Lino kwali icilala, Yeova waneenyile Eliya ati: ‘Yanga uku Zalefati. Kuuku akuno mukamfwilwa alaya akakupeele ivyakulya.’ Lino wafisile apa mpongolo iya musumba, Eliya waweni mukamfwilwa akutiiya inkwi. Wamulenzile amanzi ya kumwa. Lino wayanga umukumuletela manzi, Eliya wamwamile amuneena ati: ‘Napaapata undeteleko nu mukate.’ Mukamfwilwa waswike ati: ‘Ntakweti umukate wakukupeela. Nkweti sile utu usu utunono utwakuti mpangile ivyakulya ivya mwanane ni vyane.’ Eliya wamuneenyiile ati: ‘Yeova watalaya ukuti ndi cakuti wampeela ivyakulya, usu na mafuta vino ukweti vitalasila mpaka imvula ice ize.’

Fwandi mukamfwilwa waswilile uku ng’anda nu kuyapangila kasesema wakwe Yeova umukate. Wakwe vino Yeova walavile, mukamfwilwa nu mwana wakwe yakweti ivyakulya pa nsita yonsi ino kwali cilala. Usu na mafuta vino yakweti vitasizile.

 Lyene icintu cimwi iciipe cacitike. Umwana umulumendo wakwe mukamfwilwa walwile mpaka afwa. Mukamfwilwa walenzile uwazwilizyo kuli Eliya. Eliya watoozile umwana wiyo umumakasa yakwe nyina nu kumutwala umu muputule wapapela umu ng’anda yakwe mukamfwilwa. Walaliike umwana wiya pa musanzi nu kupepa ati: ‘Yeova napaapata, leka umwana wii aye nu umi nupya.’ Uzye utumanya umulandu uno cayelile icakuzungusya cino Yeova wacisile? A pa mulandu wakuti pa nsita iya kutali umuntu umwi uwatazile atuutululwapo. Nupya mukamfwilwa wii nu mwana wakwe yaatali Aina Izlaeli.

Umwana wiya wali nu umi, nupya watandike ukufuuta! Eliya waneenyile mukamfwilwa ati: ‘Lola! Umwana wako ali nu umi.’ Mukamfwilwa wali sana ni nsansa icakuti waneenyile Eliya ukuti: ‘Icumi kwene wewe umuntu wakwe Leza. Namanya vii pano ukalanda sile vino Yeova wakuneena.’