MWAHA WOOSOMIYA 32
NCIPO 44 Nivekelo na Mutthu Oxankale
Yehova nopheela wiira atthu otheene athoonyihere uttharuwa
“Kontha Yehova . . . khaavo ntthu nompheelaawe umoona atankanyinyaka, masi nawiira uweherera wiira atthu otheene arukunuse mirima caya.”—2 PET. 3:9.
ITTHU INHALEEHU WIITTHUCA
Nhina ula mwahoola, ninaahala wiiweeha uttharuwa ikhanle isiyani, kontha isiyani ikhanlyaaya itthu yofayita ni manannani Yehova nonkaviheraawe khula ntthu uttharuwa.
1. Uttharuwa maanaaya isiyani?
HIIVA napankaka itthu yootakhala, ninlamuliya woonihera uttharuwa. Khampa inhimyaaya Ibiibiliya, ntthu noonihera uttharuwa khinoncivela-tho itthu yoohiloka ipankilyaawe naarukunusa moopuwelelwaawe uhiya upanka citthu caapankaawe ni naalakela uhituruwela-tho upanka nnyo citthunnyo.
2. Kontha isiyani hiiva otheene nihaana wiitthucera uttharuwa? (Nemiya 8:9-11)
2 Atthu otheene ahaana wiitthuca uttharuwa. Kontha isiyani? Kontha otheene cihu ninaavara itampi khula mahuku. Hi nikhanle asaana Atamu ni Hawa phimaana nikhanle omatampi ni ninaakhwa. (Aroo. 3:23; 5:12) Khaavo ntthu cihimmwiiraneela nnyo citthunyo. Hataa atthu ookhuluvelya okhalayi, toko apostolu Paulu ciicammo yahaana yaweheehaka saana moopuwelelwaaya oohinamaana. (Aroo. 7:21-24) Niireke nlattu wo matampiihu, hiiva pooti ulolovaca ukati wotheene? Mena, Yehova khanle nakiriri, uyo nopheela wiira atthu otheene akhale ootteeliya. Muupuwele itthu yaawiirannyenle ayuuta ukati wa Nemiya. (Nsome Nemiya 8:9-11. a) Yehova khaapheela wiira ayo akhale ooriipiya nrima cinene yuupuwelaka itampi avanryaaya khalayi. Uyo apheela wiira ayuuta answalele waatteelaka nrima. Yehova naacuwela wiira ntthu ooniheraka uttharuwa naakhala otteeliya. Iyo phiitthu inniitthucihaawe. Hiiva nooniheraka uttharuwa nlattu wotampi cihu, pooti unkupaliihu wiira Apaapeehu okiriri anaanilevelela.
3. Isiyani inhaleehu woona nhina ula mwahoola?
3 Nhina ula mwahoola, ninaahala woona citthu tthaaru cinhala unikavihera wiitthucera cinene uttharuwa: (1) isiyani Yehova awiitthucihilyaawe apoovu o Sarayeeli nhina uttharuwa? (2) isiyani Yehova ipankilyaawe wiira aakavihere ale avanre itampi uttharuwa? ni (3) isiyani Yesu awiitthucihilyaawe attharyaawe nhina uttharuwa?
ISIYANI YEHOVA AWIITTHUCIHILYAAWE APOOVU O SARAYEELI NHINA UTTHARUWA
4. Isiyani Yehova aawiitthucihilyaawe apoovu o Isarayeli nhina uttharuwa?
4 Ukati Yehova aatthenkacilyaawe apoovu o Sarayeli ahaapankana nleehano. Yehova ahaavaha malamulo yaahala waakavihera wiira aakhikicere ni aacaalihe asarayeli ni ayo yahaamini wiiwelela. Yehova ahaakhuluveliha nlattu wo ayo malamulwaayo eeraka: “Nna nlamulo kinovahaakani ilelonna khanirikile cinene wiira ntthare ni nhihiyerere.” (Deut. 30:11, 16) Wootakihera, unari wiira asarayeli khayaatthanre ni khayeewelenle ayo malamulwaayo awula yaholakela waaswalela anluku akhwaawe, Yehova khaahala waacaaliha-tho ni yanhala uhuva nlattu wo iyo itthwiiyo. Masi, hataa ukhalaka commo, iyo khayaathoonyera wiira ayo yahonyanyaliya ni Yehova. Ayo pooti wanturuwelaaya Yehova ni wiiwelela malamulwaawe. (Deut. 30:1-3, 17-20) Ni moolumacero makhwaawe, ayo pooti waathoonyeraaya uttharuwa. Unari wiira ayo yahoonihera uttharuwa, Yehova anhala waattamela nanlelo ni waacaaliha-tho.
