SAMBILILO 100
Paulo na Timoti
Timoti wali umwina uwacance uwali umu cilongano ca ku Lisitila. Isi wali Umugiliki, nyina nawe wali Umuyuda. Yunisi nyina na Loisi nyinakulu, yasambilizye Timoti pali Yeova kufuma ukuwance.
Lino Paulo waile uku Lisitila pa lwendo lwakwe ciili ala akusimikila, waweni ukuti Timoti watemilwe sana aina nupya walondesyanga sana ukuyazwilizya. Fwandi Paulo wanenyile Timoti ukuti yapite yonsi. Lino papisile insita, Paulo wasambilizye Timoti ivyakuya kasimikila nupya kasambilizya uwi lyasi lisuma.
Umupasi wa muzilo wazwilizyanga Paulo na Timoti konsi kuno yayanga. Wanda umwi usiku, monsi umwi wanenyile Paulo mu cilolwa ukuti yaye uku Makedoniya mu kuyazwa. Fwandi Paulo, Timoti, Sailasi, na Luka yaile uku Makedoniya mu kusimikila nu kupanga ivilongano.
Aonsi na anaci aingi aa mu Makedoniya musumba uwa mu Tesalonika, izile iyaya Aina Klistu. Nomba Ayuda yamwi yuvwilanga Paulo na yano wali nayo uzuwa. Yapanzile iumba ilya unkalwe nu kulema Paulo na yano wali nayo iyayatwala uku ntunguluzi zya mu musumba, ala yakupunda iyati: ‘Aonsi yaa alwani ya uteeko uwa Ina Loma!’ Paulo na Timoti yali mu uzanzo, fwandi usiku yutukile uku Beleya.
Antu ya mu Beleya yalondesyanga ukusambilila ilyasi lisuma, fwandi Agiliki na Ayuda izile iyataila. Nomba lino Ayuda aafumile uku Tesalonika yalesile icimvulunganya, Paulo waile uku Atena. Lelo Timoti na Sailasi yasiile yakukomelezya aina aa mu Beleya. Lino papisile insita, Paulo wanenyile Timoti ukuswilila uku Tesalonika kuti akazwilizye aina yano yacuzyanga. Pa cisila, Paulo watumile Timoti mu kutandalila aa mu vilongano vyuze ivingi nu kuyakomelezya.
Paulo wanenyile Timoti ati: ‘Yayo aakalonda ukuombela Yeova yalayacuzya.’ Timoti yamucuzizye nupya yamunyefile pa mulandu nu utailo wakwe. Watemilwe pano wakweti isyuko ilya kulanga ukuti wali uwa cumi kuli Yeova.
Paulo wanenyile Aina Filipi ati: ‘Namatuma Timoti kuli mwemwe. Alamusambilizya vino cikapiliula ukuya umuomvi wakwe Yeova, nupya alamusambilizya ivyakusimikila.’ Paulo wataile Timoti. Yali ivyuza nupya yaombiile pamwi pa myaka ingi.
‘Ntakweti ali wensi uwaya wakwe aliwe aangamukomelezya monsi muno mukulondekwa. Pano yonsi yakalonda ivingayazipila, asi vyakwe Yesu Klistu.’—Filipi 2:20, 21
Limwi Mungatemwa Ukulolako na Vii
MWASAMBILIZYA ANA INU
Timoti Walondanga Ukwazwa Antu
Ungacita uli pakuti ivintu vyakuziipila, wakwe vino Timoti wacisile?
LUPUNGU LWA MULINZI
“Nemo Namutemwa wa Mwana Nupya Wene U Muomvi Mutailwe wa Mwene”
I cani icazwile Timoti ukukanaya ni insoni nupya kangalila aakaomba ningo sana?
