MWAHA WOOSOMIYA 16
Waaviriyane, waacuwele ni uwoonele uthunku akhwaa
“Nhiye uhukhumu nttharaka citthu cinooneenyu, masi nhukhumu niisariya.”—JOAU 7:24.
NCIPO 101 Servimos a Jeová em União
NINHALA WIITTHUCANI? *
1. Ikhweeliini yoonitteeliha nrima ineetthucihiya mbiiblyani nhina mananna Yehova cinniweheraawe?
WAANAAHALA wuucivela wuulumiya pusya awula uhiwehiya saana nlattu wootteela awula uriipa nttapala, ikhovyaa, wuunuwa waa awula uyeva waa irutthu? Unawoonannya wiira mena. Unaanitteela nrima nlattu woocuwela wiira Yehova khampanka iyo! Uyo khanweha paahi itthu apinaatamu inoonaaya ni miitho. Wootakihera, ukati Samuweli waawoonalyaawe asaana a Yesee, uyo khaawehenre toko Yehova caaweheraawe. Yehova ahomwiirela Samuweli wiira mwaana mmoca a Yesee aanaahala uthanliya ukhala mwene o Isarayeli. Masi mwaanani aahala uthanliya? Ukati Samuweli waamoonalyaawe Eliyapi, mwaana omuulupale a Yesee, uyo aheera: “Khweeliini, ula phithanliye ni Yehova.” Eliyapi aarina ikhove ni irutthu yomphwanela ukhala mwene. “Masi Yehova ahomwiirela Samuweli: ‘Uhimoone ureera uwiittho awula urekama, ukhala wiira mi kihonkhotta.’” Iyo inniitthuciha isiyani? Yehova aheera-tho: “Ntthu noweha ikhove paasi, masi Yehova naacuwela khula ntthu irinaawe wanrimani.”—1 Sam. 16:1, 6, 7.
2. Toko cinttonkiyaaya nhina Joau 7:24, kontha isiyani khaninlamuliya unwehera pusya nkhwiihu nlattu wo citthu cinooneehu? Utakihere.
2 Ukhala wiira naatthu oopahuwa, otheene cihu ninawaakuva uwuuluma pusya akhwiihu awula uhaawehera ratta nlattu wo citthu cinooneehu. (Usome Joau 7:24. *) Masi hiiva nanwehaka ntthu ni miitho paahi khaninhala ukhitiri uncuwela ratta. Wootakihera, umuupuwele meetiku oocuwelaca cinene. Niireke uyo naakhitiri ucuweleeha itthu immwiira nretta nlattu wonweha ni miitho paahi? Mena. Woopacera, uyo haana anviriyanaka saana nretta ukati unttonkaawe itthu inonwerya. Meetiku atthunaka haana arumaka upankiya iraio-X wiira amoone nretta mananna ciryaawe nhina mwiirutthuni. Meetiku aahipankeke nnyo citthunnyo, unawoopiha uyo unvaha nretta mirette cikhwaawe cihinvoniha iretta irinaawe. Inanna imoca, hiiva khaninhala ukhitiri waacuwela mayamunneehu ni asirokorihu naawehaka ni miitho paahi. Nihaana naacuweleehaka mananna ciryaaya nhina awula wanrimani waya. Hiiva khaninkhitiri ucuwela citthu akhwiihu cirinaaya wanrimani; phimaana, khaninhala waacuwela ratta akhwiihu toko Yehova cinaacuwelaawe. Masi hiiva pooti wiikurumica untakiha Yehova. Manannani?
3. Ihantisi co mbiiblyani cinhaleehu woopela mwaha cinhala unikavihera cani untakiha Yehova?
3 Yehova naawehera cani atthu anonswalela? Uyo nawaaviriyana. Uyo naacuwela citthu cinwiira ni cinaakhumelela. Ni ciicammo naawoonela uthunku. Nttwee noone mananna Yehova caapankalyaawe iyo ukati wonwacera Jonas, Eliyasi, Hakari ni Loti. Nnyo ihantisinnyo cinaahala unithoonyera mananna ninlamuliyeehu untakiha Yehova ukati wowaawacera mayamunneehu ni asirokorihu.
