Ezekeli 34:1-31
34 Nupya kwene Yeova wanenyile ati:
2 “We mwana wa muntu, sesemela ya kacema ya mu Izlaeli. Sesema nu kunena ya kacema uti, ‘Yeova Umwene wa Papelapela walanda wati: “Kalanda kuli ya kacema ya mu Izlaeli aakailisya sile aineco! Uzye asi mfwele zino yalinzile ukulisya?
3 Mukalya mafuta ya nyama, mukazwala ivyakuzwala ivyapangilwa na mavumbu ya mfwele nupya mukakoma inyama iziine sana, lelo musilisya imfwele.
4 Musiazwa izitonte ukukwata amaka nanti ukupozya izilwale nanti ukunyepela izyatizicisika nanti ukulonda nu kuwezya izyatiziponga; lelo mukazicuzya nu kuzisunga unkalwe unkalwe.
5 Fwandi imfwele zyasalangine pano kutaali kacema; zyasalangine nu kuya ivyakulya vya vilyanyi vya mu mpanga.
6 Imfwele zyane zyalulumbanga pa myamba yonsi ikalamba ni inono; zyasalangine umu nsi yonsi, nupya kutaali uwakuti akazilonde.
7 “‘“Fwandi mwe ya kacema, uvwini amazwi yakwe Yeova:
8 ‘Yeova Umwene wa Papelapela walanda wati, “Nkulapa ukuti pa mulandu wakuti imfwele zyane zizile iziya ivyakulya vya vilyanyi vya mu mpanga pa mulandu wakuti kutaali kacema nupya ya kacema yane yataalonzile imfwele zyane; lelo yatwalilile sile ukuilisya aineco ukwaula ukulisya imfwele zyane,”’
9 fwandi mwe ya kacema uvwini amazwi yakwe Yeova.
10 Yeova Umwene wa Papelapela walanda wati: ‘Inja umulwani wakwe ya kacema, nupya ndayapingula pali vino yasunganga imfwele zyane,* ndayalesya ukuzilisya nupya ya kacema yayo yatalatwalilila ukuilisya aineco, ndapususya imfwele zyane uku tunwa twao, yatalatala yazilyepo nupya.’”
11 “‘Yeova Umwene wa Papelapela walanda wati: “Lolini, ndailondela imfwele zyane nupya ndazisakamala.
12 Ndasakamala imfwele zyane wakwe kacema uwatazana imfwele zyakwe izyasalangana nupya akuzilisya. Ndazipususya umu ncende zyonsi muno zyasalanganila umu wanda uno kulaya icifutika na kaanda.
13 Ndazifumya umu yantu nu kuzikolonganika ukufuma umu mpanga zino zyasalanganilamo nupya ndazitwala umu mpanga yaziko nu kuzilisizya pa myamba ya mu Izlaeli, mupiipi ni nguzi nu mupiipi ni ncende zyonsi umwaya antu.
14 Ndaazilisizya umu ncende ya mulemvwe isuma, nupya zilaliila pa myamba itali iya mu Izlaeli. Zilaalala umu ncende ya mulemvwe isuma, nupya zilalya umulemvwe usuma pa myamba ya mu Izlaeli.”
15 “‘Yeova Umwene wa Papelapela walanda wati: “Ndaalisya imfwele zyane nupya nene kwene ndaalenga ukuti zilaale.
16 Imfwele iponge ndailonda ni ikululumba ndaiwezya, ndanyepela iyaticisika, nu kulenga iitonte ukuya na maka, lelo imfwele iine ni ya maka ndailovya. Ndalenga upinguzi uye aali vyakulya vyaiko.”
17 “‘Namwe mwe mfwele zyane, ne Yeova Umwene wa Papelapela nalanda nati: “Nimapingula pakasi ka mfwele yonga ni yuze, na pakasi kakwe ya suuku na ya sawe.
18 Uzye citalinga vino mukalya umulemvwe usuma sana? Uzye mufwile ukulyatola nu mulemvwe uze uwasyala? Nupya uzye mufwile ukuvundola manzi pa cisila ca kumwa aasenguluke ningo?
19 Uzye imfwele zyane zifwile ukulya umulemvwe uno imulyatoola nu kumwa manzi yano imuvundola ni ngazo zinu?”
20 “‘Fwandi Yeova Umwene wa Papelapela walanda uku mfwele wati: “Lolini ndapingula pakasi ka mfwele iine ni yonde,
21 pano mwatwalilile ukusunka imfwele zyonsi zilwale kuomvya imili inu ni viye vinu, nupya mwatwalilile ukuzisunka ukuomvya impembe zinu mpaka izisalangana.
22 Ndapususya imfwele zyane, zitalayapo ivyakulya vya nyama nupya; ndapingula pakasi ka mfwele yonga ni yuze.
23 Ndasoolola kacema wenga uwakuti aazicema, kuli kuti Devedi umuomvi wane, nawe alaazilisya. Alaazilisya nu kuzicema.
24 Nupya ne Yeova ndaya Leza waziko, na Devedi umuomvi wane aliwe aalazitungulula, nene ne Yeova indanda.
25 “‘“Ndapangana nazyo upangano wa mutende nu kufumya ivilyanyi iviipisye umu mpanga pakuti zice zyaikala umutende umu lwanga nu kulaala umu mitengo.
26 Ndazilenga ukuya ipaalo kumwi ni ncende iyazinguluka umwamba wane nupya ndalenga imvula ukutoonya pa nsita iilinge. Mapaalo yalapongoloka wa mvula.
27 Imiti ya mu mpanga ilaaseeka ivizao, nu musili ulamezya ivimelwa, nupya imfwele zyane zilaikala umutende umu mpanga. Lyene zilamanya ukuti nene Yeova lino ndavuna mayoko yano yazizwika nu kuzipususya kuli yano yakazicuzya.
28 Antu ya mu nko yatalatala yazilyepo nupya, ni vilyanyi vya mu mpanga vitalazilya, nupya zilaikala umutende ukwaula uwa kuzyuvwisya intete.
29 “‘“Ndazipeela incende iilamanyikwa pa mulandu ni vimelwa ivilamelamo, zitalatala zifwepo uku cipowe nupya zitalatala zizewanepo uku nko.
30 ‘Lyene yalamanya ukuti nene ne Yeova Leza wao indi nayo, nu kuti yene, kuli kuti amu ng’anda yakwe Izlaeli, aantu yane,’ avino Yeova Umwene wa Papelapela walanda.”’
31 “‘Namwe mwe mfwele zyane zino nkasakamala, mwemwe yantu nani nene Leza winu,’ avino Yeova Umwene wa Papelapela walanda.”
Mafutunoti
^ Nanti “ndayanena ukuti yambwezezye imfwele zyane.”
