MWAHA WOOSOMIYA 18
Mwiihelele ni mwiirannyeehe mipika coominepani
“Wuupuwele cinene ni uweheehe saana nnya citthunnya, wiira wuunuwa waa nhina mminepani wooniye ratta-raatta naatthu otheene.”—1 TIM. 4:15.
NCIPO 84 Niikurumice ulalyeera
NINHALA WIITTHUCANI? *
1. Mipikani cinlamuliyeehu wiihelela?
HI NINANFENTA Yehova cinene. Phimaana nimpheela wiikurumica uvara cinene ntekwaawe. Masi wiira ninvarele nteko cinene, nihaana niihelelaka mipika coominepani, toko wiitthuca uthoonyera makhalelo o nhokorokho wo nnepa wowaarya, wiitthuca mavarelo ratta nteko wa Yehova ni utotha mananna owaakavihera akhunanihu. *
2. Nlattuni ninlamuliyeehu wiihelela ni wiirannyeeha mipika coominepani?
2 Nlattuni ninlamuliyeehu utotha wuunuwa mminepani? Yoopacera, kontha nimpheela waatteeliha nrima Apaapeehu oonifenta owiirimu. Yehova naakhala ootteeliya venci anoonaka nivarelaka nteko ucuwela wihu wiira ninswalele. Yonayeeli, kontha nimpheela waakavihera mayamunneehu ni miyanuunwiihu. (1 Atesal. 4:9, 10) Otheene cihu pooti wuunuwa mminepani hataa ukhalaka wiira nipacenre khalayi unswalela Yehova. Nttwee noone manannani ikano ya Paulu cinnikaviheraaya.
3. Toko cinthoonyeraaya 1 Timotiyu 4:12-16, isiyani apostolu Paulu yankurumicilyaawe Timotiyu upanka?
3 Timotiyu aari mmirawo oocuwelaca ukati apostolu Paulu waamwantikhenlyaawe iwarakha. Waahookhalaru commo, Paulu ahonkurumica uhihiya wuunuwa mminepani. (Nsome 1 Timotiyu 4:12-16. *) Ukati woosoma moolumo a Paulu, nyuuva nnaahala woona wiira cihaavo mipika miili Paulu caapheelaawe wiira Timotiyu eehelele. Mpika woopacera waari ukhitiri uthoonyera makhalelo eekristau, toko nifento, waamini ni waarya. Mpika wonayeeli waari ucuweleeha usoma waatthuni, wiitthuciha ni utaphulela myaha ratta. Ntakihero na Timotiyu ninaahala unikavihera woona wiira napheelaka wuunuwa mminepani, nihaana niihelelaka mipika cinhaleehu ukhitiri wiirannyeeha. Nhina ula mwahoola, ninaahala woona ciicammo manannani ninlamuliyeehu uvara cinene nteko wa Yehova.
MWIIKURUMICE UTHOONYERA MAKHALELO EEKRISTAU
4. Toko cinthoonyeraaya Afilipo 2:19-22, isiyani yaamwiiriha Timotiyu ukhala nswali omaana a Yehova?
4 Isiyani yaamwiiriha Timotiyu ukhala nswali omaana a Yehova? Yaari makhalelo eekristau yaarinaawe. (Nsome Afilipo 2:19-22. *) Nasomaka mananna Paulu cimmuulumaawe Timotiyu nhina iwarakha cawe, ninaakhitiri woona wiira Timotiyu aari ntthu owiiyeviha, ookhuluvelya, owiikurumica ni oohinyoonyaciya. Uyo aanawaafenta mayamunna ni ampheela cinene waakavihera. Phimaana, Paulu khoova unvahacera Timotiyu miteko cuulupale. (1 Akor. 4:17) Inanna imocaaru, neekurumicaka uthoonyera makhalelo eekristau ninaahala ukavihera cinene nloko nihu ni Yehova naahala utepa unifenta.—Isaa. 25:9; 138:6.
