Zefaniya 1:1-18
1 Yaa ali mazwi yano Yeova wanenyile Zefaniya mwana Kushi mwana Gedaliya mwana Amaliya mwana Hezekiya umu manda yakwe Yosiya mwana Amoni umwene uwa ku Yuda:
2 Yeova walanda wati, “Ndalovya ivintu vyonsi umu nsi.”
3 Yeova walanda wati: “Ndalovya antu ni nyama.
Ndalovya ivyunyi vya mu lwelele ni nswi zya muli yemba,Ndafumyapo ivikalenga antu ukuluvyanya* kumwi na antu aipe;Nupya ndalovya antu umu nsi.”
4 “Ndakonzolwela ikasa pali YudaNa pali yonsi aakaikala umu Yelusalemu,Nupya ndalovya vyonsi ivyashalako vyakwe Baali ivyaya umu ncende yii,Nu kulovya izina lyakwe ya simapepo yakwe leza wa ku mpanga yuze pamwi na ya simapepo yauze.
5 Na aakafukamila ilanzi, umwezi ni ntanda pa mapaala,Na aakafukamila Yeova kwati yaya ni cisinka kuli aliweLelo ale yali ni cisinka kuli Malikamu;
6 Na aakata ukulondela YeovaKumwi na aakata ukulonda Yeova nanti ukumuleenga ukuti ayapandeko mano.”
7 Muye mya pa nkoleelo yakwe Yeova Umwene wa Papelapela pano uwanda wakwe Yeova iupalama.
Yeova watapekanya ilambo watasangulula antu yano wama.
8 “Pa wanda wi lambo lyakwe Yeova ndapingula ya cilolo,Ana ya mwene, na yonsi aakazwala wa yantu ya ku mpanga zyuze.
9 Pa wanda uuwa ndapingula yonsi aakakwela pa pulatifomu*Aakazuzya unkalwe nu ucenjezi mu ng’anda ya musambazi wao.”
10 Yeova walanda wati, “Pa wanda uuwa,Kulaya ukulila ukufuma uku Mpongolo ya Nswi,Kulila kuluvwika mu Citungu Cakwe Ciili ica musumba,Ni congo icikalamba ukufuma uku tumyamba.
11 Looshini mwe yantu ya mu Makiteshi*Pano aculuzi yonsi iyaloviwa;Yonsi aakapima siuva iyononwa.
12 Pa nsita iya ndaceeceta sana umu Yelusalemu ala inkozya ya lampi,Nupya ndapingula aasisakamikwa icili consi, aakaelenganya iyati,‘Yeova atalacita icisuma nupya atalacita iciipe.’
13 Ivyuma vyao vilapokololwa na mang’anda yao yalononwa.
Yalakuula mang’anda lelo yatalikalamo;Nupya yalalima ivyalo vya myangazi lelo yatalamwa waini aalafumamo.
14 Uwanda ukalamba wakwe Yeova uli umupiipi!
Iupalama nupya ukwiza zuwa sana!
Uwanda wakwe Yeova ulaya uwa koofya.
Asilika yalapunda.
15 Uwanda uwo ulaya u wanda wa ukali,Uwanda wa ntazi nu kucululuka,Uwanda wa cimuza nu wononesi,Uwanda wa mfinzi na kaanda,Uwanda wa makumbi na makumbi aafitishe,
16 Ulaya u wanda wa kulila kwi penga nu kupunda kwa mu ulwi,Uliza pa misumba iicingililwe na pa mpungu izitali izya mu makoona.
17 Ndaleta intazi pa yantu,Nupya yalaapita wa mpafu,Pano yayembukila Yeova.
Uwazi wao ulitilwa wa lukungu,Ni minyefu yao* ilaya wa mavi ya nyama.
18 Nanti a siuva wao na goldi vitalayapususha umu wanda wa ukali wakwe Yeova;Ukali wakwe uwaya wa moto uloca insi yonsi,Pano alonona iciipishe antu yonsi umu nsi.”
Mafutunoti
^ Vingalozya kuli vyonsi ivikaomviwa uku kupepa kwa ufi.
^ Nanti limwi, “pa pulatifomu ya cilimba ca wene.”
^ Ifwile i ncende iya mu Yelusalemu umupiipi ni Mpongolo ya Nswi.
^ Mu Ciebele: “Mala.”