WAAVIRIYANE RATTA
4. Nlattuni nahaahaleehu unwehera saana Jonas?
4 Hiiva naahala umoona Jonas ukhala nlopwana oohikhuluvelya ni oohinamaana. Yehova ahonruma Jonas urwaa u Niinive ulalyeera ihukhumu yaahala uwa. Uhiya umwiiwelela Yehova, Jonas ahonkela paketi wiira arwee ilapo ikhwaawe, “apheelaka untthawa Yehova.” (Jonas 1:1-3) Unari weeva, waanaahala unvaha Jonas ukati nkhwaawe wiira apanke itthu yaarumiyaawe? Atthunaka mena. Masi iyo phi itthu Yehova yaapankalyaawe.—Jonas 3:1, 2.
5. Ilivuru ya Jonas 2:1, 2, 9 inniitthuciha isiyani nhina makhalelwaawe uyo porofeetooyo?
5 Nhina nivekelo naapankalyaawe, Jonas hothoonyera khweeliini aari tipani. (Usome Jonas 2:1, 2, 9. *) Khweeliini, Jonas aananlompa Yehova ikwaha cinci. Ikwaha imoca yaalompalyaawe, nari mmirimani wohopa, Jonas hothoonyera wiira ahaana makhalelo omaana, waanookhalaru wiira ahotthawa nteko waarumiyaawe. Moolumo a Jonas nhina nno nivekelonno anthoonyera wiira uyo aari nlopwana owiiyeviha, oosukhuru ni aalakenle umwiiwelela Nluku. Yehova khaaweheehale itthu Jonas yaavonyalyaawe. Masi Yehova ahaakhula nivekelo nawe ni ahonhiya wiira nanlelo avare nteko khampa porofeetaawe.
Napacaka ucuwela citthu cotheene cikhumelenle, ninaahala ukhitiri waawehera ratta mayamunneehu (Uwehe iparaagarafu 6) *
6. Kontha isiyani unaareera wiikurumica waaviriyana ratta akhwiihu?
6 Wiira naaviriyane ratta akhwiihu, nihaana niiyevihaka ni naavilelaka. Nihaana niikurumicaka upanka iyo nlattu wo citthu tthaaru. Yoopacera, upanka commo unaahala unikavihera wiira nihaakuve waawehera pusya akhwiihu. Yonayeeli, iyo inaahala unikavihera ucuweleeha itthu inwiira ni impheelaaya mayamunneehu. Ni yoneeraru, ninaahala ukhitiri unkavihera ntthuuyo wiicuwela mwaaneennyaawe. Kontha ukati nkiina, ntthu pooti uhicuwelela itthu immwiira, masi ukati unonhimyeraawe ntthu nkhwaawe, uyo nawancera ucuwelela isiyani immwiira. (Miru. 20:5) Humu mmoca u Ásia neera: “Mi kihopaca uvonya nlattu wowuuluma kihinaaya unviriyana ratta ntthuuyo. Ikwaha imoca, mi kahomwiirela nrokorihu wiira uyo aalamuliya wiikurumica uvaha ikomentaariyu comaana umikutthaanoni. Masi wahoolo mi kahocuwelela wiira uyo khaakhitiri usoma ratta, ni ahaana eekurumicaka cinene wiira akomentari.” Phimaana ikhanle itthu yofayita cinene humu “wiiweeha citthu cotheene” hinaaya unvaha ikano ntthu.—Miru. 18:13.
7. Wiitthucale isiyani wuupuwelaka mananna Yehova canwacenryaawe Eliyasi?
7 Mayamunna akhwaawe unawaarika uhimya itthu inwiira, atthunaka nlattu wo mananna cuunuwihiyaaya, ilemaaya awula nlattu wo makhalelwaaya. Isiyani ninlamuliyeehu upanka wiira naakavihere ale unaarika unihimyera itthu inwiira wanrimani waya? Wuupuwele mananna Yehova cankavihenryaawe Eliyasi ukati wantthawalyaawe Yesapeli. Yahovira mahuku menci Eliyasi hinaaya waahimyeera Athumwaane owiirimu citthu cotheene caamwiira. Yehova ahonviriyana Eliyasi. Uyo ciicammo ahonlipiha Eliyasi ni ahonruma uvara nteko muulupale. (1 Mam. 19:1-18) Inanna imoca, mayamunneehu awula asirokorihu akiina pooti ukhala ukati mwinci yahikhitiriki unihimyeera itthu khweeliini inwiira. Masi ayo yanihimyeraka phinhaleehu ucuwela itthu khweeliini inwiira. Naavilelaka mayamuneehu toko Yehova canvilenlyaawe Eliyasi, ayo anaahala unikhuluvela ni anaahala unihimyera itthu inwiira. Ni ukati unnihimyeraaya, hiiva nihaana naaviriyanaka ratta.
