MWAHA WOOSOMIYA 25
NCIPO 96 Ilivuru ya Nluku ikhanle iparakha
Itthu nineetthuceehu niinatiri Yakopi yaapankilyaawe hinaaya ukhwa—Mphantte 2
“Uyo ahoncaliha khula ntthu nimananna camphwanelanaaya.”—UPHA. 49:28.
ITTHU INHALEEHU WIITTHUCA
Nhina ula mwahoola, ninaahala woona itthu nineetthuceehu niinatiri Yakopi yaapankenlyaawe asaanaawe: Zebulau, Isakar, Taa, Kaati, Aser, Nafitali, Yusufu ni Pencamii.
1. Mphantteni wonatiri ya Yakopi unhaleehu woona nhina ula mwahoola?
ASAANA a Yakopi yahothukumana nipuro nimoca wiira aviriyane saana itthu athumwana caya yaahalaaya uhimya. Khampa noonileehu mwaha uvinre, Ruupeni, Simeau, Levi ni Yuuta yahokhalaca ootikhinihaciya niitthu Yakopi yaahimenryaawe. Khweeliini, ayo yaaneekoha isiyani Yakopi yaahalaawe waahimerya asaanaawe akhwaawyaayo. Vano, nttwee noone itthu ineetthuceehu niitthu Yakopi yaahimenryaawe asaanaawe, Zebulau, Isakar, Taa, Kaati, Aser, Nafitali, Yusufu ni Pencamii. a
ZEBULAU
2. Isiyani Yakopi yaamwiirenlyaawe Zebulau ni manannani ayo moolumwaayo yiiraneelyaaya? (Uphattuwaca 49:13) (Nwehe ciicammo ikwaaturu.)
2 Nsome Uphattuwaca 49:13. b Yakopi ahohimya wiira ucuulu wa Zebulau waahala ukhala uculu waya ilapo yaakhuluvelihiyaaya ni waattamela ipahari. Uvira waya myaakha coopwahaka 200, ala moolumwaala yaheerannya. Ncoko waakhalaaya ucuulu wa Zebulau waari iriyari ipahari yo Kalileeya ni ipahari yo Mediterrâneo. Moocesi ahohimya co: “Utteeliye, oo Zebulau, naanakoswaa.” (Deut. 33:18) Uyo atthunaka enre commo, kontha ucuulu wa Zebulau khawaarikela umpanka nakoso naatthu yaakhuma micoko cikhwaawe, ukhala wiira ayo yaakhala iriyari ipahari piili. Phimaana, ucuulu wa Zebulau wahaana isariya yookhala ootteeliya.
3. Isiyani innikavihera ukhala ootteeliya niitthu irineehu?
3 Itthu ineetthuceehu: Hataa nikhalaka mapuroni awula naananaka masakhani, hi khaninhiya ukhala ootteeliya. Masi, wiira nihihiyerere ukhala ootteeliya, nihaana nitteeliyaka nrima nicitthu cirineehu. (Isaa. 16:6; 24:5) Ikwaha cikhwaawe, hiiva pooti uweheeha citthu cihirineehu uhiya uweheeha citthu comaana cirineehu. Vano, nihaana umananiha uweheeha citthu comaana cirineehu.—Akalas. 6:4.
ISAKAR
4. Isiyani Yakopi yaamwiirenlyaawe Isakar ni manannani ayo moolumwaayo yiiraneelyaaya. (Uphattuwaca 49:14, 15) (Nwehe ciicammo ikwaaturu.)
4 Nsome Uphattuwaca 49:14, 15. c Yakopi ahonlattaniha Isakar nimwannama mmoca ookhomaala makhuvawyaayo neehaniya puuru, ni nokhitiri upakhirya citthu cinci coolemela. Khweeliini, uyo ahonttottopela nlattu wo nteko womaana waavanryaawe. Yakopi ciicammo ahomwiirela wiira uyo aanhala ukhalana ilapo yomaana. Iyo phiitthu yiirannyeele. Ucuulu wa Isakar waahovahiya ilapo yomaana yaaphiya mpaka mooloko Jordau. (Jos. 19:22) Ayo ciicammo yaaneekurumica uvara nteko wiira aruwerye ni waakavihera atthu akhwaawe. (1 Mam. 4:7, 17) Wootakihera, ucuulu wa Isakar waaholakela waana wiira awaakihe apoovwaaya, khampa mahuku a suwiisi Baruki ni porofeeta Debora.—Masuw. 5:15
