1. Isiyani apoovu a Yehova impankaaya nlattu wonfenta Yehova ni nlattu wo waafenta akhwaaya?

 IBIIBLYA yahohimya khalayi wiira apoovu yaahala unswalela Yehova yanhala “wiivaherera woohikhanyererihiya” yattharaka malakihero a Yesu. (Isaa. 110:3) Khweeliini, iyo inatiriiyo inawiirannya ilelo. Khula mwaakha, aswali a Yehova anaaviriha iwoora cinci yalalyaaka ihapari comaana ca Nluku. Ni ayo ampanka iyo itthwiiyo kontha anaapheela, ni ukati nkhwaawe anaaleva citthu cirinaaya wiira akavihere uyo ntekooyo. Uhiya commo, ayo anawaakavihera mayamunnaaya yaakaviheraka ukhalana citthu cinaathwa, yaakurumicaka ni yaakaviheraka ulipihaca waamini waya. Mahumu ni arumiya o wanlokoni anaaviriha iwoora cinci yatthenkacaka miphantte cinkhalanaaya mmamikutthaanoni ni yawootolaka mayamunnaaya wiira yaalipihe. Apoovu a Yehova ampanka citthu cotheenennyo nlattu wonfenta Yehova ni wo waafenta akhwaaya.—Mat. 22:37-39.

2. Toko cinthoonyeraaya Arooma 15:1-3, isiyani Yesu yaapankaawe inreera hiiva utakiha?

² Yesu khamala upanka citthu cinreera hiiva utakiha. Uyo aanawaawacera cinene ni ratta akhunanawe uvikana ceewaceraawe uyova. Ni hi ninawiikurumica untakiha. (Nsome Arooma 15:1-3. *) Napankaka commo, ninaweettela moolumo a Yesu: “Uvaha unaatteeliha nrima cinene uvirikana ni waakhelela.”—Mite. 20:35.

3. Isiyani inhaleehu wiitthuca nhina ula mwahoola?

 ³ Nhina ula mwahoola, ninaahala woona citthu Yesu caapankilyaawe wiira aakavihere akhwaawe ni mananna hiiva ninlamuliyeehu untakiha. Ciicammo, ninaahala woona isiyani inlamuliyeehu upanka wiira nitepe upheela waakavihera akhwiihu.

4. Yesu aathoonyihenre cani wiira uyo anhoolelihera waakavihera akhwaawe?

⁴ Yesu aanawaakavihera akhwaawe hataa oocyaaka. Yesu ahoviriha uhiyu nteru alompaka ni nari umwaakoni, atthunaka wakhiviru ni u Cafarnaum. Muupuwele mananna Yesu caakhanlyaawe ukati waawonalyaawe atthu enci yawaaka nipuro naaryaawe. Uyo ahowoonela uthunku ayo atthwaayo ni hataa ukhala wiira ahoocya, Yesu ahancera waavoniha ale yaawerennya. Ni kahi iyo paahi; Yesu ahonkoma ni ahotaphulela mwahaawe muulupale ilelo uneehaniya Mwaha Muulupale Woomwaakoni.—Luka 6:12-20.

5. Ahooleli itthoko waaphwanyaka woocya anlamuliya untakiha cani Yesu?

⁵ Mananna ahooleli itthoko anlamuliyaaya untakiha Yesu. Muupuwele ila itthwiila: Nhooleli itthoko hokhala nihuku nteru nari untekoni ni nophiya uwannyawe noocyaale cinene. Nlattu wo woocya cinene, uyo nawuupuwela uhipanka nno nihukunno uswali waamuci. Masi uyo nanlompa Yehova ni nanlepela ikuru wiira akhitiri. Yehova nawaakhula ulompa wawe, ni naapanka uswali waamuci sana-saana. Asaana yawoonaka athumwanaya yapankaka commo, anawiitthuca ikano yofayita cinene. Ayo anawoona wiira asithumwanaya anaahoolelihera miteko ca Nluku muukumini waka.

