1 Yamwene 4:1-34
4 Umwene Solomoni wateekanga umu Izlaeli monsi.
2 Mazina yakwe ya cilolo yakwe aeya: Azaliya mwana Sadoki wali a simapepo;
3 Eliolefi na Ahiya ya mwana Syisya yaali aakalemba; Yeosyafati mwana Ailudi wali a kasunga wa vyalembwa;
4 Benaya mwana Yeoyada wali u mukalamba wa yasilika; Sadoki na Abiata yaali aasimapepo;
5 Azaliya mwana Natani wangalilanga intunguluzi; Zabudi mwana Natani wali a simapepo nupya wali a cuza wa mwene;
6 Ahisya wangalilanga isano; nupya Adonilamu mwana Abuda wangalilanga yano yamile ukuti yaombela umwene.
7 Solomoni wakweti intunguluzi 12 izyangalilanga Aina Izlaeli yonsi, nupya izyapeelanga umwene na amu ng’anda yakwe ivyakulya. Cila ntunguluzi yapekanyanga ivyakulya pa mwezi onga umu mwaka.
8 Intunguluzi izyasoolwilwe aezi: Mwana Huli, u wangalilanga incende ya myamba yakwe Efulemu;
9 mwana Dekeli, u wangalilanga umu Makazi, mu Syaalabimu, mu Beti-syemesyi nu mu Eloni-beti-hanani;
10 mwana Hesedi, u wangalilanga Aluboti (wapeezilwe na Soko ni mpanga yonsi iya Hefeli);
11 mwana Abinadabu, u wangalilanga incende yonsi isuluke iya Doli (watwazile Tafati umwana wakwe Solomoni);
12 Baana umwana wakwe Ailudi, u wangalilanga Taanaki, Megido ni ncende yonsi iya Beti-syeani iyayela umu Zaletani mwisika lya ncende ya Yezileele, kufuma uku Beti-syeani kuya uku Abeli-mehola nu kufika uku ncende ya Yokomeamu;
13 mwana Gebeli, u wangalilanga umu Lamoti-gilyadi (wapeezilwe imizi ya matenti yakwe Jaili mwana Manase, iyayela umu Gilyadi; nupya wapeezilwe ni ncende ya Aligobu, iyayela umu Basyani: kuli kuti, misumba ikalamba 60 iyakweti malinga ni mifiikilo yakwe koopa);
14 Ahinadabu mwana Ido, u wangalilanga Mahanaimu;
15 Aimaazi, u wangalilanga incende ya mutundu wakwe Nafutali (watwazile Basemati umwana na muze wakwe Solomoni);
16 Baana mwana Husyai, u wangalilanga incende ya mutundu wakwe Asyeli nu musumba wa Bealoti;
17 Yeosyafati mwana Paluwa, u wangalilanga incende ya mutundu wakwe Isakali;
18 Syimei mwana Ela, u wangalilanga incende ya mutundu wakwe Benjamini;
19 Gebeli mwana Uli, u wangalilanga impanga ya Gilyadi ni mpanga yakwe Sihoni umwene wa Ina Amoli na yakwe Ogi umwene wa ku Basyani. Kwali ni ntunguluzi yonga iyangalilanga intunguluzi zyonsi izyasyala.
20 Ayuda na Ina Izlaeli yaali aingi wa mucanga wa mu mbali yakwe yemba; yalyanga nu kumwa nu kusansamuka.
21 Solomoni wateekanga mawene yonsi kufuma uku luzi* kufika uku mpanga ya Ina Filisti nu kufika uku mupaka wa Ijipti. Yatwalanga imisonko nu kuombela Solomoni amanda ya umi wakwe yonsi.
22 Cila wanda ivyakulya vyakwe Solomoni vyafinanga makilogilamu 3,300 yakwe fulaulo umusuma, na makilogilamu 6,600 yakwe fulaulo,
23 payanga ing’ombe 10 iziine, ni ng’ombe 20 izyalyanga umulemvwe, ni mfwele 100, nupya payanga ni mpelembe, mpombo, cisongo ni vyunyi iviine.
24 U wakweti maka umu ncende yonsi iyali umu mbali ya Luzi,* kufuma uku Tifisa kufika uku Gaza, nupya u watungululanga ya mwene yonsi aali uku mbali ya Luzi; nu mu mpanga yonsi mwali umutende.
25 Ayuda na Ina Izlaeli yaali acingililwe, kufuma uku Dani kufika uku Belisyeba mu manda yonsi yakwe Solomoni, cila muntu wakweti umuti wa myangazi nu wa masamvu.
26 Nupya Solomoni wakweti umwa kwikala imfwalasi umwali 4,000* izyasendanga maceleta yakwe, wakweti ni mfwalasi 12,000.*
27 Intunguluzi zizyo zyapeelanga umwene Solomoni ivyakulya na yonsi alyanga kuli aliwe. Cila ntunguluzi yamupekanyizizyanga ivyakulya pa mwezi onga nupya yasininkizyanga ukuti kusi cili consi iculila.
28 Nupya yatwalanga na baale ni vyakulya vya mfwalasi lyonsi lino vyalondekwa kumwi sile nu kupekanyizizya imfwalasi izyasendanga maceleta, cila muntu ukulingana na vino yamunenyile ukuomba.
29 Nupya Leza wapeezile Solomoni amano aingi nu mwenzo wa kwiluka wa mucanga wa mu mbali yakwe yemba.
30 Solomoni wakweti sana mano kucila antu yonsi aku ufumondaka na antu yonsi amu Ijipti.
31 Wakweti sana amano kucila antu yonsi, kucila na Etani Mwina Ezala, na Hemani, Kaukoli na Dala, ana aonsi yakwe Maoli; wamanyikwe umu nko zyonsi izyazingulwike.
32 Walanzile mapinda 3,000 nu kwimba inyimbo 1,005.
33 Walanzile pa miti, kutandikila pa muti wa mukedali umu Lebanoni kufika uku kamuti ka isopu akakatamba uku ciumba; walanzile pa nyama, pa vyunyi, pa nyama izikasela,* na pa nswi.
34 Antu amu nsi yonsi yayanga umu kuvwa vino Solomoni wakweti mano, kwikako na ya mwene amu nsi yonsi auvwile pa mano yano wakweti.
Mafutunoti
^ Kuli kuti uluzi lwa Yufuleti.
^ Kuli kuti ku uwondaka wa luzi lwa Yufuleti.
^ Cipendo cii cikazanwa umu vyalembwa vimwi vya mpiti nu mu malembo yauze. Mu vyalembwa vyuze ivya mpiti mwaya icipendo cakwe 40,000.
^ Nanti “aonsi akwelanga pa mfwalasi.”
^ Nanti limwi, “mungaya ni vizizi.”
