Kalata wa Kutandikilako ku Ina Kolinto 7:1-40
7 Lyene ukulozya uku vintu vino mwalemvile, cazipa uku monsi ukukanalema* umwanaci;
2 lelo pa mulandu wa kuvulisya kwa uzelele,* lekini umonsi wensi akwate umuci nu mwanaci wensi nawe akwate iya.
3 Lekini iya apeele umuci cino alinzile ukupeelwa, umuci nawe kwene apeele iya cino alinzile ukupeelwa.
4 Umuci atakwata amaka pa mwili wakwe, suka iya; iya nawe kwene atakwata amaka pa mwili wakwe, suka umuci.
5 Mutaimana suka sile nga mwazumilizyanya apa nsita imwi, pakuti muomvye insita iiyo uku kupepa alino nu kwizaya pamwi nupya, pakuti Satana ataamutunka pa mulandu wa kukanaikaanya kwinu.
6 Lelo namupeela insambu zya kucita vivyo, nomba asi sunde.
7 Lelo ningatemwa ndi cakuti antu yonsi yali wakwe nene. Nomba cila muntu wakwata ica upe ukufuma kuli Leza, wenga umu nzila yii, muze nawe umu nzila yuze.
8 Lyene nkunena aatatwala nanti ukutwalwa kumwi na ya mukamfwilwa ukuti cingazipa nga yatwalilile ukuya wakwe nene.
9 Lelo ndi cakuti yatanga yaikaanye, lekini yatwale nanti ukutwalwa, pano cazipa ukutwala nanti ukutwalwa ukucila ukuya sana ni nsuna.
10 Lyene kuli yano yatwalana nkuyanena ukuti, umuci atalinzile ukufuma kuli iya, asi nene nkulanda lelo u Mwene.
11 Lelo umuci nga wafuma kuli iya, atwalilile ukwikala ukwaula ukutwalwa nanti aswilile kuli iya; nupya iya atalinzile ukusya umuci.
12 Lelo yauze nkuyanena ukuti ndi cakuti umwina wakwata umuci aatataila nupya umuci akulonda ukwikala nawe, atalinzile ukumusya, anene nkulanda, asi Umwene;
13 nupya ndi cakuti umwanaci wakwata iya aatataila nupya umonsi akulonda ukwikala nawe, atalinzile ukumusya.
14 Pano iya aatataila akaya umusanguluke pa mulandu nu muci, nupya umuci aatataila akaya umusanguluke pa mulandu na iya uwataila, nga citaali vivyo ana inu yangaya akowele, lelo ndakai aamuzilo.
15 Lelo ndi cakuti aatataila wapingulapo ukufumako,* angafumako; umwina nanti nkazi atalinzile ukupatikiziwa ukwikala nawe nga caya vivyo, nomba Leza wamwama ukuti muye nu mutende.
16 Pano we muci, wamanya uli ndi cakuti limwi wewe ungaca upususye uwako? Nanti, we iya, wamanya uli ndi cakuti limwi wewe ungaca upususye mamako?
17 Lelo wakwe viivi kwene vino Yeova wapeela cila muntu ica upe, lekini cila muntu acita ukulingana na vino Leza wamwama. Nupya vikwene avino nkunena ni vilongano vyonsi.
18 Uzye umwi wamilwe ala u muzembululwe? Lekini atwalilile ukuya umuzembululwe. Uzye umwi wamilwe ala asi muzembululwe? Lekini aye vivyo kwene ukwaula ukuzembululwa.
19 Ukuzembululwa kutaakwata incito, nu kukanazembululwa nako kwene kutaakwata incito; icacindama u kulondela masunde yakwe Leza.
20 Lekini cila muntu atwalilile ukuya viivi kwene vino wali lino wamilwe.
21 Uzye wamilwe ala wewe muzya? Cico citalinzile ukukusakamika; lelo ndi cakuti isyuko lya kuya umuntungwa lyaloleka, utalipanya.
22 Pano wensi uwamiilwe umu Mwene lino wali umuzya, u muntungwa umu Mwene; nupya wensi uwamilwe lino wali umuntungwa, u muzya wakwe Klistu.