5. Manannani Yehova oonihenryaawe uhahiya apoovwaawe oohunya maaru? (2 Mamwene 17:13, 14)
5 Hataa ukhalaka wiira yaari apoovu oothanliya ni Nluku, asarayeli yaahonrukunuwela Yehova ikwaha cinci. Uhiya waaswalela anluku akhwaawe, ayo yampanka citthu cinci coohiloka ni nlattu wo iyo, ayo yahohuva cinene. Masi Yehova khahiile umananiha waakavihera ale yaattharuwa. Ikwaha cinci, uyo aanaaruma maporofeeta wiira apoovu athoonyihere uttharuwa ni unswalela ninrimaaya wotheene —Nsome 2 Mamwene 17:13, 14. b
6. Manannani Yehova aavarenlyaawe nteko maporofeeta wiira awiitthucihe apoovu ifayita urinaaya uttharuwa? (Nwehe ciicammo ilatarato.)
6 Moone mananna Yehova aavarenlyaawe nteko maporofeeta wiira ahimeerye asarayeli citthu caahala waakhumelela nlattu wo itampi caya ni waamananiha waakavihera wiira attharuwe ni apanke marukunuso. Wootakihera, Nluku ahonvarela nteko Jeremiya wiira ahimeerye co:“Nkituruwele asarayeli oohunya maaru ni nkinhala wuuviruwelani nyuuva ni akinhala ukhala ooviruwa mpaka so nkupali wiira nhottheka kontha nyuuva nhonrukunuwela Yehova.” (Jer. 3:12, 13) Anvarelaka nteko Joweli, Yehova aheera: “Nkituruwele ninrimeenyu wotheene.” (Jow. 2:12, 13) Yehova ciicammo ahonvarela nteko porofeeta Isaiya eeraka: “Mmalamalihe citthu cootakhala cimpankeenyu uhoolo waka ni nhiye upanka nnyo citthunyo.” (Isai. 1:16-19) Ni nlattu wo Ezekiyeli Yehova ahomwiirela co: “Kontha isiyani unhalaaya ukitteela nrima nlattu wootankanyinya ntthu ootakhala nrima? Mi akimpheela wiira uyo ahiye citthu coohiloka ni akhale nkumi? Mi khunkitteela nrima nlattu wootankanyinya ntthu. Phimaana, nrukunuse mirima cinyu ni nkhale mpaka.” (Ezek. 18:23, 32) Yehova naakhala otteeliya cinene amoonaka ntthu ooniheraka uttharuwa, kontha uyo nopheela wiira otheene cihu nikhale mpaka! Phimaana, Yehova khanonweherera ntthu upanka marukunuso woohinkavihera. Nttwee noone matakihero makhwaawe.
Yehova ahaavarela nteko maporofeeta wiira aahimerye atthu oottheka woonihera uttharuwa (Nwehe iparaagarafu 6-7)
