1, 2. (a) Uzye ya Nte Yakwe Yeova yakalola uli Baibo? (b) I ciputulwa ci cino mwatemwa sana muli Baibo?

SWE ya Nte Yakwe Yeova, twatemwa sana Baibo. Pano ikatuteekezya, ukutulenga ukuya nu utailo, nupya tukazanamo ivyeo ivisuma vino tungataila. (Loma 15:⁠4) Baibo lisi buku lya mano ya antu lelo ‘iizwi lyakwe Leza.’​—⁠1 Tesalonika 2:⁠13.

² Ukwaula nu kutwisika, swensi twakwata vino twatemwa sana muli Baibo. Yamwi yatemwa sana mabuku ailandwe pano amuno yakawelenga pa miyele ino Yeova waya nayo ukupitila muli vino vyalembwa pali Yesu. (Yoane 14:⁠9) Yauze nayo yatemwa mabuku ya usoowelo, wakwe Umbwilo, aakatulanga “vintu ivili nu kucitika zuwa.” (Umbwilo 1:⁠1) Yamwi nayo yakateekeziwa ndi yawelenga Masamu, lyene yauze nayo yakaipakizya ukuwelenga ivyeo vya kuyazwa umwi buku lya Mapinda. Fwandi ukwaula nu kutwisika, Baibo i buku lya yantu yonsi.

3, 4. (a) Uzye tukauvwa uli pa mpapulo zitu? (b) I mpapulo ci nazyuze zino tukapokelela izingazwa a misinku ipusane pusane?

³ Pa mulandu wakuti twatemwa Baibo, ali cino twatemelwa  ni mpapulo zitu zyonsi pano zikalanda pi Zwi Lyakwe Leza. Mabuku yonsi akulu na anono, ya magazini, ni mpapulo zyonsi a Yeova akatupekanyizizya. Impapulo zyonsi zii zikatwazwa ukupalama kuli aliwe nu kutwalilila ukukomya utailo witu.​—⁠Tito 2:⁠2.

⁴ Impapulo zitu izingi zikalembelwa ya Nte Yakwe Yeova yonsi. Lelo kwaya zimwi izikalembelwa sile limwi acance, avyazi nanti sile yauze. Ivipande ivingi na mavidyo aya pa webusaiti itu yakalembelwa antu sile asi ya Nte Yakwe Yeova. Vyonsi vivyo vikalanga ukuti mu cumi Yeova akafikilizya ulayo uno walavile ukuti alapeela antu yonsi ivyeo ivikalondekwa.​—⁠Ezaya 25:⁠6.

5. Tungasininkizya ukuti Yeova akataizya vyani?

⁵ Swe ingi tungatemwa ukukwata insita ikulu iyakuwelenga Baibo ni mpapulo zitu. Fwandi tutange twasumba insita iili imwi pa kusambilila ulupapulo ululi lonsi luno twapoka. Tungasininkizya ukuti Yeova akataizya ngi cakuti tukuomvya ningo insita itu ku kuwelenga nu kusambilila Baibo ni mpapulo zitu. (Efeso 5:​15, 16) Nomba, kwaya cimwi cino tulinzile ukucenjelako. I cani cico?

6. I cani cingalenga ukuti twafilwa ukusambilila kuli vimwi vino Yeova akasambilizya?

⁶ Ndi cakuti tutacenjile, tungatandika ukwelenganya ukuti ciputulwa cimwi ca muli Baibo citatukumile. Nga ndi cakuti limwi iciputulwa cimwi ica muli Baibo cikuloleka ukuti citange citwazwe? Nanti limwi vino iciputulwa cico cikulanda swemo vitatukumile? Uzye tukawelengamo sile zuwa zuwa nanti limwi nu kuwelenga tusiwelenga? Nga vino tukacita, limwi tungazana ukuti twakana ukuwelenga ivyeo ivisuma ivingatwazwa naswe kwene nanti icakuti vitatukumile. Tungacita uli pakuti tutacita vivyo? Tulinzile ukwiusya ukuti ivyeo vyonsi vino tukapokelela vikafuma kuli Yeova. Muli Baibo mwaya amazwi akuti: “Nene indi [Yeova], Leza winu, wiyo akamusambilizya vyakuti vyamuzipila.” (Ezaya 48:17) Umu cipande cii tumasambilila pa vintu vitatu ivingatwazwa ukusambilila ivyeo vyonsi vino Yeova akatupekanyizizya.

