MWAHA WOOSOMIYA 39
Mwaakavihere asirokorihu o wanlokoni
“Athiyana anlalyeera ihapari comaana akhanle anatoropa oolupale.”—ISAA. 68:11.
NCIPO 137 Mulheres Fiéis
NINHALA WIITTHUCANI? *
Asirokorihu owiikurumica anari umikutthaanoni, wuulalyeerani, yakaviheraka urehelela Isalau yo Umwene ni yaawaceraka akhwaaya (Nwehe iparaagarafu 1)
1. Manannani asirokorihu cinkaviheraaya mphwinko wa Yehova, ni marikarikoni anaakhumelela? (Nwehe ilatarato iri wakaapani.)
UNAANITTEELA nrima nlattu wookhalana asirokorihu enci aneekurumica wanlokoni wihu! Ayo khanlova umikutthaanoni ni wuulalyeerani ihapari comaana. Asirokorihu akiina anaakavihera urehererya Isalau yo Umwene ni anawaawacera mayamunna ni asirokorihu akiina. Ayo ciicammo anawaakhumelela masakha. Asirokorihu akiina ahaana yaawaceraka asithumwanaya yuuluvanle. Akiina anaalupatthiya naasimucaaya ahikhanle Masaahiti a Yehova. Ni asirokorihu akhwaawe anwuunuwiha asaanaaya veekha ni ahaana yiikurumicaka venci wiira awaaverye iyoolya ni citthu cikhwaawe.
2. Nlattuni ninlamuliyeehu waakavihera asirokorihu o wanlokoni?
2 Nlattuni ninlamuliyeehu waakavihera asirokorihu o wanlokoni? Kontha imaara cinci, atthu o ntuninyani khanaawacera athiyana niihisima toko cinaaphwanelaaya. Uhiya commo, Ibiiblya inaanikurumica waakavihera. Wootakihera, apostolu Paulu ahaahimyera mayamunna o wanlokoni u Roma wiira amwaakhelele Febe ni ‘ankavihere nhina citthu cotheene caahalaawe upheela.’ (Aroo. 16:1, 2) Ukati waaryaawe farisewu, Paulu atthunaka khaawacera ratta athiyana. Masi ukhala wawe nkristau, uyo ahancera untakiha Yesu ni waawacera athiyana ratta ni niihisima.—1 Akor. 11:1.
3. Yesu aawacera manannani athiyana otheene, ni aawehera cani ale yaapanka itthu inaacivela Athumwaane?
3 Yesu aanaawacera athiyana otheene niihisima. (Joau 4:27) Yesu khaawehera athiyana toko caaweheraaya ahooleli ottiini o mahukwaawe. Ilivuru imoca inoopela mwaha Ibiiblya ineera: “Yesu khiivo itthu yootakhala yuulumilyaawe yaahala uthoonyera uhaahisima athiyana.” Uhiya commo, uyo aanaahisima cinene athiyana, venci-venci ale yaapanka itthu inaacivela Athumwaane. Ayo athiyanaayo, Yesu awoona ukhala asirokorawe awula amucaawe o mminepani.—Mat. 12:50.
4. Ninhala wiitthucani nhina ula mwahoola?
4 Khula ukati Yesu aanaakavihera athiyana yanswalela Nluku. Ni oonihenre iyo, nlattu wookumiha ukati wiira akhale wamoca naayo, wowaalemeliha ni uwaakiha. Nhina ula mwahoola ninaahala wiitthuca mananna cinlamuliyeehu waakavihera asirokorihu nantakihaka Yesu.
