Antu yakauvwa ningo nga twayasimikila ilandwe lya Wene mu lulimi lwa kumwao. Limwi uli mulandu uno pa Pentekositi mu 33 C.E., Yeova walengiile ukuti “Ayuda, yakapepa acindike Leza, yao afumile ku mpanga zyonsi zya muno nsi,” yuvwe ilandwe lisuma “mu lulimi lwa kumwao” nanti icakuti yafwile yamanyile nu lulimi luno antu aingi yaomvyanga, wakwe Ciyebulai nanti Cigiliki. (Mili. 2:5, 8) Mu ncende muno mwaya antu aakalanda indimi izingi, ivilongano ivikalongana mu ndimi zyuze vingakwata icifulo cili cimwi ica kuombelamo. Uzye ya kasimikila aya mu vilongano vivyo yangacita uli pakuti yaombela pamwi lino yakusimikila ukwaula icimvulunganya ca kuya pa mang’anda ya antu maila aingi pakuti yatasosya antu?

• Mufwile Ukulanzyanya (Mapi. 15:22): Angalizi ya mulimo yalinzile ukulanzyanya nu kulola inzila iingazipisya kusimikila antu ilandwe lisuma mu ncende iyo. Ndi cakuti cifulo cinu icakusimikililamo mwaya akalanda lulimi luze limwi yangati mutasimikila pa mang’anda apaaya aakalanda indimi zyuze. Nomba yamwi yene ngi cakuti yasisimikila sana mu ncende iyo, vino limwi iikalamba sana, yangatemwa ukuti mwasimikila sile icifulo consi lyene nga mwazana umwi aakalanda ululimi luze imuyaneena ukuti imuzana aakulanda lulimi lwao. (od ifwa 93 pala. 37) Nanti limwi yangamulenga ukuti mwayazwa ukulondola antu aakalanda lulimi lwa cilongano cao nu kuyasontelela mang’anda ya antu aakalanda ululimi lwao. (km 7/12 ifwa 5, kambokosi) Mwaiusya nu kuti mu ng’anda iili imwi kwene mungaya indimi kuluta pali longa. Mufwile nu kulondela ningo masunde pali umuntu angaomvya ivyeo vino wapoka pa muntu.

• Mwaombela Pamwi (Efes. 4:16): Mwaikako sana amano kuli vino umwangalizi wa mulimo akulanda. Uzye ndakai mukusambilizya umwi Baibo mu lulimi luze luno musiomvya mu cilongano cinu? Musambi wiyo angalunduluka zuwa ngi cakuti wakuukila ku cilongano ca mupipi nanti iumba ilikalanda ululimi lwa kumwao.

• Mwaipekanya (Mapi. 15:28; 16:1): Ngi cakuti wino mukusimikila umuntu aakulanda ululimi luze, mufwile ukwezya na maka ukumusimikila. Mungaipekanya nga mwelenganyizizya calimwi pa ndimi izyaya mu cifulo cinu nu kukopela limwi Mabaibo na mavidyo pali foni. Nupya mungasambilila kulamuka antu mu ndimi zizyo kuomvya JW Language.