Yelemiya 20:1-18
20 Lyene Pasyuli mwana Imeli, simapepo uwali intunguluzi ikalamba umu ng’anda yakwe Yeova, uvwanga lino Yelemiya wasesemanga ivintu vii.
2 Pasyuli umile Yelemiya kasesema nu kumunyepa umwi koli ilyali pa Mpongolo Yakwe Benjamini Iya Papela iyali umu ng’anda yakwe Yeova.
3 Lelo uwanda uwalondelilepo lino Pasyuli wasapwile Yelemiya, Yelemiya wamunenyile ati:
“Yeova watakupeela izina lyuze, utakulaamwa ukuti Pasyuli, lelo wakulaamwa ukuti Intete Konsi Konsi.
4 Pano Yeova watalanda ati, ‘Nimakulenga ukuya ni ntete pamwi na ya cuza yako pa mulandu ni vilakucitikila, nupya yalakomwa uku lupanga lwa yalwani yao ala ukulola nako; ndapeela na antu ya mu Yuda yonsi uku Mwene wa ku Babiloni, nawe alayasenda umu uzya uku Babiloni nu kuyayakoma nu lupanga.
5 Ivyuma vyonsi ivya mu musumba uu ni vintu vyonsi ivicindame ni vyuma vyakwe ya mwene ya mu Yuda ndavipeela uku yalwani yao. Nupya yalavipokolola nu kuvisenda uku Babiloni.
6 Lelo wemo Pasyuli kumwi na yonsi aakaikala umu ng’anda yako, mulasendwa umu uzya. Ulaya uku Babiloni nu kuyafwila kuuku kwene, nupya ulaziikwa pamwi na ya cuza yako yonsi pano wayasesemile ivya ufi.”
7 Watumbepa we Yeova, watumbepa.
Wandwisizye na maka yako nupya wancimvizye.
Antu yonsi yakunseka uwanda onsi;Nupya yakuntumfya.
8 Pano lyonsi lino nkulanda, nkapunda nu kumanyisya inti,“Unkalwe nu wononesi!”
Mazwi yakwe Yeova yakalenga natukwa nu kusekwa.
9 Fwandi nalanzile inti: “Ntalatala ndandepo pali aliwe,Nanti ukulandila umwi zina lyakwe nupya.”
Lelo izwi lyakwe lizile iliya wa moto ukupya umu mwenzo wane, wa moto ukupya umu mafupa yane,Nupya nafizilwe ukulisunga;Nafizilwe ukuzizimizya.
10 Pano nuvwile malyasi aipe aingi:Konsi kwene kwali ivyanguvwisyanga intete.
Yalandanga yakuti: “Musinilini; lekini tumusinile!”
Antu yonsi aangandandila ivisuma, yalolelanga ukuti iviipe vincitikile ala yakuti:
“Limwi amaluvyanya cimwi,Pakuti tumucimvye nu kulandula pali vino watacita.”
11 Lelo Yeova wali nani wa musilika wa maka nupya uwa kutiinya.
Ali mulandu uno aakancuzya yalafililwa nupya yatalacimvya.
Yalazewana sana pano vino yakulonda vitalacitika.
Kuzewana kwao ukwa manda pe kutalililika.
12 Lelo wemo we Yeova wa maumba ukaceeceta umulungami;Ukalola ivyaya umu melenganyo ya yantu ni vyaya umu myenzo yao.
Leka indole vino umalandula pali aliyo,Pano indeta umulandu wane kuli wewe.
13 Imbilini Yeova! Lumbanyini Yeova!
Pano watapususya umupiina kuli ya kacita ya viipe.
14 Uye utiipwe uwanda uno naviilwe!
Si uwanda uno mayo wamviile uye utiipwe!
15 Aye umutiipwe umuntu uwanenyile tata ilyasi ilisuma ati:
“Umwanako umulumendo watavyalwa!”
Pakuti amulenge ukuya sana ni nsansa.
16 Si umuntu wiyo aye wa misumba ino Yeova onona ukwaula ukulanguluka.
Nupya auvwa impooma katondo ni congo ca nkondo umusanya pakasi.
17 U mulandu ci uno ataankomiile umu nda muli mayo,Pakuti inda yakwe mayo iye ali lindi lyaneNupya atwalilile ukuya ni inda vivyo kwene?
18 U mulandu ci uno nafumiile umu nda muli mayoKuti nize nalola intazi nu ulanda,Nu kufwa imfwa ya muzewanya?