NKUMIHE UKATI WIIRA NKHALE WAMOCA NAASIROKORIHU
5. Nlattuni asirokorihu akiina unawaarika ukhala wamoca ni mayamunneehu wiira avirihe ukati nkhayi naayo?
5 Otheene cihu, unaanicivela ukhala wamoca ni mayamunneehu wiira nivirihe ukati nkhayi naayo. Masi ahaavo asirokorihu ahinkhitiri. Nlattuni? Moone citthu cihimyalyaaya asirokorihu. Nrokorihu neehaniya Jordan * neera: “Nlattu wookhala nthupa, akineecoona ukhalana ifayita wanlokoni.” Nrokorihu Kristen, noovara nteko weepiyoneeru rwaale ukavihera nteko woolalyeera nloko nikhwaawe neera: “Wathamelaka nloko nikhwaawe, unawiicoona ukhala veekha.” Mayamunneehu akiina aneecoona toko cineecoonaaya ayo asirokorihwaayo. Ale nkhala naamucaawe ahinonswalela Yehova, pooti uhaapatthanana cinene amucaawe, ni ukati yooyo wiicoona ukhala uttayi ni mayamunna o wanlokoni. Asirokorihu akiina anwerennya awula anaawereeha amucaaya, pooti ciicammo wiicoona ukhala veekha. Annette naattonka eeraka: “Amaama yaakikhuluvela miiva wiira kaakavihere. Phimaana mayamunna yakilattulaka urwaa uthuka, mi akaarwaaka.”
Toko Yesu, nihaana nithoonyeraka wiira ninawaawacera asirokorihu ookhuluvelya (Nwehe iparaagarafu 6-9) *
6. Toko cinhimyaaya Luka 10:38-42, Yesu ankavihenre manannani Mariya ni Marta?
6 Yesu ankumiha ukati wiira awoopane mwaha asirokorawe oominepani. Ni ayo yaari apatthani eekhweeli a Yesu. Wootakihera, muupuwele upatthani Yesu waarinaawe ni Mariya wamoca ni Marta. Pooti ukhala wiira ooyeeli caya khayaatheliye. (Nsome Luka 10:38-42. *) Yesu khula ukati anaawuulumana ni ayo ciicammo yaananhimyera citthu caakhalanaaya wanrimani waya. Mariya khoonale ihaya wonkoma uhoolo wa Yesu, toko caapankesaawe khula ntthari. * Ni Marta khoovale unhimyeera Yesu wiira aahonviruwela Mariya kontha khankaviha waapyaaca. Ule ukatyuule, Yesu ahomwiithuciha Marta ni Mariya itthu yofayita cinene. Ni Yesu aanancivela cinene Mariya, Marta ni Laazaru, phimaana anrwaaka uwootola ikwaha cinci. (Joau 12:1-3) Ukati Laazaru waawerennyaawe venci, Mariya ni Marta yancuwela wiira Yesu anhala unkavihera Laazaru.—Joau 11:3, 5.
7. Manannani ninhaleehu waalipiha asirokorihu o wanlokoni?
7 Asirokorihu akiina ankhitiri uwoonanana mayamunnaaya o wanlokoni yarwaaka umikutthaanoni paahi, ni khankhalana-tho ukati nkiina woowoonanana. Phimaana, khaninlamuliya uviriiha uyo ukatyuuyo, wiira niwaakhelele saana, niwuulumane ni naahimyere wiira hiiva ninawaawacera. Jordan, nrokorihu romoliye wiipaceroni, neera: “Mi kinawiicoona ratta akhwaaka yakittottopelaka nlattu wokomentaariyu ivahalyaaka unkutthaanoni, yakileehananaka wiira nirwaace nkhayi wuulalyeerani awula yathoonyeraka niinanna ikiina wiira anaakiwacera.” Hiiva nihaana naathoonyeraka ayo asirokorihwaayo wiira ahaana ifayita. Nrokorihu Kia, neera: “Kaahirweeke unkutthaanoni, mi kinaacuwela wiira mayamunna anaahala ukantikhela mensagem yakikohaka khampa kihaavo salaama. Iyo inaakikupaliha wiira mayamunna o wanlokoni anaakiwacera.”