Nthanle ikhalelo yeekristau impheeleenyu wiitthuca uthoonyera ratta (Nwehe iparaagarafu 5-6)
5. a) Isiyani inhala wuukaviherani uthanla ikhalelo inlamuliyeenyu wiikurumica uthoonyera ratta? b) Toko cinthoonyeraaya ilatarato, isiyani arokorihu aakaani impankaaya wiira yiirannyeehe mpika wiihelenlyaaya woothoonyera uthunku?
5 Nthanle ikhalelo impheeleenyu wiikurumica uthoonyera. Munlepele Yehova wuukaviherani woona itthu inlamuliyeenyu urehererya muukumini winyu. Vano nthanle ikhalelo imoca ni mwiikurumice uthoonyera ratta iyo ikhalelweeyo. Atthunaka nnaahala woonelela wiira nhaana mwiitthucaka uwoonela uthunku akhunaninyu awula pooti woonelela wiira nhaana mwiikurumicaka waapankela citthu mayamunneenyu. Awula atthunaka nhaana mwiitthucaka ukhala nannema ni waalevelela akhunaninyu. Itthu inhala wuukaviherani ukhanle unlepela mpwaniinyu wiira oohimyeereni ikhaleloni ihinthoonyereenyu ratta.—Miru. 27:6.
6. Isiyani inlamuliyeenyu upanka wiira nkhitiri uthoonyera ikhalelo yeekristau?
6 Mwiikurumice wiirannyeeha mpika wiihelenleenyu. Nnohala wiikurumica cani wiirannyeeha? Itthu imoca ukhanle wiikurumica usoma ikhalelo impheeleenyu uthoonyera ratta. Wootakihera, muupuwele wiira nyuuva nnopheela wiitthuca waalevelela akhunaninyu. Wiira mwiirannyeehe uyo mpikooyo, nyuuva pooti usoma mbiiblyani ihantisi caatthu yaalevelenle akhunanaya ni caatthu yahaalevelenle. Mmuupuwele Yesu. Uyo khawanrika waalevelela akhunanawe. (Luka 7:47, 48) Yesu khaatepa uweheeha citthu caavonyaaya akhunanawe, masi aahoolelihera woona citthu comaana caakhitiryaaya upanka. Yesu aanaavirikana ni mafarisewu yahaawoona akhunanaya ukhalana ifayita. (Luka 18:9) Muupuwele ayo matakihero meelyaayo, na Yesu ni no mafarisewu. Vano, mwiikohe co: ‘Mi kinaawehera cani akhunanaka? Kinneekurumica woona makhalelo omaana arinaaya?’ Wakhala wiira nyuuva unawuurikani unlevelela ntthu, mwantikhe nipuro makhalelo omaana arinaawe uyo ntthuuyo ni mwiikohe co: ‘Yesu nonwehera cani ula ntthuula? Kiireke Yesu anhala unlevelela?’ Upanka iyo itthwiiyo wanhala wuukaviherani urukunusa mananna moopuwelweenyu. Wiipaceroni, nyuuva atthunaka khunhala uwaakuvyeelani unlevelela ntthu ootthekenleni. Masi mweekurumicaka waalevelela akhunaninyu, vakaani-vakaani unaahala utepa uhuurikani waalevelela.
MWIITTHUCE MANANNA OOKAVIHERA NTEKO WA NLUKU
Mwiivaherere wiira mwiitthucihiye urehererya Isalau yo Umwene (Nwehe iparaagarafu 7) *
7. Miruku 22:29 inthoonyera cani wiira Yehova nawiirannyeeha citthu cootikhiniha nlattu wo nteko unvaraaya atthu owiikurumica?