7. Nuulumaka itthu yankhumelenle Oseiya nkhayi naamwaarawe, isiyani Yehova inwiitthucihaawe apoovwaawe?
7 Moone mananna Yehova varenlyaawe nteko ntakihero wiira awiitthucihe apoovwaawe mananna oottharuwa. Yehova hohimya itthu yaawiirannyenle amwaara a porofeeta Oseiya aneehaniya Gomer. Ayo yampanka urupihana woohiloka ni yaahonhiya Oseiya wiira yakhale naalopwana akhwaawe. Niireke iyo itthwiiyo khayaari itampi yuulupale yahaahala uhikhitirya ukaviheriya? Yehova noona nrima wo khula ntthu, ahomwiirela Oseiya co: “Urwee waafente amwaara ale anfentiya naalopwana akhwaawe ni aneetta uluva, khampa Yehova naafentaawe apoovu o Sarayeeli hataa ukhalaka wiira anawaaswalela anluku akhwaawe.” (Ose. 3:1; Miru. 16:2) Masi nanlelo amwaara a Oseiya yampanka citthu cootakhala ni yanvara itampi cuulupale. Hataa ukhalaka commo, Yehova ahomwiirela wiira awaavyaavye ni aalevelele ni wiira aturuwele ukhala amwaarawe. c Mananna mamocaaru, Yehova khaahiile apoovwaawe hataa ukhalaka wiira ayo yampanka citthu cootakhala ni uruna citthu caapankaaya. Hataa apankaka citthu cootakhala, Yehova nanlelo aanaafenta ni ampheela waakavihera wiira athoonyihere uttharuwa ni apanke marukunuso muukumini waya. Noonaka ayo matakiherwaayo, atthunaka hiiva pooti wiikohaka co: “Yehova noona nrima wa khula ntthu”, niireke wiira uyova nankavihera ntthu hinhiya uvara itampi cuulupale ni umananiha unkavihera uttharuwa? (Miru. 17:3) Nttwee noone.
ISIYANI YEHOVA IMPANKAWE WIIRA AKAVIHERE ATTHU OOTTHEKA WOONIHERA UTTHARUWA
8. Isiyani Yehova yaapankilyaawe wiira ankavihere Caim uttharuwa? (Uphattuwaca 4:3-7) (Nwehe ciicammo ilatarato.)
8 Kayini ari mwaana oopacera Atamu ni Hawa. Khampa asaana otheene Atamu ni Hawa, Kayini ahoyaryaana upheela upanka citthu cootakhala. Ibiibiliya ineera wiira citthu caapankaawe caari cootakhala. (1 Joau 3:12) Iyo inawoonihera itthu yaamwiirihile Yehova ukhotta nkuttho wa Kayini. Uhiya urukunusa moopuwelelwaawe, Kayini ahohiya utakhala wawe nrima umuunuwacaka ni ahopacera unrusanana Yehova. Isiyani Yehova yaapankilyaawe? Yehova ahomuulumana Kayini. (Nsome Uphattuwaca 4:3-7. d) Moone unamaana wa Yehova, uyo ahomuulumana Kayini ni ahomwiirela wiira anhala uncaaliha apaceraka upanka citthu comaana ni Yehova ciicammo ahonhimerya citthu caahala umwiirannyeela aahihiyeke upanka citthu cootakhala. Wooriipiha nrima, Kayini khaamwiiwelenle Yehova ni khaaphenle ukaviheriya ni Nluku wiira attharuwe, nlattu wo iyo, Yehova ahorusiya cinene. Masi niireke wiira nlattu wo iyo itthwiiyo, Yehova khanhala waakavihera atthu wiira athoonyere uttharuwa? Mena!
Yehova ahonhimerya citthu caahala unkhumelela aahihiyeke weetta iphiro cawe coohiloka, masi amooniheraka unamaana uyo ahonhimerya wiira aahaana niweherero (Nwehe iparaagarafu 8)
9. Isiyani Yehova yaapankilyaawe wiira ankavihere Davidi uttharuwa?
9 Yehova ananfenta mwene Davidi, mpaka uyo aheera co:“Uyo khanle nlopwana mmoca nokitteeliha nrima.” (Mite. 13:22) Ni Davidi anvara itampi cuulupale, toko weetta uluva ni wiiva, khampa ninthoonyeraaya nlamulo na Moceesi, Davidi ahaana eeviyaka. (Lev. 20:10; Manu. 35:31) Hataa ukhalaka commo, Yehova ahonkavihera Davidi wiira attharuwe. e Uyo ahonruma porofeeta Nataa wiira anwehe mwene Davidi, hataa ukhalaka wiira khaari hinaaya uthoonyera uttharuwa. Nataa aahovarela nteko ntakihero nanvanre nrima cinene Davidi ni nno nahonkavihera woonelela wiira ahonriipiha nrima cinene Yehova ni ahoonihera uttharuwa. (2 Sam. 12:1-14) Davidi ahantikha Isaalimu imoca inthoonyera wiira uyo ahottharuwa ni citthu caapankilyaawe.(Isaa. 51, Murwaaya) Atthu enci avanre itampi ni anhimiya nhina iyo isaalimwiiyo, ciicammo anawoonihera uttharuwa. Manannani nyuuva cineecooneenyu mwasomaka mananna Yehova cankavihenryaawe Davidi?