WAACUWELE MAYAMUNNAA NI ASIROKORAA
8. Toko cinthoonyeraaya Uphattuwaca 16:7-13, Yehova ankavihenre cani Hakari?
8 Hakari, ipottha ya Sarayi, ahopanka itthu yoohiloka ukati waatheliyaawe ni Aparau. Ukati waarupanlyaawe irukulu, Hakari ahancera unthanya Sarayi, kontha khaakhitiri uyara. Nlattu wo iyo, Sarayi ahancera uhinwacera ratta Hakari. Ayo yaarina nanrokottole muulupale, mpaka Sarayi ahomoomola Hakari. (Upha. 16:4-6) Woonela wihu hiiva atthu oopahuwa, unkhala toko Hakari aari nthiyana oohinamaana ni waanamphwanela woomoliya. Masi Yehova kahi phanweheraawe Hakari commo. Uyo ahoveleeliha nlayikha. Nno nlayikhanno nahorwaa umoonanana Hakari, nahonkavihera urukunusa moopuwelelwaawe ni nahonvaha iparakha. Hakari ahoona wiira Yehova aananwacera ni aanaacuwela itthu yaamwiira. Phimaana Hakari ahomwiihana Yehova “Nluku owoona” ni “ule nokoona.”—Usome Uphattuwaca 16:7-13. *
9. Kontha isiyani Yehova ahonwacera saana Hakari?
9 Yehova anwehenre cani Hakari? Yehova aanaacuwela citthu cankhumelenle Hakari khalayi ni aanaacuwela citthu cotheene caamwiira muukumini wawe. (Miru. 15:3) Hakari aari nthiyana o Wiciipitu ni aakhala watthokoni yo maberewu. Niireke ukati nkiina Hakari aanawiicoonaka ukhala veekha? Niireke khayannukhelaka amucyaawe Wiciipitu ni ilapo yaayariyaawe? Uhiya iyo, Hakari aanowaattennya ni Aparau. Khalayi, alopwana ookhuluvelya akiina yahaathela athiyana enci. Masi iyo khinakhala itthu Yehova yaalakenlyaawe wiira ikhumelele watthokoni. (Mat. 19:4-6) Phimaana watthokoni commo, ninawoona ikhalaka ihace ni uhitthunaniya. Yehova khawancivela umoona Hakari ahinhisimaka Sarayi. Hataa wakhalaka commo, Yehova ahonwacera saana Hakari kontha aanaacuwela citthu cankhumelenle ni aanaacuwela yaamwiira wanrimani.
Waacuwele ratta mayamunnaa ni asirokoraa (Uwehe iparaagarafu 10-12) *
10. Isiyani ninlamuliyeehu upanka wiira naacuwele ratta mayamunneehu ni asirokorihu?
10 Hiiva ninontakiha Yehova neekurumicaka ucuwelana. Utothe waacuwela ratta mayamunnaa ni asirokoraa. Uwuulumane cihinaaya wancera mikutthaano awula camalaka; waavarane nteko wuulalyeerani, waalattule wiira waalyane. Wapankaka iyo, weeva unaahala woonelela wiira ule nrokorihuule ummoonaa uhimuulumana ntthu, khweeliini khanle ntthu oomaala paahi; ule munnoole weeva ummoonaa unciva mihakhu, khweeliini khanle munna oowaakhelela aletto wapuwani wawe; awula ule nrokorihuule nowaaka umikutthaanoni naasaanaawe nacerewale, naavilela ulupatthiya uwannyawe. (Jó 6:29) Ninaacuwela wiira khaninlamuliya ‘wiikelakeliha myaha caakhwiihu.’ (1 Tim. 5:13) Hataa ukhalaka commo, unaareera ucuwela vakaani makhalelo o mayamunneehu ni citthu cinaakhumelela muukumini waya. Iyo inaahala unikavihera waacuwela ratta.
