Ezekeli 14:1-23
14 Nupya akalamba ya mu Izlaeli yamwi izile nu kwikala pa nkoleelo yane.
2 Lyene Yeova wanenyile ati:
3 “We mwana wa muntu, antu yaa yakalondesya ukutwalilila ukupepa ivilubi vya winyi,* nupya yakacita ivikalenga antu ukuyembuka. Uzye ningayasuka nga iza umu kuzya kuli nene?
4 Fwandi landa nayo nupya uyanene uti, ‘Yeova Umwene wa Papelapela walanda wati: “Ndi cakuti Umwina Izlaeli akulondesya ukutwalilila ukupepa ivilubi vya winyi nupya akucita ivingalenga antu ukuyembuka alino waya umu kuzya kuli kasesema, ne Yeova ndamwasuka ukulingana ni vilubi vya winyi uwingi vino akapepa.
5 Pano ndalenga amu ng’anda yakwe Izlaeli ukuya ni ntete pa mulandu wakuti yonsi yaafuma kuli nene nu kukonka ivilubi vyao ivya winyi.”’
6 “Fwandi nena amu ng’anda yakwe Izlaeli uti, ‘Yeova Umwene wa Papelapela walanda wati: “Welini nu kuta ukupepa ivilubi vinu ivya winyi, mute nu kucita iviipe vyonsi vino mukacita.
7 Pano ndi cakuti Umwina Izlaeli ali wensi nanti uwafuma uku mpanga yuze aakaikala umu Izlaeli waitalusya kuli nene nu kutandika ukulondesya ukupepa ivilubi vyakwe ivya winyi nupya akucita ni vingalenga yauze ukuyembuka, alino waya umu kuzya kuli kasesema wane, nene ne Yeova ndamwasuka.
8 Ndamukana nu kumulenga ukuya ica kulolelako kuli yauze na antu yalaamulandapo umu mapinda, nupya ndamukoma nu kumufumya umu yantu yane; lyene mulamanya ukuti nene Yeova.”’
9 “‘Lelo ndi cakuti kasesema wabepwa nu kumwasuka, ala nene ne Yeova indenga ukuti abepwe. Lyene ndakonzolola ikasa lyane pali aliwe nu kumulovya umu yantu yane Aina Izlaeli.
10 Yonsi kwene yalaya nu mulandu; mulandu wa muntu aakuzya ulaya uli umwi nu mulandu wakwe kasesema,
11 pakuti amu ng’anda yakwe Izlaeli yate ukululumba nu kuta ukuikowezya uku membu zyao zyonsi. Nupya yalaya antu yane nani ndaya Leza wao,’ avino Yeova Umwene wa Papelapela walanda.”
12 Nupya kwene Yeova wanenyile ati:
13 “We mwana wa muntu, ndi cakuti antu ya mu mpanga yanjembukila ukupitila umu kukanaya ni cisinka, ndakonzolola ikasa lyane pali aliyo nu konona ivyakulya nupya ndayaletela icipowe nu kukoma antu ni nyama.”
14 “‘Nanti cakuti aonsi yaa yatatu, kuli kuti Nowa, Danieli, na Yobo yaali mu mpanga iiyo, yangaipususya sile aineco pa mulandu nu ulungami wao,’ avino Yeova Umwene wa Papelapela walanda.”
15 “‘Nanti ndi cakuti nalesile ivilyanyi ukupita umu mpanga nu kukoma antu nu kuleka isyale umwaula cimwi na antu yate ukupitamo pa mulandu ni vilyanyi,
16 ne Yeova Umwene wa Papelapela nkulapa ukuti nanti cakuti aonsi yaa yatatu yaali umu mpanga iiyo yatanga yapususye ana yao aonsi nanti anaci; yangaipususya sile aineco, nupya impanga ingasyala umwaula icili consi.’”
17 “‘Nanti nga naleesile ulupanga umu mpanga iiyo nu kulanda inti: “Lekini ulupanga lupite umu mpanga,” nu kukoma antu ni nyama,
18 ne Yeova Umwene wa Papelapela nkulapa ukuti, nga aonsi yaa yatatu yaali umu mpanga iiyo, yatanga yapususye ana yao aonsi nanti anaci; yangaipususya sile aineco.’”
19 “‘Nanti nga naleesile icikuko umu mpanga iiyo nu kukomoola antu aingi ni nyama ala indi nu ukali,
20 ne Yeova Umwene wa Papelapela nkulapa ukuti, nanti cakuti Nowa, Danieli, na Yobo yaali umu mpanga iiyo yatanga yapususye nanti ana yao aonsi nanti anaci; yangaipususya sile aineco pa mulandu nu ulungami wao.’”
21 “Yeova Umwene wa Papelapela walanda wati: ‘Avino cilaya lino ndaleta ivintu 4 ivya kufulwilako Yelusalemu, kuli kuti ulupanga, cipowe, cilyanyi ca mu mpanga ni cikuko nu kukoma antu ni nyama.
22 Lelo yamwi yalapusuka nu kufumamo, kuli kuti ana aonsi na anaci. Yaliza kuli wewe nupya lino ulalola imiyele yao ni vicitwa vyao ulateekeziwa pa ntazi zino ndaleta pali Yelusalemu na pali vyonsi vino ndacita uku musumba uuwo.’”
23 “‘Yalakuteekezya lino ulalola imiyele yao ni vicitwa vyao, nupya ulamanya ukuti ntaacisile vivyo apaula umulandu,’ avino Yeova Umwene wa Papelapela walanda.”
Mafutunoti
^ Izwi lya Ciebele lyakolana ni izwi ilikaomviwa uku usaali nupya likaomviwa nu ku kulondolola icintu ica sile sile.
