LINO Petulo na Yoane yaafumile ukwilindi kuno Yesu waziisilwe, Maliya wene wasiile kuuku kwene. Watandike ukulila. Lyene winiime kuti alolekesye umwilindi, wakwe vino twaweni apa cikope icafumako. Umwilindi wawenimo angeli yaili! Yaamuuzizye yati: ‘I cani cino ukulilila?’

Nawe Maliya waswike ati: ‘Yati-yasenda umwene wane, ntamanyile na kuno yamwisile.’ Lyene Maliya waselewike, alola nu monsi umwi aimi. Umonsi wamuuzizye ati: ‘A weni wino ukulonda?’

Maliya welenginye ukuti limwi umonsi wiiya wali u mulimi, nu kuti manye aaliwe uwasenzile umwili wakwe Yesu. Acino, walanzile ati: ‘Nga a wewe watumusenda, uunene kuno umwisile.’ Nomba, umonsi wino Maliya wavwanzyanga wali ali Yesu kwene. Yesu wali mu mwili upusaneko icakuti Maliya ataamumanyile. Nomba lino Yesu wamwamile umwiziina, Maliya wilwike ukuti fwandi umonsi wiya wali a Yesu. Lilyokwene sile wasimwile nu kuyaneena asambi ati: ‘Nalola Umwene!’

Lyene uwanda kwene uuwa, asambi yamwi yaili yapitanga yakuya uku muzi wa Emausi, lyene umonsi umwi wayalondiile. Asambi yaali sana nu ulanda pano Yesu wafwile. Nomba lino yaapitanga, umonsi uwayalondelanga wayasimikiile ivintu ivingi ivya muli Baibo icakuti yuvwile ningo sana. Lino imiliile pamwi kuti yalyeko utwakulya, a lino asambi iilwike ukuti fwandi umonsi wiya wali a Yesu. Nomba papokwene sile Yesu watiile ukuloleka, nayo asambi kwene yaayo yaili yaasimwile ulwilo ukuswilila uku Yelusalemu kuti yakaneene atumwa pali vino yaaweeni Yesu.

Lino ivintu vii vyacitikanga, Yesu walolekiile kuli Petulo. Antu yaatemilwe sana lino yuvwile ukuti Yesu waloliike. Awe, a vino asambi yaili yaaya yaafisile uku Yelusalemu nu kuzaana atumwa. Nayo yaasimiike vino Yesu waloliike kuli aliyo ala yali apa lwendo. Lyene lino yatali-yamale nu kusimika, uzye watuumanya icintu ca kuzungusya icacitiike?

Lola apa cikope. Yesu waloliike umu muputule ala icisaasa icifungwa. Asambi yaali ni nsansa cuze! Uwanda uuwa yaazanzile sana, asi avivyo vwile? Uzye ungapenda imiku ino Yesu walolekiile uku yalondezi yakwe? Uzye wapenda wati imiku 5?

Umutumwa Tomasi wene ataalimo lino Yesu walolekiile umu muputule. Lyene asambi yaamusimikiile yati: ‘Itulola Umwene.’ Nomba Tomasi wakaanyile ukuzumila, watiile suka alole Yesu nga alino azumile. Mukwai, paapisile amanda 8 na asambi yaakolongiine nupya umu muputule ala iyafungako nu kufunga, na Tomasi kwene amuno wali. Awe, umu kupumikizya sile, avino Yesu waloliike mumu kwene. Nga alino Tomasi wazumiile.