1 Samweli 17:1-58
17 Aina Filisti yakolonganike asilika yao kuti yakalwe inkondo. Yakolongine umu Soko, umusumba uwayela umu mpanga ya mutundu wakwe Yuda nupya yapangiile inkambi pakasi ka musumba wa Soko nu wa Azeka umu Efisi-damimu.
2 Saulo na aonsi Aina Izlaeli yakolongine nu kupanga inkambi mu mukonko wa Ela, nupya yaipekinye ukuti yalwe na Ina Filisti.
3 Aina Filisti yaali pa mwamba uku lusansa longa, na Ina Izlaeli nayo yaali pa mwamba uku lusansa luze, ala umukonko uli pakasi.
4 Lyene umu nkambi ya Ina Filisti mwafumile umonsi uwakwatisye sana amaka; izina lyakwe wali a Golyati umwina Gati, nupya wali u mutali sana umupiipi na mamita 2.9.
5 Wazwite icisote cakwe koopa nupya wazwite ikoti lya mpapa ilyakweti utuvyela. Ikoti lilyo lyafinyile umupiipi na makilogilamu 57.
6 Wazwite ivyakucingilila makulu vyakwe koopa, wakowike na kalisumo akipi kakwe koopa pa ciye.
7 Cilemelo ci sumo cali wa cimuti cakwe ya kapikula, nupya icilimi ci sumo ca cela cafinyile umupiipi na makilogilamu 6.84; nu wamusendelanga icisyangu wali pa nkoleelo yakwe.
8 Lyene wimilile nu kupundilila Aina Izlaeli aaipekinye ukulwa ati: “U mulandu ci uno mwaipekanyizizya ukulwa naswe? Uzye asi nene Umwina Filisti nupya namwe mwemwe yaomvi yakwe Saulo? Soololini umonsi uwakuti atentemuke aize kuli nene.
9 Ndi cakuti amakwanisya ukulwa nani nu kunkoma, ale tumaya aomvi inu. Lelo ndi cakuti namucimvya nu kumukoma, ale lyene mumaya aomvi itu nupya mwakulatuombela.”
10 Lyene Umwina Filisti walanzile ati: “Insuula asilika ya Ina Izlaeli ilelo. Mpeelini umonsi uwakuti tulwe nawe!”
11 Lino Saulo na Ina Izlaeli yonsi yuvwile mazwi ya Mwina Filisti, yazakize nu kuvwa sana intete.
12 Devedi wali a mwana Yese Umwina Efulata uwafumile uku musumba wa Betelemu uwayela umu mpanga ya mutundu wakwe Yuda, Yese wakweti ana aonsi 8 nupya umu manda yano Saulo wateekanga wali u mukote.
13 Ya mwana Yese aikolo yatatu yalondiile Saulo uku nkondo. Mazina yao aeya: Eliabu uwali iyeli, wakwe ciili a Abinadabu, na wakwe citatu a Syama.
14 Devedi wali ali munono sana, nupya ya isilenzi yatatu yalondiile Saulo.
15 Devedi wayanga umu kucema imfwele zyakwe isi ku Betelemu nupya wawelanga kuli Saulo.
16 Cila wanda katondo na manguzi pa manda 40, Umwina Filisti wayanga akwimilila apiipi na Ina Izlaeli.
17 Lyene Yese wanenyile Devedi umwanakwe ati: “Tola kasaka* kaa aka ngano izisalule ni mikate yii 10, utwalile zuwa zuwa ya solenzi aali uku nkambi.
18 Nupya utole iviputulwa 10 utwalile umukalamba wa yasilika; ukalole vino ya solenzi yali nupya uce uwize unene.”
19 Ya isilenzi yakwe Devedi yaali pamwi na Saulo na aonsi yauze Aina Izlaeli mu mukonko uwa Ela, yalwanga na Ina Filisti.
20 Fwandi Devedi wakatwike katondotondo, nupya wasiilile umwi kuti awino asakamala imfwele; lyene walonzile ivintu nu kupita wakwe vino isi Yese wamunenyile. Lino wafisile wazanyile ala asilika yakuya umu kulwa inkondo, ala yakupunda icongo ca ulwi.
