Yoswa 5:1-15
5 Lino ya mwene yonsi aa Ina Amoli aayelile uku lusansa lwa ku uwondaka wa Luzi Lwa Yodani na ya mwene yonsi aa Ina Kenani aayelile umupiipi nu luzi yuvwile pali vino Yeova wakamizye amanzi ya mu Luzi Lwa Yodani ala na Ina Izlaeli yakulolako iyasuka iyalamba, yuvwile sana intete nupya yatakweti maka ali yonsi akulwisya Aina Izlaeli.
2 Pa nsita iiya Yeova wanenyile Yoswa ati: “Panga imipeni ukuomvya mawe, nu kuzembulula aonsi Aina Izlaeli nupya kwene, umuku wakwe ciili.”
3 Yoswa nawe wapanzile imipeni ikalipe nu kuzembulula aonsi Aina Izlaeli pa Gibeati-halaloti.*
4 Mulandu uno Yoswa wayazembulwilile aewu: Aonsi yonsi aafumile umu Ijipti aalinzile ukuya umu ulwi yafwilile umu lwanga lino yafumile mu Ijipti.
5 Antu yonsi aafumile umu Ijipti yazembulwilwe, lelo yonsi avyalilwe umu lwanga pa lwendo lwa kufuma umu Ijipti yatazembulwilwe.
6 Walanga Aina Izlaeli iyapita umu lwanga pa myaka 40 kufikila antu yonsi yafwa, kuli kuti aonsi aalinzile ukuya umu ulwi aafumile umu Ijipti aatuuvwilile Yeova. Yeova walafile ukuti atalayaleka ukulola impanga ino Yeova walafile uku vikolwe vyao ukuti alatupeela, impanga umwaya umukaka nu uci.
7 Fwandi pali aliyo wapyanikizyepo ana yao. Yakwene ayano Yoswa wazembulwile; pa mulandu wakuti yatazembulwilwe lino yaali pa lwendo.
8 Lino yamazile ukuzembulula uluko lonsi, yatwalilile ukuya paapa kwene pa nkambi, suka yonsi iyapola.
9 Lyene Yeova wanenyile Yoswa ati: “Ilelo namufumizyapo umuzewanya uno Aina Ijipti yakaleta pali mwemwe.” Fwandi incende iiya ikaamwa ukuti Giligali* kufika na ndakai kwene.
10 Aina Izlaeli yatwalilile ukupanga inkambi pa Giligali, nupya yazevizye Ucilo pa wanda uwalenga 14 umu mwezi manguzi, umu lwanga ulwa Yeliko.
11 Nupya pa wanda kwene uwa pa cisila ca Ucilo, yatandike ukulya ivilimwa vya mu mpanga iiya nu mukate uwaula icitutumusi, ni ngano izisalule.*
12 Lyene mana watiile ukuyako pa wanda uwalondelilepo lino yaliileko ivilimwa vimwi ivya mu mpanga iiya; Aina Izlaeli yataatazile iyalolapo mana nupya, lelo yatandike ukulya ivilimwa vya mu mpanga ya Kenani umu mwaka uwa.
13 Lino Yoswa wali umupiipi na Yeliko, wakatwisye umutwe nu kulola umonsi wataimilila pa nkoleelo yakwe ala alemile ulupanga. Yoswa waile kuli aliwe nu kumuzya ati: “Uzye uli uku lusansa lwitu nanti uku lusansa lwa yalwani itu?”
14 Nawe waswike ati: “Awe, lelo iniza wa mukalamba wa yasilika yakwe Yeova.” Lino Yoswa uvwile vivyo wafukime nu kufupama pansi alino alanda ati: “I cani cino umwene wane akulonda ukulanda kuli ne muomvi wakwe?”
15 Mukalamba wa yasilika yakwe Yeova waswike Yoswa ati: “Zula indyatu pano incende ino uwimililepo iya muzilo.” Lilyo kwene Yoswa wazuuzile indyatu.
Mafutunoti
^ Icikapiliula ukuti “Umwamba wa Nkanda Zya ku Mpela ya Onsi.”
^ Icikapiliula ukuti “Ukufumyapo.”
^ Mungaya ni vyakulya na vyuze ivili wakwe baale na vyuze ivikolineko.
