CIPANDE 35

Ningacita uli pa kuya cuza wakwe Leza?

Lino Jeremy waponiilwe nu uzanzo wizile amanya ukuti ukuya cuza wakwe Leza i cintu cicindame. Walanzile ati: “Lino nali ni myaka 12, ya tata yafumile pa ng’anda nu kutusya. Wanda umwi usiku lino nali pa bedi, napepanga ala nkupaapata Yeova ukuti aleke ya tata yace yawele.”

Lino Jeremy wali sana nu ulanda, watandike ukubelenga Baibo. Lino wabelenzile Masamu 10:14, wakomeleziwe sana. Icikomo cii cikalanda pali Yeova ukuti: “Umupina akaituula kunuli. Wewe uli kazwa wa ana asyale.” Jeremy walanzile ati: “Nuvwile ukuti Yeova walandanga kuli nene nupya wanenanga ukuti ali kazwa wane; nupya tata wane. Uzye kwaya umuvyazi na muze umusuma ukucila pali aliwe?”

 ASI mulandu wakwata intazi wakwe ino Jeremy wakweti nanti foo, Baibo ikalanda ukuti Yeova akalonda ukuti uye cuza wakwe. Nupya Baibo ikalanda ukuti: “Palamini kuli Leza, nawe alapalama kuli mwemwe.” (Yakobo 4:8) Tale elenganya pali vino amazwi yaa yakapiliula: Nanti icakuti utanga umulole nupya utalingana nawe, Yeova Leza akulonda ukuti uye cuza wakwe!

Lelo pa kuya cuza wakwe Leza ufwile ukuombesya. Katulangilile: Ndi cakuti wakwata iluwa pa ng’anda wamanya ukuti lisiikulila ilyeneco. Pakuti lituma ufwile ukulalikontelela lyonsi nu kuliika pasuma pano lingakula. Vikwene avino cikalondekwa pa kuya cuza na Leza. Ungacita uli pakuti ucuza wako na Leza ukomeleko?

Mulandu Uno Cacindamila Ukusambilila Baibo

Muli ucuza mwaya inzila ziili izya kulanzyanyizizyamo, kuli kuti ukukutika nu kulanda. Vikwene avino caya na kuli ucuza witu na Leza. Ukubelenga nu kusambilila Baibo ali nzila zino tukakutikilamo kuli vino Leza akutunena.—Masamu 1:2, 3.

I cacumi limwi ukusambilila kutanga kuye icintu cino watemwa sana. Acance aingi yatemwa ukutamba TV, ukuteya ivyangalo nanti ukucinila pamwi na auze. Lelo pakuti uye cuza wakwe Leza, ulinzile ukulondela vino walanda. Ufwile ukukutika kuli aliwe ukupitila umu kusambilila Izwi lyakwe.

Lelo utafwile ukusakamala. Ukusambilila Baibo kutafwile ukuya icisendo. Ungaaipakizya ukusambilila Baibo nanti icakuti ukailola kwati utatemwa ukusambilila. Ica kutandikilako cino ufwile ukucita u kupaatulako insita ya kusambilila Baibo. Umukazyana umwi uwi zina ilyakuti Lais walanzile ukuti: “Natantika insita ya kusambilila Baibo, cila katondo nkatandikilapo ukubelenga icipande conga ica muli Baibo.” Maria uwa myaka 15 watantika ivipusaneko. Watiile: “Nkabelenga Baibo lyonsi usiku lino ntatala nalala.”

Pakuti utantike ningo vino ungasambilila Baibo, lola  kambokosi akali api fwa 292. Lyene, apisika ulembepo insita ino ungaasambilila Izwi lyakwe Leza nanti sile a pa mamineti 30.

․․․․․

Ukutantika insita i ntandikilo sile. Nga watandika ukubelenga Baibo, ulazana ukuti asi lyonsi lino cangupala ukubelenga. Ungazumilizyanya na Jezreel uwa myaka 11 uwalanzile ukuti, “Iviputulwa vimwi ivyaya muli Baibo vikalonda ukwikisyako mano pakuti uvyuvwikisye nupya vikauvwisya sana ukasu.” Ndi cakuti avino ukayuvwa utalinzile ukutoovoka. Lyonsi uwalola kusambilila Baibo ukuti insita yakukutika kuli Yeova Leza cuza wako. Lelo pakuti uwaipakizya ukusambilila Baibo nu kutemwa vino ukusambilila ulinzile ukuombesya!

