2 Yamwene 4:1-44
4 Lyene wenga pa yaci ya yana yakwe ya kasesema walilile kuli Elisya ati: “Uwane wafwa, nupya wamanya ningo ukuti lyonsi watiinanga Yeova. Lyene uwankongole wataiza umu kusenda anane yonsi yaili kuti yaye azya yakwe.”
2 Elisya nawe wamuzizye ati: “Ukulonda nkucitile cani? Neene, i cani cino ukweti mu ng’anda?” Nawe waswike ati: “Nkweti sile insembo ya mafuta.”
3 Lyene wamunenyile ati: “Yanga ukazime iviya vya kwikamo mafuta uku inamupalamano yako yonsi. Uwazime ivingi.
4 Pa cisila uwize uwingile umu ng’anda pamwi na anako aonsi nu kuyalako icisaasa. Uzuuzye iviya vyonsi nu kuvika pa mbali.”
5 Fwandi wafumile kuli Elisya.
Lino wingile umu ng’anda pamwi na anakwe aonsi nu kuyala icisaasa, anakwe yamupeelezyanga iviya nawe witilangamo mafuta.
6 Lino iviya vyazuuzile, wanenyile umwanakwe wenga ati: “Leta iciviya na cuze.” Lelo walanzile ati: “Viya ivisila.” Nupya lilyo kwene mafuta yatile ukwituluka.
7 Fwandi waile anena umuntu wakwe Leza wa cumi, nawe walanzile ati: “Pitanga ukakazye mafuta nu kulipila inkongole, nupya ulupiya ulumasyala mungaomvya pamwi na anako.”
8 Wanda umwi Elisya waile uku Syunemu ukwali umwanaci uwamanyikwe, nawe wamupaapasile ukuti alye ivyakulya ukwakwe. Miku iingi wapitilanga pa mwanaci wiyo nu kulya ivyakulya.
9 Fwandi wanenyile iya ati: “Namanya ukuti umuntu aakaiza pano lyonsi a kapepa wakwe Leza.
10 Lekini tupekanye umuputule wa papela nu kwikamo bedi, tebo, cilimba, na pa kuteeka lampi. Lyene lyonsi lino wiza, amaikalanga mumu kwene.”
11 Wanda umwi waile kuuku kwene uku Syunemu, nupya waile umu muputule wa papela umu kulaala.
12 Lyene wanenyile Geazi umuomvi wakwe ati: “Ngamile umwanaci Umwina Syunemu.” Fwandi wamwamile, nawe waile aimilila pa nkoleelo yakwe.
13 Lyene wanenyile Geazi ati: “Umunene uti, ‘Wacita vyonsi vii pakuti sile utusakamale. I cani cino ungatemwa nkucitile? Uzye ungatemwa nkuvwangile uku mwene nanti ku mukalamba wa yasilika?’” Nawe waswike ati: “Awe ntakweti intazi ili yonsi, nkaikala na ya lupwa yane.”
14 Elisya uzizye ati: “Nomba lyene i cani cino ningamucitila?” Geazi waswike ati: “Atakwata umwana nupya iya watakota.”
15 Lilyo kwene Elisya wanenyile umuomvi wakwe ati: “Mwame.” Nawe wamwamile, nupya wizile aimilila pa mulyango.
16 Lyene wamunenyile ati: “Mwaka uukwiza pa nsita wakwe ikwene ulakwata umwana umonsi.” Lelo umwanaci walanzile ati: “Awe musambazi wane, we muntu wakwe Leza wa cumi! Utambepa ne muomvi wako.”
17 Lelo umwanaci wizile akwata inda, avyala nu mwana umonsi pa nsita iiya kwene umu mwaka uwalondelilepo, wakwe viivi kwene vino Elisya wamunenyile.
18 Umwana wakuzile, nupya wanda umwi waile kuli isi uwali pamwi na ya kazombola.
19 Watandike ukunena isi ati: “Nafwa umutwe, nafwa umutwe!” Lyene isi wanenyile umuomvi wakwe ati: “Mutwale kuli nyina.”
20 Nawe wamuswilizye kuli nyina, nyina nawe waile amufukatila kufika umusanya pakasi, nupya pa cisila wafwile.
21 Lyene waile amulaalika pali bedi wa muntu wakwe Leza wa cumi, afuma asya wayala ni cisaasa.
22 Lyene wamile iya nu kumunena ati: “Mpeele umuomvi wenga na punda, nupya leka inje likwene ku muntu wakwe Leza wa cumi nu kuyawela.”
23 Lelo wamuzizye ati: “U mulandu ci uno ukulonda ukamulolele ilelo? Kusi umwezi upya nanti isabata.” Nomba waswike ati: “Vyonsi vili ningo.”
24 Fwandi wakwezile pali punda nu kunena umuomvi ati: “Twapita. Utaapita panono pa mulandu wakwe nene suka nga nakunena.”