10. Manannani nneecooneenyu muupuwelaka uvilela ni ulevelela wa Yehova?
10 Yehova unrusa itampi ni uyo khanweheeha citthu atthu cinvonyaaya. (Isaa. 5:4, 5) Masi, uyo naacuwela wiira nikhanle atthu oottheka. Ni ukhala wiira uyo naanifenta, phimaana, naapanka yotheene inkhitiryaawe wiira anikavihere waanana itampi. Yehova ri oolikaneene wiira anikavihere, hataa ale avanre itampi cuulupale wiira attharuwe ni amwaattamele. Ikhanle itthu yomaana ucuwela iyo! Neemelaka wiira nuupuwele uvilela ni ulevelela wa Yehova, hiiva ninaalakela ukhala ookhuluvelya ni uthoonyihera uttharuwa woohipica navaraka itampi. Nttwee noone, isiyani Yesu awiitthucihilyaawe attharyaawe nhina uttharuwa.
ISIYANI YESU AWIITTHUCIHILYAAWE ATTHARYAAWE NHINA UTTHARUWA?
11-12. Isiyani Yesu aawiitthucihilyaawe attharyaawe nhina ulevelela wa Yehova? (Nwehe ilatarato .)
11 Iseekulu yoopacera, wahophiya ukati waahalaawe uwa Mesiya. Khampa noonileehu mwaha uvinre, Yehova ahonvarela nteko Joau Mpattisa khampa Yesu Kristu wiira awiitthucihe atthu ifayita irinaaya uttharuwa.—Mat. 3:1, 2; 4:17.
12 Ukati waaryaawe watuninyani, Yesu ahowiitthuciha attharyaawe mananna athumwaane caaryaaya owiitthenkaceene wiira yaalevelele atthu oottheka. Ni Yesu ahothoonyera iyo, ukati waahimilyaawe ihantisi yomaana ya mmirawo mmoca aathamile wapuwani. Nhina nno ntakiheronno, mmirawo mmoca naalakela uthama wapuwani waasithumwaane. Manannani athumwaane yaamwakhelenlyaaya uyo mmirawooyo? Uyo mmirawooyo, apheela awaceriye khampa nanteko o wapuwani, masi athumwaane yaheera co: “Ula mwanaka . . . ahoorimela, masi hophwanyinnya.” Vano athumwaane yahomwaakhelela wapuwani. (Luka 15:11-32) Ukati Yesu waryaawe wiirimu, ahowoona athumwaane ikwaha cinci athoonyiheraka unakiriri ni woohipica waalevelela ale yaattharuwa. Ihantisi Yesu yaahimilyaawe ikhanle yoolipiha nrima cinene ni inawoonihera wiira Yehova khanle nakiriri!
Ntakihero na Yesu nimmuuluma mwaana aathamile wapuwani waasithumwaane, athumwaane anaatthawa wiira yankapatte mwanaaya aaturuwenle wapuwani (Nwehe iparaagarafu 11-12)
13-14. Isiyani apostolu Peturu eetthucilyaawe nhina uttharuwa ni isiyani uyo awiitthucihilyaawe atthu akhwaawe? (Nwehe ciicammo ilatarato.)