Ipepo Lyacindama

Ipepo iinzila ino tukalandilamo na Leza. Tale elenganya pali vino ipepo waya upe wa kuzungusya! Ungalanda na Yeova Leza pa nsita ili yonsi umusanya nanti usiku. Wene lyonsi waipekanya ukukutika kuli wewe. Nupya akalonda nu kuvwa vino ukulanda. Uli mulandu uno Baibo ikalandila ukuti: “Lekini vyonsi vino mukulenga vimanyikwe kuli Leza ukupitila umwi pepo nu kupaapata pamwi nu kutaizya.”—Filipi 4:6.

Wakwe vino ilembo lii likalanda, kwaya ivintu ivingi vino unganena Yeova umwi pepo. Pali vivyo pangaya nu kumunena pa ntanzi zyako ni vikukusakamika. Nupya ungamunena na pa vintu ivikakuzanzya. Alino uzye usitaizya auzo pa visuma vino yakucitila? Vikwene avino ungacita na kuli Yeova, uwakucitila ivintu ivingi ukucila cuza wako ali wensi.—Masamu 106:1.

Lemba apisika ivintu vimwi vino ukataizizyapo Yeova.

․․․․․

 Ukwaula ukutwisika, kukaya insita zimwi lino kukaya vimwi ivikalenga kuti uwauvwa intete nu kusakamala. Pali Masamu 55:22 pakaati: ‘Uwatuula masakamiko yako kuli Yeova, nawe amakuwakanga. Wene asitazyela umuntu musuma ukuti yamutonsye foo.’

 Pa misilwa iyalondelilapo lembapo ivili vyonsi ivikakusakamika vino ungatemwa ukunena Yeova umwi pepo.

․․․․․

Icacitikile Umwi

Kwaya na cuze pali ucuza wako na Leza cino utafwile ukusuulako sile. Kalemba wa masamu Devedi walemvile ati: ‘Muyuvwile mweisikulu mwenga usuma wakwe Yeova.’ (Masamu 34:8) Lino Devedi walemvile Masamu 34 ala patalengile ukufuma pano iviipe vyamucitikiile. Utukanga Umwene Saulo uwalondanga ukumukoma nupya iyo yaali intazi iipisye. Nomba lyene wali nu kuya fisama ku yalwani yakwe aina Filisti. Lino Devedi waweni ukuti yamamukoma, waicisile kwati atavulungana, ukucita vivyo kwalenzile ukuti apusuke.—1 Samueli 21:10-15.

Devedi ataaweni ukuti icalenzile apusuke a pa mulandu nu kucenjela kwakwe. Lelo wataizye Yeova. Pa kutandika walemvile umwi buku lya masamu ilyatililangililwa papela ati: ‘Napefile kuli Yeova nawe wanjaswike, ampususya na kuli vyonsi ivya nsakamikanga.’ (Masamu 34:4) Fwandi ivyacitikile Devedi i vyalenzile akomelezye auze ukuti, ‘Muyuvwile mweisikulu mwenga usuma wakwe Yeova.’ *

Uzye ungelenganya pali cimwi icakucitikiile icikalangilila ukuti Yeova akasakamala? Nga akuno cili, cilembe apisika. Icingakwazwa aeci: Icakucitikiile citafwile ukuya iciiyele sana. Ungelenganya pa vintu ivisuma ivyangupale ivikacitika cila wanda vino antu yasisumbako na mano.

․․․․․

Limwi avyazi yakusambilizya Baibo. Nga vino cili ale wapaalwa. Lelo wemwineco ulinzile ukukomya ucuza wako na Leza. Ndi cakuti utali uye cuza wakwe Leza, ungaomvya ivyeo ivili umu cipande cii pakuti vikwazwe ukuya cuza wakwe. Yeova alapaala ukuombesya kwako. Baibo ikaati: “Mwalenga, alino mulapeelwa; mwalonda, alino mulazana.”—Mateo 7:7.

 BELENGA IVYEO NA VYUZE API LYASI LII UMWI BUKU 1, CIPANDE 38 NA 39

 CIPANDE ICILONDELILEPO

Uzye cikakutalila ukunena yauze pali Leza? Sambilila umanye vino ungacingilila vino wazumilamo.

[Futunoti]

ILEMBO

“Ansansa aantu aakalondesya vyakwe Leza.”—Mateo 5:3.