25 Fwandi waile uku muntu wakwe Leza wa cumi pa Mwamba wa Kalimeli. Lino umuntu wakwe Leza wa cumi wamuweni sile katalamukila, wanenyile Geazi umuomvi wakwe ati: “Lola! Mwanaci Umwina Syunemu awiya.
26 Simula ukamukomenkanye nupya umuzye uti, ‘Uzye uli ningo? Uzye uwako ali ningo? Uzye umwanako ali ningo?’” Umwanaci nawe waswike ati: “Vyonsi vili ningo.”
27 Lino umwanaci wafisile uku mwamba uku muntu wakwe Leza wa cumi, lilyo kwene waile alema ingazo zyakwe kasesema. Lyene Geazi wapalime pakuti amutalusye, lelo umuntu wakwe Leza wa cumi wamunenyile ati: “Muleke, pano ali sana nu ulanda, nupya Yeova atanenyile ivyativicitika, watamfisa.”
28 Lyene umwanaci walanzile ati: “Uzye nalenzile umwana uku musambazi wane? Uzye ntalanzile inti, ‘Utambepa’?”
29 Lilyo kwene sile Elisya wanenyile Geazi ati: “Nyepa icakuzwala umu musana nupya utole intuwa yane nu kupita. Ndi cakuti wazana ali wensi utamulamuka; nupya ndi cakuti ali wensi wakulamuka, utasuka. Yanga ukike intuwa yane pa cinso ca mulumendo.”
30 Lyene nyina wa mwana wanenyile Elisya ati: “Nkulapa umwi zina lyakwe Yeova wa umi na pali wewe ukuti nsikukusya.” Fwandi Elisya wakatwike nu kupita nawe.
31 Geazi wakolezile nu kuyaika intuwa pa cinso ca mulumendo, lelo umulumendo ataasakinye nanti ukucita icili consi. Fwandi Geazi waile akomenkanya Elisya nu kumunena ati: “Mulumendo atazyusile.”
32 Lino Elisya wingile umu ng’anda, mulumendo waizi pali bedi ala watafwa.
33 Wingile umu ng’anda umwali umulumendo ayala ni cisaasa nupya watandike ukupepa kuli Yeova.
34 Waile pali bedi nu kulambalala pa mwana, wakumizye kanwa kakwe pa kanwa ka mulumendo, ni cinso cakwe pa cinso ca mulumendo, nupya wamulemile umu minwe, watwalilile nu kulambalala pa mulumendo mpaka akaya.
35 Wapitananga umu muputule aya kuu na kuu alino aswilila pali bedi, alambalala pa mulumendo. Lyene umulumendo watisizye imiku 7 alino azyuka.
36 Lyene Elisya wamile Geazi nu kumunena ati: “Ama umwanaci Umwina Syunemu.” Nawe wamwamile nupya wingile umu muputule. Lyene wamunenyile ati: “Senda umwanako.”
37 Lino wingile waponiile pa ngazo zyakwe Elisya nu kufukama pa nkoleelo yakwe, lyene wasenzile umwanakwe nu kufuma.
38 Lino Elisya waswilile uku Giligali, mu mpanga mwali cipowe. Ya kasesema yamwi yatenzi pa nkoleelo yakwe nupya wanenyile umuomvi wakwe ati: “Teka impoto ikalamba pa moto uwelekele ya kasesema ivyakulya.”
39 Fwandi wenga pali aliyo waile umu calo umu kusolela umusaalu, nupya wazanyile icimuti ca myungu ya mu mpanga nu kukululako imyungu afundila nu mu cakuzwala cakwe. Nupya waswilile aya aputolela umu mpoto ukwaula nu kuti amanye vino wakulwile.
40 Pa cisila yapeezile aonsi kuti yalye, lelo lino yatandike sile ukulya, yapunzile iyati: “We muntu wakwe Leza wa cumi mu vyakulya muli poizoni.” Nupya yafizilwe ukulya.
41 Fwandi Elisya walanzile ati: “Letini fulaulo.” Lino wasumbiile umu mpoto, walanzile ati: “Peelini antu ivyakulya.” Nupya poizoni wasizile umu vyakulya.
42 Umuntu umwi wafumile uku Baali-syalisya, nupya waletiile umuntu wakwe Leza wa cumi mikate 20 iyapangiilwe na baale uwatandikilapo ukuca, pamwi ni saka lya ngano izipya. Lyene Elisya walanzile ati: “Peelini antu pakuti yalye.”
43 Lelo umuomvi wakwe walanzile ati: “Uzye vikwene ali vyakulya vino nimapeela antu 100?” Elisya nawe wamunenyile ati: “Peela antu yalye, pano Yeova watalanda ati, ‘Yamalya na vimwi visyale.’”
44 Lyene wayapeezile, nayo yaliile na vimwi ivisyala wakwe viivi kwene vino Yeova walanzile.
