1 Yamwene 22:1-53
22 Pa myaka itatu pataali inkondo pa Ina Silya na Ina Izlaeli.
2 Mu mwaka uwalenga citatu, Umwene Yeosyafati uwa ku Yuda waile uku mwene uwa ku Izlaeli.
3 Lyene umwene uwa ku Izlaeli uzizye aomvi yakwe ati: “Uzye mwamanya ukuti umusumba wa Lamoti-gilyadi u witu? Nomba lyene tukuwayawaya ukuupoka uku mwene uwa ku Silya.”
4 Nupya uzizye Yeosyafati ati: “Uzye ulansukilila umu kulwisya umusumba wa Lamoti-gilyadi?” Nawe wamwaswike ati: “Wemo nani sweswe ali yamwi. Antu yane icili cimwi nu kuti antu yako. Imfwalasi zyane icili cimwi nu kuti imfwalasi zyako.”
5 Lelo Yeosyafati wanenyile umwene uwa ku Izlaeli ati: “Napaapata, inkoleelo uzya kuli Yeova.”
6 Fwandi umwene uwa mu Izlaeli wakolonganike ya kasesema umupiipi na 400 aonsi nu kuyuzya ati: “Uzye inje umu kulwisya umusumba wa Lamoti-gilyadi nanti foo?” Nayo yamwaswike iyati: “Yanga, nupya Yeova alaupeela kuli wewe.”
7 Lyene Yeosyafati uzizye ati: “Uzye kuno kutaya kasesema wakwe Yeova? Lekini tuzye na kuli aliwe vino Leza amalanda.”
8 Umwene uwa mu Izlaeli wanenyile Yeosyafati ati: “Kusile umuntu wenga wino tunguzya pali Yeova; nomba namupata, pano ataatala wasesema ivisuma pali nene suka sile iviipe. Izina lyakwe a Mikaya mwana Imila.” Lelo Yeosyafati wamunenyile ati: “Umwene atafwile ukulanda vivyo.”
9 Lyene umwene uwa mu Izlaeli wamile umuomvi wakwe nu kumunena ati: “Kaame zuwa Mikaya mwana Imila.”
10 Umwene uwa mu Izlaeli na Yeosyafati umwene uwa ku Yuda yatenzi pa vilimba vyao ivya wene ale iyazwala ivyakuzwala vyakwe ya mwene, yali pa lwano pa mpongolo ya musumba wa Samaliya, nupya ya kasesema yonsi yali pa nkoleelo yao ale yakusesema.
11 Lyene Zedekiya mwana Kenaana wapanzile impembe zya cela nu kulanda ati: “Yeova watalanda ati, ‘Uluma Aina Silya ukuomvya impembe zii kufikila wayalovya.’”
12 Ya kasesema yonsi yasesemanga ivili vimwi ala yakuti: “Yanga uku musumba wa Lamoti-gilyadi nupya ulaya ukacimvye; Yeova alaupeela kuli wewe.”
13 Wino waile umu kwama Mikaya wamunenyile ati: “Lola! Ya kasesema yonsi iyalanda ivisuma uku mwene. Napaapata, leka vino umalanda viye wakwe vino iyalanda, nupya ulande ivisuma.”
14 Lelo Mikaya walanzile ati: “Nkulapa umwi zina lyakwe Yeova Leza wa umi ukuti, vyonsi vino Yeova amanena avino namalanda.”
15 Lyene waile uku mwene, umwene nawe wamuzizye ati: “Mikaya, uzye tungaya umu kulwisya umusumba wa Lamoti-gilyadi nanti foo?” Lilyo kwene Mikaya nawe wamwaswike ati: “Yangini nupya mulaya mukaucimvye; Yeova alaupeela kuli wewe.”
16 Umwene nawe wamuzizye ati: “I miku inga ino ndakulapisya ukuti uwanena sile ivya cumi umwi zina lyakwe Yeova?”
17 Nawe walanzile ati: “Nkulola Aina Izlaeli yonsi iyasalangana umu myamba kwati imfwele izyaula kacema. Yeova watalanda ati: ‘Antu yaa yatakweti uwa kuyatungulula. Lekini cila muntu aswilile ukwakwe umu mutende.’”
