Danieli 7:1-28
7 Mu mwaka wa kutandikilako uwa kuteeka kwakwe Belisyazali Umwene wa ku Babiloni, Danieli walosile iciloto nu kulola ivilolwa. Lyene walemvile iciloto; walemvile vyonsi vino waweni.
2 Danieli walanzile ati:
“Mu vilolwa vino naweni usiku, naweni imiza 4 ala ikupungila sana pali yemba mukalamba.
3 Lyene muli yemba mwafumile ivilyanyi 4 ivikalamba, nupya cila cilyanyi capusine uku vyuze.
4 “Cilyanyi ca kutandikilako calolekanga wakwe cisama, nupya cakweti maapa yakwe lyang’anda. Natandike ukulolekesya suka maapa ya ciko iiza iyasusulwa, nupya yacikatwisye nu kuleka ukuti cimilile na makulu yaili wa muntu, capeezilwe nu mwenzo wa muntu.
5 “Lyene naweni icilyanyi cakwe ciili icalolekanga wakwe beele. Cakatwisye ikulu lyonga, nupya cavwasile imbazo zitatu; lyene yacinenyile iyati, ‘Katuka, ulye iminyefu iingi.’
6 “Pa cisila cakwe cii natwalilile ukulolekesya, nupya naweni icilyanyi na cuze icalolekanga wa nangu, lelo cakweti maapa 4 api tundu aali wa maapa ya cunyi. Cakweti ni mitwe 4, nupya capeezilwe maka ya kuteeka.
7 “Natwalilile ukulolekesya, nupya naweni icilyanyi icalenga 4, cuvwisyanga intete nupya cofyanga, cakweti na maka sana, cakweti na mino ya cela akalamba. Calyanga nu kuvungola, ni vyasyala calyatolanga, capusiineko ni vilyanyi vyuze ivyacikolelile nupya cakweti impembe 10.
8 Lino ncili nkulolekesya nu kwelenganya pa mpembe zizyo, naweni ulupembe na luze ulunono lwamelelapo nupya impembe zitatu pa mpembe izya kutandikilako zyakontwilwe pano lwayelile. Naweni nu kuti ulupembe luu ulunono lukweti manso kwati aamuntu nupya lwakweti na kanwa akavwanganga cilumba cilumba.
9 “Natwalilile ukulolekesya suka ivilimba vya wene ivipekanyiziwa nupya Uwayako Ukufuma Mpiti wikazile. Ivyakuzwala vyakwe vyali ivitiswe wa usu wa mvula, ni nyele zya ku mutwe wakwe zyali wa mavumbu ya mfwele aaswepe. Icilimba cakwe ica wene cali wa cimbilimbili ca moto na mateelo yali wa moto uukwaka.
10 Uluzi lwa moto lwakonkolokanga ukufuma pa nkoleelo yakwe. Ya malaika masauzandi yamuombelanga, nupya ya malaika mamilyoni yaimi pa nkoleelo yakwe. Icilye capanzilwe, na mabuku yayuzilwe.
11 “Natwalilile ukulolekesya pa mulandu na mazwi aacilumba yano ulupembe lwalandanga; nalolekisye suka icilyanyi icikomwa nu mwili wa ciko ononyilwe nu kusumbilwa umu moto.
12 Lelo ivilyanyi ivyasyala vyaposilwe uwene, nupya vyatwalilile ukuya nu umi pa ciputulwa ca nsita.
13 “Natwalilile ukulola ivilolwa, nupya naweni umwi uwali wa mwana wa muntu akwiza umu makumbi; wazumiliziwe ukwingila kuli wino Wayako Ukufuma Mpiti nupya yamupalamike umupiipi nawe.
14 Wapeezilwe ukateeka, umucinzi, nu uwene pakuti antu, inko, ni mitundu yonsi yamuombela. Ukateeka wakwe uwa manda pe utalatala usile, nu wene wakwe utalatala ononwe.
15 “Lelo nemo ne Danieli, nacululwike pa mulandu wakuti ivilolwa vyanguvwisizye sana intete.
16 Lyene naile umupiipi na wenga pali yano yaimi paapa nu kumuzya vino ivintu vii vyapiliulanga. Nawe wanenyile vino vyapiliulanga.
17 “Watiile, ‘Vilyanyi vii vikalamba ivili 4, vikwimililako ya mwene 4 aalateeka umu nsi.
18 Lelo aamuzilo yakwe Leza wa Papelapela yalapokelela uwene, nupya yalateeka manda pe, mu cumi yalateeka manda pe.’
19 “Lyene nalondanga ukumanyilapo na vyuze pa cilyanyi icalenga 4 icapusiine uku vilyanyi vyuze vyonsi; cuvwisyanga sana intete, cakweti amino ya cela ni ngala zyakwe koopa, calyanga nu kuvungola, ni vyasyala calyatolanga;
20 nupya nalondanga nu kumanya apa mpembe 10 izyali pa mutwe na pa lupembe luze ulunono ulwizile ilumela pano impembe zitatu zyakontwike, kuli kuti ulupembe ulwakweti amanso na kanwa akavwanganga cilumba cilumba nupya ulwizile ilwaloleka ulukulu ukucila izyuze.
21 “Natwalilile ukulolekesya kuno ulupembe lukulwa na aamuzilo, nupya lwatandike ukuyacimvya,
22 suka Uwayako Ukufuma Mpiti aiza nu kuvwangila aamuzilo yakwe Leza wa Papelapela, ni nsita yafisile iyakuti aamuzilo yatandike ukuteeka.
23 “Uwanenanga upiliulo wa vintu vino naweni walanzile ati: ‘Icilyanyi icalenga 4 u wene uwalenga 4 uulayako pano nsi. Ulapusanako na mawene yonsi asyala, nupya ulonona vyonsi vino ulazana pano nsi, kuvilyatola nu kuvivungola.
24 Lyene impembe 10 aa mwene 10 aalateeka umu wene uuwo; lelo kuliza umwene na muze pa cisila cao, wene alapusana uku yauze yonsi aakutandikilako nupya alacimvya ya mwene yatatu.
25 Alaalanda iviipe pa wa Papelapela, nupya alatwalilila ukucuzya aamuzilo yakwe Leza wa Papelapela. Alezya ukucinja insita na masunde, nupya aamuzilo yalapeelwa kuli aliwe pa nsita yonga, insita ziili na afu.*
26 Lelo Icilye capanzilwe, nupya yamuposile uwene pakuti yamonone nu kumulovya.
27 “‘Nupya uwene na ukateeka nu ucindami wa mawene amu nsi yonsi vyapeezilwe uku yantu ya muzilo yakwe Leza wa Papelapela. Uwene wao ulaya u wa manda pe, nupya mauteeko yonsi yalaayaombela nu kuyuvwila.’
28 “Vikwene avino ne Danieli naweni. Vilolwa vino naweni vyandenzile ukuya sana ni ntete icakuti navulunganyiziwe; lelo natwalilile ukusunga ivintu vivyo umu mwenzo wane.”
Mafutunoti
^ Kuli kuti insita zitatu na afu.
