Apostolu Tiyaku holattaniha Ibiibiliya khampa iloola innikavihera wiicoona mananna ciriihu. (Tiya. 1:22-25) Manannani ninhaleehu uvarela nteko iloola nimananna omaana?

Nsome saana. Hiiva niiweheehaka nloolani naakuvyaacaka, atthunaka khaninhala ukhitiri woona mananna ciriihu uwiitho awula ciwanreehu. Inanna imocaaru, nasomaka Ibiibiliya naakuvyaacaka, khaninhala ukhitiri woona makhalelo oohiloka arineehu wanrimani wihu anlamuliyeehu urukunusa.

Mwiiweheehe uhiya waaweha atthu akhwaawe. Nawehaka iloola nineemenle nseresere, hi khaninhala ukhitiri wiicoona mananna ciriihu, masi ninhala woona inanna ciryaaya akhunanihu. Iyo phiitthu ineerannya nasomaka Ibiibiliya nuupuwelaka wiira atthu akhwaawe anlamuliya upanka marukunuso. Napankaka commo, khunhala unikavihera ukhala atthu omaana awula upanka marukunuso makhwaawe.

Nwehere ratta. Niiwehaka nloolani ni naweheehaka paahi mapuro arineehu itafaawuti, pooti ulolovaca. Nasomaka Ibiibiliya, ciicammo nihaana uwehera ratta. Nihaana uwehera khampa Yehova cimpheelaawe uhiya mananna cinnicivela.—Tiya. 3:17.