18 Lyene umwene uwa mu Izlaeli wanenyile Yeosyafati ati: “Uzye ntali nakunena ukuti, ‘Atakusesema ivisuma pali nene suka sile iviipe’?”
19 Mikaya walanzile ati: “Uvwa amazwi yakwe Yeova: Inalola Yeova atenzi pa cilimba cakwe ica wene, nupya asilika yonsi akwi yulu iyaimi umupiipi nawe, ukwi lunji na kuli cimani.
20 Lyene Yeova ali uzya wati, ‘A weni amaya akalyombeleke Ahabu pakuti aye uku Lamoti-gilyadi nu kuyafwila kuuku kwene?’ Lelo yonsi iyakwasuka ivipusanepusane.
21 Lyene malaika wenga ali wimilila pa nkoleelo yakwe Yeova nu kulanda ati: ‘Nimaya nkamulyombeleke.’ Yeova nawe ali wamuzya wati, ‘Umaya ukamulyombeleke utuli?’
22 Nawe ali wasuka wati, ‘Nayalenga ya kasesema yakwe yonsi ukulanda ivya ufi.’ Fwandi ali walanda wati, ‘Umaya ukakwanisye ukumulyombeleka. Pitanga ukacite vivyo kwene.’
23 Fwandi Yeova watalenga ya kasesema yako yonsi ukusesema ivya ufi, nupya Yeova watalanda ukuti iviipe vilakucitikila.”
24 Lyene Zedekiya mwana Kenaana wapalime nu kuma Mikaya api tama, nupya wamuzizye ati: “Uzye ukulanda ukuti umupasi wakwe Yeova iwafuma pali nene kuti ulande naawe?”
25 Mikaya nawe wamwaswike ati: “Ulalola vino umupasi iwapita pa wanda uno ulingila umu muputule wa mukasi pakuti ufisame.”
26 Lyene umwene uwa mu Izlaeli walanzile ati: “Sendini Mikaya mumutwale kuli Amoni umukalamba wa musumba na kuli Yoasyi umwana wa mwene.
27 Muyanene muti, ‘Umwene watalanda ati: “Yalilini umuntu wi umu cifungo, nupya mwamupeela ivyakulya ivinono na manzi kufikila lino ndawela umutende.”’”
28 Lelo Mikaya walanzile ati: “Ndi cakuti ulawela umutende ale Yeova atalanzile nani.” Walanzile nu kuti: “Mwensi kwene musunge amazwi yaa.”
29 Lyene umwene uwa mu Izlaeli na Yeosyafati umwene uwa mu Yuda yaile uku Lamoti-gilyadi.
30 Umwene uwa mu Izlaeli wanenyile Yeosyafati ati: “Namazwala ivyakuzwala vyuze pakuti ntamanyikwa nu kuya umu ulwi, lelo wemo uzwale icakuzwala cako ica wene.” Fwandi umwene uwa mu Izlaeli waile azwala ivyakuzwala vyuze nu kuya umu ulwi.
31 Walanga umwene uwa ku Silya watanena akalamba ya yasilika akwezile pa maceleta yakwe 32 ati: “Mutalwa na ali wensi suka sile umwene uwa mu Izlaeli.”
32 Lino akalamba ya yasilika akwezile pa maceleta yaweni sile Yeosyafati, yalanzile iyati: “Wii u mwene uwa mu Izlaeli.” Lyene yaile umu kumulwisya; nupya Yeosyafati wapunzile mutuule.
33 Lino akalamba ya yasilika akwezile pa maceleta yaweni ukuti asi umwene wa mu Izlaeli lilyo kwene yatiile ukumukonka.
34 Lyene umonsi umwi wavwinsile uluceto ukwaula ukumanya, nalo lwaile ilutota umwene wa mu Izlaeli pano ica kucinga icisao calundinkanile. Fwandi umwene wanenyile uwamusenzile api celeta ati: “Koneka nu kumfumya umu ulwi pano iyancisa sana.”