6. Nttonkace mananna Yesu caakavihenryaawe atthu ukati waaphenlyaawe ukhala veekha.

⁶ Yesu ankumiha ukati wiira aakavihere akhwaawe hataa apheelaka ukhala veekha. Nkoopuwelani mananna Yesu caakhanlyaawe ukati weewalyaawe wiira Joau Mpattisa aheeviya. Yesu atthunaka ahoriipiya nrima cinene. Ibiiblya ineera: “Weewalyaawe [wiira Joau aheeviya], Yesu ahokela nkalawani ni ahorwaa nipuro nahaaviraviriya, wiira akhale veekha.” (Mat. 14:10-13) Yesu ahaana isariya yoopheela ukhala veekha ule ukatyuule. Atthu enci anaapheelaka ukhala veekha akhwaaka ntthu anfentaaya cinene. Iyo phi  itthu Yesu yaapheelaawe masi khaakhitinri. Atthu yahocuwela nipuro naarwaawe ni yahaakuva uphiya uyova hinaaya. Yesu aapankileni waawonnyaawe ayo atthwaayo? Ahoopuwela itthu yaawiira ayo atthwaayo ni ahowoonela uthunku. Yesu ahoona wiira ayo atthwaayo yampheela cinene ukaviheriya ni umaalihiya. Phimaana, “ahancera uwiitthuciha citthu cinci.”—Mark. 6:31-34; Luka 9:10, 11.

7-8. Nttonkace manannani mahumu cinontakihaaya Yesu wakhalaka wiira haavo ntthu nopheela ukaviheriya wanlokoni.

⁷ Mananna mahumu anlamuliyaaya untakiha Yesu. Hi ninaasukhurweela cinene miteko cotheene mahumu cineekurumicaaya uvara wiira anikavihere! Ikwaha cinci, mayamunna o wanlokoni khancuwela miteko mahumu cinvaraaya. Awerennyaka ntthu, mahumu anwacera myaha coosipiritaali anawaakavihera mayamunna woohipicapica. Imaara cinci, nnyo citthunnyo cinkhumelelaka uhiyu, masi mahumu ni asimucyaaya anawiivaherera waakavihera akhwaaya! Ampanka commo kontha anawaafenta mayamunna.

⁸ Mahumu ciicammo anaakavihera uteka Isalau co Umwene ni mapuro makhwaawe anvareliya nteko wiira aswaleliye Yehova. Ayo ciicammo anaakavihera cakhumelelaka ihasara cinwaaniya ninaphuvu awula uttettemela wotthaya. Mahumu anaaviriha iwoora cinci wiira awiitthucihe ni yaalipihe mayamunna o wanlokoni. Mayamunna otheennyaayo unawaaphwanela uttottopeliya. Ninanlepela Yehova wiira hihiye waacaaliha ayo mayamunnaayo! Masi mahumu otheene ahaana yiivaracaka. Ayo khanlamuliya uviriha ukati mwinci yawaceraka miteko co wanlokoni wahinkhalanaaya ukati wo waawacera amucyaaya.

9. Toko cinthoonyeraaya Afilipo 2:4, 5, isiyani makristau inlamuliyaaya upanka?

⁹ Nsome Afilipo 2:4, 5. * Yesu aari ntthu aahoolelihera waakavihera akhunanawe uhiya uhoolelihera citthu cawe. Kahi mahumu paahi thinlamuliya untakiha Yesu. Otheene cihu nihaana nintakihaka. Ibiiblya ineera wiira Yesu “ahaamini ukhala khampa ipottha.” (Afili. 2:7) Muupuwele maanaaya iyo itthwiiyo. Ipottha awula nanteko nokhala ntthu neekurumica ukati wotheene waavarela nteko apwiiyaawe. Hiiva nikhanle ipottha ca Yehova ni nikhanle ananteko o mayamunneehu. Phimaana, nimpheela untakiha Yesu ni wiikurumica upanka citthu cinontteeliha nrima Yehova ni waavarela miteko mayamunneehu. Nttwee noone citthu cinhala unikavihera upanka iyo itthwiiyo.

