Ezekeli 19:1-14
-
Ulwimbo lwa ulanda pa ntunguluzi zya mu Izlaeli (1-14)
19 “Uwimbe ulwimbo lwa ulanda pa ntunguluzi zya mu Izlaeli
2 uti,
‘Mayo winu wali wakwe cisama uwa kaci aali pali ya cisama yauze.
Walaalanga pali ya cisama aamaka ala akusakamala utwana tuno wakweti.
3 Wakuzizye kacisama konga nupya kizile ikaya a cisama uwa maka.
Wasambilile ukulunga,
Walyanga na antu.
4 Antu ya mu nko yuvwile pali aliwe nupya yamulemile umu citeyo,*
Yamutwazile uku Ijipti ala iyamulema na maswelo.
5 Nyina walolezile lelo wizile alola ukuti akana kakwe kataali nu kuwela.
Fwandi watozile kacisama kauze nu kukatuma.
6 Kapitananga muli ya cisama nupya kizile ikaya a cisama uwa maka.
Wasambilile ivya kulunga nupya walyanga antu.
7 Watundelelanga umu mpungu zyao izikome nu konona imisumba yao,
Icakuti umu mpanga umutaali icili consi muvwikanga sile ukung’anza kwakwe.
8 Antu ya mu nko izyamuzingulwike yaile kuli aliwe nu kumuteya isumbo,
Nawe walemizye umu citeyo cao.
9 Yamulemile na maswelo nu kumwika muli kaseke nu kumutwala uku mwene uwa ku Babiloni.
Yamuyaliile umu cifungo pakuti izwi lyakwe litauvwika pa myamba iya mu Izlaeli.
10 Mayo wako wali wa mwangazi umu wazi wako,* uno yalemeka umupiipi na manzi.
Waseekanga nupya wakweti imisambo iingi pano wali pa manzi aingi.
11 Wakweti imisambo ikome, iingaya intuwa zyakwe ya kateeka.
Wakuzile nu kutalimpa ukucila imiti yuze,
Walolekanga pa mulandu wakuti wali utali nupya wakweti imisambo iyakweti mafwa aingi.
12 Lelo yautukwile ni cipyu nu kuusumba,
Nupya umuza wa ku ufumondaka walenzile ivizao ukuuma.
Ni misambo iyaliko ikome yakontwike nu kuuma, nupya yapiile nu moto.
13 Lyene yaulemile umu lwanga,
Umu mpanga iyumisye umutaya manzi.
14 Lyene umoto osile imisambo kumwi ni vizao,
Kusi umusambo uwasiile uwa kuya intuwa yakwe kateeka,
“‘Luu u lwimbo lwa ulanda ululamanyikwa sana.’”