35 Ulwi wakomile sana uwanda uwa, nupya umwene yamwimike umwi celeta ala watalozya icinso uku Ina Silya. Uwazi uwafumanga pa cilonda wakonkolokelanga umwi celeta, nupya wafwile amanguzi.
36 Lino ilanzi lyali umupiipi nu kuwa yanenyile asilika Aina Izlaeli iyati: “Cila muntu aswilile uku musumba wakwe! Cila muntu aswilile uku mpanga yakwe!”
37 Fwandi umwene wafwile, nupya yamutwazile uku Samaliya; kuuku kwene akuno yaile iyamuziikila.
38 Lino yafuzile iceleta lyakwe ilya mu nkondo mu cifula ca mu Samaliya, ya simbwa yamwile uwazi wakwe, nupya ya cizelele yafulalile mumu kwene,* wakwe viivi kwene vino Yeova walanzile.
39 Ilyasi lyonsi ilyasyala ilikalanda pali Ahabu, pali vyonsi vino wacisile na pi sano lino wakuuzile ukuomvya amino ya nzovu kumwi ni misumba yonsi ino wakuuzile, lyalembwa umwi buku lya mpiti ilikalanda pali ya mwene ya mu Izlaeli.
40 Lyene Ahabu wafwile nu kuziikwa wa vikolwe vyakwe; nupya Ahaziya umwanakwe u wamupyanyile pa wene.
41 Yeosyafati mwana Asa watandike ukuteeka umu Yuda mu mwaka uwalenga 4 wa kuteeka kwa mwene Ahabu umu Izlaeli.
42 Yeosyafati wali ni myaka 35 lino watandike ukuteeka, nupya wateesile imyaka 25 umu Yelusalemu. Nyina wali a Azuba mwana Syili.
43 Watwalilile ukulondela sana umu ngazo zyakwe Asa isi. Atafumilemo, nupya wacitanga ivisuma kuli Yeova. Lelo atononyile incende izya kupepelapo zino antu yalolanga ukuti izya muzilo, nupya antu yatwalilile ukupeela malambo ya koca na malambo yauze pa ncende kwene zizyo.
44 Yeosyafati watwalilile ukuvwana nu mwene uwa ku Izlaeli.
45 Ilyasi lyonsi ilyasyala ilikalanda pali Yeosyafati, pa vintu ivya maka vino wacisile na pali vino walwile inkondo, lyalembwa umwi buku lya mpiti ilikalanda pali ya mwene ya mu Yuda.
46 Mu mpanga iiya wafumizyemo na aonsi aali ya cizelele ya pi tempele aasileko umu manda yakwe Asa isi.
47 Lyene umu Edomu mutali umwene, intunguluzi i yalemelezyanga pa wene.
48 Yeosyafati wapanzile na mawato ya ku Tasyisyi akuti yaya umu kusenda goldi uku Ofili, lelo yataileko pa mulandu wakuti yononekile uku Ezioni-gebeli.
49 Lyene Ahaziya mwana Ahabu wanenyile Yeosyafati ati: “Leka aomvi yane yapite na aomvi yako umu mawato,” lelo Yeosyafati wakanyile.
50 Lyene Yeosyafati wafwile nu kuziikwa wa vikolwe vyakwe mu musumba wakwe Devedi icikolwe cakwe, nupya Yeolamu umwanakwe u wamupyanyile pa wene.
51 Ahaziya mwana Ahabu wizile aya umwene mu Izlaeli ala akwikala umu Samaliya mu mwaka uwalenga 17 uwa kuteeka kwa Mwene Yeosyafati uwa mu Yuda, nupya wateesile umu Izlaeli pa myaka iili.
52 Nupya wasosyanga Yeova nu kulondela umu ngazo zyakwe isi na zyakwe nyina, nupya wacitanga wakwe viivi kwene vino Yeloboamu mwana Nebati wacitanga, uwalenzile Aina Izlaeli ukuyembuka.
53 Watwalilile ukuombela Baali nu kumufukamila, nupya watwalilile ukusosya Yeova Leza wa Ina Izlaeli wakwe viivi kwene vino isi wacisile.
Mafutunoti
^ Nanti limwi, “muno ya cizelele yafulalanga amuno ya simbwa yamwile uwazi wakwe.”