5. Kontha isiyani ninlamuliyeehu wiikurumica uvara nteko womaana?
5 Itthu ineetthuciheehu: Yehova naavaha ifayita nteko womaana unonvareleehu, khampa wancivenlyaaya nteko womaana waavanryaaya ucuulu we Isakar. (Ekles. 2:24) Muupuwele co: mayamunna anawiikurumica uwacera nloko. (1 Tim. 3:1) Ayo khaanaana ikhotto wiira awaakihe apoovu a Nluku, masi anawiikurumica cinene waakhikicera apoovu a Nluku nhina mminepani. (1 Akor. 5:1, 5; Yuda 17-23) Ayo ciicammo anawiikurumica utthenkaca ni upanka myaha wiira yaamaalihe ni yaalipihe mayamunna ni mayanuunu o wanlokoni.—1 Tim. 5:17.
TAA
6. Nrinttini ucuulu wa Taa waakhenlyaaya? (Uphattuwaca 49:17, 18) (Nwehe ciicammo ikwaaturu.)
6 Nsome Uphattuwaca 49:17, 18. d Yakopi ahonlattaniha Taa niinwa yaakhitiri uluma inama cuulupale uvikana iyova, khampa ikavalo yaavareliya nteko ukhottoni nimwanenyooyo. Khampa cinthoonyeraaya inatiri, ucuulu wa Taa waahala ukhala woolipa nrima ni wanhala ukupali waanana awanani o Sarayeli. Iyo khweeliini yaheerannya. Iphiro yaarwaa ilapo yaakhuluvelihiyaaya, ucuulu wa Taa waaneetthenkaca wiira ukhikicere maloko makhwaawe uttuli wo akampamentu yaasarayeli. (Manu. 10:25) Phimaana, ucuulu wo maloko makhwaawe khawaakhitiri woona citthu cotheene ucuulu wa Taa waapankaaya. Hataa ukhalaka commo, uyo waari nrintti muulupale ni wofayita.
7. Isiyani inlamuliyeehu wuupuwela?
7 Itthu ineetthuceehu: Nyuuva nhopaca ukavihera nteko ni woonenela wiira khaavo oottottopenleni? Atthunaka nyuuva nhopaca ukwecakweca awula ulokihaca Isalau yo Umwene ni ukavihera miteko cikhwaawe wankutthaanoni muulupale, toko wanthukumanoni wo Isirikwiitu, ukonkereesuni awula nhaana mirintti cikhwaawe. Masi muupuwele wiira Yehova naavaha ifayita wiikurumica winyu upanka yotheene inkhitiriinyu. Ni uyo unantteela nrima oonaka wiikurumica winyu wiira mpanke iyo, kahi nlattu woopheela uttottopeliya, masi wiira moonihere unfenta winyu Yehova ninrimeenyu wotheene.—Mat. 6:1-4.
KAATI
8. Kontha isiyani awanani wahaarikelaaya utuphela nloko na Kaati? (Uphattuwaca 49:19) (Nwehe ciicammo ikwaaturu.)
8 Nsome Uphattuwaca 49:19. e Yakopi ahohimya wiira ikhurupu imoca yaanakhotto yanhala untuphela Kaati. Uvira waya myaakha 200, nloko na Kaati naahotuphela ilapo yaaphwanyannyaa unkhuma ncuwa, waattamela mooloko Jordau, yaari ilapo yaattamanne niilapo caawanannyaaya. Phimaana, unawoonannyaa wiira ayo awanannyaayo pooti wahaahalaaya waarikela utuphela nloko na Kaati. Hataa ukhalaka commo, nloko na Kaati naapheela wiira nikhaleke ule ncokoole, kontha waari ncoko waahalaaya ukhitiri uliha inama caya. (Manu. 32:1, 5) Khweeliini, ucuulu wa Kaati waari ucuulu woolipa nrima cinene. Masi, uhiya commo, ayo yaanonkhuluvela Yehova wiira anhala waakavihera waakiha ilapo yaavahiyaaya. Nlattu wooviriha myaakha cinci yankhuluvelaka Yehova, ayo ciicammo yahokavihera maloko makhwaawe ukhitiri uwoomolaca atthu akhwaawe yaakhala ilapo yaakhuluvelihiyaaya mphantte woomoolokoni Jordau. (Manu. 32:16-19) Ayo yancuwela wiira Yehova anhala waakhikicera asaaraya ni asaanaaya yarwaaka waana ikhotto. Yehova ahocaaliha ulipa waya nrima ni ulakela waya wiivaherera waakavihera atthu akhwaawe.—Jos. 22:1-4.