11. Nlattuni mahumu unlamuliyaaya waacuwela ratta mayamunnaaya ni asirokoraya?
11 Venci-venci mahumu anlamuliya waacuwela ratta mayamunnaaya ni asirokoraya anaawaceraaya. Woone ntakihero na Artur, aari mootoli osirikwiitu. Uyo wamoca ni humu nkhwaawe yahomootola nrokorihu mmoca oomaala cinene. Artur neera: “Nahoonelela wiira awannyawe uyo nrokorihuuyo yahokhwa cihinavira myaakha cinci yathelaneru. Hataa akhalaka ni marikariko, uyo ahokhitiri uwiitthuciha ikhweeli asaanaawe eeli ni ayo ananswalela Yehova. Masi nna va, uyo nrokorihuuyo hancera uhoona ratta ni nkhala ni masukhuli menci. Unookhalaru commo, uyo khanhiya umwaamini ni unfenta Yehova. Hiiva nahoona wiira yahaavo mananna menci ontakiha uyo nrokorihuuyo.” (Afili. 2:3) Uyo mootoli osirikwiituuyo antakiha Yehova. Yehova nawaacuwela atthu anonswalela ni naacuwela marikariko anaakhumelela. (Nkw. 3:7) Mahumu yeekurumicaka waacuwela mayamunnaaya ni asirokoraya, anaahala ukhitiri waakavihera.
12. Kontha isiyani wahoreera nrokorihu neehaniya Yip Yee uncuwela ratta nrokorihu nkiina wanlokoni wawe?
12 Weeva atthunaka pooti wuupuwela wiira munna mmoca o wanlokoni nawuunyoonyiha. Masi wancuwelaka ratta uyo munnooyo, weeva unaahala unwehera ratta. Woone itthu inhimyaawe nrokonihu mmoca neehaniya Yip Yee, nkhala u Ásia. Uyo neera: “Haavo nrokorihu mmoca o wanlokoni waka wancivela ukhuwaca oolumacaka. Mi koopuwela wiira uyo aapanka imweeni. Masi nihuku nimoca kahonkhumana wuulalyeerani, ni uyo ahokihimyera wiira khalayi aanawaakaviheraka asithumwaane utumihaca ihopa upacari. Ukati waatumihaawe ihopa, uyo ahaana akhuwacaka cinene wiira awiihane makiliyenti.” Yip Yee heera-tho: “Mi kiheetthuca wiira kapheela waawehera saana mayamunnaaka ni asirokoraka, kihaana kipacaka waacuwela ratta.” Wiira nikhitiri waacuwela ratta mayamunneehu ni asirokorihu, ninlamuliya wiikurumica. Masi hataa ukhalaka commo, phataari utthara ikano yo mbiiblyani ineera wiira nihaana ‘nitaphulaka nrimeehu ratta-raatta.’ Wapankaka commo, weeva unaahala untakiha Yehova, ule naafenta “atthu okhapila cotheene.”—1 Tim. 2:3, 4; 2 Akor. 6:11-13.
UWOONELE UTHUNKU
13. Toko cinttonkaciyaaya nhina Uphattuwaca 19:15, 16, isiyani malayikha yaapankalyaaya ukati Loti waapicapicaawe, ni nlattuni?
13 Nkwaha mmoca, Loti ahopica weettela citthu caahimeriyaawe ni Yehova. Malayikha meeli yahomootola Loti ni yahomwiirela wiira uyo naamucyaawe akhume nsittatti yo Sotoma. Nlattuni? Ayo malayikhaayo yaheera: “Kontha nimpheela ukwanyulaca nna nipuronna.” (Upha. 19:12, 13) Masi waaseele, Loti naamucyaawe nanlelo yaari ahinakhuma waapuwani waya. Phimaana, malayikha yahonhimyeera-tho Loti itthu yaahala ukhumelela. Masi uyo “aanaapicapica.” Hiiva atthunaka pooti uhinwehera ratta Loti ni wuupuwela wiira uyo khaawacera itthu yaahimeriyaawe ni Yehova ni aari ntthu oohunya maaru. Masi Nluku khaamoocaale Loti. “Yehova ahomoonela uthunku,” phimaana ale malayikhaale yahonvara moono Loti naamucyaawe ni yahaakumihera vate isittatti.—Usome Uphattuwaca 19:15, 16. *
