Afaliseo yaapasile Yesu nupya yalondanga inzila zyakumulemelamo. Yalanzile iyati atalinzile ukupozya pa wanda wi Sabata. Pa wanda umwi uwi Sabata, Yesu wazanyile impafu mu museo ala ikulengelezya. Wanenyile alondezi yakwe ati: ‘Leza amaomvya amaka yakwe pa kwazwa umuntu wii.’ Yesu waswile amati pansi alino ayasakanya ni ivu lyene nga apaka ivu lilyo mu manso ya muntu wii. Yesu wamunenyile ati: ‘Pitanga ukafulale mu cifula ca Siloamu.’ Lino waile afulala, watandike ukulola, nupya uu wali ali muku wa kutandikilako mu umi wakwe ukulola.

Antu yazungwike. Nupya yalanzile iyati: ‘Uzye wii aliwe wikalanga mu museo akulenga nanti amuze sile akoline nawe?’ Lyene umonsi nawe watile: ‘Aneene kwene nemuno navilwe impafu.’ Antu yatiile: ‘I cani caticilenga utandike ukulola?’ Lino wayanenyile vyonsi ivyacitike, yamutwazile uku Yafaliseo.

Umonsi waneenyile Afaliseo ati: ‘Yesu ali wampaka ivu mu manso nu kuneena ukuti nkafulale. Lyene lino inafulala inatandika ukulola.’ Afaliseo yalanzile iyati: ‘Ndi cakuti Yesu ali wapozya pa wanda wi Sabata, ale ataali waomvya amaka yakwe Leza.’ Lelo yauze nayo yalanzile iyati: ‘Ndi cakuti amaka yataafuma kuli Leza, nga atali wapozya umuntu wii.’

Afaliseo yamile avyazi ya monsi wii nu kuyuzya iyati: ‘Uzye i cani caticilenga  umwana winu atandike ukulola?’ Avyazi yakwe yuvwile intete pano Afaliseo yalanzile ukuti ndi cakuti ali wensi wataila muli Yesu wali nu kuzingwa mwi sunagogi. Fwandi yaswike iyati: ‘Tutamanyile. Muzyini umwineco.’ Afaliseo yuzizye umonsi wiya mauzyo aingi cakuti wasusile ayaneena ati: ‘Iimuneena vyonsi. U mulandu ci uno mucili mukunguzizya?’ Afaliseo yasosile nupya yamuzinzile.

Yesu waile mu kulonda umonsi wii nupya lino wamuzanyile wamuzizye ati: ‘Uzye wataila muli Mesiya?’ Umonsi walanzile ati: ‘Ningamutaila nga namumanyile.’ Yesu nawe watiile: ‘Aneene kwene indi Mesiya.’ Vii vyalangilile vino Yesu wali ni cikuuku. Atapozizye sile umonsi wii lelo wamwazwile nu kuya nu utailo.