7. U mulandu ci uno tulinzile ukwikilako amano lino tukuwelenga Baibo?

⁷ Mwaika mano kuli vyonsi vino mukuwelenga. I cacumi ukuti iviputulwa vimwi ivya muli Baibo vyalembelwa sile antu yamwi umu kulungatika. Nomba Baibo kwene ikati “mazwi yonsi amu malembelo yene yafuma kuli Leza nupya yakaomviwa mu kusambilizya cumi.” (2 Timoti 3:16) Ali mulandu uno tulinzile ukwikilako sana amano lino tukuwelenga Baibo. Umwina umwi walanzile ukuti angasambililako ivingi umwi ilyasi sile lyonga lino wawelenga. Cico cikamwazwa ukulola vino angasambililako. Fwandi lino tutatala twatandika ukuwelenga Baibo, tulinzile ukupepa kuli Yeova ukuti atwazwe ukwika amano kuli vino tukuwelenga nu kutupeela amano ya kwiluka vino akulonda tusambilileko.​—⁠Ezila 7:10; welengini Yakobo 1:⁠5.

8, 9. (a) Lino tukuwelenga Baibo, a mauzyo ci yano tulinzile ukuyuzya sweineco? (b) Uzye ndi twawelenga pa miyele ino ya eluda yalinzile ukukwata cikatusambilizya cani pali Yeova?

⁸ Mwayuzya mauzyo mweineco. Lino mukuwelenga Baibo mwatala mwimilila imuyuzya mweineco amauzyo yaa: ‘Uzye  ivyeo vii vikunsambilizya cani pali Yeova? Uzye vii vino nawelenga ningaviomvya ntuuli mu umi wane? Ningaomvya ntuuli vikomo vii ku kwazwa yauze?’ Ndi tukwelenganya pa mauzyo yayo, tulasambilila ivingi kuli vino tukuwelenga muli Baibo. Lekini tulangilile. Baibo ikalanda pa imiyele imwi ino ya eluda yalinzile ukukwata. (Welengini 1 Timoti 3:​2-7.) Nomba sweingi asi sweswe ya eluda, fwandi limwi tungaelenganya ukuti ivyeo vii vitange vitwazwe umu nzila ili yonsi. Nomba lekini tuomvye mauzyo yatatu yano itulandapo pakuti tulole vino ukuwelenga pa miyele ii kungatwazwa swensi.

⁹ “Uzye ivyeo vii vikunsambilizya cani pali Yeova?” Yeova watunena imiyele ino ya eluda yalinzile ukukwata. Akalonda ukuti aonsi yano wasoolola ukusakamala cilongano cakwe yaye ni miyele isuma. Cii cikutulangilila ukuti icilongano cacindama sana kuli Yeova. Baibo ikati wacisile amu cilongano ukuya akwakwe “ukupitila mu wazi wa Mwana wakwe.” (Milimo 20:​28, NWT) Fwandi Yeova akalonda ukuti ya eluda yaye ni miyele isuma, nupya aliyo yalalondolola kuli aliwe pali vino yakasunga amu cilongano. Akalonda ukuti twayuvwa acingililwe lino yakutusakamala. (Ezaya 32: 1, 2) Lino twawelenga pa miyele iyo, tukasambilila ukuti mu cumi Yeova akatusakamala.

10, 11. (a) Lino tukuwelenga pa miyele ino ya eluda yalinzile ukukwata, tungaomvya uli ivyeo vivyo umu umi witu? (b) Tungaomvya uli ivyeo ivili vimwi uku kwazwa yauze?

 ¹⁰ “Uzye vii vino nawelenga ningaviomvya ntuuli mu umi wane?” Ngi cakuti mwemwe ya eluda mpiti, mulinzile ukulawelenga pa miyele iyo lyonsi pakuti mwazifyako imiyele inu. Ngi cakuti ‘mukulondesya kuya umwangalizi umwi uvi,’ mulinzile ukulaezya sana na maka ukukwata imiyele iyo. (1 Timoti 3:⁠1) Nomba swe Ina Klistu swensi tungasambililako uku miyele iyo. Yeova akalonda ukuti cila muntu ateeka umwenzo nu kupingulapo ningo pa vintu. (Filipi 4:5; 1 Petulo 4:⁠7) Ndi cakuti ya eluda yali ‘i cilangililo pakasi ki uvi’ tulasambilila kuli alio nu ‘kukolana nayo umu utailo wao.’​—⁠1 Petulo 5:3; Ayebulai 13:⁠7.