10. Makohoni anlamuliyeehu wiipanka?

¹⁰ Nwehe ciryaaya nrimeenyu. Mwiikohe co: ‘Miiva unaakicivela wiivaherera wiira kaakavihere mayamunnaaka?’ Wootakihera, mwiikohe ciicammo co: ‘Isiyani yaahalaaka upanka kinalepeliye urwaa umootola munna ooluvanle awula kinalepeliye waaveleela umikutthaanoni arokorihu owuuluvala? Kinawiivaherera ukavihera ukweca Isalau yo Umwene awula nipuro nimpakiya ikonkereesu?’ Ukati ulakenleehu unvaherera Yehova ukumiihu, hi nihomwiirela wiira ninaahala uhoolelihera unciveliha. Inanna imoca yoopanka iyo itthwiiyo ukhanle uleva ukatiihu ni waavaha citthu cirineehu wiira naakavihere mayamunneehu. Yehova naakhala ootteeliya nrima cinene anoonaka nipankaka commo. Masi noonaka wiira hiiva khanimpanka iyo itthwiiyo, isiyani inhala unikavihera urukunusa nrimeehu?

11. Ulompa unhala unikavihera cani utepa upheela waakavihera akhwiihu?

¹¹ Munlompe Yehova ninrimeenyu wotheene. Atthunaka nyuuva nhoonelela wiira nhaana mpankaka marukunuso muukumini winyu wiira nhoolelihere waakavihera akhwiinyu. Masi wakhala wiira nyuuva khunoocivelani upanka iyo itthwiiyo, munlompe Yehova ninrimeenyu wotheene. Munhimyeere inanna cineecooneenyu ni munlepele ‘uwiirihani wanrimani winyu upheela upanka nnyo citthunnyo ni wuuvahani ikuru wiira nkhitiri upanka.’—Afili. 2:13.

12. Mayamunna amirawo isiyani inlamuliyaaya upanka wiira akavihere mphwinko wa Yehova?

¹² Wakhala wiira weeva ummiravo ni uhopattisiya, unlepele Yehova wuukavihera ukhala ntthu ookhuluveliya wavahiyaka miteko wanlokoni. Mmalokoni menci aaswali a Yehova mahumu phinenciva waavikana arumiya o wanlokoni, ni ayo arumiya vakaannyaayo khanakhala amiravo cinene. Mphwinko wa Yehova khunhiya urwaa uhoolo, ni anaapheeliya amiravo owaakavihera mahumu uwacera miteko co wanlokoni. Weeva weevahereraka ukavihera, unaahala wuutteela nrima cinene. Nlattuni nineereehu commo? Kontha Yehova Nlukwaa naahala utteeliya, mayamunna o wanlokoni ciicammo anaahala utteeliya ni wuukhuluvela.

13-14. Isiyani inlamuliyeehu upanka wiira naakavihere mayamunneehu? (Nwehe ilatarato yo wakaapani.)

¹³ Nhiitthaale wiira nkhitiri uwaakuvela akhwiinyu yapheelaka ukaviheriya. Apostolu Paulu ahowiirela makristau yaakhala u Judeia co: “Nhiliyale waapankela citthu comaana akhunaninyu ni waamela irineenyu, kontha Nluku anancivela ayo meevahererwaayo.” (Mabere. 13:16) Ikano yaavahilyaawe yaari yomaana! Uvira waya ukati vakaani anaakhenle iyo iwarakheeyo, makristau o Judeia yahaana ‘yatthawelaka mmamyaakoni’ ni uhiya uttuli inupa caya, anakoswaaya ni amucyaaya yahaari makristau. (Mat. 24:16) Uyo  ukatyuuyo, makristau yahaana yakaviheranaka. Umeelana waya citthu caarinaaya, khweeliini phaakavihenre uvilela ni ulemalela ukhala woohimihakhu.