7 Mpika nkhwaawe unlamuliyeenyu wiihelela ukhanle wiitthuca mananna makhwaawe oovara nteko wa Nluku. Muupuwele atthu akavi ampheeliya wiira citekiye ipeteli, Isalau co Mithukumano Cuulupale ni Isalau co Umwene. Mayamunna enci ankavihera uyo ntekooyo yiitthucile uteka ukati waakaviheraaya mayamunna ancuwela utekateka. Toko cinthoonyeriyaaya walataratoni, mayamunna ni hataa miyanuunu anawiitthucihiya ulokihaca Isalau yo Umwene awula Isalau co Mithukumano Cuulupale. Coo, Yehova Nluku, “Mwene o mahuku otheene” wamoca ni Yesu Kristu, “Mwene aale anlamulela” anawiirannyeeha citthu cootikhiniha nlattu wo nteko unvaraaya alopwana ni athiyana owiikurumica. (1 Tim. 1:17; 6:15; nsome Miruku 22:29. *) Hi nimpheela ukhala atthu oohinyoonyaciya ni uvarela nteko ucuwelaca wihu wiira ninttitthimihe Yehova, kahi wiira nooniye.—Joau 8:54.
8. Isiyani inhala wuukaviherani uthanla nteko unhaleenyu wiikurumica uvara ratta?
8 Nthanle nteko umpheeleenyu wiitthuca uvara ratta. Ntekoni umpheeleenyu wiitthuca uvara ratta? Mwaakohe mahumu o wanlokoni ni mootoli osirikwiitu wiira ncuwele ntekoni wo wanlokoni unlamuliyeenyu wiikurumica uvara ratta. Wootakihera, ayo pooti uwiirelani wiira nhaana mwiikurumicaka ucuwela wiitthuciha ratta. Wakhala wiira iyo phi itthu inhalaaya uwiirelani, mwaalepele wuuhimyeerani isiyani inoohaleelani wiira mwiitthucihe ratta. Vano, mwiikurumice uvara nteko iyo itthwiiyo. Masi isiyani inhala wuukaviherani ucuwela wiitthuciha ratta?
9. Isiyani inlamuliyeenyu upanka wiira nkhitiri wiitthuciha ratta?
9 Mwiikurumice wiirannyeeha mpika wiihelenleenyu. Wakhala wiira mpika wiihelenleenyu ukhanle ucuwela wiitthuciha ratta, nyuuva pooti usoma ni weettela ipontu co mbroxurani Melhore a Sua Leitura e o Seu Ensino. Mwavahiyaka mphantte wiira mwapanke wankutthaanoni weeriyari isumana, mwiitthenkace nkhayi ni munna nkiina ni munlepele wuuhimyeerani isiyani inhaleela wiira mwiitthucihe ratta. Hataa ukhalaka wiira ninaacuwela wiitthuciha ratta, otheene nihaana nitthenkacaka ratta khula mwaha unvahiyeehu wiira nataphulele wanlokoni.—Miru. 21:5; 2 Akor. 8:22.
10. Niireke ninaahala ukhitiri wiitthuca nteko wo wanlokoni unnirika cinene? Ntakihere.
10 Vano wakhalaka wiira unawuurikani cinene nteko uthanlaleenyu, nnohala upankani? Nhoocye! Munna mmoca neehaniya Garry waananrika cinene usoma. Uyo neera wiira aanawoona ihaaya cinene asomaka wankutthaanoni. Masi uyo aheekurumica cinene wiitthuca usoma ratta ni nlattu wookaviheriya, ilelo uyo munnooyo naataphulela myaha mmikutthaanoni, mmithukumanoni cosirikwiitu ni mmakonkereesuni.
11. Toko Timotiyu, isiyani inhala unikavihera utepa uvara saana miteko ca Yehova?
11 Niireke wiira Timotiyu ahokhitiri ukhala mwiitthucihi muulupale? Ibiiblya khinhimya. Masi pooti wankupaliihu wiira ikano ya Paulu yahonkavihera Timotiyu wiitthuca uvara sana-saana miteko cinci wanlokoni. (2 Tim. 3:10) Inanna imocaaru, neekurumicaka wiitthuca uvara ratta miteko ca Yehova, ninaahala utepa uvara saana miteko cawe.