9. Manannani ninhaleehu woonihera wiira ninankhuluvela Yehova?
9 Itthu ineetthuceehu: Nankhuluvelaka Yehova, hiiva khaninhala uhiyerera unswalela hataa naananaka masakha oorika cinene. (Isaa. 37:3) Atthu enci mahukwaala anawoonihera unkhuluvela waya Yehova yeekurumicaka ukavihera miteko cootekatekiya, ukavihera mapuro ampheeliya anamalalyeera awula uwacera mirintti civahaceriyaaya wanlokoni. Ayo ampanka commo, kontha anaakupali wiira Yehova naahala waawacera.—Isaa. 23:1.
ASER
10. Isiyani nloko na Aser naalamuliyaaya upanka? (Uphattuwaca 49:20) (Nwehe ciicammo ikwaaturu.)
10 Nsome Uphattuwaca 49:20. f Yakopi enre wiira ucuulu wa Aser waahala ukhala ucuulu woopuha cinene. Ni iyo phiitthu yiirannyeele. Ncoko wo nloko na Aser waahela nhina itthaya yooruweriya yomaana yo Isarayeli. (Deut. 33:24) Uyo ncokooyo ciicammo waaphwanyannyaa waattamela ipahari Mediterrâneo ni waahela nhina ipoortu, nipuro naaviraviriya cinene ni naapankiya anakoso oolupale, ipoortu yo Sitoni. Atthunaka nlattu wo mihakhu caarinaaya ni makhalelo oohiloka aakananewu, ucuulu wa Aser wiikurumica waya upanka uswali womaana waahololovaca. (Masuw. 1:31, 32) Wootakihera, ukati suwiisi Baruki waalepenlyaawe asarayeli unkavihera waanana aKananewu, ucuulu wa Aser khawaatthunne unkavihera. Phimaana, ayo yaahohaleela woona mananna Yehova aakavihenryaawe asarayeli utthema, waattamela nkhayi “myooloko coo Megido.” (Masuw. 5:19-21) Nloko na Aser nahoona ihaaya ukati Yehova wanrumilyaawe Baruki ni Debora wiipa ncipo noonihera utthema waya, nineera: “Aser wahonriipa nrima.”—Masuw. 5:17.
11. Kontha isiyani ninlamuliyeehu uwehera saana nsurukhu?
11 Itthu ineetthuceehu: Ninlamuliya wiikurumica unvarela nteko Yehova. Phimaana, nihaana uweheeha saana moopuwelelweehu wiira nihikhalane moopuwelelo aatthu o ila ituniyeela, anoopuwela paahi wiira nsurukhu phirina ifayita muukumini waya. (Miru. 18:11) Hiiva nihaana wiikurumica uwehera saana nsurukhu. (Ekles. 7:12; Mabere. 13:5) Khanimpheela urihakaca ukati awula ikuru cihu natothaka citthu nihimpheeleehu, kontha iyo pooti ulolovihaca unvarela wihu nteko Yehova. Uhiya upanka iyo, ula phuukati hiiva unlamuliyeehu wiikurumica wiira ninvarele nteko Yehova, kontha ninaacuwela wiira uyo naahala univaha ukumi womaana ni wookhikiceryaa uhoolo.—Isaa. 4:8.
NAFITALI
12. Manannani moolumo Yakopi yaamuulumenlyaawe Nafitali yeeraneelyaaya? (Uphattuwaca 49:21) (Nwehe ciicammo ikwaaturu.)
12 Nsome Uphattuwaca 49:21. g “Moolumo omaana” Yakopi oolumilyaawe, atthunaka aaca moolumo Yesu oolumilyaawe nhina ntekwaawe. Yesu aacuweliya ukhala mwiitthucihi omaana ni ahoviriha ukati mwinci nari u Kafarnau, isittatti yaakhala nloko na Nafitali. Phimaana, yaari isittatti yaacuweliya khampa “isittattyaawe.” (Mat. 4:13; 9:1; Joau 7:46) Ni Isaiya ahohimya wiira Yesu aahala ukhala “iluusu yuulupale” yaahala waamwalelaca atthu a Zebulau ni a Nafitali.” (Isai. 9:1, 2) Nlattu wo ntekwaawe wowiitthuciha, Yesu ahokhala “iluusu yeekhweeli wiira aamwalele atthu wo khula ikhapila.”—Joau 1:9.