13 Nlattu wa Yesu, Peturu aheetthuca itthu yuulupale cinene nhina uttharuwa ni ulevelela. Peturu ahovara itampi cinci, masi Yesu ahonlevelela niiraati. Wootakihera, Peturu ahonkhotta Yesu ikwaha tthaaru wiira khancuwela. Ni uvira waya iyo, Peturu ahokhala ooriipiya nrima cinene nlattu wo itthu yaapankilyaawe. (Mat. 26:34, 35, 69-75) Masi ukati wonwelelihiyaawe, Yesu ahonkhumelela Peturu— atthunaka uyo ukatyuuyo aari veekha. (Luka 24:33, 34; 1 Akor. 15:3-5) Khweeliini, Yesu ahocuwela wiira Peturu ahottharuwa ni uyo aapheela umoonihera wiira ahonlevelela.—Mark. 16:7
14 Woona wawe ulevelela wa Yehova ni wa Yesu, Peturu ahopacera wiitthuciha atthu akhwaawe uttharuwa ni ulevelela. Ukati vakaani inavinre ifesta yo Pentekositi, Peturu ahaataphulela mwaha apoovu o Yuuta yahaamwaamini Yesu, ahimyaka wiira ayo phaamwiivile Mesiya. Hataa ukhalaka commo, Peturu awooniheraka waafenta, ahowiirela co: “Nrukunuse nrima, ni nhiye meettelo oohiloka, wiira matampi arineenyu afuttiye, ni wiira wuuphwanyeni ukati wo nnema wa Yehova.” (Mite. 3:14, 15, 17, 19) Peturu ahothoonyera wiira uttharuwa unankurumica ntthu uhiya meettelwaawe oohiloka awula urukunusa moopuwelelwaawe. Naayo manannaayo, ntthu nopanka citthu coohiloka pooti upacera untteeliha nrima Yehova. Peturu ciicammo ahoonenela wiira Yehova naamalamaliha itampi caapinaatamu. Ni myaakha cinci, Peturu ahaakhuluveliha makristau eeraka co: “Yehova . . . nawuuvilelani, kontha khaavo ntthu nompheelaawe umoona atankanyinyaka, masi nawiira uweherera wiira atthu otheene arukunuse mirima caya.” (2 Pet. 3:9) Nna nikhanle niweherero nomaana hataa ale avanre itampi cuulupale pooti uleveleliya ni Yehova!
Yesu anthoonyeraka unfenta nanlevelela ni nammaaliha apostolu ttharuwile (Nwehe iparaagarafu 13-14)
15-16. a) Inannani apostolu Paulu eetthucilyaawe ulevelela? (1 Timotiyu 1:12-15) b) Isiyani inhaleehu woona nhina mwaha unttharelana?
15 Ntthu nkhwaawe aaphenle uttharuwa uleveleliya ni Nluku aari Saulu o Tarso. Uyo wawoomolanihacaawe makristau ni mananna oohinamaana. Ule ukatyuule, makristau yuupuwela wiira Saulu ari ntthu ahaahala urukunusa makhalelwaawe. Masi mananna Yesu yamoonelaawe Saulu yaari oovirikana ni mananna yamoonelaaya ale makristawaale. Yesu ancuwela wiira Saulu anhala urukunusa makhalelwaawe ni uttharuwa. Yesu ni Yehova yaanoona makhalelo omaana aarinaawe Saulu. Phimaana, Yesu aheera co: “Kontha uyo nlopwanooyo kihonthanla.” (Mite. 9:15) Mpaka Yesu ahopanka miiriirya wiira ankavihere Saulu uttharuwa. (Mite. 7:58–8:3; 9:1-9, 17-20) Vano ukhala wawe nkristau, Saulunuuwakatyaaya aacuweliye ukhala apostolu Paulu—hoonihera ikwaha cinci usukhurweela unakiriri ni unamaana wooniheriyaawe ni Yehova wamoca ni Yesu. (Nsome 1 Timotiyu 1:12-15. f) Nwo usukhuru nwo, wahomwiiriha Paulu uhimya co: “Nluku nawoonihera ureera wawe nrima, wiira ookavihere uttharuwa.”—Aroo. 2:4.
16 Ikwaha imoca, Paulu aheewa itthu yooriipiha nrima yeerannya wanlokoni no Korintu. Nlopwana mmoca ahopanka urupihana woohiloka ni nanlelo aatafitiya khampa munna o wanlokoni. Isiyani Paulu yaapankilyaawe? Iwarakha apostolu Paulu antikhenlyaawe mayamunna o nloko no Korintu, inaaniitthuciha mananna Yehova naathoonyeraawe nifento apoovwaawe ukati naahukhumwaawe ni mananna uyo nonthoonyeraawe unakiriri ntthu oottheka athoonyiheraka uttharuwa. Mwaha unttharelana nuula, ninaahala woona isiyani yiirannyeele ninne nlokonne ni wiitthuca mananna ootakiha unakiriri wa Yehova.
