Ezekeli 28:1-26
28 Nupya kwene Yeova wanenyile ati:
2 “We mwana wa muntu, nena intunguluzi ya ku Tuli uti, ‘Yeova Umwene wa Papelapela walanda wati:
“Pa mulandu wakuti waya ni cilumba, watwalilila ukulanda uti, ‘Naya wakwe Leza.
Nikala pa cilimba cakwe Leza icaya pakasi kakwe yemba.’
Lelo wewe muntu sile utaaya wakwe Leza,
Nanti cakuti ukailola ukuti waya wakwe Leza.
3 Lola! Ukailola kwati wakwata mano ukucila Danieli.
Nupya ukalola kwati kusi icafiswa kuli wewe.
4 Wailenga ukuya umukankala pa mulandu na mano yako nu kwiluka.
Watwalilila ukusunga goldi na siuva umu nkoma zyako.
5 Pa mulandu wakuti wamanya sana uculuzi calenga ukuti ukwate ivyuma ivingi,
Nupya wizile uya ni cilumba pa mulandu ni vyuma vyako.’”
6 “‘Fwandi Yeova Umwene wa Papelapela walanda wati:
“Pa mulandu wakuti ukailola ukuti waya wakwe Leza,
7 Ndaleta antu ya ku mpanga zyuze, antu ya mu nko izyaya sana nu unkalwe,
Yalatola ya panga yao nu konona ivintu vyako vyonsi ivisuma vino wakwata pa mulandu na mano yako,
Nupya yalakukowezya.
8 Yalakutwala uku malindi
Nupya ulafwa imfwa ya unkalwe pakasi kakwe yemba.
9 Uzye ulatwalilila ukunena aakukukoma uti, ‘Naya wakwe Leza’?
Ulaya sile umuntu mu minwe ya yantu aakukukowezya, utalaya leza.”’
10 ‘Ulafwila umu minwe ya yantu ya ku mpanga zyuze wa yantu aatazembululwa,
Pano nene indanda,’ avino Yeova Umwene wa Papelapela walanda.”
11 Nupya kwene Yeova wanenyile ati:
12 “We mwana wa muntu, imba ulwimbo lwa ulanda pa mwene wa ku Tuli, umunene uti, ‘Yeova Umwene wa Papelapela walanda wati:
“Wali icilangililo icisuma,
Wakwatisye mano nupya wali umuyembe sana.
13 Wali umu Edeni umu calo cakwe Leza.
Wayemviwe na mawe yonsi amutengo,
Kuli kuti lubi, topazi na jasipa; kilisoliti, onikisi, jadi; safilo, tokwasi na emalodi;
Mawe yonsi yaa yano wakweti yakweti goldi.
Yapekanyiziwe pa wanda uno waumvilwe.
14 Nakusoolwile ukuya wakwe kelubi umupakwe uwatakonzolola amaapa yakwe.
Wali pa mwamba wa muzilo wakwe Leza, nupya wapitananga pa mawe ya moto.
15 Utaatazile uluvyanye ukufuma pa wanda uno waumvilwe
Ukufikila lino iciipe cazanyilwe muli wewe.
16 Pa mulandu wakuti wakazyanga ivintu ivingi,
Wizile uya sana nu unkalwe nupya watandike ukuyembuka.
Fwandi we kelubi wemuno wakonzolola amaapa
Ndakufumya pa mwamba wakwe Leza na pa mawe ya moto wa cintu ca winyi nu kukonona.
17 Wizile uya ni cilumba pa mulandu nu kuyemba kwako.
Lulumbi lwako lwalenzile ute ukuya na mano.
Ndakuvwinta pansi.
Ndaleka kuti uye ica kutamba pa nkoleelo yakwe ya mwene.
18 Pa mulandu ni vintu uwingi vino waluvyanya na vino waya nu ucenjezi umu uculuzi wako, wakowezya incende zyako izya muzilo.
Ndalenga umoto ukutumuka muli wewe nupya ulakoca.
Ulasyala itwi pa nkoleelo ya yantu yonsi aakukutamba.
19 Antu yonsi aakumanyile yalaakulolekesya ala iyazunguka.
Impela yako iliza umu kupumikizya nupya ilaya iipisye,
Ulononwa manda pe.”’”
20 Nupya kwene Yeova wanenyile ati:
21 “We mwana wa muntu, lozya icinso cako uku musumba wa Sidoni nu kusesema ivilaucitikila.
22 Ulande uti, ‘Yeova Umwene wa Papelapela walanda wati:
“We Sidoni, inja umulwani wako nupya ndacindamikilwa muli wewe;
Lino ndakufulula alino antu yalamanya ukuti nene Yeova nupya injilenga ukuya uwa muzilo.
23 Ndaleta icikuko muli wewe, nu wazi ulaakonkoloka umu miseo yako.
Antu yalakomwa lino ndaleta ulupanga muli wewe ukufuma uku ntunga zyonsi;
Nupya yalamanya ukuti nene Yeova.
24 “‘“Lyene amu ng’anda yakwe Izlaeli yatalazingulukwapo ni myunga nupya, kuli kuti antu aakayasaalula; lyene antu yalamanya ukuti nene Yeova Umwene wa Papelapela.”’
25 “‘Yeova Umwene wa Papelapela walanda wati: “Lino ndakolonganika amu ng’anda yakwe Izlaeli ukufuma umu yantu muno yasalanganila, alino ndacindamikilwa muli aliyo ala ni nko zikulolako. Nupya yalikala umu mpanga yao ino napeezile Yakobo umuomvi wane.
26 Yalikalamo umutende, nupya yalakuula mang’anda nu kulima ivyalo vya myangazi, yalikala umutende lino ndapingula antu yonsi ayazinguluka akayatumfya; nupya yalamanya ukuti nene Yeova Leza wao.”’”
