2 Yamwene 12:1-21
12 Mu mwaka uwalenga 7 uwa kuteeka kwakwe Yeu, Yeoasyi wizile aya umwene, nupya wateesile pa myaka 40 umu Yelusalemu. Nyina wali a Zibiya uwa ku Belisyeba.
2 Yeoasyi watwalilile ukucita ivisuma kuli Yeova manda yonsi yano Yeoyada simapepo wamutungululanga.
3 Lelo atononyile incende izya kupepelapo zino antu yalolanga ukuti izya muzilo nupya antu yatwalilile ukupeela malambo ya koca na malambo yauze pa ncende kwene zizyo.
4 Yeoasyi wanenyile ya simapepo ati: “Tolini impiya zyonsi zino antu yaleta umu ng’anda yakwe Yeova wa upe wa muzilo, kuli kuti impiya zino cila muntu alinzile ukulipila, impiya zino yakalipila ukulingana na vino umuntu walaya ni mpiya zyonsi zino cila muntu akaitemelwa ukutwala uku ng’anda yakwe Yeova.
5 Mulinzile ukutola impiya zizyo ukufuma uku yantu inu nu kuziomvya uku kuzifya ing’anda monsi muno yononeka.”
6 Lino umwaka uwalenga 23 uwa kuteeka kwa Mwene Yeoasyi wafisile, ala ya simapepo yatatala yazifya ing’anda.
7 Lyene Umwene Yeoasyi wamile Yeoyada simapepo na ya simapepo yauze nu kuyuzya ati: “I cani cino musikuzifizya ing’anda? Fwandi tiini ukupoka impiya umu yantu inu suka sile ndi cakuti mukuziomvya uku kuzifizya ing’anda.”
8 Fwandi ya simapepo yazumile ukuta ukupoka impiya uku yantu, iyakana nu mulimo wa kuzifya ing’anda.
9 Lyene Yeoyada simapepo watozile kambokosi atulula intupiko nu kukika umupiipi nu ulambo uwayelile ukwi lunji lya mulyango wa kwingilila umu ng’anda yakwe Yeova. Mumu kwene amuno ya simapepo aaombelanga pa mulyango iikanga impiya zyonsi zino antu yaletanga uku ng’anda yakwe Yeova.
10 Lyonsi lino impiya zyavula umu kambokosi, kalemba wa mwene na simapepo mukalamba yayanga umu ng’anda yakwe Yeova iyaya iyafumya impiya umu kambokosi nu kuzipenda.
11 Yatwalanga impiya zizyo uku yantu asonsilwe ukwangalila imilimo iyaombwanga pa ng’anda yakwe Yeova. Nayo yalipilanga ya kapenta na ya kakuula aombanga pa ng’anda yakwe Yeova,
12 yalipilanga na ya kakuula yauze na aaputolanga mawe. Nupya yakalanga ni mbao na mawe ivya kuzifizya ing’anda yakwe Yeova nupya yaomvizye impiya zizyo na kuli vyuze ivyaomviwe pa kuzifya ing’anda.
13 Lelo yataomvizye impiya izili zyonsi izya mu ng’anda yakwe Yeova ku kupangila ya beseni yakwe siuva, ivya kuzimizyako umoto, imbale, mapenga, nanti iviya ivili vyonsi vyakwe goldi nanti siuva ivya kuomvya umu ng’anda yakwe Yeova.
14 Yapeelanga sile aombanga imilimo, nayo yaziomvyanga uku kuzifya ing’anda yakwe Yeova.
15 Aonsi yano yapeezile ukulipila aomvi, yatayatwisikanga pali vino yaomvyanga impiya pano yayataile.
16 Lelo impiya zya pa malambo ya pa mulandu ni zya pa malambo ya pa luyembu yatazitwalanga uku ng’anda yakwe Yeova; zyayanga izyakwe ya simapepo.
17 Pa nsita kwene iiya, Hazaeli umwene wa ku Silya waile umu kulwisya umusumba wa Gati nupya wauposile, pa cisila wapingwilepo ukuyazanza Yelusalemu.
18 Fwandi Umwene Yeoasyi uwa ku Yuda watozile ivya upe vya muzilo vyonsi vino ivikolwe vyakwe, kuli kuti Yeosyafati, Yeolamu, na Ahaziya ya mwene ya ku Yuda yapeezile, kumwi ni vya upe vyakwe ivya muzilo na goldi wensi uwali umu ng’anda yakwe Yeova nu mwi sano, avituma uku mwene Hazaeli uwa ku Silya. Fwandi Umwene Hazaeli ataile azanza Yelusalemu.
19 Ilyasi lyonsi ilyasyala ilikalanda pali Yeoasyi na pali vyonsi vino wacisile, lyalembwa umwi buku lya mpiti ilikalanda pali ya mwene ya ku Yuda.
20 Lelo aomvi yakwe yamupangiile nupya yamukomiile umu ng’anda iyaya uku Beti-milo iyayela umu nzila iyaya uku Sila.
21 Aomvi yakwe, kuli kuti Yozaka mwana Syimeati na Yeozabadi mwana Syoma aamukomile. Yamuziisile umu Musumba Wakwe Devedi ukwalaala ivikolwe vyakwe, nupya Amaziya umwanakwe u wamupyanyile pa wene.
