Ezekeli 41:1-26
41 Lyene wantwazile uku ncende ya muzilo iya kunzi* nupya wapimile incesi zya mu mbali; lucesi longa lwatikime mamita yatatu uku mbali yonga nu ku mbali yuze mamita yatatu.
2 Mulyango wali mamita 5 mu wipi, ni viumba ivyali umu mbali ya mulyango vyali mamita yaili uku mbali yonga nu ku mbali yuze mamita yaili. Wapimile utali wa ncende iiyo nupya wazanyile ukuti yatalimfile umupiipi na mamita 21, mu wipi namo mamita 10.
3 Lyene wingile umukasi* nupya wapimile ulucesi lwa mu mbali ulwali pa mulyango nu kuzana ukuti lwatikime mita wenga, mulyango nao wali mamita yatatu umu wipi. Viumba vya mu mbali zyonsi zyoili izya pa mulyango vyali ukucila pa mamita yatatu na afu.
4 Lyene wapimile umuputule uwalozizye uku ncende ya muzilo, nao wali mamita 10 umu utali na mamita 10 umu wipi. Nupya wanenyile ati: “Muu u mwa Muzilo Sana.”
5 Lyene wapimile iciumba ci tempele, naco catikime mamita yatatu. Miputule iyaali umu mbali ukuzinguluka itempele yaali umupiipi na mamita yaili umu wipi.
6 Miputule ya mu mbali yakweti intunti zitatu, cila ntunti yakweti imiputule 30. Iciumba ci tempele capanzilwe umu musango wakuti imiputule iyali mu mbali iyakwata apa kwikala ukwaula ukutulula iciumba.
7 Ku mbali zyonsi zyoili izi tempele kwali masitepu aazinguluke aayanga yakukulilako lino yakuya uku miputule ya papela. Miputule ya pa ntunti yakwe ciili yaali ikulu ukucila imiputule ya pa ntunti ya kutandikilako, nupya imiputule ya pa ntunti yakwe citatu yaali ikulu ukucila imiputule ya pa ntunti yakwe ciili.
8 Naweni ukuti tempele lyali patumpuke nupya imifula ya miputule ya mu mbali yatalimfile mamita yatatu ukufika pa koona.
9 Ciumba ca mu miputule ya mu mbali cali mamita yaili na afu umu wipi. Kwali kacende* akaali umu mbali ya miputule ya mu mbali yi tempele.
10 Pakasi ki tempele ni miputule ya kuliilamo pali ncende iyaali mamita 10 umu mbali zyonsi.
11 Pakasi ka miputule ya mu mbali na kacende akasiile uku katutu pali umulyango, mulyango na uze nao wayelile uku kaeya. Kacende akazingulwike itempele kaali mamita yaili na afu umu wipi.
12 Cikuulwa icayelile uku uwondaka nupya icalozizye uku kacende akazingulwike itempele cali mamita 36 umu wipi na mamita 47 umu utali; iciumba consi ukuzinguluka cali icitikame mamita yaili na afu.
13 Wapimile itempele nupya lyatalimfile mamita 52. Kacende akazingulwike itempele, cikuulwa ni viumba navyo kwene vyali mamita 52 umu utali.
14 Incende ya pa nkoleelo yi tempele iyalozizye uku ufumondaka na kacende akazingulwike itempele vyali mamita 52 umu wipi.
15 Wapimile utali wa cikuulwa icalozizye uku kacende ka kwi tundu li tempele kumwi nu tuzila twa ku cikuulwa kwene cico uku mbali zyonsi zyoili, navyo vyali mamita 52.
Wapimile ni ncende ya muzilo, ncende ya muzilo sana ni miputule iyalozizye uku musolo,
16 kumwi ni ncende izyali pa nkoleelo ya mpongolo, mawindo aakweti mafulemu aakuliile umukasi alino nu tuzila utwali umu ncende zizyo zitatu. Ku viumba ivyali umupiipi ni ncende ya pa mpongolo yakambatikeko imbao ukufuma pansi ukufika pa mawindo, nupya na mawindo kwene yavimvilwe.
17 Wapimile papela ya wingililo, mukasi ki tempele nu kunzi alino ni ciumba consi ukuzinguluka.
18 Ku ciumba yalenzileko ya kelubi nu tuncindu, cila kancindu kakonkanga ya kelubi yaili, nupya cila kelubi wakwatanga ivinso viili.
19 Cinso ca muntu calozizye uku kancindu uku mbali yonga, ni cinso cakwe cisama calozizye uku kancindu uku mbali yuze. Vikwene avino yalenzile umwi tempele lyonsi.
20 Ku ciumba ca mu ncende ya muzilo yalenzileko ya kelubi nu tuncindu kufuma pansi ukufika papela ya mulyango.
21 Mafulemu* ya mu ncende ya muzilo yaalingine konsi konsi. Pa nkoleelo ya ncende ya muzilo paali icalolekanga
22 wa ulambo wa mbao icali mita wenga na afu ukuya umupela na mita wenga umu utali. Cakweti ivyali wa makulu umu makoona 4, nupya ica pansi ni vya mu mbali vyapangiilwe ni mbao. Lyene umonsi wiyo wanenyile ati: “Wii a tebo aali pa nkoleelo yakwe Yeova.”
23 Umwa muzilo nu mwa muzilo sana monsi kwene mwali ivisaasa viili viili.
24 Cila mulyango wakweti visaasa viili ivilemane ivyayulikanga konsi konsi.
25 Ku visaasa vya mu ncende ya muzilo yalenzileko ya kelubi nu tuncindu wakwe vino yacisile uku viumba. Nu ku kamuputule ka pansi ukwi tempele kwali kalipaala ka mbao.
26 Kwali na mawindo aakweti mafulemu aakuliile umukasi nupya yalenzileko utuncindu ku mbali zyonsi zyoili izya ka muputule, alino nu ku miputule ya mu mbali ya kwi tempele nu ku tumapaala.
Mafutunoti
^ Mu Ciebele: “Itempele.” Mu cipande 41 na 42 izwi lii likalozya uku ncende ya muzilo iya kunzi (umwa muzilo) nanti incende ya muzilo yonsi (itempele ukwikako ni ncende ya muzilo alino nu mwa muzilo sana).
^ Kuli kuti umu ncende ya muzilo iya mukasi, nanti umwa Muzilo Sana.
^ Limwi kangaya a kazila kanono akakupita ukuzinguluka itempele.
^ Mu Ciebele: “Fulemu.” Lifwile likulozya uku mulyango wa kwingilila umwa Muzilo.
