Yesu ali mutwe wa cilongano ca ina Klistu. (Efeso 5:23) Ndakai vino Yesu u mwene ukwi yulu, akatungulula aomvi yakwe pano nsi ukuomvya “umuomvi mutailwe nupya uwa mano.” (Belengini Mateo 24:45.) Yesu umwineco wasonta umuomvi wii nu kumupeela amaka ya kupingula pali vimwi, nomba umuomvi wii alinzile ukutwalilila ukuvwila Klistu nu kuombela aina yakwe Klistu. Uzye umuomvi kwene wii a weni? Uzye umuomvi wii akatusakamala uli?

1. Uzye “umuomvi mutailwe nupya uwa mano a weni”?

Kufuma na mpiti, lyonsi Yeova akaomvya umuntu umwi nanti iumba lya antu ukutungulula antu yakwe. (Malaki 2:7; Aebele 1:1) Pa cisila ca mfwa yakwe Yesu, atumwa na ya eluda amu Yelusalemu aliyo yatungululanga. (Milimo 15:2) Vikwene avino caya na ndakai. Iumba ilinono lyakwe ya eluda kuli kuti iumba ilikatungulula ilya Nte zyakwe Yeova, likatupeela ivikalondekwa pakuti tutwalilile ukuya na ucuza usuma na Yeova nupya likatungulula nu mulimo wa kusimikila. Iumba lii u “muomvi mutailwe nupya uwa mano” wino Yesu wasonta. (Mateo 24:45a) Yonsi aaya umwi umba ilikatungulula a ina Klistu apakwe aakalondesya ukuyateeka na Klistu ukwi yulu ndi cakuti umulimo wao pano nsi wasila.

2. I vyani vino umuomvi mutailwe akatupekanyizizya?

Yesu watiile umuomvi mutailwe wali nu kulapeela aina Klistu yauze “ivyakulya pa nsita ilinge.” (Mateo 24:45b) Wakwe viivi kwene vino ivyakulya vino tukalya vikatwazwa ukutwalilila ukuya akome nu kuya nu umi usuma, avino ni vyakulya vino tukapokelela ukufuma umwi izwi lyakwe Leza vikatwazwa ukutwalilila ukuya acisinka kuli Yeova nu kuomba umulimo uno Yesu watupeela. (1 Timoti 4:6) Tukapokeleela ivyakulya vii ukupitila mu kulongana, maukongano anono na akalamba, umu mpapulo izikalanda pali Baibo na mavidyo aakatwazwa ukumanya vino Leza akalonda alino nu kukomya ucuza witu na aliwe..

 LONDELEZYINI NA VYUZE

3. Antu yakwe Yeova yalinzile ukuombela pamwi

Iumba ilikatungulula likalondela utunguluzi wakwe Yesu lino likutungulula umulimo wakwe ya Nte Yakwe Yeova. Vikwene avino cali nu mu nsita ya ina Klistu ya kutandikilako. Tambini VIDYO.

Belengini 1 Kolinto 14:33, 40, alino mulanzyanye iuzyo lii:

• Uzye ivikomo vii vikalanga uli ukuti Yeova akalonda ya Nte yakwe ukulaombela pamwi?

4. Muomvi mutailwe akatungulula umulimo witu uwa kusimikila

Mulimo wa kusimikila ali mulimo ucindamisye uno aina Klistu ya kutandikilapo yaombanga. Belengini Milimo 8:14, 25, alino mulanzyanye mauzyo yaa:

• Aaweni aatungululanga umulimo wa kusimikila umu nsita ya ina Klistu ya kutandikilako?

• Uzye Petulo na Yoani yacisile uli pali vino atumwa yauze yayanenyile ukucita?

Mulimo wa kusimikila ali mulimo ucindamisye ukatungululwa ni Iumba Ilikatungulula. Tambini VIDYO.

 Yesu walanzile sana pali vino umulimo wa kusimikila wacindama. Belengini Mako 13:10, alino mulanzyanye mauzyo yaa:

• U mulandu ci uno umulimo wa kusimikila wacindamila sana ukwi Umba Ilikatungulula?

• U mulandu ci uno tukalondekwa “umuomvi mutailwe nupya uwa mano” ukutungulula umulimo wa kusimikila uukaombwa umu nsi yonsi?

5. Umuomvi mutailwe akatunena ivya kucita

Iumba Ilikatungulula, likanena aina Klistu umu nsi yonsi ivya kucita. Uzye likacita uli pakuti lipingulepo ivya kuyanena? Uvwini vino iumba ilikatungulula ilyaliko umu nsita ya ina Klistu ya kutandikilako lyacitanga. Belengini Milimo 15:1, 2, alino mulanzyanye mauzyo yaa:

• I cani calenzile aina Klistu yamwi aakutandikilako yatandike ukupaazyanya?

• A kuli ya weni kuno Paulo, Banaba na yauze yaile iyuzya pakuti yamanye ivya kucita pa ntazi iyakatwike?

Belengini Milimo 15:12-18, 23-29, alino mulanzyanye iuzyo lii:

• I vyani vino amwi umba ilikatungulula yacitanga lino yatatala yapingula pali vimwi?—Lolini vikomo 12, 15, na 28.

Belengini Milimo 15:30, 31 na 16:4, 5, alino mulanzyanye mauzyo yaa:

• Uzye aina Klistu ya kutandikilapo yacisile uli pali vino amwi umba ilikatungulula yayanenyile ukucita?

• Uzye Yeova wayapaazile uli pali vino yuvwilile?

Belengini 2 Timoti 3:16 na Yakobo 1:5, alino mulanzyanye iuzyo lii:

• Aekwi kuno Iumba Ilikatungulula likafumya utunguluzi lino likupingula pali vimwi ndakai?

 VINO TWASAMBILILA

Iumba Ilikatungulula, u “muomvi mutailwe nupya uwa mano” wino Klistu wasonta. Likatungulula nu kupeela ina Klistu ivyakulya umu nsi yonsi.

I vyani vino mwasambilila?

• A weni uwasonta “muomvi mutailwe nupya uwa mano”?

• Uzye Iumba Ilikatungulula likatusakamala uli?

• Uzye mwasininkizya ukuti Umba Ilikatungulula ali “muomvi mutailwe nupya uwa mano”?