu 73. Watiile: “Inganzo zyane, zyali umupiipi nu kupumbuka; intampulo zyane zyali umupiipi nu kusyelemuka.” (Masa. 73:2) Wazumile ukuti umwenzo wakwe “wawavile” nupya ‘atelenganyanga’ wali wa “nyama isielenganya” pa nkoleelo yakwe Yeova. (Masa. 73:21, 22) Nomba uzye welenginye ukuti pa mulandu wakuti waluvyanyizye, Yeova ataali nu kumutemwa alino nu kumwelela?
17. (a) Na lino kalemba wa masamu wali sana nu ulanda, i vyani vino wacisile? (b) I vyani vino tukusambililako kuli vino vyamucitikile? (Loliniko ni vikope.)
17 Ndi cakuti kalemba wa masamu wayuvwile ukuti Yeova watamutazyela, ale wayuvwile vivyo pa nsita sile inono. Nanti sile lino uvwile uyi sana, wamanyile ukuti walondekwanga ukupalama kuli Yeova. Walemvile ati: “Nomba lyene lyonsi nkaya naawe; wandema ukwi kasa li lunji. Ukampanda amano pa kuntungulula, nupya pa cisila ulantungula uku lulumbi.” (Masa. 73:23, 24) Naswe kwene tulinzile ukulenga Yeova ukuti atukomye ndi cakuti utailo witu watonta nanti lino twatandika ukuvwa uyi pali vino twaluvyanyizye. (Masa. 73:26; 94:18) Nanti cakuti twaluvyanya pa nsita imwi tungawelela kuli Yeova pano twasininkizya ukuti “waipekanya ukweleela.” (Masa. 86:5) Tulinzile ukupalama sana kuli Leza, sana sana lino tuli nu ulanda.—Masa. 103:13, 14.
Ndi cakuti tukuyuvwa ukuti tukulondekwa ukukomya utailo witu, tulinzile ukupalama sana kuli Leza ukupitila umu kupepa nu kulazanwa lyonsi ku kulongana (Lolini palaglafu 17)
TUNGATWALILILA “UKUPALAMA KULI LEZA” MANDA PE
18. U mulandu ci uno tutalatela ukupalama sana kuli Yeova?
18 Tulatwalilila ukupalama kuli Yeova manda pe nupya tutalatala tute ukusambilila pali aliwe. Baibo ikalanda ukuti “kusi aangalondolola” imilimo yakwe Yeova alino na mano yakwe.—Loma 11:33.
19. Uzye amazwi aaya umu Masamu yakalenga tusininkizye vyani?
19 Pa Masamu 79:13 pakalanda ukuti: “Swe yantu yako nupya imfwele zino ukacema, tulakutaizya manda pe; nupya tulakulumbanya umu nkulo zyonsi.” Mungasininkizya ukuti ndi cakuti mwatwalilila ukupalama kuli Leza alatwalilila ukumupaala nupya mulalanda ukuti: “Leza ali ciliwe ca mwenzo wane nupya ali cilambu cane manda pe.”—Masa. 73:26.
LWIMBO NA. 32 Mwaya Uku Lusansa Lwakwe Yeova!
a Yamwi aakatwalilila ukusakamikwa nanti ukuya nu ulanda pa nsita itali yangalondekwa ukwazwiwa na dokota. Pakuti mumanyilepo na vyuze, lolini Lupungu Lwa Mulinzi, Na. 1 2023.