8. Manannani makhwaawe ninlamuliyeehu untakiha Yesu?
8 Toko Yesu, nihaana nikumihaka ukati wiira nikhale wamoca naasirokorihu o wanlokoni. Nnoonela cani waalattula uwannyu wiira mwaalyane awula mwaathukane? Uyo ukatyuuyo, moopele mwaha citthu comaana coohala waalipiha. (Aroo. 1:11, 12) Wakhala wiira nyuuva nkhanle humu o wanlokoni, muntakihe Yesu. Uyo ancuwela wiira atthu akiina, unawaarika ukhala athupa. Masi uyo hothoonyera wiira ntthu pooti ukhala ootteeliya, hataa akhalaka nthupa ni hikhalanaka asaana. (Luka 11:27, 28) Khweeliini, itthu inomphwanyiha ntthu utteeliya woohimala ukhanle uhoolelihera muukumini wawe nteko wa Yehova.—Mat. 19:12.
9. Isiyani mahumu inlamuliyaaya upanka wiira yaakavihere asirokorihu?
9 Venci-venci mahumu ahaana yaawaceraka athiyana o wanlokoni khampa asirokoraya ni mayamaamaaya oominepani. (1 Tim. 5:1, 2) Unaareera mahumu yakumihaka ukati cihinancera awula camalaka mikutthaano wiira awuulumane asirokorihu o wanlokoni. Nrokorihu Kristen romoliye wiipaceroni, neera: “Humu mmoca ahoona wiira akaakhalanaka ukati, phimaana ahokikoha isiyani yaavaresaaka khula nihuku. Kahokhala ootteeliya venci nlattu wo woona wiira uyo naakiwacera.” Mahumu yakumihaka ukati wiira awoopane mwaha asirokoraya o wanlokoni, anaathoonyera wiira anawaawacera. * Annette, romoliye wiipaceroni, naahimya mananna cikaviheriyaawe nlattu woowoopana mwaha mahumu. Uyo neera: “Uwoopana mwaha mahumu unaakikavihera waacuwela ratta, ni ayo ciicammo anaakicuwela saana. Ni yakikhumelelaka itthu yoorika, khunkirika urwaa waalepela wiira akikavihere.”
NLEMELIHE CITTHU COMAANA CIMPANKAAYA ASIROKORIHU
10. Isiyani inhala waakavihera asirokorihu o wanlokoni ukhala ootteeliya?
10 Otheene cihu, alopwana ni athiyana, unaanitteela nrima akhwiihu yacuwelaka citthu cinkhitiriihu upanka ni yalemelihaka nteko unvareehu. Masi, ntthu aahiwacereke citthu cincuweleehu upanka ni wiikurumica wihu, ninaakhala ooriipiya nrima. Nrokorihu mmoca novara nteko weepiyoneeru neehaniya Abigail, naahimya wiira ukati nkiina, neecoona uthanyiya. Uyo neera: “Atthu akiina ankiwehera khampa nrokorawe fulano awula mwaana a fulano paahi. Uhaavo ukati unoopuwelaka wiira khaavo nokoona.” Ciicammo, moone itthu inaakhumelela arokorihu aneehaniya Pam. Ukati waaryaaya ahinatheliya, ayo yahokhala myaakha cinci yavaraka nteko weemisiyonaariyu. Wahoolo, yahoturuwela uwannyaya wiira yaawacere asithumwanaya yaawerennya. Ilelo, ayo arina myaakha 70 ni nanlelo anvara nteko weepiyoneeru. Arokorihu Pam aneera: “Itthu intepa ukikavihera, ukhanle uwiiwa mayamunna yakiirelaka wiira anawoona ukhalana ifayita cinene citthu cotheene cimpankaaka.”
