Pali 1 Kolinto 6:1-8, paaya ivyeo vino Paulo walanzile pa milandu ino Aina Klistu yakwatanga na ya kapepa yauze. Uvwile uyi sana pa mulandu wakuti Aina Klistu amu Kolinto yasitakanga auze uku “cilye ca milandu cakwe yakapingula atataila.” (Cikomo 1) Paulo walanzile ningo sana imilandu ino Aina Klistu yatalinzile ukutwalila Aina Klistu yauze uku cilye, lelo yalinzile ukutwala umulandu uku cilongano. Lekini tulande pa milandu imwi-imwi ikalondolola cino tutalinzile ukucitila vivyo, nupya tumasambililako panono pa vintu vimwi ivingacitika vino isunde lii litalandapo.

Ndi twapusana nu Mwina Klistu unji mu vya uculuzi, inkoleelo tutafwile ukuomvya amaka itu ukumala uwavya uuwo, lelo tulinzile ukuvwana ukulingana na vino Yeova akaalonda. (Mapinda 14:12) Wakwe vino Yesu walangilile, cingazipa sana ukuvwana zuwa nu munji lino intazi itatala iipilako. (Mateo 5:23-26) Lelo, ica ulanda i cakuti, Aina Klistu yamwi yakapusana icipisye icakuti icifika nu ku kutwalana uku kooti. Paulo walanzile apa mulandu uu ukuti: “Kusitakana ku cilye ca milandu pakasi kinu, kukalanga paswe ukuti mwemo mwati mucimviwa.” U mulandu ci uno walandile vii? Pano ukucita vivyo u kukana-cindika icilongano, nupya u kukana-cindika Leza witu wino tukapepa. Acino fwemo twaiusya amazwi yano Paulo walanzile, aakuti: “Canga cizipe ndi cakuti yauze yatala imilandu kuno muli!”—Cikomo 7.

Nakupya, Paulo walanzile ukuti Leza wapekanya umu cilongano ivyakucita nga kwaya ukukana uvwana. Ya eluda a Ina Klistu aonsi aakaomba ningo lino yakuomvya cumi ca mu Malembelo, nupya Paulo walanzile nu kuti ya eluda ‘yangaputwila Aina Klistu milandu’ ndi “yacitika pakasi kinu.” (Vikomo 3-5) Yesu walangilile ukuti imilandu iikome, wakwe ukulanda iviipe pa muntu, nu usomvi, ifwile ukuombelwapo ukukonka ivintu vitatu vii: ica nkoleelo, antu aatiyapusana yafwile ukulanzyanya yoili sile; cakwe ciili, ndi cakuti icakutandikilapo citaomvile, yafwile ukwama kambone wenga nanti yaili, na cakwe citatu, ndi  cakuti vivyo viili vyafilikwa ukuomba, yangatwala umulandu uu uku cilongano pakuti ya eluda yakaombelepo.—Mateo 18:15-17.

Ukuya kwene, ya eluda asi ya kavwangila yakwe yasimilandu, nanti ya kaculuzya, nupya asi mulimo wao ukupanda antu mano pa vintu vivyo. Yasipeela amasunde pali vino antu yaayo ati-yapusana yalinzile ukucita pa uculuzi wao. Mu cifulo ca kucita vivyo, yaka-azwa yonsi ukuomvya Amalembelo alino nu kuzumilizyanya umu mutende. Umu milandu iitale, limwi ya eluda nga yakulonda yanganenako umwangalizi wa ciputulwa ukuyavwa, nanti sile ukuuzya ukwiofesi lya musambo ilya Nte Zyakwe Yeova. Nomba, kwayako imilandu imwi iingacitika ino Paulo ataalanzilepo. I milandu ci iiyo?

Insita zimwi, cingacitika ukuti, yamwi yatwala umulandu uku cilye pano ala yakulonda sile ukuti cimwi ciombeke ningo nupya umu mutende. Wakwe ndi cakuti ukuya uku koti aali nzila ino aatwalana yangaomvya pakuti yataane, ukupoka ana, kulipilwa ulupiya lwa kusungila umwi, nanti umwi akulonda yamulipile pali cino caticononeka, limwi umuntu ali pali yaayo aataposileko impiya lino ibanki lyulizye impiya, nanti yamwi yakulonda ukusainizyanya pali vino vilacitika ndi wenga wafwa. Alino nupya, kwaya imilandu imwi ino umwina angalola ukuti cikulondekwa sile ukuya uku koti pakuti aicingilile. *

Ndi cakuti ukuya uku kooti asi pa mulandu nu lupato, ala yatatamile ukusunda kwakwe Paulo. * Nomba, vino Umwina Klistu alinzile ukukolezya, u kucindika izina lyakwe Yeova, nu kulondesya ukuti umu cilongano muye umutende nu kuvwana. Alondezi yakwe Klistu yakamanyikilwa kuli vino yaatemwana, nupya “kutemwa kutaitemwa.”—1 Kolinto 13:4, 5; Yoane 13:34, 35.