Isamu 109:1-31
Ku mukalamba wakwe ya kiimba. Lwimbo luno Devedi wimvile. Lwimbo.
109 We Leza, wemuno nkalumbanya utikala mya.
2 Pano aipe na aakabepa yakalanda pali nene.
Yakalanda ivya ufi pali nene ukuomvya indimi zyao;
3 Yakanzinguluka ala yakulanda amazwi aipe,Nupya yakanzanza apaula umulandu.
4 Nayatemwa lelo yene yakampeela imilandu;Nomba nkatwalilila ukupepa.
5 Yakancitila iviipe nanti cakuti nkayacitila ivisumaNupya yampata nanti cakuti nayatemwa.
6 Sonta umuntu umwipe uwakuti atungulula umulwani wane;Si kakanya aimilile ukwi kasa lyakwe ili lunji.
7 Si azanwe nu mulandu, lino akupingulwa;Si ipepo lyakwe liye wa luyembu.
8 Si amanda yakwe yacefiwe;Umuntu muze aliwe apyane umulimo wakwe.
9 Si ana yakwe yaye ana ya nsiwa,Na mamakwe aye mukamfwilwa.
10 Si ana yakwe yalulumba ala yakulenga,Yalondelezya ivyakulya umu vitotela vya mang’anda yao.
11 Si uwamukongwesya amupoke vyonsi vino wakwata,Nu mwenyi amupoke ivintu vino wakwata.
12 Kutaya nanti awenga uwa kumulanga icikuuku,Nupya kutaya nanti awenga uwa kuvwila ana yakwe ansiwa uluse.
13 Si ana yakwe yakomwe;Si mazina yao yace yafuutwe umu nkulo ilalondelelapo.
14 Si Yeova ace aiusye imembu zya vikolwe vyakwe,Ni membu zyakwe nyina zitaca zifuutwe.
15 Si lyonsi Yeova aiusya vino yaacita;Nupya aleke antu ya mu nsi yailile.
16 Pano atiwisye ukulanga icikuuku,Lelo watwalilile ukuzinganya uwacuziwanga, mupiina nu wali nu ulandaPakuti amukome.
17 Watemilwe ukutipwila cakuti icitiipu cizile pali aliwe;Atatemilwe ipaalo, fwandi atapokelile ipaalo.
18 Wazwalanga ivitiipu kwati i cakuzwala.
Nupya vyakonkolokanga pa mwili wakwe kwati a manzi,Nu kukonkoloka umu mafupa kwati a mafuta.
19 Si vitiipu viye wa vyakuzwala vino akazwalaNupya viye wa musipi uno akazwala lyonsi.
20 Cikwene ali cilambu cino Yeova akapeela umuntu aakankanyaAlino na yayo akalanda iviipe pali nene.
21 Lelo we Yeova Mwene wa Papelapela,Ngazwe pa mulandu ni izina lyako.
Mpususye pano ukutemwa kwako ukwa cumi u kusuma.
22 Pano ntakweti uwa kungazwa nupya nene mupiina,Nupya umwenzo wane iuciswa.
23 Nasya inte ukuloleka wakwe vino icinzingwa cikaata ukuloleka;Inkuntwa wakwe makanta.
24 Makokola yane iyatonta pa mulandu nu kukanalyaUmwili wane ionda nupya amaka iyasila.
25 Antu yakunseka.
Nga yandola yakupukunya imitwe.
26 Ngazwe we Yeova Leza wane;Mpususye pa mulandu nu kutemwa kwako ukwa cumi.
27 Kayamanye ukuti cii icicitika pa mulandu ni ikasa lyako;Ukuti we Yeova wewe watucita cii.
28 Si kayantipwile, lelo umpaale.
Lino yankatukila uleke yazewane,Lelo leka ne muomvi wako insansamuke.
29 Yayo akankanya leka yazewane;Si yazwale umuzewanya kwati u mwingila.
30 Ndalumbanya sana Yeova;Ndamulumbanya pa nkoleelo ya yantu aingi.
31 Pano alimilila ukwi kasa li lunji lya mupiinaPakuti amupususye kuli yano yakamupingula.