 VINO UNGACITA

Cila wanda uwabelenga sile mafwa 4 amuli Baibo, ngu ukucita vivyo ale ulamala ukubelenga Baibo yonsi mupiipi nu mwaka onga.

UZYE UTUMANYA . . . ?

Vikwene vino ukubelenga ibuku lii nu kulondela ukusunda ukwaya muli Baibo, cikulangilila ukuti Yeova wakwikako mano.—Yoani 6:44.

vino nkulonda ukucita!

Pakuti naipakizya sana ukusambilila Baibo, nimacitanga vii

Pakuti napepa lyonsi amapepo nimacitanga vii

Cino ningatemwa ukuzya avyazi yane api lyasi lii aeci

UZYE UKWELENGANYAPO ULI?

● Ungacita uli pakuti waipakizya sana ukuisambilizya Baibo?

● U mulandu ci uno Yeova akalondela ukukutika ku mapepo ya yantu aatamalilika?

● Ungacita uli pakuti uzifye mapepo yako?

[Amazwi umu vilembo vikulu pifwa]

“Lino nali umwance, naswilizyanga ivili vimwi umu mapepo. Nomba lyene nkapepela pa visuma na pa ntazi cila wanda. Vino manda yasicela mumwi, calenga ukuti ntaswilizya ivili vimwi umwi pepo.’’—Eve

 [Kambokosi/Cikope pifwa]

 vino ungacita pa kubelenga Baibo

1. Soolola ilyasi muli Baibo lino ungatemwa ukubelenga. Pepa nu kulenga mano pakuti uuvwikisye vino ukubelenga.

2. Ikisyako mano lino ukubelenga. Utabelenga lwilo lwilo. Uwalola vino ukubelenga kwati vikucitika. Uwaelenganya pali vino unguvwa ndi cakuti vino ukubelenga vyakucitikiile: Ezya ukulola ivikucitika, ukuvwa mazwi yakwe yano yalimo, elenganya kwati ukununsya nu kulya ivyakulya ni vintu vyuze. Elenganya pali vino ukubelenga kwati vikucitika!

3. Elenganya pali vino wafuma ukubelenga. Uyuzye amauzyo wakwe yaa ali apisika:

● U mulandu ci uno Yeova wikiile ilyasi lii umwi Zwi lyakwe?

● Antu ci alembwa muli Baibo yano ningakolanya nupya antu ci yano ntalinzile ukukolanya?

● I vyani vino ningasambililako ukwi lyasi lii?

● Uzye ilyasi lii likunsambilizya vyani pali Yeova na vino akacita ivintu?

4. Pepa ipepo ilipi kuli Yeova. Munene vino wasambilila muli Baibo na vino ukulonda ukuviomvya umu umi. Lyonsi uwataizya Yeova pa upe uno wakupeela, kuli kuti Izwi lyakwe, Baibo wa Muzilo!

[Cikope]

“Amazwi yako ali lampi ilya kuntungulula, nupya ali luswepo lwa kunkozezya inzila yane.”—Masamu 119:105.

[Kambokosi/Cikope pifwa]

uwakolezya ukucita ivintu ivicindame

Uzye ukauvwa ukuti wapamviwa icakuti utanga ukwate insita iya kupepa nanti ukuisambilizya Baibo? Ilingi cikaya ni vintu vino wacindamika.

Ezya ukucita vii: Tola baketi ulongemo amawe aingi akalamba. Lyene itila umucanga muli baketi suka apapela. Lyene wakwata baketi iyatizuulamo mawe nu mucanga.

Lyene fumya ivili muli baketi, lelo usunge umucanga na mawe. Lyene ezya ukutandikilapo ukuzuuzya umucanga muli baketi, alino ulongemo mawe. Uzye incende yasila? Icalenga a pa mulandu wakuti iwatandikilapo ukulongamo umucanga.

I cani cino ukusambililako? Baibo ikati: “Mwamanya ivintu ivicindamisye.” (Filipi 1:10) Ndi cakuti ukukolezya utuntu tunono, utuli wa kucina, utalaakwata insita iya kucita ivintu ivicindamisye, kuli kuti ukukolezya vyakwe Leza. Nomba ndi cakuti ukulondela vino Baibo ikalanda, ulaakwata insita iya kuomba ivya Wene alino ni ya kucina. Cikaya na vino ukutandikila ukulonga muli baketi

[Cikope pifwa 290]

Wakwe vino caya ukwi luwa lya pa ng’anda, ufwile ukwika mano kuli ucuza wako na Leza pakuti ukomeleko