¹⁴ Nihiweherere umoona munna o wanlokoni awaaka unilepela unkavihera. Wootakihera, pooti ukhalaka wiira munna mmoca o wanlokoni ahokhwa amwaarawe ni uyo nokhala ariipiyaka nrima cinene. Niireke uyo munnooyo khampheela ukaviheriya uvara miteko co wapuwani awula waapyaaca? Uyo atthunaka khanlepela kontha khampheela waavaha miteko mayamunnaawe. Masi uyo khweeliini anhala usukhuru cinene neevahereraka unkavihera woohinilepela. Nihuupuwele wiira ahaavo mayamunna akhwaawe anonkavihera uyo munnooyo ni nihiweherere wiira uyo naahala unilepela apheelaka ukaviheriya. Mwiikohe co: ‘Kinari mi, isiyani yaahalaaka upheela wiira mayamunna akikavihere?’

15. Isiyani ninlamuliyeehu upanka napheelaka waakavihera akhwiihu?

¹⁵ Nthoonyere wiira nnaapheela waakavihera akhwiinyu. Nyuuva nnaacuwela wiira ahaavo mayamunna ni mayanuunu enci wanlokoni winyu anaakavihera akhwaaya niiraati ni ahintthuka iyuuci wiira ahilepeliye. Hi khaninoova waalepela itthu ayo mayamunnaayo. Khweeliini, otheene cihu nimpheela waatakiha ayo mayamunnaayo! Ntaniceraka iyo itthwiiyo, muupuwele itthu yuulumalyaawe humu mmoca rina myaakha 40 neehaniya Alan. Uyo enre: “Yesu aakhala nimiteko cinci, masi atthu otheene, anamwane ni oolupale, khayoova umwaattamela ni unlepela wiira aakavihere. Ayo atthwaayo yankhitiri woona wiira Yesu ampheela waakavihera. Mi kimpheela untakiha Yesu; kimpheela ukhala ntthu ooreera nrima, oohitthuka iyuuci ni kimpheela waathoonyera akhwaaka wiira kinaatthuna waakavihera.”

16. Weettela itthu inhimyaaya Isaalimu 119:59, 60 unhala unikavihera cani untakiha Yesu?

 ¹⁶ Nihikhale nimasukhuli noonaka wiira khaninkhitiri untakiha Yesu ratta-raatta. (Tiya. 3:2) Mmuupuwele ntthu nofunttiya nteko. Uyo naamoonela ntthu nonfuntta, masi ntekwaawe khunonkhumela sana-saana khampa wa funttyaawe. Hataa ukhalaka commo, uyo nanlelo nantakiha funttyaawe ni wahoolo waya unaamweettela saana ntekwaawe. Inanna imocaaru, neettelaka citthu cineetthuceehu mbiiblyani ni neekurumicaka wiira nihivonyanihe-tho, ninaahala ukhitiri untakiha Yesu sana-saana.—Nsome Isaalimu 119:59, 60. *

17-18. Citthuni comaana cinhaleehu uphwanya nahooleliheraka waakavihera akhwiihu?

¹⁷ Neevahereraka waakavihera akhwiihu, ayo ciicammo anaahala upheela unikavihera. Humu mmoca neehaniya Tim neera: “Amiravo enci anaatotha ukhala arumiya o wanlokoni kontha ahowoona mayamunna akhwaawe yakaviheraka miteko co wanlokoni. Ayo amirawaayo anawaakavihera cinene mahumu ni mayamunna o wanlokoni.”

¹⁸ Hi ninkhala ituninya yoocara atthu ahimpheela waakavihera akhwaaya, masi apoovu a Yehova kahi phiryaaya commo. Noopuwelaka mananna Yesu caahoolelihaawe waakavihera akhwaawe, hi ciicammo ninaapheela untakiha. Ninaacuwela wiira khaninhala ukhitiri untakiha ratta-raatta, masi khaninhala uhiya wiikurumica ‘utthara meettelwaawe.’ (1 Pet. 2:21) Ukati uneekurumiceehu untakiha Yesu unaahala unitteela nrima cinene nlattu woocuwela wiira Yehova naaciveliya venci ni hiiva.