13. Isiyani inlamuliyeehu upanka wiira moolumweehu antteelihe nrima Yehova?
13 Itthu ineetthuceehu: Yehova naaviriyana saana moolumweehu ni mananna anoolumeehu. Manannani hiiva ninhaleehu wuuluma moolumo omaana ni ontteeliha nrima Yehova? Ninlamuliya wuuluma ikhweeli. (Isaa. 15:1, 2) Uhiya commo, nihaana waalipiha akhunanihu, waattottopela, wohaaveeha ni woohiwaapa. (Efesu 4:29) Ciicammo ninlamuliya urehererya mananna oowoopana mwaha atthu, khampa wuulalyeerani ni ciicammo ale ninaaphwanyeehu khula nipuro nineetteehu.
YUSUFU
14. Manannani inatiri ya Yusufu yeeraneelyaaya? (Uphattuwaca 49:22, 26) (Nwehe ciicammo ikwaaturu.)
14 Nsome Uphattuwaca 49:22, 26. h Yakopi ahaana isariya yookhala ootteeliya nlattu wa Yusufu. Yehova ahonthanla Yusufu wiira avare nteko wofayita cinene. Yakopi ahomwiihana “irittha yo mwiri womaana.” Yakopi phaari mwiri ni Yusufu phaari iritthyaawe. Yusufu aari mwaana oopacera Yakopi annyanryaawe naamwaarawe yeehaniya Repeka. Yakopi aahomwiirela Yusufu wiira anhala waakhela iparakha Ruupeni, mwaana oopacera annyanryaawe ni Leeya, caahalenlyaawe. (Upha. 48:5, 6; 1 Ikor. 5:1, 2) Iyo inatiriiyo yaheerannya ukati asaana a Yusufu yeehaniya Efrayi ni Manaseesi yaakhanlyaaya maloko meeli. Ni khula nloko, nahaakhela ncoko woovirikana ilapo yaakhuluvelihiyaaya.—Upha. 49:25; Jos. 14:4.
15. Manannani Yusufu aanannyaawe uhuvihiya?
15 Yakopi ahaahimya ciicammo atthu “yaahala unlupattha Yusufu ni unsunkera nruukwa.” (Upha. 49:23) Asinyeenyaawe phaari ayo atthwaayo, kontha yaanonsukera nruukwa ni yaahonhuvihaca cinene. Masi Yusufu khaaviruwenle asinyeenyaawe ni khaamootherenrye Yehova citthu caamwiirannyenle. Phimaana Yakopi, amuulumaka Yusufu, aheera co: “Khuvonyile nivaka naa ni matataa ari oolipa.” (Upha. 49:24) Ukati wotheene waananaawe masakha, Yusufu anonkhuluvela Yehova ni, uhiya paahi waalevelela asinyeenyaawe, Yusufu ciicammo aanaawacera nuunamaana. (Upha. 47:11, 12) Masakha otheene Yusufu aananaawe yaahomwiiriha ukhala ntthu omaana. (Isaa. 105:17-19) Naayo manannaayo, Yehova ahaana unvarela nteko wiira apanke citthu cinci cootikhiniha.
16. Manannani ninhaleehu untakiha Yusufu ukati wo waanana masakha?
16 Itthu ineetthuceehu: Hiiva khaninlamuliya uhiyerera wiira masakha anihiihe umwaattamela Yehova awula mayamunneehu. Ninlamuliya wuupuwela wiira Yehova pooti uvarela nteko citthu cinttehatteha waamini wihu wiira anitthenkace. (Mabere. 12:7.) Nwo utthenkaciya nwo pooti unikavihera uhihiyerera ukhalana ni utakiha makhalelo omaana Yehova rinaawe, khampa ikiriri ni ulevelela. (Mabere. 12:11) Hiiva ciicammo pooti wankupaliihu wiira, navilelaka, Yehova naahala unicaaliha khampa cancaalihilyaawe Yusufu.
PENCAMII
17. Manannani inatiri ya Pencamii yeeraneelyaaya? (Uphattuwaca 49:27) (Nwehe ciicammo ikwaaturu.)
17 Nsome Uphattuwaca 49:27. i Yakopi enre wiira ucuulu wa Pencamii unhala ukhala khampa mwiici awula anakhotto oocuwelaca cinene. (Masuw. 20:15, 16; 1 Ikor. 12:2) Waari wicisu waapacenryaaya ihantisi yo mamwene o Isarayeli, ukati Sawuli, ucuulu wa Pencamii, waakhanlyaawe mwene aapoovu. Ni khweeliini, uyo ahowaanana mafilistewu niikuru cawe cotheene. (1 Sam. 9:15-17, 21) “Uhiyu waya” awula wiimaleloni ihantisi yo mamwene o Isarayeli, atthu eeli o nloko na Pencamii, apwiyamwene Ester ni ministru mmoca oopacera, Mortekayi, yahaana nrintti wofayita cinene. Ayo yahowoopola Asarayeli yaahiihaka ahooleli o Peersiya waamalamaliha.—Ester 2:5-7; 8:3; 10:3.