NTOTHE MANANNA O WAAKAVIHERA AKHUNANINYU
12. Mayamunna akhwaawe yuukavihenreni cani?
12 Hi unaanitteela nrima akhunanihu yanikaviheraka. Wootakihera, nawerennyaka ni naapaxariki usiripitaali, unaanitteela nrima nootoliyaka ni mahumu o Mphwinko Untafiti Myaha Coosipiritaali ni Mphwinko Wowaathotola Aretta. Yanikhumelelaka masakha, unaanicivela umoona humu oofenta anootolaka wiira aniviriyane ni animaalihe. Ni napheelaka ukaviheriya unsomiha ntthu Ibiiblya, hi unaanitteela nrima piyoneeru oocuwelaca aniveleelaka wuusomihani Ibiiblya ni anithoonyeraka mananna oosomiha ratta Ibiiblya. Ayo mayamunnaayo yanikaviheraka, anaakhala ootteeliya cinene. Utteeliya nrima unkhalanaaya hi ciicammo pooti uniphwanya neekurumicaka waakavihera mayamunneehu. Yesu enre wiira “uvaha unaatteeliha nrima cinene uvirikana ni waakhelela.” (Mite. 20:35) Wakhala wiira nyuuva nnopheela waakavihera akhunaninyu nvaraka nnyo mitekonnyo, isiyani inhala wuukaviherani wiirannyeeha uyo mpikooyo?
13. Ukati woothanla mpika unlamuliyeenyu wiihelela, isiyani inlamuliyeenyu wuupuwela?
13 Nhiihelele mpika wo citthu cinci. Wootakihera, nyuuva pooti wuupuwela co: ‘Mi kimpheela ukavihera cinene nloko naka.’ Mpika toko uyo unaahela nhina citthu cinci. Phimaana, pooti wuurikani ucuwela mananna owiirannyeeha uyo mpikooyo ni hataa pooti uhicuwelela wakhala wiira nheerannyeeha awula mena. Wiira iyo itthwiiyo ihiirannye, mwiihelele mpika mmoca woowoonannya. Mwapheelaka, pooti wantikha nipuro mpika wiihelenleenyu ni itthu inlamuliyeenyu upanka wiira mwiirannyeehe.
14. Kontha isiyani neehelelaka mpika nihaana naaminiki upanka marukunuso?
14 Neehelelaka mpika, nihaana naaminiki upanka marukunuso, kontha pooti unikhumelelaka citthu cahaaweherereehu. Mmuupuwele apostolu Paulu. Uyo ahokavihera utthenkaca nloko nophiyaaru wasittatti yo Tesalonika, ni khweeliini ahaana mpika wo waakavihera mayamunna o nno nlokonno. Masi nlattu woolupatthiya, uyo ahaana akhumaka ile isittattiile. (Mite. 17:1-5, 10) Unari wiira Paulu khaakhumale ile isittattiile, uyo anhala waaphwanyiha masakha mayamunnaawe. Masi hataa inkhumelelaka iyo itthwiiyo, Paulu khoocyaale. Uyo ahopanka marukunuso attharihaka citthu cankhumelenle. Wahoolo, uyo ahonruma Timotiyu wiira arwee aakavihere mayamunna o Tesalonika. (1 Atesal. 3:1-3) Khweeliini, mayamunna o Tesalonika wahaatteela nrima waamonnyaaya Timotiyu eevahereraka wiira aakavihere!
15. Citthu cahaaweherereehu cinnikhumelela cinrukunusa cani mipika cihu? Nttonkace itthu iwiirannyenle amunneehu naamwaaraya.