11. Yesu aathoonyenre cani wiira aanaalemeliha athiyana yankavihera uvara ntekwaawe?
11 Athiyana ookhuluvelya akiina yaanankavihera Yesu “yanvahaka citthu caarinaaya.” (Luka 8:1-3) Yesu ahaavaha ale athiyanaale iparakha yonkavihera, ni ciicammo aanaahimyera ikhweeli cuulupale. Uyo ahaahimyera wiira aanaahala wiiviya ni wunwelelihiya. (Luka 24:5-8) Toko caatthenkacalyaawe mapostolu, Yesu ahaatthenkaca attharyaawe athiyana wiira yakhitiri uvilela masakha yaahala waakhumelela wahoolo. (Mark. 9:30-32; 10:32-34) Ni ukati Yesu waatthukiyaawe, mapostolu yahontthawa ni unhiya veekha. Masi ukati waakhwaawe wanipottoni, athiyana akiina yankavihera yahaavo ni khayanhiyale veekha.—Mat. 26:56; Mark. 15:40, 41.
12. Ntekoni Yesu waavahacenryaawe athiyana?
12 Yesu ahaavahacera athiyana miteko cuulupale. Wootakihera, atthu yaapacenre umoona Yesu ukati wonwelelihiyaawe, yaari athiyana. Ni Yesu ahaavaha nteko woorwaa waahimyera mapostolu wiira honwelelihiya. (Mat. 28:5, 9, 10) Ciicammo, atthunaka yahaavo athiyana nkhurupuni yo makristau yaamwaruseliye nnepa wowaarya nihuku no Pentekositi, mwaakha wo 33. Wakhala wiira nhina iyo ikhurupwiiyo yahaavo athiyana, unawoonannya wiira ayo yahaakhela iparakha yo wuuluma iluuka cikiina. Commo, ayo yahokavihera nteko wo waalalyeera atthu “citthu cootikhiniha ca Nluku.”—Mite. 1:14; 2:2-4, 11.
13. Mitekoni asirokorihu cinonvarelaaya Yehova, ni manannani nyuuva cinlamuliyeehu uthoonyera wiira nnaalemeliha citthu cotheene cimpankaaya?
13 Asirokorihu unawaaphwanela uttottopeliya nlattu wo miteko cotheene cinonvarelaaya Yehova. Nnyo mitekonnyo cikhanle uteka ni urehererya Isalau co Umwene, ukavihera maloko oluuka cikiina ni wiivaherera ukavihera u Peteli. Asirokorihu ciicammo anaavara nteko wookavihera cakhumelelaka ihasara, nteko wootaphulela ilivuru cihu ni anaavara nteko weepiyoneeru owiivaherera ni weemisiyonaariyu. Ni toko mayamunna, asirokorihu ciicammo anaarwaa usoma icikola yo mapiyoneeru, Icikola ya Anamalalyeera Umwene ni icikola yo Gileade. Ni ale atheliye anawaakavihera asiwanuwaya uwacera miteko co wanlokoni ni miteko cikiina co mumphwinkoni wa Yehova. Ayo alopwanaayo ankhitiri ukhala “itthuvo ceepinaatamu” kontha anaakaviheriya naasaaraya. (Efesu 4:8) Munnokhitiri woona mananna cinlamuliyeehu waakavihera ayo asirokorihwaayo nhina miteko cotheene cinvarayaa?
14. Toko cineeraaya Isaalimu 68:11, isiyani mahumu impankaaya?
14 Asirokorihu akhanle “anatoropa oolupale” aneevaherera uvara nteko. Ni asirokorihu anaacuwela ulalyeera saana. (Nsome Isaalimu 68:11. *) Mahumu oocuwelaca anaamananiha uwiitthucera ayo asirokorihwaayo. Nrokorihu Abigail, romoliye wiipaceroni, nawiicoona ulipihiya mayamunna yankohaka isiyani inonkavihera uwuulumana saana atthu wuulalyeerani. Uyo neera: “Iyo inaakithoonyera wiira Yehova hokivahacera nteko womaana wanlokoni wawe.” Ciicammo, mahumu anaakupali wiira asirokorihu ookhuluvelya yuuluvanle anaacuwela sana-saana waakavihera amirawo anaanana marikariko. (Titu 2:3-5) Khweeliini, asirokorihu unawaaphwanela ufentiya ni usukhurwiya!