18. Manannani ninhaleehu utakiha ukhuluvelyaa waatthu o nloko na Pencamii?
18 Itthu ineetthuceehu: Ucuulu wa Pencamii wahaana isariya yookhala ootteeliya ukati waamonnyaaya Sawuli, aakhumile wanlokoni waya, akhalaka mwene. Masi, ukati Yehova wanthanlilyaawe Davidi, o nloko no Yutaa wiira akhale mwene, nloko na Pencamii nuuwakatyaaya nahonkavihera. (2 Sam. 3:17-19) Ukati maloko makhwaawe yahaatthunnyaaya ukavihera umwene Yehova aathanlilyaawe, ucuulu wa Pencamii khawaahiyerenre wiiwelela umwene wo Yutaa, Yehova waathanlilyaawe. (1 Mam. 11:31, 32; 12:19, 21) Ni hiiva ciicammo ninlamuliya uwiiwelela ale Yehova yaathanlalyaawe wiira yaahoolele apoovwaawe.—1 Atesal. 5:12.
19. Kontha isiyani usoma inatiri Yakopi yaapankilyaawe cinhalaaya unikavihera?
19 Ikhanle itthu yomaana usoma inatiri Yakopi caapankilyaawe. Wuupuwela mananna ayo moolumwaayo yiiraneelyaaya, unaalipihaca ukhuluvela wihu inatiri cikhwaawe ca Yehova cimphwanyannya mbiibiliyani. Ni woona mananna asaana a Yakopi caacaalihiyaaya, unaanikavihera wiiweeha mananna ontteeliha nrima Yehova.
NCIPO 128 Nivilele Mpakha Wanikisa
[Niwehero]
a Yakopi aahoncaaliha Rubeni, Simeau, Levi ni Yuda, ampaceraka mwaamwanawe oopacera unyara ni ammaliheraka mwaamwanawe oomalela unnyara. Masi khunakhala wiira phaapankilyaawe ukati waacaalihilyaawe akhwaawyaayo.
b Uphattuwaca 49:13 Zebulau aahala ukhala nseresere ipahari waattamela nipuro nineemela ikalawa ni waattamela mphantte wooSitoni.
c Uphattuwaca 49:14 Isakar nohala ukhala khampa mwannama neehaniya puuru ookhomaala, rupile iriyari mirintti cawe. 15 Uyo naahala woona wiira nipuro nimmumulaawe nno nikhanle nomaana ni itthayeeyo ikhanle yooreera. Ni uyo naahala wooroma wiira acise nrintti wanikhatani ni uvara miteko cuulupale.
d Uphattuwaca 49:17 Taa nokookhala toko inwa nseresere iparapaara, toko ivili nseresere iphiro, inluma ikottokottho yo kavalu wiira immorose ntthu wenlyooyo. 18 Mi kinhala uweherera woopoliya ni weeva Yehova.
e Uphattuwaca 49:19 Vano Kaati inaahala umwaattakanana ikhurupu yo malatarawu, masi uyo naahala waatthema.
f Uphattuwaca 49:20 Aser naahala ukhalana iyoolya yinci ni yooyo phinhala ukawa iyoolya yo mamwene.
g Uphattuwaca 49:21 Nafitali khanle toko nacoro ooyevayeva. Phimaana, uyo nawuuluma moolumo omaana
h Uphattuwaca 49:22 Yusufu khanle irittha yomwiri womaana umenle nseresere maaci, irittha caya cikhanle cuulupale. 26 Iparakha cinhalaawe uvahiya naathumwaane cinhala ukhala cuulupale uvikana myaako, citthu cooreera comyaako coolipa. Nnya iparakhannya khancinhala ukhuma wanlokoni na Yusufu, yooyo thanliye iriyari yaasinyeenyaawe.
i Uphattuwaca 49:27 Ucuulu wa Benjamim khunhala uhiyerera waana khampa mwiici. Uwicisu naahala waatthema awanannyaawe ni uhiyu naahala ukawaana citthu caawanannyaawe.
