1 Yamwene 16:1-34
16 Yeova walanzile pali Baasya ukupitila muli Yeu mwana Hanani ati:
2 “Nakukatwisye umu lukungu nu kukulenga ukuya umwene pa yantu yane Aina Izlaeli, lelo watwalilila ukulondela umu ngazo zyakwe Yeloboamu nu kulenga antu yane Aina Izlaeli ukuyembuka icakuti yansosya sana pa mulandu ni membu zyao.
3 Fwandi ndalovya Baasya kumwi na amu ng’anda yakwe, nupya ndalenga ing’anda yakwe ukuya wa ng’anda yakwe Yeloboamu mwana Nebati.
4 Umuntu wensi wakwe Baasya aalafwila umu musumba ya simbwa yalamulya; nu muntu wakwe wensi aalafwila umu mpanga ivyunyi vya mwi yulu vilamulya.”
5 Ilyasi lyonsi ilyasyala ilikalanda pali Baasya, pali vino wacisile na pa maka yano wakweti, lyalembwa umwi buku lya mpiti ilikalanda pali ya mwene ya mu Izlaeli.
6 Lyene Baasya wafwile nu kuziikwa wa vikolwe vyakwe umu Tiliza; nupya Ela umwanakwe u wamupyanyile pa wene.
7 Yeova walanzile pali Baasya na amu ng’anda yakwe ukupitila muli Yeu mwana Hanani, pa mulandu ni viipe vino wacisile kuli Yeova nu kumusosya nu kuya wa ya mu ng’anda yakwe Yeloboamu na pali vino wakomile Nadabu.
8 Umu mwaka uwalenga 26 uwa kuteeka kwa mwene Asa uwa ku Yuda, Ela mwana Baasya wizile aya umwene umu Izlaeli ala akuteeka ukufuma umu Tiliza, nupya wateesile pa myaka iili.
9 Zimuli umuomvi wakwe, uwangalilanga afu wa yasilika akwelanga pa maceleta wamupangiile ala ali uku Tiliza watakoleka umu ng’anda yakwe Aza, uwangalilanga amu ng’anda ya mwene umu Tiliza.
10 Zimuli wingile umu ng’anda nu kumukoma umu mwaka uwalenga 27 uwa kuteeka kwa mwene Asa uwa ku Yuda, nupya wamupyanyile pa wene.
11 Lino wizile aya sile umwene nupya lino wikazile sile pa cilimba cakwe ica wene, wakomile yonsi amu ng’anda yakwe Baasya. Atasilemo umonsi ali wensi, aye a lupwa wakwe nanti cuza wakwe.
12 Fwandi Zimuli walovizye yonsi amu ng’anda yakwe Baasya, wakwe viivi kwene vino Yeova walanzile pali aliwe ukupitila muli Yeu kasesema.
13 Cali vivyo pa mulandu ni membu zino Baasya na Ela umwanakwe yacisile na vino yalenzile Aina Izlaeli ukuyembuka nu kusosya Yeova Leza wa Ina Izlaeli kupitila umu kupepa ivilubi ivya sile sile.
14 Ilyasi lyonsi ilyasyala ilikalanda pali Ela na pali vyonsi vino wacisile, lyalembwa umwi buku lya mpiti ilikalanda pali ya mwene ya mu Izlaeli.
15 Umu mwaka uwalenga 27 uwa kuteeka kwa Mwene Asa uwa ku Yuda, Zimuli wizile aya umwene pa manda 7 umu Tiliza ala asilika iyapanga inkambi kuti yalwisye umusumba wa Gibetoni uwa Ina Filisti.
16 Umu kuya kwa nsita, asilika aapanzile inkambi yuvwile ukuti: “Zimuli wakomile umwene pa cisila ca kumupangila.” Fwandi Aina Izlaeli yonsi yasonsile Omuli umukalamba wa yasilika kuti aye umwene pa Ina Izlaeli ala yali umu nkambi.