15 Itthu yankhumelenle apostolu Paulu u Tesalonika inaaniitthuciha citthu cinci. Pooti ukhalaka wiira hiiva ninawiitthenkaca wiira nivahaceriye nteko muulupale mumphwinkoni wa Yehova. Masi pooti unikhumelela itthu yahaaweherereehu inhala unihiiha uvahaceriya uyo ntekooyo. (Ekles. 9:11) Yookhumelelakani iyo itthwiiyo, nyuuva nhaana mwaaminiki upanka marukunuso ni wiihelela mpika nkhwaawe unhaleenyu ukhitiri wiirannyeeha. Iyo phi itthu yaapankilyaaya amunna Ted ni amwaaraya aneehaniya Hiedi. Ayo yaavara nteko u Peteli, masi nuuwakatyaaya yahohiya uvara nteko u Peteli nlattu woowerennya. Hataa ukhalaka commo, unfenta waya Yehova wahowiiriha utotha mananna makhwaawe ookavihera nteko wa Yehova. Woopacera, ayo yahanca uvara nteko weepiyoneeru owiicaaverya. Nuuwakatyaaya, ayo yaholattuliya wancera uvara nteko weepiyoneeru owiivaherera. Ni amunna Ted yahancera utthenkaciya wiira akhale mootoli osirikwiitu. Masi, uyo ukatyuuyo wahohimiya wiira mayamunna apiihile myaakha 70 khanlamuliya ukhala mamootoli osirikwiitu. Phimaana amunna Ted khayaalamuliya-tho ukhala mootoli osirikwiitu. Ayo ni amwaaraya wahaariipa nrima nlattu wo iyo itthwiiyo, masi yahoona wiira pooti waakaviheraaya nteko wa Yehova nimananna makhwaawe. Amunna Ted aneera: “Hi khaninlamuliya wuupuwela wiira ninhala unswalela Yehova nivaraka nteko mmocaaru ukati wotheene.”
16. Akalasiya 6:4 inniitthuciha isiyani?
16 Hi khanincuwela citthu cinhala unirannyeela muukumini wihu. Phimaana, khaninlamuliya wuupuwela wiira ninaahiya ukhalana ifayita uhoolo wa Yehova naahivahaceriyeke miteko mumphwinkoni wawe. Ciicammo, khaninlamuliya ulattaniha miteko cinvaraaya akhunanihu nimiteko hiiva cinvareehu. Arokorihu Hiedi aneera: “Walattanihaka makhalelwaa nimakhalelo aatthu akiina, khunootaphuwa nrima.” (Nsome Akalasiya 6:4. *) Nihaana nitothaka mananna makhwaawe owaakavihera akhunanihu ni onswalela Yehova. *
17. Isiyani inlamuliyeenyu upanka wiira nvahaceriye mirintti cikhwaawe?
17 Khunhala wuurikani uvara cinene nteko wa Yehova mwanyemaka uhoolelihera ukhalana mihakhu cinci ni mwahiyaka uthumathuma citthu cihitepile ukhalana ifayita. Nyuuva pooti wiihelela mipika cankaani wiira nkhitiri wiirannyeeha mipika cuulupale. Wootakihera, wakhala wiira mpika wiihelenleenyu ukhanle uvara nteko weepiyoneeru owiicaaverya, nnoonela cani upacera ukhala piyoneeru ookavihera wooheemelela? Wakhala wiira mpika wiihelenleenyu ukhanle ukhala nrumiya o wanlokoni, nnoonela cani uviriha ukati mwinci nlalyeeraka ni nwootolaka mayamunna anwerennya ni owuuluvala o wanlokoni? Iyo itthwiiyo pooti wuutthenkacani wiira nvahaceriye mirintti cikhwaawe wahoolo. Nlakele uvara ratta khula nteko unhaleenyu urumiya.—Aroo. 12:11.
Mwiihelele mpika mmoca unooneenyu wiira nnaahala ukhitiri wiirannyeeha (Nwehe iparaagarafu 18) *
18. Toko cinthoonyeraaya ilatarato, itthu yaapankilyaaya arokorihu Beverley inniitthuciha isiyani?
18 Hataa ntthu ooluvalaka, pooti wiihelela mipika coominepani. Nwuupuwele arokorihu arina myaakha 75 aneehaniya Beverley. Nlattu woowerennya, ayo khankhitiri weetta saana. Masi ayo yaanaapheela cinene ukavihera nteko wa Yehova ukati wo waalattula atthu unuupuweleloni. Phimaana, ayo yaheehelela mipika ni wahaatteela nrima cinene ukati waakhitinryaaya wiirannyeeha nnyo mipikannyo. Itthu yaapankilyaaya ayo anuunwaayo yahaavaha ikuru mayamunna akhwaawe wiira yiikurumice wuulalyeerani. Yehova unancivela cinene nteko wotheene unvaraaya mayamunneehu owuuluvala, hataa yahikhitiriki uvara nteko mwinci.—Isaa. 71:17, 18.
