Yesu atapozyanga sile alwale nu kutuutulula afwe lelo wakweti na maka pa muza ni imvula. Lino Yesu wamazile ukupepa ala ali pa mwamba, walolekisye kuli Yemba wa Galili nupya waweni ukuti kuli maimbi. Atumwa yakwe yali umu wato, nomba yafilwanga ukufiya pa mulandu ni cimuza. Yesu watentemwike umwamba nu kutandika ukuya kuno yaali ala akupita pa manzi. Lino atumwa yaweni umwi akupita pa manzi, yuvwile intete. Nomba Yesu wayaneenyile ati: ‘Aneene. Mutuvwa intete.’

Petulo watiile: ‘Mwene, ndi cakuti awewe, neene nize kuli wewe.’ Yesu waneenyile Petulo ati: ‘Iza.’ Fwandi Petulo wafumile umu wato, atandika nu kupita pa manzi ala kuli cimuza. Nomba lino wali umupiipi nu kufika kuli Yesu, walolekisye amaimbi nupya uvwile intete. Lyene uvwile ukuti watandika ukutuwila. Petulo wapunzile ati: ‘Mwene mpususye!’ Yesu wamulemile api kasa, amuneene ati: ‘I cani cino iwatwisikila? Uzye ukweti utailo?’

Yesu na Petulo yakwezile umu wato, nupya papo kwene sile icimuza casizile. Uzye ukwelenganya ukuti atumwa yuvwile uli? Yalanzile iyati: ‘Umu cumi wewe Umwana wakwe Leza.’

Uu asi ali umuku sile onga uno Yesu walesizye icimuza. Umuku uze ala Yesu na atumwa yali umu wato yakuya uku mbalama yuze yakwe yemba, Yesu wakaswile. Lino wakasulanga, kwakatwike icimuza icipisye. Maimbi yapumanga uku wato icakuti na manzi iingila umu wato. Atumwa yazyuzile Yesu, nu kupunda iyati: ‘Kasambilizya, tumafwa! Tupususye!’ Yesu wakatwike nu kuneena yemba ati: “Laala!” Papo kwene sile, icimuza na yemba vyalaazile. Lyene Yesu uzizye atumwa yakwe ati: ‘Uzye muli nu utailo?’ Lyene yatandike kulanzyanya iyati: “Nanti sile u muza na yemba vikumuvwila.” Atumwa yasambilile ukuti ndi cakuti yataila Yesu nu mwenzo onsi, yatalinzile ukutiina ivili vyonsi.