1 Samweli 28:1-25
-
Saulo waya kuli wino akauvwana ni mipasi mu Eni-doli (1-25)
28 Mu manda yaya, Aina Filisti yakolonganike asilika yao ukuti yakalwe na Ina Izlaeli. Fwandi Akisyi wanenyile Devedi ati: “Watumanya ukuti wemo na antu yako tulaya swensi uku ulwi.”
2 Devedi nawe wanenyile Akisyi ati: “Watumanya ukuti umuomvi wako alacita vivyo kwene.” Lyene Akisyi wanenyile Devedi ati: “Ali mulandu uno ndakusontela ukuya kalinda wane manda pe.”
3 Samweli alanga wafwa nupya ale Aina Izlaeli yonsi yamuloosya nu kumuziika umu musumba uno wikalangamo uwa Lama. Nupya pa nsita iiya ala Saulo wazinga aakauvwana ni mipasi na aakasowela umu Izlaeli.
4 Aina Filisti yakolongine nupya yaile iyapangila inkambi umu Syunemu. Saulo nawe wakolonganike Aina Izlaeli yonsi nupya yaile iyapangila inkambi umu Giliboa.
5 Lino Saulo waweni inkambi ya Ina Filisti uvwile intete nupya watandike ukuzakaza sana.
6 Nanti cakuti Saulo wapepanga kuli Yeova, Yeova atamwasukanga ukuomvya iviloto nanti Ulimu nanti ukuomvya ya kasesema.
7 Saulo wasusile wanena aomvi yakwe ati: “Ndondelini umwanaci akauvwana ni mipasi, nani namayako nu kuyamuzya.” Aomvi yakwe yaswike iyati: “Umu Eni-doli mwaya umwanaci akauvwana ni mipasi.”
8 Fwandi Saulo waicisile ukuya kwati umuntu muze nupya wazwite ivyakuzwala vyuze nu kuya ku mwanaci usiku ala ali na aonsi yakwe yaili. Lyene wamunenyile ati: “Nsapolele, nupya unkatusizye umuntu wino namakunena.”
9 Lelo umwanaci wamunenyile ati: “Wamanya vino Saulo wacisile, wazinzile aakauvwana ni mipasi na aakasowela umu Izlaeli. U mulandu ci uno ukunjikila umu uzanzo pakuti inkomwe?”
10 Lyene Saulo walafile kuli aliwe umwi zina lyakwe Yeova ati: “Nkulapa umwi zina lyakwe Yeova Leza wa umi, utamakwata umulandu uuli onsi!”
11 Lino umwanaci uvwile vivyo uzizye ati: “A weni wino ukulonda inkukatusizye?” Nawe waswike ati: “Unkatusizye Samweli.”
12 Lino umwanaci waweni “Samweli,”* wapunzile kuli Saulo ni izwi likalamba ati: “U mulandu ci uno uwambepela? Wewe Saulo!”
13 Umwene wamunenyile ati: “Utuvwa intete, i vyani vino ukulola?” Umwanaci wanenyile Saulo ati: “Nkulola umwi kwati a leza akufuma mu musili.”
14 Nupya kwene Saulo uzizye umwanaci ati: “Akuloleka uli?” Nawe watiile: “U mukote nupya azwite ikoti lyaula makasa.” Lyene Saulo wilwike ukuti a “Samweli” nupya wafukime ala watainama alino afupama.
15 Lyene “Samweli” uzizye Saulo ati: “U mulandu ci uno wampumvyanyizizya pa kunkatusya?” Saulo waswike ati: “Indi mu ntanzi ikalamba. Aina Filisti yakundwisya, Leza wafuma kuli nene nupya wata ukungasuka ukupitila muli ya kasesema nu mu viloto; ali mulandu uno nakwamila pakuti unene vino ndinzile ukucita.”
16 Nupya “Samweli” watiile: “U mulandu ci uno wiza umukuzizya kuli nene lino Yeova wafuma kuli wewe nupya waya u mulwani wako?
17 Yeova umwineco alacita vino walanzile ukupitila muli nene: Yeova alapoka uwene kuli wewe nu kuupeela kuli Devedi wenga pa ya omvi yako.
18 Pano wakanyile ukuvwila Yeova nupya utaaloviizye Aina Amaleki aasosizye Leza, ali mulandu uno Yeova akucitila cii kuli wewe ilelo.
19 Yeova alapeela Aina Izlaeli pamwi naawe uku Ina Filisti, nupya mutondo wemo pamwi na ana yako aonsi mulaya pamwi nani. Nupya Yeova alapeela asilika ya Ina Izlaeli uku Ina Filisti.”
20 Lilyo kwene sile Saulo waponyile alambalala pansi nupya uvwile sana intete pa mulandu na vino “Samweli” walanzile. Nupya atakweti amaka pano ataliile ivyakulya umusanya nu usiku.
21 Lino umwanaci waile kuli Saulo nu kulola ukuti watasakamikwa sana, wamunenyile ati: “Ne muomvi wako inuvwila vino iwanena, inika umi wane umu uzanzo nu kucita vino iwanena.
22 Fwandi uvwa kuli vino ne muomvi wako nkulanda. Leka nkupekanyizizye ivyakulya pakuti ulye nu kukwatako amaka aakuti upitile.”
23 Lelo wakanyile nu kulanda ati: “Nsikulya.” Nomba aomvi yakwe kumwi nu mwanaci yatandike ukumupatikizya. Wasusile auvwa kuli aliyo nupya wakatwike pansi nu kwikala pali bedi.
24 Umwanaci wakweti akana ka ng’ombe akiine apa ng’anda apakwe, fwandi wakakomile zuwa zuwa, nupya watozile fulaulo nu kukasa umunya, lyene wapanzilemo umukate uwaula icitutumusi.
25 Wapeezile Saulo na aomvi yakwe, nayo yaliile. Lyene pacisila yakatwike usiku nu kupita.
Mafutunoti
^ Nanti “icalolekanga wakwe Samweli.”