17 Omuli na Ina Izlaeli yonsi yano wali nayo yafumile uku Gibetoni nu kuyazinguluka umusumba wa Tiliza.
18 Lino Zimuli waweni ukuti umusumba wapokwa, waile uku ncende icingililwe iya pi sano nu koca isano afwila na mumo kwene.
19 Cali vivyo pa mulandu ni viipe vino wacisile nu kuyembukila Yeova, ukupitila umu kulondela umu ngazo zyakwe Yeloboamu na vino walenzile Aina Izlaeli ukuyembuka.
20 Ilyasi lyonsi ilyasyala ilikalanda pali Zimuli na pali vino wapangiile umwene, lyalembwa umwi buku lya mpiti ilikalanda pali ya mwene ya mu Izlaeli.
21 Aina Izlaeli yankanikiine umu maumba yaili. Iumba lyonga lyalondelanga Tibini mwana Ginati nupya lyalondanga ukumwika pa wene, iumba lyuze nalyo lyalondelanga Omuli.
22 Lelo antu alondelanga Omuli yacimvizye alondelanga Tibini. Fwandi Tibini wafwile nupya Omuli wizile aya umwene.
23 Umu mwaka uwalenga 31 uwa kuteeka kwa Mwene Asa uwa ku Yuda, Omuli wizile aya umwene umu Izlaeli nupya wateesile pa myaka 12. Wateesile imyaka 6 umu Tiliza.
24 Wakazile umwamba wa Samaliya pa matalanti* yaili yakwe siuva kuli Syema nupya wakuuzilepo umusumba. Watemiile umusumba izina lyakuti Samaliya ilyali ilyakwe Syema uwali umwineco wa mwamba pa kutandika.
25 Omuli wasosyanga Yeova, nupya uwacitanga sana iviipe ukucila yonsi aamukolelile.
26 Walondelanga umu ngazo zyakwe Yeloboamu mwana Nebati nu mu membu zino walenzile Aina Izlaeli ukucita nu kusosya Yeova Leza wa Ina Izlaeli ukupitila umu kupepa ivilubi ivya sile sile.
27 Ilyasi lyonsi ilyasyala ilikalanda pali Omuli, pali vino wacisile na pali vino wacimvizye, lyalembwa umwi buku lya mpiti ilikalanda pali ya mwene ya mu Izlaeli.
28 Lyene Omuli wafwile nu kuziikwa umu Samaliya wa vikolwe vyakwe; nupya Ahabu umwanakwe wamupyanyile pa wene.
29 Ahabu mwana Omuli wizile aya umwene umu Izlaeli umu mwaka uwalenga 38 uwa kuteeka kwa Mwene Asa uwa mu Yuda, nupya Ahabu wateesile umu Izlaeli pa myaka 22 ala akwikala umu Samaliya.
30 Ahabu mwana Omuli wacitanga sana iviipe kuli Yeova ukucila yonsi aamukolelile.
31 Kulunda pa kucita imembu zino Yeloboamu mwana Nebati wacisile, watwazile na Yezebele mwana Etibaali umwene wa Ina Sidoni, nupya watandike ukupepa Baali nu kumufukamila.
32 Nupya wakuuliile Baali ulambo pa ng’anda yakwe Baali ino wakuuzile umu Samaliya.
33 Ahabu wimike nu lucesi lwa kupepa. Wacisile na vyuze ivya kusosya Yeova Leza wa Ina Izlaeli ukucila ya mwene yonsi amu Izlaeli aamukolelile.
34 Lino Ahabu wali umwene, Hiyeli Umwina Betele wakuuzile cipya cipya umusumba wa Yeliko. Wafwililwe Abilamu iyeli lyakwe pa kukuula umufula, nupya pa kukwika ivisaasa wafwililwe Segubu kasuli wakwe, kulingana na viivi kwene vino Yeova walanzile ukupitila muli Yoswa mwana Nuni.
Mafutunoti
^ Italanti lyonga lyafinanga makilogilamu 34.2. Lolini Ivyeo na Vyuze pa B 14.