NCIPO 33 Ninvahererye Yehova Ovelavela Wahu
a Nemiya 8:9 Nemiya ari kovernatoore ni Estra nankuttho ni namantikha nkhayi ni Malevita yaawiitthuciha apoovu, yahowiirela atthu otheene co: “Ileelo nikhanle nihuku nowaarya na Yehova Nlukwiinyu. hikhale ocukulaca ni nhunle.” Kontha apoovu otheene yaanonla ukati waasomiyaaya malamulo.10 Ni uyo ahowiirela: “Nrwee, mwalye icoolya comaana ni mwawurye citthu cooviyola, ni mwaaveleelihere iyoolya ale ahirina itthu yootthenkaciyeene; kontha nna nikhanle nihuku nowaarya na Apwiiyeehu. Nhikhale ooriipiya nrima, kontha utteeliya unkhuma wa Yehova ukhanle nikhikicero ninyu 11 Ni malevita yanaamaaliha apoovu yiirelaka: “Nhunle ni nhiriipiye nrima, konttha nna nihukunna, nowaarya.”
b 2 Mamwene 17:13 Yehova khahiile wuupusera a Sarayeeli ni ayuuta aavarelaka nteko maporofeeta aheerela co: Nhiye iphiro cinyu cootakhala! “Mweettele malamulwaaka, ntharaka malamulo otheene karumilyaaka asithumwaninyu kaavarelaka nteko maporofeeta.” 14 Masi ayo khayeewelenle ni yaahokhanyerera waatakiha asithumwanaya yahaamwaamini Yehova Nluku.
c Ila iri itthu ihineerannya. Ileelo Yehova khanonkhanyereriha wiira ntthu eetteliye uluva haahiye amwaarawe awula awannyawe. Khweeliini, Yehova honvahacera Yesu utaphulela wiira ule eetteliye uluva pooti ulakela waahiya awula uhaahiya amwaarawe awula awannyawe.—Mat. 5:32; 19:9.
d Uphattuwaca 4:3 Unavinre ukati mwinci, Kayini ahocisa icoolya cawe wiira avaherere Yehova khampa nkuttho. 4 Masi Abel ahocisa ikhontwaa cawe cikhwaawe caapacenre utotholiya, nkhayi ni makhuraaya. Phimaana, Yehova aahonwehesesa abel niiraati ni itthuvo nawe, 5 khanwehesesile niiraatti Kayini nkhayi ninkutthwaawe. Vano ahoviruwa ni ahokhala ololovaca. 6 Nlattu wo iyo, Yehova ahonkoha Kayini : “Kontha isiyani uviruwilya ni kontha isiyani ulolovacilya? 7 Weeva wapaceraka upanka citthu comaana, akinhala wuucaaliha? Masi, waahipankeke citthu comaana, matampi ari mowuuweherera ni ari mowuukhitiri; weeva unaahala ukhitiri usempa?
e Nwehe mwaha “O que o perdão de Jeová significa para você?”, nhina irevista Sentinela 15 yo Novembro 2012, ipaag. 21-23, iparaag. 3-10.
f 1 Timotiyu 1:12 Kinansukhuru venci Yesu Kristu, Pwiiyeehu, ule kivahile ikuru, ukhala wiira hokoona ukhala ookhuluvelya ni hokivaha nteko wa Nluku, 13 wahookhalaru wiira khalayi kaari ntthu ooveeha, nlupatthi ni ntthu oohihisima. Masi, kihooneliya ikiriri kontha miiva khiivo yaacuwelaaka ni akaarina waamini. 14 Masi, Apwiiya ahokithoonyera cinene maana ookironya, phimaana wakhalannyaaka waamini ni nifento nlattu wookhala ntthari a Yesu Kristu. 15 Ala moolumwaala akhanle ookhuluvelya ni anlamuliya ukupaliya: Yesu Kristu howa watuninyani wiira awoopole anamatampi. Iriyaryaaya ayo, thi mi kitepile ukhala namatampi.