23 Mwakazilwe pa mutengo ukome; fwandi tiini ukuya azya ya yantu.
24 Inane lekini cila muntu atwalilile ukuya cuza wakwe Leza wakwe vino wali lino wamilwe.
25 Lyene ukulozya kuli yano yataatala yatwalapo nanti ukutwalwa, ntakweti amazwi ya kuyanena ukufuma uku Mwene, lelo namalanda sile vino nkwelenganya wa muntu wino Umwene walangizya uluse pa kuya uwa cumi.
26 Fwandi nkwelenganya ukuti cazipa umuntu atwalilile wakwe vino waya pa mulandu ni ntazi zya ndakai.
27 Uzye wakwata umuci wako? Utalonda ukusapulwa. Uzye utakwata umuci wako? Utalonda ukukwata umuci.
28 Lelo nanti cakuti watwala nanti ukutwalwa, ala utacisile uluyembu. Nupya umusimbe nga watwala nanti ukutwalwa, ala atacisile uluyembu. Lelo yano yatwala nanti ukutwalwa yalakwata intazi umu mili yao. Nemo nkwezya sile ukumucingilila uku ntazi.
29 Nupya inane namunena ukuti, insita iyatisyalako yaticepa. Acino ukufuma ndakai kwene, aakwata ya mama yaye kwati yatakwata,
30 nupya akuloosya yaye wa yantu asikuloosya, na akusansamuka yaye wa yantu asikusansamuka, na akukala yaye wa yantu aatakweti nanti acimwi,
31 na akuomvya insi yii yaye wa yantu asiiomvya sana; pano ivintu vya mu nsi yii vikusenuka.
32 Nkulonda ukuti muye antungwa uku masakamika. Umuntu aatatwala akasakamala pa vintu vya Mwene, pali vino angatemwikwa uku Mwene.
33 Lelo umuntu uwatwala akaika mano uku vintu vya mu nsi, pali vino angatemwikwa kuli mamakwe,
34 nupya akapumvyanyiziwa. Lelo umwanaci aatatwalwa, kumwi nu musimbe, yakaika mano uku vintu vya Mwene, pakuti yangaya amuzilo uku mwili nu ku mupasi. Nomba umwanaci uwatwalwa, akaika amano uku vya mu nsi, pakuti angatemwikwa kuli iya.
35 Lelo nkumunena vii pakuti ivintu vimuzipile, nsikumupoka untungwa, lelo nkulonda ukuti mwacita ivisuma alino nu kutwalilila ukuombela Umwene ukwaula ukupumvyanyiziwa.
36 Lelo ndi cakuti umwi akulola ukuti cikumutalila ukwikala ukwaula ukutwala nanti ukutwalwa, nupya nga watacila pa musinku wa wance, cingazipa ukuti atwale; ala atayembwike.
37 Lelo ndi cakuti umwi akulola ukuti angakwanisya nupya kusi icingamutalila, nupya akweti amaka ya kuikaanya nupya watapingula umu mwenzo wakwe ukwikala ukwaula ukutwala nanti ukutwalwa, ala wacita ningo.
38 Fwandi wensi uwatwala nanti ukutwalwa, ala wacita ningo, lelo wensi uwakana ukutwala nanti ukutwalwa, ala wene wacita ningo sana.
39 Umuci asiya nu untungwa wa kutwalwa lino iya acili nu umi. Lelo ndi cakuti iya wafwa, u muntungwa ukutwalwa kuli wensi wino akulonda, cikulu sile watwalilwa umu Mwene.
40 Lelo nemo nkulola ukuti angaya ni nsansa nga watwalilila ukwikala vivyo kwene; nupya nkwelenganya ukuti nani kwene nakwata umupasi wakwe Leza.
Mafutunoti
^ Kuli kuti ukukanapanga icupo nu mwanaci.
^ Kuvuzya umu Cigiliki Por·nei′a. Lolini Ulondolozi wa Mazwi.
^ Nanti “ukupaalukana.”