¹¹ “Ningaomvya ntuuli ivyeo vii ku kwazwa yauze?” Tungaomvya ivyeo vivyo ivikalanda pa miyele ino ya eluda yalinzile ukukwata ukwazwa asambi itu na antu yauze ukumanya vino ya eluda yapusanako ni ntunguluzi zya macalici. Ukuwelenga pa miyele ii kungatwazwa ukwiusya vino ya eluda yakaombesya umu cilongano. Nupya kulatwazwa naswe kwene ukucindika aina yaa. (1 Tesalonika 5:12) Ndi cakuti tukuyacindika lyonsi, nayo yalaaya ni nsansa lyonsi lino yakuomba umulimo uno yapeelwa.​—⁠Ayebulai 13:⁠17.

12, 13. (a) Ukuomvya mpapulo zino twakwata, i vyani vino tungalondelezya? (b) Langililini vino ukumanyilapo ivyeo na vyuze ukulunda pali vino tukuwelenga kungatwazwa ukusambililako vimwi.

¹² Mwalondelezya. Lino tukusambilila Baibo, tungalondelezya amasuko ku mauzyo yaa:

• A weni walemvile ibuku lii?

• Aukwi kuno lyalembilwe nupya alilaci lino lyalemvilwe?

• I vintu ci ivicindame ivyacitikanga lino ibuku lii lyalembwanga?

Masuko uku mauzyo yayo yangatwazwa ukumanya vino tungasambililako kuli vino tukuwelenga.

¹³ Pali Ezekelo 14:​13, 14 pakati: “Aikala mpanga ndi yifya kunondi apakuntaya acumi kunondi, lyene ndaomvya amaka yane nu kuyavunuka apa kucefya ivyakulya. Ndaponyezya impanga iyo icipowe nu kukoma antu kumwi ni nyama kwene. Nanti angala antu yatatu yaa, Nowa, Danieli na Yobo yatenzi mwenemo, yene yangaipususya sile aisikulu ku ololoke wao. Ivyalanda ne [Yeova].” Ndi cakuti twalondelezya, tukazana ukuti Ezekelo walemvile amazwi yaa ala kwasyala imyaka umupipi na 612 kuti Yesu aize pano nsi. Papo ala patipapita imyaka iingi ukufuma pano Nowa na Yobo yafwilile, nomba Yeova ala wene acili akwiusya utailo wao. Danieli wene ala acili nu umi. Limwi ala ali ni myaka 20 lino Yeova wamunenyile ukuti wali umulungame wakwe vino Nowa na Yobo yali. I vyani vino tukusambilila? Tukusambilila ukuti Yeova akalola nupya akataizya aomvi yakwe acisinka, kumwi na ance kwene.​—⁠Masamu 148:​12-14.

14. Uzye ivyeo ivingi ivyalembelwa acance vingayazwa uli, nupya vingazwa uli na yauze? (Lolini icikope cakutandikilako.)

¹⁴ Impapulo izikapangilwa acance. Twatitusambilila ukuti tungaipakizya kuwelenga mabuku yonsi amuli Baibo. Mu nzila ili imwi kwene, tungaipakizya nu kuwelenga impapulo zyonsi. Lekini tulangilile. Myaka iyapita, Yeova wapekanyizizya acance ivyeo ivingi. ^[1] (Lolini vyeo vya ku mpela.) Ivyeo vii vingazwa acance ukumanya ivyakuzizimizya amezyo lino yali uku sukulu ni vyakucimvya intazi izikayako lino muntu akukula. Nomba ivyeo vivyo vingatwazwa uli fwensi? Lino tukuwelenga ivyeo vivyo, tukasambilila intazi zino acance yakakwata nupya tukamanya ningo ivyakuyazwa nu kuyakomelezya.