19. Mipikani coominepani cinlamuliyeehu wiihelela?
19 Mwiihelele mipika cinhaleenyu ukhitiri wiirannyeeha. Mwiikurumice uthoonyera makhalelo eekristau anoncivela Yehova. Mwiitthuce uvara miteko cinhala wuukhitirihani ukavihera cinene miteko ca Yehova ni co mumphwinkoni wawe. Ni ntothe mananna o waakavihera mayamunneenyu o wanlokoni. * Toko Timotiyu, mwakaviheriyaka ni Yehova ‘wuunuwa winyu mminepani unaahala wooniya naatthu otheene.’—1 Tim. 4:15.
NCIPO 38 Jeová Vai Dar-te Força
^ par. 5 Timotiyu aari nlalyeeri ihapari comaana owiikurumica. Waanookhalaru commo, apostolu Paulu ahonkurumica wuunuwa mminepani. Ukhala wiira ahotthara ikano yaavahiyaawe ni Paulu, Timotiyu ahokhitiri uvara cinene nteko wa Yehova ni waakavihera mayamunnaawe. Nyuuva nnaapheela uvara cinene nteko wa Yehova ni waakavihera mayamunna khampa Timotiyu? Khweeliini nnaapheela. Masi mipikani cinhala wuukaviherani upanka iyo itthwiiyo? Ni isiyani inlamuliyeenyu upanka wiira mwiirannyeehe nnyo mipikannyo?
^ par. 1 NUULUMO NOOTAPHULELIYA: Mipika coominepani cinkhala citthu cineekurumiceehu upanka wiira nitepe uvara cinene nteko wa Yehova ni nintteelihe nrima.
^ par. 3 1 Timotiyu 4:12 Uhinhiye hataa ntthu oovyaavyeehacaka nlattu wookhala mmirawo. Masi, ukhale ntthu ooreera utakihiya naatthu ookhuluvelya nhina wo moolumacerwaa, meettelwaa, nifento naa, waamini waa, makhalelwaa omaana. 13 Mpaka wanhalaaka uwa, uhihiye wiikurumica usoma ratta waatthuni, waalipiha akhwaa ni wiitthuciha ratta. 14 Uvarele nteko ucuwelaca urinaa, uvahiyaa niinatiri, ukati mahumu yooweeserenryaaya matata. 15 Wuupuwele cinene ni uweheehe saana nnya citthunnya, wiira wuunuwa waa nhina mminepani wooniye ratta-raatta naatthu otheene. 16 Uhihiye wiiwehaweha ni uwacera mananna cineetthucihaa. Uvaresese nnya citthunnya, kontha wapanka commo unaahala uyoopola weeva ni unaahala uwoopola atthu anooviriyana.
^ par. 4 Afilipo 2:19 Kinaaweherera iriyari ya Apwiiya Yesu wuuveleeliherani Timotiyu, wiira kikhale oolipihiya ukati unhalaawe uturuwa ni ukihimyeera ihaali cinyu. 20 Kontha khaavo-tho nomoonaaka owiikurumica toko uyova ni nohala wuuwacerani saana. 21 Kontha akhwaawe otheene anwacera citthu caya, kahi citthu ca Yesu Kristu. 22 Masi nyuuva nnaacuwela sana-saana wiira Timotiyu heevaherera uvara nteko nkhayi ni miiva wuulalyaani ihapari comaana, khampa mwaana cinvaraawe nteko naathumwaane.
^ par. 7 Miruku 22:29 Nhomoona nlopwana neekurumica uvara saana ntekwaawe? Uyo naahala waakhalakhalana mamwene, kahi atthu ahirina ukhulupale.
^ par. 16 Akalasiya 6:4 Khula ntthu aweheehe meettelwaawe, vano phinhalaawe ukhalana isariya yootteeliya nlattu wo meettelwaawe, kahi nlattu wo wiilattaniha ni ntthu nkiina.
^ par. 16 Nwehe isuputiitulu “Servir onde a necessidade é maior” nlivuruni Organizados Para Fazer a Vontade de Jeová ikapiitulu 10, iparaagarafu 6-9.
