Yoswa 1:1-18
1 Pa cisila ca mfwa yakwe Mose umuomvi wakwe Yeova, Yeova wanenyile Yoswa* mwana Nuni nupya umuomvi wakwe Mose ati:
2 “Mose umuomvi wane watafwa. Fwandi katuka nu kulamba Uluzi Lwa Yodani, wewe pamwi na antu yaa yonsi, kuli kuti Aina Izlaeli nupya muye uku mpanga ino nimayapeela.
3 Ndamupeela impanga yonsi ino mulayamo, wakwe vino nalavile Mose.
4 Incende inu ilafumilila uku lwanga ukufika uku Lebanoni nu ku luzi ulukalamba ulwa Yufuleti, kuli kuti mpanga yonsi iya Ina Hiti ukufika na lwa ku uwondaka wakwe Yemba Mukalamba.*
5 Kusi ali wensi alakucimvya umu umi wako onsi. Wako viivi kwene vino nali na Mose avino ndaya naawe. Ntalakutazyela nanti ukukusya.
6 Usipe nupya uye umukome, pano wewe ulalenga antu yaa ukupyana impanga ino nalafile ukuti ndapeela ivikolwe vyao.
7 “Usipe sile nupya uye umukome, uwalondela sana masunde yonsi yano Mose umuomvi wane wakunenyile. Utapaalukila ukwi lunji nanti kuli cimani, pakuti uye na mano konsi kuno ulaya.
8 Ibuku lii lya masunde litalinzile ukufuma umu kanwa kako, walibelenga nu kwelenganyapo umusanya nu usiku, pakuti uwalondela sana ivyalembwamo; pano alino ulatunguluka nu kuya na mano.
9 Uzye ntakunenyile? Usipe nupya uye umukome. Utuvwa intete nanti ukutiina, pano Yeova Leza wako amayanga naawe konsi kuno waya.”
10 Lyene Yoswa wanenyile intunguluzi zya yantu ati:
11 “Pitini umu nkambi nu kunena antu muti, ‘Pekanyini ivya kusenda pano kwasyala sile manda yatatu ale mwalamba Uluzi Lwa Yodani nu kuyaikala umu mpanga ino Yeova Leza winu akumupeela.’”
12 Nupya Yoswa wanenyile amu mutundu wakwe Lubeni, amu mutundu wakwe Gadi, na afu wa mutundu wakwe Manase ati:
13 “Iusyini vino Mose umuomvi wakwe Yeova wamunenyile, watiile: ‘Yeova Leza winu watamulenga ukupuuza nupya watamupeela impanga yii.
14 Ya mama inu na ana yalikala umu mpanga ino Mose wamupeela uku lusansa* luu lwa Luzi Lwa Yodani kumwi ni viteekwa vinu, lelo mwemo mwensi mwe yasilika ya maka mulinzile ukulamba nu kuyalwila pamwi na ina inu. Mulinzile ukuyazwa
15 kufikila lino Yeova alayalenga ukupuuza wakwe vino wacita kuli mwemwe, suka nayo yace ikale umu mpanga ino Yeova Leza winu alayapeela. Lyene muce muwele nu kwikala umu mpanga ino Mose umuomvi wakwe Yeova wamupeezile uku ufumondaka wa Luzi Lwa Yodani.’”
16 Nayo yanenyile Yoswa iyati: “Tulacita vyonsi vino watutunena, nupya tulaya konsi kuno ulatutuma.
17 Wakwe viivi kwene vino tuvwanga kuli vyonsi vino Mose watunenanga, avino tulauvwa na kuli wewe. Si Yeova Leza wako aaya naawe, wakwe vino wali na Mose.
18 Wensi aataluvwila vino ulamunena alakomwa. Wemo usipe sile nupya uye umukome.”
Mafutunoti
^ Nanti “Yeosyuwa,” icikapiliula ukuti “Yeova a Kapususya.”
^ Kuli kuti Yemba wa Meditileniani.
^ Kuli kuti uku ufumondaka.