NWAAKIHE ASIROKORIHU
15. Ukatini asirokorihu umpheelakaaya waakihiya?
15 Ukati nkiina, asirokorihu anampheelaka ntthu oowaakiha. (Isai. 1:17) Wootakihera, nrokorihu akhwile awannyawe awula mwalanacile naawannyawe pooti umpheela ntthu oohala umwaakiha awula unkavihera uvara miteko caavaresaaya awannyawe. Awula pooti ukhala wiira arokorihu owuuluvala anaapheela ukaviheriya urwaa usipiritaali. Awula atthunaka haavo nrokorihu novara nteko weepiyoneeru ni nkavihera miteko co Umwene, toko u Peteli. Uyo pooti upheela waakihiya wakhalaka wiira ahaavo mayamunna ammuuluma pusya nlattu woohirwaa cinene wuulalyeerani toko mapiyoneeru makhwaawe. Isiyani ninlamuliyeehu upanka wiira niwaakihe asirokorihu? Toothooni, nihaana nintakihaka Yesu.
16. Toko cinthoonyeraaya Markus 14:3-9, Yesu aamwaakihale cani Mariya?
16 Yesu aanawaakuva uwaakiha asirokorawe yoolumiyaka pusya. Wootakihera, uyo ahomwaakiha Mariya ukati woolumiyaawe pusya ni Marta. (Luka 10:38-42) Ni ciicammo ahomwaakiha-tho Mariya ukati atthu akiina waamuulumalyaaya pusya nlattu wo itthu yaalakenlyaawe upanka. (Nsome Markus 14:3-9. *) Yesu ahocuwela isiyani yaamwiirihale Mariya ulakela upanka iyo itthwiiyo ni ahonttottopela, amwiirelaka: ‘Itthu ikipankilyaawe ikhanle yomaana. Ula pankale itthu ikhitinryaawe.’ Yesu mpaka ahopanka inatiri, eeraka: “Khula nipuro ninhala ulalyeeriya ihapari comaana ntuninyani motheene, ciicammo inaahala wuulumiya itthu ipankalyaawe ula nthiyanoola, oopuweleliyaka”—ni khweeliini ula mwaha nsomeehuula unooluma itthu yaapankalyaawe ule nthiyanoole. Unawoonannya wiira moolumo a Yesu yahonlipiha Mariya ukati woolumiyaawe pusya nne nipuronne! Ni yooreera cinene phiila: niitthu Mariya yaapankalyaawe, Yesu hohimya wiira nteko woolalyeera wanhala uvariya ntuninyani motheene.
17. Nttonke ntakihero ninthoonyera mananna cinlamuliyeenyu umwaakiha nrokorihu.
17 Asirokorihu yoolumiyaka pusya, nyuuva nnaawaakihaka? Muupuwele ila itthwiila: wanlokoni winyu, haavo nrokonihu rina awannyawe ahikhanle Saahiti a Yehova. Mayamunna akiina anaamoona wiira ikwaha cinci, uyo nowaaka usalau nkutthaano unancenre, ni wamalakaru nkutthaano, uyo naarwaa uwaani woohipica. Ciicammo, ikwaha cinci khanaawaana asaanaawe unkutthaanoni. Vano mayamunna akiina anawancera umuuluma pusya, ni aneera wiira uyo nrokorihuuyo aalamuliya waakhanyereriha awannyawe wiira antthunihere waacisa asaana umikutthaanoni. Masi noopuwelaka ratta, ninawoona wiira uyo nrokorihuuyo khweeliini nawiikurumica upanka inkhitiryaawe. Uyo khanakhala nolakela veekha cawe iwoora inlamuliyaawe ukhuma ni uphiya uwaani; ni khanlakela veekha citthu caasaanaawe. Vano moonaka wiira nrokorihu nawuulumiya pusya ayo manannaayo, nnolamuliya upanka isiyani? Munttottopele nrokorihu nlattu wo wiikurumica wawe ni mwaahimyere akhwiinyu citthu comaana cimpankaawe uyo nrokorihuuyo. Mwapankaka commo, nyuuva nnaahala unkavihera wiira huulumiye pusya.
