Yobo 42:1-17
42 Lyene Yobo waswike Yeova ati:
2 “Lyene namanya ukuti wakwata amaka ya kucita ivintu vyonsiNupya kusi nanti acimwi cino wapanga ukucita cino ungafilwa ukucita.
3 Walanzile uti, ‘A weni aakuvimbilikizya pali vino impingulapo lino atamanyilepo ivili vyonsi?’
Fwandi nalanzile pa vintu vya kuzungusya vino ntamanyaUkwaula ukwiluka.
4 Watiile: ‘Kutika nani namalanda.
Namakuuzya, naawe ungasuke.’
5 Nuvwile pali wewe,Nomba lyene inkulola.
6 Ali mulandu uno nawezezya vino nalanzile,Nupya nikala umu lukungu nu mwi twi kukulangilila ukuti indapila.”
7 Pa cisila cakuti Yeova wanena Yobo mazwi yaa, Yeova wanenyile Elifazi Umwina Temani ati:
“Inkusokela sana pamwi na auzo yaili, pano mutalanzile icisinka pali nene wakwe vino umuomvi wane Yobo walanzile.
8 Fwandi sendini ya cipambasi 7 na ya suuku 7 muye kuli Yobo umuomvi wane, nupya muye mukapeele ilambo lya koca pa mulandu winu. Nu muomvi wane Yobo amaya akamupepeleko. Namakutika uku kuleenga kwakwe pakuti ntamufulula ukulingana nu uwelewele winu, pano mutalanzile icisinka pali nene wakwe vino umuomvi wane Yobo walanzile.”
9 Fwandi Elifazi Umwina Temani, Bilidadi Umwina Syuwa na Zofali Umwina Naamati yapisile nu kucita vino Yeova wayanenyile ukucita. Nupya Yeova uvwile ipepo lyakwe Yobo.
10 Pa cisila cakuti Yobo wapepelako auze, Yeova wafumizyepo intazi zino Yobo wakweti nu kumuwezezya ivintu vino wakweti. Yeova wamupeezile vino wakweti, vyavuzile maila yaili ukucila pali vino wakweti pa kutandika.
11 Aina yakwe yonsi na ya nkazi yakwe yonsi, na ya cuza yakwe aa mpiti yaile kuli aliwe nu kuliila pamwi nawe umu ng’anda yakwe. Yamuvwilile uluse nu kumuteekezya pa ntanzi zyonsi zino Yeova wazumilizye ukuti zimuponele. Cila muntu wamupeezile impiya ni mbalaminwe* yakwe goldi.
12 Fwandi Yeova wapaazile sana Yobo pa kusyalikizya ukucila vino wamupaazile pa kutandika, wizile akwata imfwele 14,000, ingamila 6,000, ya masaye 2,000, ya punda ya kaci 1,000.
13 Wizile akwatilapo ana na yauze, aonsi 7 na akazyana yatatu.
14 Watemiile umwana uwa kutandikilako umukazyana ati Yemima na wakwe ciili wamutemiile ati Keziya, wakwe citatu nawe wamutemiile ati Keleni-hapuki.
15 Kutaali umwanaci ali wensi umu mpanga yonsi uwalingiine usuma na ya mwana Yobo aakazyana, nupya isi wayapeezile ica upyanyi pamwi na ya kalume yao.
16 Pa cisila cakwe vii, Yobo wikazile imyaka 140 nupya waweni ana yakwe na izikulu, kuli kuti inkulo 4.
17 Lyene Yobo wafwile pa cisila ca kwikala imyaka iingi nu kuipakizya umi usuma.
Mafutunoti
^ Nanti “ling’i, impete.”
