Timoti wali umulumendo uwatemilwe ukwazwa antu. Wayanga uku ncende izipusane-pusane ukukwazwa antu. Ivintu vyamuzipiile sana pa mulandu nu mulimo uno waombanga. Uzye ungatemwa ukumanya vino caali?—

Timoti wakuliile umu musumba uno yaamanga yakuti Lisitala. Lino Timoti wali umwance sana, nyinakulu Loisi pamwi na nyina Yunisi, yaatandike ukumusambilizya pali Yeova. Lino Timoti wakulanga, walondanga ukwazwa antu yauze ukusambilila pali Yeova.

Lino Timoti acili umulumendo, Paulo wamulenzile ukuti apite nawe ukuya umu kusimikila uku ncende zyuze. Timoti wazumiile. Waipekiinye ukuya-azwa antu yauze.

 Timoti wapitiile pamwi na Paulo uku musumba uwaela umu Makedoniya uno yatangi Tesalonika. Pa kuya-fika kuuku, yaali nu kupita pansi ulwendo ulutali nga alino yaya yakwela uwato. Lino yaaile iyafika, yaaile iyavwa antu aingi sana ukusambilila pali Yeova. Nomba antu yamwi yene yaasosile nupya yalondanga nu kuyakoma. Acino Paulo na Timoti yaafumileko nu kuya uku kusimikila uku ncende zyuze.

Lino paapisile imyezi, Paulo wanenyile Timoti ukuti aswilile uku Tesalonika nu kuya-lola vino aina yaombanga. Calondekanga sana ukusipa pa kuswilila uku musumba uuwa ukwali antu aipe! Nomba, Timoti waswiliile pano wasakamiile sana aina aikalanga kuuku. Lino wawezile, wizile asimikilako Paulo amazwi asuma sana. Aina uku Tesalonika yaombanga ningo sana!

Timoti waomvile na Paulo pa myaka iingi sana. Pa nsita imwi Paulo walemvile ukuti Timoti u walinzile sana ukutumwa uku vilongano ukuya-avwa aina. Timoti watemilwe sana Yeova na antu.

Uzye naawe watemwa sana antu icakuti ukalondesya nu kuyaazwa ukusambilila pali Yeova?— Ndi wacita vivyo, naawe ungaya sana nu luzango nupya ivintu vingakuziipila sana, wakwe vino caali kuli Timoti!