14. Nlattuni Yehova waamoonenlyaawe uthunku Loti?
14 Yehova ahaana isariya yoomoonela uthunku Loti. Pooti ukhala wiira Loti aanaawoova atthu yaari vate isittatti, phimaana waapicapicaawe ukhuma wapuwani wawe. Ciicammo cihaavo citthu cikhwaawe caamoopiha Loti. Loti atthunaka aanaacuwela wiira ncoko waattamenle u Sotoma, mamwene meeli yahopaca umorela mmalikittini oocara alikatarawu. (Upha. 14:8-12) Ni ukhala wiira aari nlopwana aathenle ni ahaana asaana, Loti atthunaka aari ni masukhuli wiira aakhikicere amucyaawe. Uhiya iyo, Loti aari thaciri ni atthunaka ahaana inupa yomaana u Sotoma. (Upha. 13:5, 6) Khunakhala wiira nlattu wo nnyo citthunnyo Loti ahaana isariya yoopicapica umwiiwelela Yehova. Hata wakhalaka commo, Yehova khaaweheehale ukosa wa Loti. Uhiya commo, uyo anwehenre Loti ukhala “nlopwana nasariya.”—2 Pet. 2:7, 8.
Naaviriyanaka akhwiihu, ninaahala ukhitiri woona mananna owaathoonyera uthunku (Uwehe iparaagarafu 15-16) *
15. Uhiya umuuluma pusya ntthu, isiyani ninlamuliyeehu upanka?
15 Uhiya umuuluma pusya ntthu nlattu wo citthu cimpankaawe, wiikurumice uncuwela ratta. Iyo phi itthu yaapankalyaawe nrokorihu mmoca nkhala u Europa neehaniya Veronica. Uyo neera: “Nrokorihu mmoca o wanlokoni aakhala ooriipiya nrima ukati wotheene. Uyo khaapheela ukhala naakhwaawe ni aakhala uwiicukuleliha. Ukati nkhwaawe, waanaakoopiha urwaa unsalaamiha. Masi mi kahoopuwela co: ‘Kinari mi, kaanaahala umpheela mpatthani.’ Phimaana, kaholakela unkoha mananna ciicoonaawe. Vano uyo ahancera ukihimyacera citthu caamwiira wanrimani wawe! Ilelo, mi kinanwehera saana uyo nrokorihuuyo.”
16. Nlattuni ninlamuliyeehu ulompa wiira naawehere ratta akhwiihu?
16 Yehova veekha phinnicuwela saana. (Miru. 15:11) Phimaana, unlepele wiira ookavihere waawehera akhwaa toko uyo cinaaweheraawe. Unlepele Yehova wiira ookavihere ucuwela mananna oowoonela uthunku akhwaa. Ulompa wahonkavihera nrokorihu mmoca neehaniya Angela waawehera ratta mayamunna. Angela kheewanana ratta ni nrokorihu nkhwaawe o wanlokoni wawe. Angela naattonka: “Khawaahala ukirika umuuluma pusya uyo nrokorihuuyo ni uhinwacera. Masi mi kahonlompa Yehova ni kahonlepela wiira akikavihere unwehera ratta uyo nrokorakooyo.” Niireke ulompa wahonkavihera? Uyo neera: “Nahorwaa wuulalyeerani nkhayi ni nahokhala ukati mwinci noopaka mwaha. Mi kahonviriyana kooniheraka uthunku. Ilelo, mi kinanfenta cinene ni kiholakela unkavihera.”
17. Isiyani ninlamuliyeehu ulakela upanka?
17 Weeva khunlamuliya unthala munna awula nrokoraa o wanlokoni oohala umoonela uthunku. Otheene caya anawaakhumelela masakha toko yankhumelenle Jó, Eliyasi, Hakari ni Loti. Masakha makhwaawe yaakhumelenle, ayo yaanowiiwaanela asineennyaaya. Ni uhimya ikhweeli, otheene cihu ciicammo uhaavo ukati waahuvaleehu nlattu wo masakha yeewaanenleehu. Phimaana, Yehova haana isariya yoonilepela wiira niwacerane. (1 Pet. 3:8) Namwiiwelelaka Yehova, ninaalipihaca umuciihu wo ntuninyani motheene wiira niiwanane, hataa nikhalaka atthu okhapila coovirikanaca. Phimaana, ukati wowaawacera mayamunaa ni asirokoraa, ulakele waaviriyana, waacuwela ni uwoonela uthunku.