18. Manannani makiina ninlamuliyeehu waakavihera asirokorihu?
18 Ciicammo ninthoonyera wiira ninawaafenta asirokorihu naapankelaka citthu wiira naakavihere. (1 Jo. 3:18) Annette, nrokorihu naawereeha anumwaane romoliye wiipaceroni, neera: “Mayamunna akiina yaanaawa uwaani wiira yaawacere amaama, ni akiina yanwaana iyoolya. Mi kaaneecoona ufentiya ni ukhalana ifayita wanlokoni.” Nrokorihu Jordan ciicammo ahokaviheriya. Munna mmoca ahomwiitthuciha mananna oorehererya ikaaro. Uyo neera: “Unaareera ucuwela wiira mayamunna anaakiwacera wiira kikhale saana.”
19. Manannani mahumu cinlamuliyaaya waakavihera asirokorihu?
19 Mahumu ciicammo ahaana yaakaviheraka asirokorihu nhina citthu cinaathwa. Ayo anaacuwela wiira Yehova nopheela wiira asirokorihu awaceriye saana. (Tiya. 1:27) Mahumu ahaana yantakihaka Yesu; khanlamuliya upankela malamulo citthu cankaani, cinreera ulevaca ni uthoonyera unamaana. (Mat. 15:22-28) Asirokorihu yakaviheriyaka ni mahumu, anawoona wiira Yehova nawaawacera. Nrokorihu Kia, romoliye wiipaceroni, aapheela uthamela nipuro nikiina. Humu aahoolela ikhurupwaawe yo wuulalyeerani waacuwenlyaawe iyo, ahonkavihera woohipica. Kia neera: “Iyo yahokikavihera umaliha iwasiwaasi caka. Moolumo omaana o mahumu ni citthu caakipankenlyaaya wiira akikavihere, cahokithoonyera wiira kihaana ifayita wanlokoni. Kinaacuwela wiira, hataa ukati wo marikariko, akiri veekha.”
ASIROKORIHU OTHEENE ANAAPHEELA UKAVIHERIYA
20-21. Isiyani inlamuliyeenyu upanka inhala waathoonyera asirokorinyu o wanlokoni wiira ahaana ifayita?
20 Khula nloko, ahaavo asirokorihu owiikurumica enci anlamuliyeehu waakavihera. Ni toko cinniitthucihaaya ntakihero na Yesu, nihaana naakaviheraka. Ni ninhala waakavihera nakumihaka ukati wiira nikhale wamoca naayo wiira naacuwele ratta. Ciicammo nihaana nilemelihaka khula itthu impankaaya wiira akavihere miteko ca Nluku. Ni nihaana niwaakihaka.
21 Wiimaleloni iwarakha yaawantikhenlyaawe aroma, apostolu Paulu howuuluma athiyana 9, aaromolaka macinaaya. (Aroo. 16:1, 3, 6, 12, 13, 15) Nhina iyo iwarakheeyo, Paulu aanawaaveleelihera isalamu ni aanawaattottopela. Ayo asirokorihwaayo khweeliini yahiicoona ulipihiya ukati weewalyaaya isomiyaka wanlokoni iwarakha ya Paulu. Toko Paulu, mwaakavihere asirokorinyu otheene o wanlokoni. Mwapankaka commo, nnaahala waathoonyera wiira khweeliini akhanle amuciihu oominepani!
NCIPO 136 Jeová Vai Recompensar-te
^ par. 5 Asirokorihu o wanlokoni wihu anawaakhumelela marikariko menci. Ula mwahoola unaahala uthoonyera manannani cinlamuliyeehu waakavihera asirokorihu o wanlokoni nintakihaka Yesu. Uyo ankumiha ukati wiira awoopane mwaha athiyana, aanaavaha ifayita citthu caapankaaya ni aanaattottopela.
^ par. 5 Macina makiina ahaakakhanihiya.