21 Aina Izlaeli na Ina Filisti yatantamanga ala yakulozyanya ivinso.
22 Lilyo kwene sile Devedi wasiile iviya vyakwe pa muntu uwasunganga iviya nu kusimwilila kuno asilika yaatantime. Lino wafisile watandike ukulamuka ya isilenzi pakuti amanye vino yaali.
23 Lino Devedi walandanga na ya isilenzi, umusilika wa maka Golyati Umwina Filisti uwafumile uku Gati wizile. Wafumile umu mulongo wa yasilika ya Ina Filisti nupya wavwanzile mazwi wakwe yano wavwanganga lyonsi, na Devedi uvwileko.
24 Lino aonsi yonsi Aina Izlaeli yaweni umonsi wiyo, yuvwile intete nu kuutuka.
25 Aina Izlaeli yalanzile iyati: “Uzye imulola umuntu wii aakwiza? Akaiza umu kutumfya Aina Izlaeli. Aalakoma umuntu wii, umwene alamupeela ivyuma ivingi nupya alamupeela nu mwanakwe umukazyana, wene nu lupwa lwakwe isi yatalaapelako umwene ivintu vino Aina Izlaeli yakamupeela.”
26 Devedi watandike ukuzya aonsi aimi umupiipi nawe ati: “I vyani vino yalacitila umuntu alakoma Umwina Filisti wii nu kufumya umuzewanya pa Ina Izlaeli? Pano u Mwina Filisti ci wii aatazembululwa aangatumfya asilika yakwe Leza wa umi?”
27 Lyene antu yamunenyile mazwi ali yamwi kwene iyati: “Vii avino yalacitila umuntu alamukoma.”
28 Lino Eliabu silenzi mukalamba uvwile kuno Devedi akulanda na aonsi, wamusokiile sana nu kumukalipila ati: “U mulandu ci uno wizila kuno? Nupya a weni wino watusiila imfwele izinono umu lwanga? Imanya cilumba cako na mapange yako aipe; watuwiza sile umu kutamba ulwi.”
29 Devedi nawe waswike ati: “I cani cino naluvyanya pakwene? Inkuzya sile!”
30 Lyene Devedi waile uku muntu muze nu kumuzya ivili vimwi kwene, nupya antu yamwaswike ivili vimwi kwene.
31 Antu yuvwile mazwi yano Devedi walanzile nupya yanenyileko na Saulo. Fwandi Saulo watumile akuti yakame Devedi.
32 Devedi wanenyile Saulo ati: “Mutaleka umuntu ali wensi auvwe intete pa mulandu wa muntu wii. Ne muomvi winu namalwa nu Mwina Filisti wii.”
33 Nomba Saulo wanenyile Devedi ati: “Utanga ukwanisye ukulwa nu Mwina Filisti wii, pano wewe mwance, nupya wene u musilika ukufuma ku wance wakwe.”
34 Lyene Devedi wanenyile Saulo ati: “Lino ne muomvi winu nacemanga imfwele zyakwe ya tata, cisama wizile alema imfwele na beele kwene wizile alema imfwele.
35 Namulondelile nu kumukoma nupya naposile imfwele uku kanwa. Lino wankatukile namulemile umu nzekete nu kumukoma.
36 Ne muomvi winu nakomile cisama na beele kwene, nupya vikwene avino cimaya nu ku Mwina Filisti aatazembululwa pano akutumfya asilika yakwe Leza wa umi.”
37 Devedi walanzile nu kuti: “Yeova uwampuswisye kuli cisama na kuli beele, aliwe amampususya nu ku Mwina Filisti kwene wii.” Lino Saulo uvwile vivyo wanenyile Devedi ati: “Pitanga, nupya Yeova aye naawe.”
38 Lyene Saulo wazwisile Devedi vyakuzwala vyakwe. Wamuzwisile icisote cakwe koopa, amuzwika ni koti lya mpapa.
39 Devedi wasomike lupanga mu vyakuzwala vyakwe, nupya wezizye ukupita nomba wafizilwe pano ataviyelizye. Lyene Devedi wanenyile Saulo ati: “Nkufilwa ukupita umu vintu vii pano ntaviyelezya.” Fwandi Devedi wavizuzile.
40 Watozile intuwa nupya wasozile mawe atelepe 5 mu mbali ya kaluzi nu kwika umu kacola kano wasendanga pa kuya umu kucema imfwele, wasenzile ni ca kuvwintilako mawe. Lyene watandike ukupalama uku Mwina Filisti.