15. U mulandu ci uno Aina Klistu akalamba yalinzile ukuwelengela ivyeo ivyalembelwa acance?

¹⁵ Aina Klistu akalamba yatalinzile ukuya ni cilumba cakuti yatange yawelenge ivyeo ivyalembelwa acance. Intazi izingi zino yakalemba umu mpapulo zii zikacitikila Aina Klistu yonsi. Swensi kwene tukalondekwa ukulondolwela antu vino twazumilamo, ukuya ateekele, ukukana matunko, alino nu kutaluka ivyuza iviipe nu kukanasoolola ivintu ivipe ivyakulezezyamo icitendwe. Fwandi nanti icakuti impapulo zii zyalembelwa acance, ivyeo ivyayamo vikafuma muli Baibo, nupya Aina Klistu yonsi yangasambililako ivingi.

16. I vyani na vyuze vino impapulo izikalembelwa acance zikayakomelezya ukucita?

¹⁶ Impapulo izyalembelwa acance zingayazwa ukukomya ucuza wao na Yeova. (Welengini Kasambilizya 12:​1, 13.) Na akalamba kwene yangasambililako vimwi. Loleni! wakwe Epulelo 2009 mwali icipande icatangi “Abacaice Bepusha Ukuti, Kuti Nacita Shani pa Kuti Ndeipakisha Ukubelenga Baibolo?” Icipande cico calanzileko vimwi vimwi vino acance yangacita pakuti yasambilileko vimwi kuli vino yakuwelenga, mwali na kambokosi kano yangasusula kano yangaomvya lino yakusambilila Baibo. Uzye na ikolo kwene icipande cii cayazwile? Mama umwi umutwalwe nupya uwakwata ana watiile, mpiti camutalilanga ukuwelenga Baibo. Nomba wacisileko vimwi vino icipande cii calanzile, ndakai lyene akalondesya ukuwelenga Baibo cila wanda. Watile ndakai lyene akaipakizya ukulola vino ivyeo ivyaya umu mabuku amuli Baibo vikauvwana, alino na vino angasambililako, nupya watiile, “mpiti ntatemilwepo ukuwelenga Baibo vii.”

17, 18. Tungacita uli pakuti tuipakizye ukusambilila uku vyeo ivikazanwa umu mpapulo izikalembelwa antu yonsi? Langililini.

¹⁷ Impapulo izikapangilwa antu yonsi. Ukutandika umu 2008 tukaipakizya kuomvya Lupungu Lwa Mulinzi lwa kusambililamo. Ulupungu luu lwalembelwa sana sana  ya Nte Yakwe Yeova, nomba twakwata na ya magazini akalembelwa sile antu yonsi. Uzye ya magazini ya nayo yangatwazwa uli? Lekini tulangilile. Lino mwama umuntu ukwiza uku Ng’anda ya Wene, mukauvwa ningo ndi cakuti umuntu wiyo wiza. Lino kalanda wi lyasi akulanda, mukatandika ukwelenganya pa muntu wiyo uno mwati mulalika. Mukaelenganya vino umuntu wiyo akuyuvwa pi lyasi lino akuvwa na vino ivyeo vivyo vingasenula umi wakwe. Na ci cikalenga ivyeo vivyo vimufike pa mwenzo nu kutemwa sana ilyasi ilikulandwa.

¹⁸ Vikwene avino tukayuvwa lino tukuwelenga impapulo izyalembelwa antu yonsi. Lupungu lwa Mulinzi ni vipande ivikazanwa pa jw.org vikalondolola Baibo ukuomvya amazwi ni vyeo ivyangupale ukuvwa. Ndi twawelenga ivyeo vivyo, tukauvwikisya sana Baibo nu kutemwa sana ivyeo ivyayamo vino twamanya mpiti. Nupya tungasambilila ni nzila izipya izyakulondolwelamo vino twazumilamo uku yantu yano twazana umu mulimo wa kusimikila. Na Loleni! kwene angatwazwa ukuzumila sana ukuti Kaumba akuno waya. Nupya tungasambilila ni vya kulondolwela yauze vino twazumilamo.​—⁠Welengini 1 Petulo 3:⁠15.

19. Tungalanga uli ukuti tukataizya Yeova pali vino akatupeela?

¹⁹ Mu cumi Yeova watupeela iviombelo ivingi ni vyeo ivipusane pusane ivingatwazwa. (Mateo 5:⁠3) Lekini tutwalilile ukuwelenga nu kuomvya ivyeo vino Yeova watupeela. Ngi cakuti twacita vivyo, tulasambilila vingi nupya tulalanga ukuti tukataizya Yeova pali vyonsi vino watupeela.​—⁠Ezaya 48:⁠17.