2 Milandu 28:1-27
28 Ahazi wali ni myaka 20 lino watandike ukuteeka, nupya wateesile pa myaka 16 umu Yelusalemu. Wene ataali wakwe Devedi icikolwe cakwe pano wasosyanga Yeova.
2 Wacitanga iviipe wakwe vino ya mwene ya mu Izlaeli yacisile, nupya wapanzile ivilubi vya cela ivya kuomvya pa kupepa Baali.
3 Wapeelanga na malambo ya koca umu Mukonko Wakwe Mwana Hinomu* nu koca ana yakwe umu moto, icintu ca winyi icali pa vintu vino inko zino Yeova wazingiile Aina Izlaeli zyacitanga.
4 Watwalilile ukupeelela malambo ya koca na malambo yauze pa ncende zya kupepelapo zino antu yalolanga ukuti izya muzilo, pa tumyamba alino nu mwisika lya vimiti.
5 Fwandi Yeova Leza wakwe wamupeezile uku mwene wa ku Silya, nawe wamucimvizye nu kusenda antu aingi sana umu uzya ayatwala uku Damasika. Leza wamupeezile nu ku mwene wa ku Izlaeli, nawe wakomile antu aingi sana.
6 Peka mwana Lemaliya wakomile aonsi amu Yuda asipe 120,000 umu wanda sile onga, pano yapondokile Yeova Leza wa vikolwe vyao.
7 Nupya Zikilai umusilika wa mu mutundu wakwe Efulemu wakomile Maaseya na Azilikamu uwangalilanga isano na Elikana uwali inkonkanyi ya mwene.
8 Nupya Aina Izlaeli yasenzile aina yao 200,000 amu mpanga ya Yuda umu uzya, kuli kuti anaci, ana aonsi na akazyana; yasenzile ni vintu ivingi sana iyavitwala uku Samaliya.
9 Kwali kasesema wakwe Yeova uwi zina lyakuti Odedi. Waile pa nkoleelo ya yasilika ayanga uku Samaliya nu kuyanena ati: “Yeova Leza wa vikolwe vinu wasokiile Ayuda icalenzile ukuti ayapeele umu minwe inu nupya mwayakomile icipisye suka Leza auvwa.
10 Lyene mukulonda kuti antu ya mu mpanga ya Yuda nu mu Yelusalemu yaye azya inu. Uzye mwemo musi nu mulandu kuli Yeova Leza winu?
11 Uvwini kuli nene nupya muleke azya yano mwasenzile ukufuma uku ina inu yaswilile, pano Yeova watamusokela sana.”
12 Lyene akalamba ya mu mutundu wakwe Efulemu yamwi, Azaliya mwana Yeoanani, Belekiya mwana Mesyilemoti, Yeizikiya mwana Syalumu, na Amasa mwana Hadilai yaakalipile awelanga umu kulwa
13 iyati: “Mutaleta azya muno pano cimalenga tuye nu mulandu kuli Yeova. Vino mukulonda ukucita vimalenga tuyembukileko nu kukwatilako imilandu, pano tuli sana nu mulandu nupya ukali wakwe Leza uli pa Ina Izlaeli.”
14 Lyene asilika aali ni vyanzo yapeezile ivintu vino yasenzile ukufuma umu ulwi na azya kuli ya cilolo nu ku yantu yonsi aakolongine.
15 Lyene aonsi aasonsilwe yaile umu kusakamala azya nupya yonsi aali tupu yayapeezile ivyakuti yazwale ukufuma pa vintu vino yasenzile umu ulwi. Yayapeezile ivyakuzwala, indyatu, ivyakulya ni vyakumwa na mafuta ya kupaka pa vilonda. Nupya yakwezizye ataakweti maka pali ya punda nu kuyatwala uku ina yao uku Yeliko, kuli kuti umusumba wa tuncindu. Pa cisila yaswilile uku Samaliya.
16 Pa nsita kwene iiya Umwene Ahazi walenzile uwazwilizyo uku mwene wa ku Asilya.
17 Nupya kwene Aina Edomu yaile iingila umu mpanga ya Yuda nu kuizanza nupya yasenzile antu umu uzya.
18 Aina Filisti nayo yaile iyazanza imisumba ya ku Syefela na antu ya mu ncende yakwe Yuda iya Negebu, nupya yaposile umusumba wa Beti-syemesyi, Aijaloni, Gedeloti, Soko ni mizi iyalimo, musumba wa Timuna ni mizi iyalimo nu musumba wa Gimizo ni mizi iyalimo; nupya yatandike ukwikala umu ncende zizyo.
19 Yeova wafulwile antu amu mpanga ya Yuda pa mulandu na Ahazi umwene wa mu Izlaeli, pano walenzile kuti yaye ni miyele iipe na cii calenzile kuti yate ukuya acumi kuli Yeova.
20 Umwene Tigilati-pinesa uwa ku Asilya wizile umu kumulwisya nupya walenzile kuti aye ni ntazi umu cifulo ca kumwazwa.
21 Ahazi wafumizye ivintu ivyali umu ng’anda yakwe Yeova, umwi sano nu mu mang’anda yakwe ya cilolo nu kuvipeela uku mwene wa ku Asilya; lelo ukucita vivyo kutaamwavwile.
22 Nupya umu nsita kwene iiya ino Umwene Ahazi wakweti intazi, wacisile ivintu na vyuze kwene iviipe ivyasosizye Yeova.
23 Watandike ukupeela malambo kuli ya leza yano antu amu Damasika amulwisyanga yapepanga, nupya walanzile ati: “Pa mulandu wakuti ya leza yakwe ya mwene ya ku Silya yakwazwa antu yao, namayapeela malambo pakuti yangazwe.” Na cii calenzile wene na Ina Izlaeli yonsi yailetelele.
24 Nupya Ahazi wafumizye iviya vya mu ng’anda yakwe Leza wa cumi nu kuvivungola, ayala ivisaasa vya pa ng’anda yakwe Yeova alino aipangila maulambo umu makoona yonsi amu miseo ya mu Yelusalemu.
25 Mu misumba yonsi iya mu mpanga ya Yuda wasoolwilemo incende zya kupeelelapo malambo kuli ya leza yauze, nupya wasosizye Yeova Leza wa vikolwe vyakwe.
26 Ilyasi lyonsi ilyasyala ilikalanda pali aliwe na pali vyonsi vino wacisile ukufuma pa kutandika ukufika uku mpela, lyalembwa umwi buku lya mpiti ilikalanda pali ya mwene ya mu Yuda nu mu Izlaeli.
27 Lyene Ahazi wafwile nu kuziikwa ukwalaala ivikolwe vyakwe umu musumba wa Yelusalemu, yataamuziikile kuno yaziikanga ya mwene ya mu Izlaeli. Hezekiya umwanakwe u wamupyanyile pa wene.
Mafutunoti
^ Lolini Ulondolozi wa Mazwi, “Gehena.”