41 Umwina Filisti watandike ukupalama kuli Devedi, nu wamusendelanga icisyangu wali pa nkoleelo yakwe.
42 Lino Umwina Filisti walolekisye Devedi, wamusuuzile sana pa mulandu wakuti wali sile akalumendo akalolekanga ningo nupya akayembe.
43 Umwina Filisti wanenyile Devedi ati: “Uzye nene simbwa uwakuti waizila ni mikota?” Lyene Umwina Filisti watiifile Devedi umwi zina lyakwe ya leza yakwe.
44 Umwina Filisti wanenyile Devedi ati: “Iza kuno, nupya namapeela umwili wako uku vyunyi nu ku vinyama vya mu mpanga.”
45 Devedi waswike Umwina Filisti ati: “Wemo ukwiza kuli nene nu lupanga ni isumo na kalisumo kanono, lelo nemo nkwiza kuli wewe umwi zina lyakwe Yeova Leza wa maumba, Leza wa yasilika ya Ina Izlaeli wino watupontela.
46 Yeova amakupeela kuli nene ilelo, namakucimvya nupya namakuputula umutwe, nupya pa wanda kwene uu ivitumbi vya mu nkambi ya Ina Filisti namavipeela uku vyunyi nu ku vinyama vya mu mpanga; nupya antu yonsi umu nsi yamamanya ukuti umu Izlaeli mwaya Leza.
47 Nupya yonsi atiyakolongana pano yamamanya ukuti asi uku lupanga nanti ukwi sumo kuno Yeova akapususizya, pano ulwi u wakwe Yeova, nupya amamupeela mwensi kuli sweswe.”
48 Lyene Umwina Filisti watandike ukupalamila kuli Devedi, nomba Devedi wasimwiliile zuwa zuwa ukwali asilika Aina Filisti pakuti amukomenkanye.
49 Devedi wingizye ikasa lyakwe umu kacola nu kutola iwe nu kulivwinta ukuomvya ica kuvwintilako. Watamile Umwina Filisti pa cipuma, nupya iwe lingile umu cipuma, nupya waponyile pansi ala watafupama.
50 Fwandi Devedi wacimvizye Umwina Filisti ukuomvya iwe ni ca kuvwintilako mawe; watamile Umwina Filisti nu kumukoma, nanti cakuti Devedi atakweti ulupanga.
51 Devedi watwalilile ukusimula aya aimilila papela ya Mwina Filisti. Lyene wasomwile ulupanga lwa Mwina Filisti muno lwali nu kumuputula umutwe pakuti asininkizye ukuti wafwa. Lino Aina Filisti yaweni ukuti umuntu wao uwakwatisya maka wafwa, yutwike.
52 Lyene Aina Izlaeli na Ayuda yatandike ukupunda nupya yazinginye Aina Filisti ukufuma umu mukonko ukuyafika uku mpongolo zya ku Ekiloni, nupya ivitumbi vya Ina Filisti aafwile vyali mu museo ukutandikila uku Syaalaimu kuyafika uku Gati nu ku Ekiloni.
53 Pa cisila icakuti Aina Izlaeli yawela umu kuzinganya Aina Filisti, yaile umu nkambi zya Ina Filisti nu kuyasampa iviya ivyalimo.
54 Lyene Devedi watwazile umutwe wa Mwina Filisti uku Yelusalemu, lelo ivyanzo vya Mwina Filisti wavisungiile umwi tenti lyakwe.
55 Lino Saulo waweni Devedi waya umu kukomaanya Umwina Filisti, uzizye Abineli umukalamba wa yasilika ati: “Abineli, uzye wii a mwana weni?” Abineli nawe waswike ati: “Nkulapa pa umi wako we mwene, ntamanyile!”
56 Umwene watiile: “Londelezya pakuti umanye isi wa mulumendo wii.”
57 Lino Devedi wawezile sile umu kukoma Umwina Filisti, Abineli wamusenzile nu kumutwala kuli Saulo ala Devedi asenzile nu mutwe wa Mwina Filisti mu minwe.
58 Lyene Saulo uzizye Devedi ati: “Uzye wewe mwana weni?” Nawe Devedi waswike ati: “Nene mwana wa muomvi winu Yese Umwina Betelemu.”
Mafutunoti
^ Mu Ciebele: “Efa wenga, umupiipi na makilogilamu 13.”