^ par. 6 Luka 10:38 Yeettakoono, yahophiya aliteeya amoca. Uphiya waya ayo aliteeyaayo, nthiyana mmoca eehaniya Marta ahowaakhelela uwannyawe. 39 Uyo nthiyanooyo ahaana mwaamunnawe, eehaniya Mariya, onkomale uhoolo wa Apwiiya aviriyanaka citthu caahimyaaya. 40 Masi Marta, aanowiitthaala, avaraka citthu cinci. Phimaana, uyo ahowaattamela Apwiiya ni ahowiirela: “Pwiiya, khannoona wiira mwaamunnakooyo kihiyale kipankaka citthu cotheene veekha? Mmwiirele wiira awe ookikavihe.” 41 Woomwaakhula, Apwiiya yenre: “Marta, Marta, uri niiwasiwaasi nlattu wo citthu cinci. 42 Masi citthu vakaani paahi cinaatosa, awula itthu imoca paahi. Masi Maria thanlale itthu yomaana, ni uyo khanhala waakhiya itthu ithanlalyaawe.”
^ par. 6 Ilivuru imoca iheera: “Atthari yaanonkomaka uhoolo wa mwiitthucihyaaya wiira anviriyane. Ayo yaapanka iyo ukati weetthenkacaaya wiira naayo yancere uwiitthuciha atthu akhwaawe—ni iyo yaari itthu yahaatthuniheriya athiyana. . . Ahooleli ottiini ayuuta enci yanhala urusiya anamoonale Mariya nonkomale uhoolo wa Yesu wiira eetthucihiye, uhiya utthara ilema ceettela athiyana.”
^ par. 9 Mahumu anaapanka ratta ukati wowaakavihera asirokorihu. Wootakihera, humu mmoca khanlamuliya urwaa veekha unthotola nrokorihu.
^ par. 14 Isaalimu 68:11 Yehova naaruma; athiyana anlalyeera ihapari comaana akhanle anatoropa oolupale.
^ par. 16 Markus 14:3 Ni, ukati waaryaawe u Petaniya alyaaka uwannyawe Simau namakuttula, ahowa nthiyana mmoca nacisile ntiita woopankiya ni nluku nineehaniya alapasturu waarina makhura oonukhela, omaana ni onsurukhu mwinci. Uyo ahopwesa ntiita waawannyaawe ni ahancera wiitthela ayo makhuraayo wamuru wa Yesu. 4 Woona waya iyo, atthu akiina yahokhala oonyoonyiya ni yahanca ukohanaca: “Nlattuni urihakaciyaaya ala makhura oonukhelaala? 5 Kontha ala makhuraala pooti waatumihiyaaya idenaariyu coopwaha 300, ni nsurukhuuyo uvahiya amasikhini!” Ni yahonviruwela cinene ule nthiyanoole. 6 Masi Yesu aheera: “Munhiye akhale ni nnema. Nnonsuphelani ula nthiyanoola? Itthu ikipankilyaawe ikhanle yomaana. 7 Kontha nyuuva nnawaakhalana amasikhini khula ukati ni pooti waapankela citthu cotheene cinhala wuucivelani, masi mi khannohala ukikhalana ukati wotheene. 8 Ula pankale itthu ikhitinryaawe; hohoolelihera uttikitthela irutthwaaka makhura oonukhela, ooniheraka mananna cinhalaaka usikhiya. 9 Kinoohimyerani ikhweeli: Khula nipuro ninhala ulalyeeriya ihapari comaana ntuninyani motheene, ciicammo inaahala wuulumiya itthu ipankalyaawe ula nthiyanoola, oopuweleliyaka.”
^ par. 68 ILATARATO: Mayamunna araru yaawaceraka asirokorihu. Upanka waya commo, ayo anantakiha Yesu. Munna aakakhanihaka nroota nokaaro yaasirokorihu, munna nkiinooyo rwaale uwootola arokorihu anwerennya ni oomalelooyo naamwaarawe rwaale upanka uswali waamuci nkhayi ni nrokorihu ni mwanawe.