NCIPO 87 As Reuniões Encorajam-nos
^ par. 5 Ukhala wiira naatthu oopahuwa, hiiva ninawaakuvaka uwuuluma pusya akhunanihu ni uhiwehera ratta citthu cimpankaaya. Masi Yehova “naacuwela khula ntthu irinaawe wanrimani.” (1 Sam. 16:7) Ula mwahoola unaahala uthoonyera mananna Yehova cithoonyenryaawe ukhala nanifento ukati wonwacera Jonas, Eliyasi, Hakari ni Loti. Ciicammo ninaahala wiitthuca mananna ninlamuliyeehu untakiha Yehova ukati wowaawacera mayamunneehu ni asirokorihu.
^ par. 5 Jonas 2:1 Vano, Jonas nari mmirimani wohopa, ahonlompa Yehova Nlukwaawe, 2 eeraka: “Mmasakhani waka, kihonkhuwela Yehova ni uyo hokaakhula. Mmahiyeni kihokhuwela kilepelaka ukaviheriya. Ni weeva uheewa ncu naka. 9 Masi mi, kinaahala wuuvaha itthuvo kithoonyeraka wiira kinawuusukhuru. Itthu yuukhuluvelihalyaaka, kinaahala upanka. Woopwa unkhuma wa Yehova.”
^ par. 8 Uphattuwaca 16:7 Wahoolo, nlayikha na Yehova nahomphwanya nari waluusi muuthakoni, iluusi yaari munttalani wo Suri. 8 Ni nno nlayikhanno nahonkoha: “Hakari ipottha ya Sarayi, unkhuma vayi ni unrwaa vayi?” Uyo ahaakhula: “Kinontthawa Sarayi, pwiyaaka.” 9 Vano nlayikha na Yehova nahomwiirela: “Uturuwele waapwiiyaa ni urwee waahisime.” 10 Nlayikha na Yehova nahomwiirela-tho: “Kinaahala winciviha uculwaa, ni unaahala winciva cinene, mpaka khaavo nohala ukhitiri waalikela.” 11 Nlayikha na Yehova naheera-tho: “Wiiwe, uhorupala irukulu ni unaahala unnyara mwaana. Ni unvahe ncina na Sumayili, kontha Yehova heewa masukhulyaa. 12 Uyo nohala ukhala khampa puuru ontakhwani. Ntata nawe ninaahala waawanana atthu otheene, ni matata aatthu otheene anaahala unwanana; ni uyo nohala ukhala uhoolo waasuulupalyaawe otheene.” 13 Uyo aholompela ncina na Yehova, aamulumanne, ni aheera: “Weeva ukhanle Nluku owoona”, kontha uyo aheera: “Kiireke wiira khweeliini kihomoona ule nokoona?”
^ par. 13 Uphattuwaca 19:15 Waaseele waya, malayikha yahancera unkhanyereriha Loti, yamwiirelaka: “Waakuve! Waakuse amwaaraa ni asaanaa ooyeeli, wiira nhikhwaace ukati unhalaaya uttarusiya ila isittattiila nlattu woottheka waya.” 16 Ukhala wiira uyo aanaapicapica, alopwanaale yahonvara moono Loti, amwaarawe ni asaanaawe eeli; ni ayo yahaakumiha nne nipuronne ni yahaahiya vate isittatti, kontha Yehova ahomoonela uthunku.
^ par. 56 ILATARATO: Munna mmoca naanyoonyihiya ni munna mmirawo cerewale umikutthaanoni. Masi wahoolo, uyo nawoonelela wiira uyo munnooyo cerewale umikutthaanoni kontha nowaapanka asitente ukati waawaawe umikutthaanoni.
^ par. 58 ILATARATO: Nhooleli okhurupu yo wuulalyeerani nawoona wiira nrokorihu mmoca ri ooriipiya nrima. Wahoolo, uyo nawoonelela wiira uyo nrokorihuuyo aanoomala paahi ni aari niihaaya nlattu wookhala naatthu yahaacuwelaawe.
^ par. 60 ILATARATO: Nrokorihu nancuwela nrokorihu nkiina Usalau yo Umwene. Wuupaceroni, nrokorihu oopacerooyo noopuwela wiira nrokorihu nkiinooyo khanle ntthu ooviruwaca ni oohaawacera akhwaawe. Masi ukati unkhalaaya nkhayi yoopaka mwaha, uyo nawoonelela wiira kahi phiryaawe commo.
